വാര്‍ത്താവിനിമയ, വിവരസാങ്കേതികവിദ്യാ മന്ത്രാലയം
സ്വാതന്ത്ര്യദിനാഘോഷത്തിൻ്റെ ഭാഗമായി, ഒരു മാസത്തെ സൗജന്യ 4G സേവനങ്ങൾ ലഭ്യമാക്കുന്ന 'ഫ്രീഡം പ്ലാൻ' പുറത്തിറക്കി ബി‌എസ്‌എൻ‌എൽ
Posted On:
01 AUG 2025 6:12PM by PIB Thiruvananthpuram
ഇന്ത്യയുടെ ഗവൺമെന്റ് ഉടമസ്ഥതയിലുള്ള വിശ്വസ്ത ടെലികോം ഭീമനായ ഭാരത് സഞ്ചാർ നിഗം ലിമിറ്റഡ് (ബി‌എസ്‌എൻ‌എൽ), ഉപഭോക്താക്കൾ ഏറെ കാത്തിരുന്ന 'ഫ്രീഡം പ്ലാൻ' ഇന്ന് പുറത്തിറക്കി. ഒരു മാസം മുഴുവൻ ബി‌എസ്‌എൻ‌എൽ 4G മൊബൈൽ സേവനങ്ങൾ പരീക്ഷിക്കാൻ ഉപയോക്താക്കൾക്ക് അവസരം നൽകുന്ന ഒരു പരിമിത കാല ഓഫറാണിത്. രാജ്യത്തിന്റെ സ്വാതന്ത്ര്യദിനവുമായി ബന്ധപ്പെട്ട് ബിഎസ്എൻഎല്ലിന്റെ ആഘോഷത്തിൻറെ തുടക്കം കുറിക്കുന്ന ഈ സംരംഭം, ഇന്ത്യ തദ്ദേശീയമായി വികസിപ്പിച്ചെടുത്ത 4G സാങ്കേതികവിദ്യ സൗജന്യമായി പ്രയോജനപ്പെടുത്താൻ പൗരന്മാർക്ക് അവസരം നൽകുന്നു.
പ്ലാനിൽ ഉൾപ്പെടുന്നത്:
അൺലിമിറ്റഡ് വോയ്‌സ് കോളുകൾ (ലോക്കൽ/എസ്ടിഡി)
പ്രതിദിനം 2 ജിബി ഹൈ-സ്പീഡ് ഡാറ്റ
പ്രതിദിനം 100 എസ്എംഎസ്
തികച്ചും സൗജന്യമായി ഒരു ബി‌എസ്‌എൻ‌എൽ സിം
“ആത്മനിർഭർ ഭാരത്’ ദൗത്യത്തിന് കീഴിൽ ബി‌എസ്‌എൻ‌എൽ തദ്ദേശീയമായി രൂപകൽപ്പന ചെയ്ത് വികസിപ്പിച്ച് നടപ്പിലാക്കിയ 4ജി സാങ്കേതികവിദ്യയിലൂടെ, സ്വന്തമായി ടെലികോം സംവിധാനം നിർമ്മിച്ച ഏതാനും രാജ്യങ്ങളുടെ പട്ടികയിൽ ഇന്ത്യയെ ഉൾപ്പെടുത്താനായതിൽ ഞങ്ങൾ അഭിമാനിക്കുന്നു. ഞങ്ങളുടെ ‘ഫ്രീഡം പ്ലാൻ’ ഓരോ ഇന്ത്യക്കാരനും 30 ദിവസത്തേക്ക് ഈ തദ്ദേശീയ നെറ്റ്‌വർക്ക് സൗജന്യമായി പരീക്ഷിക്കാനും പ്രയോജനപ്പെടുത്താനും അവസരം നൽകുന്നു. ബി‌എസ്‌എൻ‌എൽ നൽകുന്ന വ്യത്യാസം ഉപഭോക്താക്കൾക്ക് അനുഭവിക്കാനാകുമെന്ന് ഞങ്ങൾക്ക് ഉറപ്പുണ്ട്.” -ഓഫർ പ്രഖ്യാപിച്ചുകൊണ്ട് ബി‌എസ്‌എൻ‌എൽ സി‌എം‌ഡി ശ്രീ എ. റോബർട്ട് ജെ.രവി പറഞ്ഞു.
മെയ്ക്ക്-ഇൻ-ഇന്ത്യ സാങ്കേതികവിദ്യ ഉപയോഗിച്ച് ബി‌എസ്‌എൻ‌എൽ രാജ്യത്തുടനീളം 100,000 4ജി കേന്ദ്രങ്ങൾ ലഭ്യമാക്കുമെന്നും സുരക്ഷിതവും ഉയർന്ന നിലവാരമുള്ളതും താങ്ങാനാവുന്ന ചെലവിലുമുള്ള മൊബൈൽ കണക്റ്റിവിറ്റി ഉപയോഗിച്ച് ഡിജിറ്റൽ ഇന്ത്യയെ ശാക്തീകരിക്കുന്നതിനുള്ള ഒരു പ്രധാന നാഴികക്കല്ലാണ് ഈ സംരംഭം എന്നും അദ്ദേഹം കൂട്ടിച്ചേർത്തു.
ഫ്രീഡം പ്ലാൻ ലഭിക്കുന്നതിന് പൗരന്മാർക്ക്, സമീപത്തുള്ള ബി‌എസ്‌എൻ‌എൽ കസ്റ്റമർ സർവീസ് സെന്റർ, റീട്ടെയിലർ കേന്ദ്രം എന്നിവ സന്ദർശിക്കുകയോ 1800-180-1503 എന്ന ടോൾ ഫ്രീ നമ്പറിൽ വിളിക്കുകയോ ചെയ്യാം.
“ബിഎസ്എൻഎല്ലിന്റെ ഇന്ത്യൻ നിർമ്മിത 4Gയിലൂടെ സ്വാതന്ത്ര്യദിനം ആഘോഷിക്കൂ”
****
(Release ID: 2151611)