نوجوانوں کے امور اور کھیلوں  کی وزارت نے ’ترقی یافتہ ہندوستان کے لیے منشیات سے مبرا  نوجوان‘ کے موضوع کے ساتھ وارانسی ، اتر پردیش میں ’نوجوانوں کی  روحانی سمٹ‘ کا آغاز کیا ہے ۔ سربراہ اجلاس میں  ملک بھر سے 122 روحانی اور سماجی و ثقافتی تنظیموں کی نمائندگی کرنے والے 600 سے زیادہ نوجوان شرکاء یکجا ہوئے ہیں ۔

اس تقریب سے خطاب کرتے ہوئے نوجوانوں کے امور اور کھیل اور محنت و روزگار کے مرکزی وزیر ڈاکٹر منسکھ منڈاویا نے کہا کہ 15 اگست 2022 کو لال قلعہ سے ہندوستان کے 76 ویں یوم آزادی کے خطاب کے دوران وزیر اعظم نریندر مودی نے امرت کال کے ’پنچ پرن‘ کے ذریعے اگلے 25 سالوں کے لیے اپنا وژن شیئر کیا تھا ۔  وزیر موصوف نے زور دے کر کہا کہ نوجوان 2047 تک ہندوستان کو ایک ترقی یافتہ ملک میں تبدیل کرنے میں اہم کردار ادا کریں گے ، کیونکہ 65 فیصد آبادی 35 سال سے کم عمر کی ہے ۔

ڈاکٹر منڈاویا نے اس وژن کو حاصل کرنے کے لیے ہندوستان کو منشیات سے مبرا  بنانے کی اہمیت پر زور دیا ۔  انہوں نے کہا کہ ہماری نوجوان نسل کو نہ صرف مستفید ہونے والوں کے طور پر دیکھا جانا چاہیے بلکہ ملک کے مستقبل کی تشکیل کی خاطر تبدیلی لانے والوں کے طور پر بھی دیکھا جانا چاہیے ۔  تاہم ، منشیات کا استعمال آج کے نوجوانوں کو درپیش سب سے بڑے خطرات میں سے ایک ہے ۔  نشے کی لت انہیں زندگی کے ایک اہم موڑ پر متاثر کر  رہی ہے اورملک کی  ترقی کے لیے ایک سنگین چیلنج پیدا کر رہی ہے ۔

انہوں نے مزید کہا کہ 2047 تک ہندوستان کو ترقی یافتہ بنانے کے لیے ہمیں اپنے نوجوانوں کو منشیات ، موبائل فون اور رِیل سے دور رکھنا چاہیے ۔

وزیر موصوف نے مذہبی اور سماجی قائدین پر زور دیا کہ وہ نشے سے دور رہنے کے بارے میں نوجوانوں میں بیداری پھیلانے کے لیے اپنے پلیٹ فارم استعمال کریں ۔  انہوں نے کہا کہ ایک کیمپ یا محدود کوششیں کافی نہیں ہیں-ہمیں ایک ایسی عوامی تحریک کی ضرورت ہے جس میں ہر شہری کم از کم پانچ دیگر افراد کو انسداد منشیات مہم میں شامل ہونے کی ترغیب دینے کا عہد کرے ۔

ڈاکٹر منڈاویا نے کہا کہ دو روزہ سربراہ اجلاس مفید  بات چیت اور بامعنی نتائج کا باعث بنے گا ۔  سمٹ کا اختتام 20 جولائی کو ’کاشی اعلامیہ‘ کے اجرا کے ساتھ ہوگا ، جو ایک دستاویز ہے جو نوجوانوں اور روحانی رہنماؤں کے اجتماعی وژن اور عزم کی عکاسی کرتا ہے ۔  یہ دستاویز منشیات سے مبرا ہندوستان کی تعمیر کے لیے ایک تفصیلی ایکشن پلان پیش کرے گا اور پالیسی سازوں ، سول سوسائٹی کی تنظیموں اور نشے سے نجات اور بحالی کے شعبوں میں کام کرنے والے نوجوانوں کے نیٹ ورکس کے لیے ایک رہنما چارٹر کے طور پر کام کرے گا۔

سمٹ میں کلیدی شعبوں پر مرکوز چار موضوعاتی اجلاس پیش کیے گئے ہیں: نشے اور نوجوانوں پر اس کے اثرات کو سمجھنا ؛ منشیات کی اسمگلنگ کے نیٹ ورک اور تجارتی مفادات کو توڑنا ؛ موثر مہمات اور آؤٹ ریچ حکمت عملی تیار کرنا ؛ اور 2047 تک منشیات سے  مبرا ہندوستان کے لیے ایک طویل مدتی عزم کی تشکیل  ۔  یہ اجلاس ماہرانہ بات چیت ، متعلقہ پینل مذاکروں  اور انٹرایکٹو وائٹ بورڈ پلیٹ فارم کے ذریعے منعقد کیے جا رہے ہیں ، اس بات کو یقینی بناتے ہوئے کہ ہر مندوب ایک جامع قومی حکمت عملی کی تشکیل میں سرگرم طور پر تعاون کرتا ہے۔

*****

ش ح-ا ع خ  ۔ر  ا

U-No- 2903