ন্যায়িক প্ৰক্ৰিয়া ক্ষিপ্ৰ কৰাৰ বাবে নতুন অপৰাধী আইনত কৰা বিধানসমূহৰ সবিশেষ তলত দিয়া ধৰণৰ:-

১. দ্ৰুত আৰু ন্যায্য সমাধান: নতুন আইনসমূহে গোচৰসমূহৰ দ্ৰুত আৰু ন্যায্য সমাধানৰ প্ৰতিশ্ৰুতি দিছে, আইনী ব্যৱস্থাৰ প্ৰতি আস্থা জগাই তুলিছে। তদন্ত আৰু বিচাৰৰ গুৰুত্বপূৰ্ণ পৰ্যায় যেনে - প্ৰাৰম্ভিক তদন্ত (১৪ দিনত সম্পূৰ্ণ হ’ব), অধিক তদন্ত (৯০ দিনৰ ভিতৰত সম্পূৰ্ণ হ’ব), ভুক্তভোগী আৰু অভিযুক্তক নথিপত্ৰ যোগান ধৰা (১৪ দিনৰ ভিতৰত), বিচাৰৰ বাবে গোচৰৰ প্ৰতিশ্ৰুতি (৯০ দিনৰ ভিতৰত), ডিচচাৰ্জ আবেদন দাখিল কৰা (৬০ দিনৰ ভিতৰত), অভিযোগৰ উপস্থাপন  (৬০ দিনৰ ভিতৰত), ৰায় ঘোষণা (৪৫ দিনৰ ভিতৰত) আৰু দয়া আবেদন দাখিল কৰা (ৰাজ্যপালৰ ওচৰত ৩০ দিন আৰু ৰাষ্ট্ৰপতিৰ ওচৰত  ৬০ দিনৰ আগতে) - সুশৃংখলিত কৰা হৈছে আৰু নিৰ্দিষ্ট সময়ৰ ভিতৰত সম্পূৰ্ণ কৰা হৈছে।

২. ফাৰ্ষ্ট ট্ৰেক তদন্ত: নতুন আইনসমূহে মহিলা আৰু শিশুৰ বিৰুদ্ধে হোৱা অপৰাধৰ তদন্তক অগ্ৰাধিকাৰ প্ৰদান কৰে, তথ্য লিপিবদ্ধ কৰাৰ দুমাহৰ ভিতৰত সময়মতে সম্পূৰ্ণ হোৱাটো নিশ্চিত কৰে।

৩.স্থগিতকৰণ: গোচৰৰ শুনানিত অপ্ৰয়োজনীয় বিলম্ব হোৱাৰ পৰা হাত সাৰিবলৈ সৰ্বাধিক দুটা স্থগিতকৰণৰ ব্যৱস্থা কৰা, সময়মতে ন্যায় প্ৰদান কৰাটো নিশ্চিত কৰা।

৪.ন্যায়িক প্ৰক্ৰিয়াৰ গতি, কাৰ্যক্ষমতা আৰু স্বচ্ছতা যথেষ্ট পৰিমাণে  উন্নত কৰিবলৈ ই-সাক্ষ্য, ই-চমন আৰু ন্যায়-শ্ৰুতি (ভিচি)ৰ দৰে ব্যৱস্থা গ্ৰহণ   কৰা হৈছে। ই-সাক্ষ্যই ডিজিটেল প্ৰমাণৰ বৈধতা, বৈজ্ঞানিক আৰু টেম্পাৰ-প্ৰুফ সংগ্ৰহ, সংৰক্ষণ আৰু ইলেক্ট্ৰনিকভাৱে দাখিল কৰিবলৈ সক্ষম কৰাৰ ফলত প্ৰামাণ্যতা নিশ্চিত হয় আৰু বিলম্ব হ্ৰাস পায়, ই-চমনে ইলেক্ট্ৰনিক মাধ্যমৰ জৰিয়তে চমন প্ৰদান কৰাৰ অনুমতি দিয়ে, যাৰ ফলত প্ৰক্ৰিয়াটো দ্ৰুত, সময়সীমাৰ ভিতৰত সম্পন্ন হোৱা  আৰু সহজে মানি চলিব পৰা ধৰণৰ কৰি তোলে। ন্যায়-শ্ৰুতি (ভিচি) ভিডিঅ’ কনফাৰেন্সিঙৰ জৰিয়তে অভিযুক্ত ব্যক্তি, সাক্ষী, আৰক্ষী বিষয়া, অভিযুক্ত, বৈজ্ঞানিক বিশেষজ্ঞ, বন্দী আদিৰ ভাৰ্চুৱেল উপস্থিতিৰ সুবিধা প্ৰদান কৰা হৈছে।

ধৰ্ষণৰ বলি হোৱা লোকৰ মৰ্যাদা ৰক্ষাৰ বাবে নতুন অপৰাধমূলক আইনসমূহত ৰখা বিধানসমূহৰ সবিশেষ তলত দিয়া হৈছে:

১.  ধৰ্ষণৰ বলি হোৱা মহিলাগৰাকীক অধিক সুৰক্ষা প্ৰদান কৰিবলৈ আৰু ধৰ্ষণৰ অপৰাধৰ সৈতে জড়িত তদন্তত স্বচ্ছতা বজাই ৰাখিবলৈ আৰক্ষীয়ে অডিঅ’- ভিডিঅ’ মাধ্যমৰ জৰিয়তে ভুক্তভোগীৰ বক্তব্য ৰেকৰ্ড কৰিব লাগিব।

২. মহিলাৰ বিৰুদ্ধে কিছুমান অপৰাধৰ ক্ষেত্ৰত  ভুক্তভোগীৰ বক্তব্য, যিমানদূৰ সম্ভৱ, মহিলা দণ্ডাধীশে আৰু তেওঁৰ অনুপস্থিতিত এগৰাকী মহিলাৰ উপস্থিতিত পুৰুষ দণ্ডাধীশে লিপিবদ্ধ কৰিব লাগিব যাতে সংবেদনশীলতা আৰু ন্যায়পৰায়ণতা নিশ্চিত কৰিব পৰা যায়।  ইয়াৰ  ফলত ভুক্তভোগীৰ বাবে সহায়ক পৰিৱেশৰ সৃষ্টি  হৈছে।

৩. ধৰ্ষণৰ বলি হোৱা এগৰাকীৰ চিকিৎসা প্ৰতিবেদন ৭ দিনৰ ভিতৰত তদন্তকাৰী বিষয়ালৈ প্ৰেৰণ কৰিবলৈ চিকিৎসক  বাধ্য।

৪. নতুন আইন অনুসৰি মহিলা আৰু শিশুৰ বিৰুদ্ধে  সংঘটিত অপৰাধৰ বলি হোৱা লোকসকলক সকলো চিকিৎসালয়তে বিনামূলীয়া প্ৰাথমিক চিকিৎসা বা আন চিকিৎসাৰ ব্যৱস্থা কৰা হৈছে। এই ব্যৱস্থাই প্ৰত্যাহ্বানমূলক সময়ত ভুক্তভোগীসকলৰ মংগল আৰু আৰোগ্যক অগ্ৰাধিকাৰ দি অত্যাৱশ্যকীয় চিকিৎসা সেৱাৰ তাৎক্ষণিক সুবিধা নিশ্চিত কৰিছে।

ভাৰতীয় ন্যায় সংহিতা, ২০২৩ত নাবালিকা ধৰ্ষণৰ অপৰাধৰ বাবে মৃত্যুদণ্ড পৰ্যন্ত কঠোৰ শাস্তি প্ৰদানৰ ব্যৱস্থা কৰা হৈছে। নাবালিকক  দলবদ্ধ ধৰ্ষণৰ অপৰাধত যাবজ্জীৱন  কাৰাদণ্ড বা মৃত্যুদণ্ডৰ শাস্তি বিহাৰ বিধান ৰখা হৈছে ।

 ৰাজ্যসভাত এক প্ৰশ্নৰ লিখিত উত্তৰত এই কথা উল্লেখ কৰে গৃহ মন্ত্ৰালয়ৰ ৰাজ্যিক মন্ত্ৰী শ্ৰীযুত বন্দি সঞ্জয় কুমাৰে।

***

RK/VV/HS/PS/PR/DM