صدرِ جمہوریۂ ہند محترمہ دروپدی مرمو نے آج (30 جولائی 2025) ایمس، کلیانی کی پہلی کانووکیشن یعنی جلسۂ تقسیمِ اسناد کی تقریب میں شرکت کی۔

صدرِ جمہوریہ نے اس موقع پر خطاب کرتے ہوئے کہا کہ اپنی سماجی ذمہ داریوں سے بخوبی واقف ڈاکٹروں نےقوم کی ترقی میں اہم کردار ادا کیا ہے۔ آزادی کے وقت اوسط متوقع عمر صرف 32 سال تھی جو اب بڑھ کر تقریباً 70 سال ہو گئی ہے۔ گزشتہ چند برسوں میں ٹیکہ کاری یعنی ویکسی نیشن کے شعبے میں غیرمعمولی ترقی ہوئی ہے۔ کئی بیماریوں کا مکمل خاتمہ ہو چکا ہے۔ مثال کے طور پر، گزشتہ سال بھارت کو ٹریکوما سے پاک قرار دیا گیا۔ تاہم اب بھی کئی چیلنجز باقی ہیں، جن میں نوجوان ڈاکٹر فیصلہ کن کردار ادا کریں گے۔ ذیابیطس، دل کی بیماریاں اور موٹاپے جیسے صحت کے مسائل پر قابو پانے میں ڈاکٹروں کا کردار حکومت اور دیگر متعلقہ فریقوں سے کہیں زیادہ اہم ہے۔

صدرِ جمہوریہ نے فارغ التحصیل ہونے والے طلبہ سے خطاب کرتے ہوئے کہا کہ ایمس، کلیانی کے پہلے بیچ کے طور پر وہ اس ادارے کے سینئر ترین سابق طلبہ ہیں۔ اس ادارے کی شناخت بنانے میں ان کا ایک اہم کردار ہوگا۔ اس لحاظ سے وہ ایمس کلیانی کے مستقبل کے معمار بھی ہیں۔

صدرِ جمہوریہ نے طبی سائنس کے شعبے میں روز بروز ہونے والی نئی تبدیلیوں کو اجاگر کرتے ہوئے طلبہ کو نصیحت کی کہ وہ تمام عمر سیکھنے والے بنے رہیں اور نئی تحقیق و طبی طریقۂ کار سے خود کو ہمہ وقت باخبر رکھیں۔

صدرِ جمہوریہ نے نوٹ کیا کہ کلیانی کے منصوبہ بند شہر کی بنیاد ڈاکٹر بیدھن چندر رائے نے رکھی تھی۔ انہوں نے کہا کہ بطور وزیر اعلیٰ اپنی طویل مدتِ خدمات کے دوران بھی ڈاکٹر بی۔سی۔ رائے نے مریضوں کو بلا معاوضہ علاج فراہم کرنا جاری رکھا۔ انہوں نے ایمس، کلیانی کے طلبہ، اساتذہ اور انتظامیہ سے کہا کہ وہ عہد کریں کہ ایمس، کلیانی کو ایک قومی فخر کا ادارہ بنائیں گے۔ ساتھ ہی انہوں نے انہیں ڈاکٹر بی۔سی۔ رائے کی مثال پر عمل کرنے کی نصیحت کی کہ وہ غریب اور محروم طبقات کو مفت طبی خدمات فراہم کریں۔

صدرِ جمہوریہ نے ڈاکٹروں سے کہا کہ وہ ایسا طرزِ زندگی اپنائیں جو عام لوگوں کے لیے مثال بن سکے۔ انہوں نے کہا کہ جینیاتی اثرات ایک الگ بات ہیں، مگر زیادہ تر صحت کے مسائل مناسب خوراک اور طرزِ زندگی کی مدد سے بڑی حد تک روکے یا حل کیے جا سکتے ہیں۔ ادویات کے علاوہ، انہیں علاج کے لیے آنے والے لوگوں کو طرزِ زندگی سے متعلق مشورے بھی دینے چاہئیں۔ جب کوئی ڈاکٹر کوئی مشورہ دیتا ہے تو اس کا لوگوں پر زیادہ اثر ہوتا ہے اور جب ڈاکٹر خود ایک مثالی طرزِ زندگی پیش کرتا ہے تو اس کا اثر اور بھی زیادہ ہوتا ہے۔

صدر کے خطاب کو دیکھنے کے لیے براہِ کرم یہاں کلک کریں۔

************

ش ح ۔ م م ۔ ص ج

Urdu Release No-3614