ਰਾਸ਼ਟਰੀ ਡੋਪਿੰਗ ਵਿਰੋਧੀ ਏਜੰਸੀ (ਨਾਡਾ) ਭਾਰਤ ਨੇ ਯੁਵਾ ਮਾਮਲੇ ਅਤੇ ਖੇਡ ਮੰਤਰਾਲੇ ਦੇ ਸਹਿਯੋਗ ਨਾਲ 21 ਤੋਂ 25 ਜੁਲਾਈ 2025 ਤੱਕ ਨਵੀਂ ਦਿੱਲੀ ਵਿੱਚ ਵਿਸ਼ਵ ਡੋਪਿੰਗ ਰੋਧੀ ਏਜੰਸੀ (ਵਾਡਾ) ਖੁਫੀਆ ਅਤੇ ਜਾਂਚ (ਆਈਐਂਡਆਈ) ਵਰਕਸ਼ਾਪ ਦੇ ਦੂਜੇ ਐਡੀਸ਼ਨ ਦੀ ਮੇਜ਼ਬਾਨੀ ਕੀਤੀ। ਵਾਡਾ ਦੀ ਸਰਪ੍ਰਸਤੀ ਹੇਠ ਅਤੇ ਇੰਟਰਪੋਲ ਅਤੇ ਸਪੋਰਟ ਇੰਟੈਗਰਿਟੀ ਆਸਟ੍ਰੇਲੀਆ ਦੇ ਸਹਿਯੋਗ ਨਾਲ ਆਯੋਜਿਤ ਇਸ ਵਰਕਸ਼ਾਪ ਵਿੱਚ ਭਾਰਤ, ਮਲੇਸ਼ੀਆ, ਕੰਬੋਡੀਆ, ਵੀਅਤਨਾਮ, ਨੇਪਾਲ, ਮਿਆਂਮਾਰ, ਭੂਟਾਨ, ਬੰਗਲਾਦੇਸ਼, ਬਰੂਨੇਈ ਦਾਰੂਸਲਮ ਅਤੇ ਫਿਲੀਪੀਨਜ਼ ਦੇ ਰਾਸ਼ਟਰੀ ਡੋਪਿੰਗ ਰੋਧੀ ਅਦਾਰਿਆਂ (NADOs) ਅਤੇ ਕਾਨੂੰਨ ਲਾਗੂ ਕਰਨ ਵਾਲੀਆਂ ਏਜੰਸੀਆਂ ਦੇ ਪ੍ਰਤੀਨਿਧੀਆਂ ਨੇ ਹਿੱਸਾ ਲਿਆ। ਇਸ ਵਰਕਸ਼ਾਪ ਵਿੱਚ ਜਾਣਕਾਰੀ ਸਾਂਝੀ ਕਰਨ, ਸਹਿਯੋਗ ਵਧਾਉਣ ਅਤੇ ਵਿਸ਼ਵਵਿਆਪੀ ਡੋਪਿੰਗ ਰੋਧੀ ਢਾਂਚੇ ਨੂੰ ਮਜ਼ਬੂਤ ਕਰਨ ਲਈ ਦੁਨੀਆ ਦੇ ਪ੍ਰਮੁੱਖ ਖੁਫੀਆ ਅਤੇ ਜਾਂਚ ਮਾਹਿਰ ਇਕੱਠੇ ਹੋਏ।

ਪੰਜ ਦਿਨਾਂ ਦੀ ਵਰਕਸ਼ਾਪ ਦੌਰਾਨ, ਭਾਗੀਦਾਰਾਂ ਨੇ ਖੁਫੀਆ ਕਾਰਵਾਈਆਂ, ਜਾਂਚ ਵਿਧੀਆਂ, ਗੁਪਤ ਸਰੋਤਾਂ ਦੀ ਵਿਵਸਥਾ, ਖੁੱਲ੍ਹੇ ਸਰੋਤਾਂ ਤੋਂ ਖੁਫੀਆ ਜਾਣਕਾਰੀ ਇਕੱਠੀ ਕਰਨ, ਪ੍ਰਭਾਵਸ਼ਾਲੀ ਵਿਸ਼ਲੇਸ਼ਣ ਅਤੇ ਇੰਟਰਵਿਊ ਤਕਨੀਕਾਂ ਵਰਗੇ ਮੁੱਖ ਖੇਤਰਾਂ 'ਤੇ ਡੂੰਘਾਈ ਨਾਲ ਸੈਸ਼ਨਾਂ ਵਿੱਚ ਹਿੱਸਾ ਲਿਆ। ਵਿਚਾਰ-ਵਟਾਂਦਰੇ ਵਿੱਚ ਐਥਲੀਟਾਂ ਦੀ ਸੁਰੱਖਿਆ ਅਤੇ ਨਿਰਪੱਖ ਅਤੇ ਸਾਫ਼ ਮੁਕਾਬਲੇ ਦੇ ਪੱਧਰ ਨੂੰ ਬਣਾਏ ਰੱਖਣ ਲਈ ਖੁਫੀਆ ਜਾਣਕਾਰੀ-ਅਧਾਰਤ, ਸਹਿਯੋਗੀ ਯਤਨਾਂ ਦੀ ਵੱਧ ਰਹੀ ਲੋੜ 'ਤੇ ਧਿਆਨ ਕੇਂਦ੍ਰਿਤ ਕੀਤਾ ਗਿਆ।

ਭਾਰਤ ਸਰਕਾਰ ਦੇ ਯੁਵਾ ਮਾਮਲੇ ਅਤੇ ਖੇਡ ਮੰਤਰਾਲੇ ਦੇ ਸਕੱਤਰ ਸ਼੍ਰੀ ਹਰੀ ਰੰਜਨ ਰਾਓ ਨੇ ਸਹਿਯੋਗੀ ਯਤਨਾਂ ਦੀ ਸ਼ਲਾਘਾ ਕੀਤੀ ਅਤੇ ਕਿਹਾ, "ਅਸੀਂ ਇੰਟਰਪੋਲ ਅਤੇ ਸਪੋਰਟ ਇੰਟੈਗ੍ਰਿਟੀ ਆਸਟ੍ਰੇਲੀਆ ਦੇ ਸਹਿਯੋਗ ਨਾਲ ਵਾਡਾ ਵੱਲੋਂ ਕੀਤੀ ਗਈ ਇਸ ਪਹਿਲਕਦਮੀ ਦੀ ਸ਼ਲਾਘਾ ਕਰਦੇ ਹਾਂ। ਉਨ੍ਹਾਂ ਦੀ ਮੁਹਾਰਤ ਅਤੇ ਵਚਨਬੱਧਤਾ ਖੇਡਾਂ ਨੂੰ ਸਾਫ਼ ਰੱਖਣ ਦੇ ਇਸ ਵਿਸ਼ਵਵਿਆਪੀ ਯਤਨ ਨੂੰ ਮਜ਼ਬੂਤ ਕਰ ਰਹੀ ਹੈ। ਭਾਰਤ ਨੂੰ ਇਸ ਮਹੱਤਵਪੂਰਨ ਪਹਿਲਕਦਮੀ ਦੀ ਮੇਜ਼ਬਾਨੀ ਕਰਨ 'ਤੇ ਮਾਣ ਹੈ। ਇਹ ਡੋਪਿੰਗ ਰੋਧੀ ਭਾਈਚਾਰੇ ਵਿੱਚ ਮਜ਼ਬੂਤ ਖੁਫੀਆ ਜਾਣਕਾਰੀ ਅਤੇ ਜਾਂਚ ਸਮਰੱਥਾਵਾਂ ਵਿਕਸਤ ਕਰਨ ਦੇ ਸਾਡੇ ਸਾਂਝੇ ਇਰਾਦੇ ਨੂੰ ਦਰਸਾਉਂਦਾ ਹੈ।"

ਨਾਡਾ, ਇੰਡੀਆ ਦੇ ਡਾਇਰੈਕਟਰ ਜਨਰਲ, ਸ਼੍ਰੀ ਅਨੰਤ ਕੁਮਾਰ ਨੇ ਕਿਹਾ, "ਇਸ ਸਾਲ ਮਈ ਵਿੱਚ ਪਹਿਲੀ ਵਰਕਸ਼ਾਪ ਦੇ ਸਫਲ ਆਯੋਜਨ ਤੋਂ ਬਾਅਦ, ਦਸ ਦੱਖਣੀ ਏਸ਼ੀਆਈ ਦੇਸ਼ਾਂ ਦੇ ਪ੍ਰਤੀਨਿਧੀਆਂ ਨਾਲ ਇਹ ਦੂਜੀ ਵਰਕਸ਼ਾਪ  ਵਾਡਾ ਦੀ ਗਲੋਬਲ ਐਂਟੀ-ਡੋਪਿੰਗ ਇੰਟੈਲੀਜੈਂਸ ਐਂਡ ਇਨਵੈਸਟੀਗੇਸ਼ਨ ਨੈੱਟਵਰਕ (GAIIN) ਨੂੰ ਹੋਰ ਮਜ਼ਬੂਤ ਕਰਨ ਲਈ ਆਪਣੀ ਜਾਣਕਾਰੀ ਅਤੇ ਸੰਚਾਰ ਸਮਰੱਥਾ ਅਤੇ ਸਮਰੱਥਾ ਨੂੰ ਵਧਾਉਣ ਦੀ ਯੋਜਨਾ ਵਿੱਚ ਇੱਕ ਹੋਰ ਮਹੱਤਵਪੂਰਨ ਮੀਲ ਪੱਥਰ ਹੈ।"

ਵਾਡਾ ਦੇ ਖੁਫੀਆ ਅਤੇ ਜਾਂਚ ਨਿਰਦੇਸ਼ਕ, ਗੁੰਟਰ ਯੰਗਰ ਨੇ ਕਿਹਾ, "ਵਾਡਾ ਏਸ਼ੀਆ ਅਤੇ ਓਸ਼ੇਨੀਆ ਵਿੱਚ ਖੁਫੀਆ ਅਤੇ ਜਾਂਚ ਸਮਰੱਥਾ ਨਿਰਮਾਣ ਯੋਜਨਾ ਦੀ ਚੌਥੀ ਵਰਕਸ਼ਾਪ ਲਈ ਭਾਰਤ ਵਾਪਸ ਆ ਕੇ ਖੁਸ਼ ਹੈ। ਮੈਂ ਨਾਡਾ ਇੰਡੀਆ ਅਤੇ ਭਾਰਤ ਦੇ ਯੁਵਾ ਮਾਮਲਿਆਂ ਅਤੇ ਖੇਡ ਮੰਤਰਾਲੇ ਦਾ ਪਿਛਲੇ ਕੁਝ ਮਹੀਨਿਆਂ ਤੋਂ ਇਨ੍ਹਾਂ ਮਹੱਤਵਪੂਰਨ ਵਰਕਸ਼ਾਪਾਂ ਦੇ ਆਯੋਜਨ ਅਤੇ ਮੇਜ਼ਬਾਨੀ ਵਿੱਚ ਨਿਰੰਤਰ ਕੰਮ ਕਰਨ ਲਈ ਧੰਨਵਾਦ ਕਰਨਾ ਚਾਹੁੰਦਾ ਹਾਂ।" ਭਾਗੀਦਾਰ ਵੀ ਖੁਸ਼ਕਿਸਮਤ ਹਨ ਕਿ ਉਨ੍ਹਾਂ ਨੂੰ ਸਾਡੇ ਭਾਈਵਾਲਾਂ ਜਿਵੇਂ ਕਿ ਇੰਟਰਪੋਲ ਅਤੇ ਸਪੋਰਟ ਇੰਟੈਗਰਿਟੀ ਆਸਟ੍ਰੇਲੀਆ ਤੋਂ ਸਿੱਖਣ ਦਾ ਮੌਕਾ ਮਿਲਿਆ ਹੈ। ਭਾਰਤ ਵਿੱਚ ਆਯੋਜਿਤ ਵਰਕਸ਼ਾਪਾਂ ਖੁਫੀਆ ਜਾਣਕਾਰੀ ਅਤੇ ਜਾਂਚ ਮੁਹਾਰਤ ਨੂੰ ਬਣਾਈ ਰੱਖਣ ਅਤੇ ਏਸ਼ੀਆ ਅਤੇ ਓਸ਼ੇਨੀਆ ਖੇਤਰਾਂ ਵਿੱਚ ਨਾਡੋ(NADO) ਅਤੇ ਕਾਨੂੰਨ ਲਾਗੂ ਕਰਨ ਵਾਲੀਆਂ ਏਜੰਸੀਆਂ ਵਿਚਕਾਰ ਜਾਣਕਾਰੀ ਦਾ ਖੁੱਲ੍ਹਾ ਆਦਾਨ-ਪ੍ਰਦਾਨ ਯਕੀਨੀ ਬਣਾਉਣ ਵਿੱਚ ਮਹੱਤਵਪੂਰਨ ਭੂਮਿਕਾ ਨਿਭਾਉਣਗੀਆਂ। ਸਾਨੂੰ ਉਮੀਦ ਹੈ ਕਿ ਵਰਕਸ਼ਾਪਾਂ ਦਾ ਸਥਾਈ ਪ੍ਰਭਾਵ ਪਵੇਗਾ ਅਤੇ ਇਹ ਯਕੀਨੀ ਬਣਾਇਆ ਜਾਵੇਗਾ ਕਿ ਇੱਥੇ ਅਤੇ ਸਮੁੱਚੀ ਦੁਨੀਆ ਦੇ ਐਥਲੀਟ ਇੱਕ ਬਰਾਬਰ ਦੇ ਮੈਦਾਨ ਵਿੱਚ ਮੁਕਾਬਲਾ ਕਰ ਸਕਣ।"

ਇਹ ਵਰਕਸ਼ਾਪ ਕਾਬਲੀਅਤ ਅਤੇ ਸਮਰੱਥਾ ਨਿਰਮਾਣ ਯੋਜਨਾ ਦਾ ਇੱਕ ਮੁੱਖ ਹਿੱਸਾ ਸੀ, ਜੋ ਕਿ ਗਲੋਬਲ ਐਂਟੀ-ਡੋਪਿੰਗ ਇੰਟੈਲੀਜੈਂਸ ਐਂਡ ਇਨਵੈਸਟੀਗੇਸ਼ਨ ਨੈੱਟਵਰਕ (GAIIN) ਨੂੰ ਮਜ਼ਬੂਤ ਕਰਨ ਲਈ  ਵਾਡਾ ਦੀ ਮੁੱਖ ਪਹਿਲ ਹੈ। ਗਲੋਬਲ ਭਾਈਵਾਲੀ ਨੂੰ ਉਤਸ਼ਾਹਿਤ ਕਰਕੇ ਅਤੇ ਜਾਂਚ ਸਮਰੱਥਾ ਨੂੰ ਮਜ਼ਬੂਤ ਕਰਕੇ, ਪ੍ਰੋਜੈਕਟ ਦਾ ਉਦੇਸ਼ ਚੰਗੇ ਸਹਿਯੋਗ ਅਤੇ ਜਾਣਕਾਰੀ-ਸਾਂਝਾ ਕਰਨ ਰਾਹੀਂ ਡੋਪਿੰਗ ਪ੍ਰਤੀ ਵਿਸ਼ਵਵਿਆਪੀ ਪ੍ਰਤੀਕਿਰਿਆ ਨੂੰ ਉਤਸ਼ਾਹਿਤ ਕਰਨਾ ਹੈ। ਭਾਰਤ ਨੂੰ ਇਸ ਮਹੱਤਵਪੂਰਨ ਗਲੋਬਲ ਪਹਿਲਕਦਮੀ ਵਿੱਚ ਆਪਣਾ ਯੋਗਦਾਨ ਜਾਰੀ ਰੱਖਣ 'ਤੇ ਮਾਣ ਹੈ, ਜਿਸਦੀ ਅੰਤਿਮ ਵਰਕਸ਼ਾਪ ਅਪ੍ਰੈਲ 2026 ਵਿੱਚ ਆਯੋਜਿਤ ਕੀਤੀ ਜਾਵੇਗੀ।

**********

ਜੀਐਸ/ਐਸਐਸ