नवी दिल्ली, 4 ऑगस्ट 2025

रेप्को बँकेने 2024-25 या आर्थिक वर्षासाठी 22.90 कोटी रुपये लाभांशाचा धनादेश केंद्रीय गृह आणि सहकार मंत्री अमित शाह यांच्याकडे नवी दिल्ली येथे सुपूर्द केला. यावेळी अमित शाह यांनी बँकेच्या चमूचे  140 कोटी रुपयांचा विक्रमी नफा कमावल्याबद्दल अभिनंदन केले. हा बँकेच्या इतिहासातील सर्वात मोठा नफा आहे.

अमित शाह यांनी एक्सवर पोस्ट करत सांगितले की, “गृह मंत्रालयाच्या अखत्यारीतील रेप्को बँकेने कार्यक्षमतेचा, समर्पणाचा आणि व्यावसायिकतेचा आदर्श निर्माण केला असून, तो संपूर्ण सहकार क्षेत्रासाठी प्रेरणादायी ठरेल. त्यांच्या भावी वाटचालीसाठी माझ्या शुभेच्छा.”

हा धनादेश रेप्को बँकेचे अध्यक्ष ई. संथानम, रेप्को बँक संचालक व रेप्को होम फायनान्स लिमिटेडचे अध्यक्ष सी. थंगराजू आणि व्यवस्थापकीय संचालक ओ.एम. गोकुल यांच्या हस्ते सादर करण्यात आला. यावेळी केंद्रीय गृह सचिव गोविंद मोहन आणि सीमा व्यवस्थापन विभागाचे सचिव डॉ. राजेंद्र कुमार उपस्थित होते.

रेप्को बँकेने 2024-25 या आर्थिक वर्षात 140 कोटी रुपयांचा निव्वळ नफा कमावला असून 30% लाभांश वितरित केला आहे, जो सहकारी संस्थेच्या इतिहासातील सर्वाधिक आहे. रेप्को बँक ही भारत सरकारच्या मालकीची संस्था असून भारत सरकारचा  या बँकेत 50.08% हिस्सा  आहे. बँक गृह मंत्रालयाच्या प्रशासकीय नियंत्रणाखाली कार्य करते. ही संस्था सलग तीन दशकांपासून नफा कमावत आहे आणि दरवर्षी लाभांश जाहीर करत आहे.

Heartiest congratulations to Team Repco Bank for posting a profit of ₹140 crore in the financial year 2024-25, which is the highest in the history of the cooperative society. The bank under the jurisdiction of the MHA has set an example of efficiency, dedication, and… pic.twitter.com/n3axkuYHrQ

— Amit Shah (@AmitShah) August 4, 2025

निलीमा चितळे/गजेंद्र देवडा/प्रिती मालंडकर

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai