പരിസ്ഥിതി സുസ്ഥിരതയുടെ പ്രതിബദ്ധത എടുത്തുകാണിച്ച് 2023-24 സാമ്പത്തിക വർഷത്തെ രണ്ടാമത് 'സുസ്ഥിരതാ റിപ്പോർട്ട്' ദേശീയപാത അതോറിറ്റി പുറത്തിറക്കി. എല്ലാ പ്രവര്‍ത്തന തലങ്ങളിലും പാരിസ്ഥിതിക -  സാമൂഹ്യ -  ഭരണനിര്‍വഹണ തത്വങ്ങള്‍ (ഇഎസ്ജി)   സംയോജിപ്പിക്കുന്ന ദേശീയപാത അതോറിറ്റിയുടെ ശക്തമായ ചട്ടക്കൂട് സമഗ്ര റിപ്പോർട്ടില്‍ വിശദീകരിക്കുന്നു. ഇന്ത്യയുടെ ആഗോള പ്രതിബദ്ധതകളോട് ചേര്‍ന്നുനില്‍ക്കുന്ന ദേശീയപാത അതോറിറ്റിയുടെ സമീപനവും 'ലൈഫ് ദൗത്യ'ത്തിലൂടെയും  (പരിസ്ഥിതി സൗഹൃദ ജീവിതശൈലി)  പുനചംക്രമണ സമ്പദ്‌വ്യവസ്ഥയിലൂടെയും അവതരിപ്പിച്ച  പ്രധാനമന്ത്രി ശ്രീ നരേന്ദ്ര മോദിയുടെ സുസ്ഥിര ഭാവി ദർശനവും റിപ്പോര്‍ട്ട് എടുത്തുകാണിക്കുന്നു.  കേന്ദ്ര ഉപരിതല ഗതാഗത - ദേശീയപാത മന്ത്രി ശ്രീ നിതിൻ ഗഡ്കരിയാണ് ഈയിടെ റിപ്പോര്‍ട്ട് പുറത്തിറക്കിയത്. 

പരിസ്ഥിതി - ഊർജ സംരക്ഷണത്തിന് ദേശീയപാത അതോറിറ്റി നടത്തിയ വിവിധ ശ്രമങ്ങളുടെ ഫലപ്രാപ്തി 2023-24-ലെ  'സുസ്ഥിരതാ റിപ്പോർട്ട് പ്രത്യേകം പരാമര്‍ശിക്കുന്നു. റിപ്പോർട്ട് പ്രകാരം 2023-24 സാമ്പത്തിക വർഷം ദേശീയ പാത നിർമാണത്തിൽ 20% വർധനയുണ്ടായപ്പോഴും ഹരിതഗൃഹ വാതക (ജിഎച്ച്ജി) പുറന്തള്ളലിന്റെ തീവ്രത കിലോമീറ്ററിന് 1.0 മെട്രിക് ടണ്‍ കാര്‍ബണ്‍ ഡയോക്സൈഡിന് തുല്യമായ നിലയില്‍നിന്ന്  0.8  മെട്രിക് ടണ്ണായി വിജയകരമായി കുറയ്ക്കാന്‍ ദേശീയപാത അതോറിറ്റിയ്ക്ക് സാധിച്ചത്  നിർമാണരംഗത്തെ വളർച്ചയും കാര്‍ബണ്‍ ബഹിര്‍ഗമനവും തമ്മിലെ വ്യക്തമായ വേർതിരിവ്  പ്രകടമാക്കുന്നു. 

സുസ്ഥിരതയുടെ പ്രധാന സ്തംഭങ്ങളിലൊന്നായ പുനചംക്രമണ സമ്പദ്‌വ്യവസ്ഥ  പ്രോത്സാഹിപ്പിക്കാന്‍ ദേശീയപാത അതോറിറ്റി നടത്തുന്ന ശ്രമങ്ങളെയും റിപ്പോർട്ട് എടുത്തുകാണിക്കുന്നു. ചാരം, പ്ലാസ്റ്റിക് മാലിന്യങ്ങൾ, പുനഃസ്ഥാപിച്ച താര്‍ എന്നിവയടക്കം 631 ലക്ഷം മെട്രിക് ടണ്ണിലധികം പുനചംക്രമണ - പുനരുപയോഗ വസ്തുക്കൾ  2023-24 സാമ്പത്തിക വർഷം റോഡ് നിർമാണത്തിൽ ദേശീയപാത അതോറിറ്റി ഉപയോഗിച്ചു. ഇതിനുപുറമെ  രാജ്യവ്യാപകമായി ദേശീയ പാതകളിൽ വൃക്ഷത്തൈ നട്ടുപിടിപ്പിക്കുന്ന പ്രവർത്തനങ്ങളും ദേശീയപാത അതോറിറ്റി തുടർന്നു. 2023-24 സാമ്പത്തിക വർഷം   56 ലക്ഷത്തിലധികം തൈകളും  2024-25 ൽ 67.47 ലക്ഷം തൈകളും നട്ടുപിടിപ്പിച്ച ദേശീയപാത അതോറിറ്റി  2015-ലെ ഹരിത ദേശീയപാത നയം (നട്ടുപിടിപ്പിക്കല്‍, മാറ്റി നടല്‍, സൗന്ദര്യവൽക്കരണം, പരിപാലനം)  നടപ്പാക്കിയശേഷം ആകെ നട്ട  വൃക്ഷത്തൈകള്‍ 4.69 കോടി പിന്നിട്ടു. ഈ സംരംഭം ദേശീയപാതകളില്‍ ഗണ്യമായ കാർബൺ ആഗിരണത്തിനും  പാരിസ്ഥിതിക സുസ്ഥിരതയുടെ വികാസനത്തിനും വഴിയൊരുക്കി.  .

ദേശീയപാതകള്‍ക്ക് സമീപത്തെ ജലാശയ സംരക്ഷണവും പുനരുജ്ജീവനവും ദേശീയപാത അതോറിറ്റി ഏറ്റെടുത്തിട്ടുണ്ട്. അമൃത് സരോവർ ദൗത്യത്തിന് കീഴിൽ രാജ്യത്തുടനീളം 467 ജലാശയങ്ങളുടെ വികസനം ദേശീയപാത അതോറിറ്റി പൂർത്തീകരിച്ചു. ഈ സംരംഭം പ്രാദേശിക ജലസ്രോതസ്സുകളെ പുനരുജ്ജീവിപ്പിച്ചതിനൊപ്പം  ദേശീയപാത നിർമാണത്തിന് ഏകദേശം 2.4 കോടി ക്യുബിക് മീറ്റർ മണ്ണ് നൽകി  16,690 കോടിയോളം രൂപ ലാഭിക്കാന്‍ സാഹചര്യമൊരുക്കി.  

കൂടാതെ, റിപ്പോർട്ട് പ്രകാരം മുൻ റിപ്പോർട്ടിനെ അപേക്ഷിച്ച് ജലക്ഷാമം നേരിടുന്ന പ്രദേശങ്ങളിൽ ദേശീയപാത അതോറിറ്റി  ജല ഉപയോഗം 74% കുറച്ചു.  മനുഷ്യ-മൃഗ സംഘർഷം ലഘൂകരിക്കുന്നതിന് ഉപരിതല ഗതാഗതാധിഷ്ഠിതഅടിസ്ഥാന സൗകര്യങ്ങള്‍ വന്യജീവികളില്‍ ചെലുത്തുന്ന ആഘാതം കുറയ്ക്കാനുള്ള പരിസ്ഥിതി സൗഹൃദ നടപടികള്‍ സംബന്ധിച്ച മികച്ച പരിശീലന മാര്‍ഗനിര്‍ദേശ രേഖ ദേശീയപാത അതോറിറ്റിയുടെ  പ്രവര്‍ത്തനങ്ങളില്‍ സംയോജിപ്പിച്ചു.  

സുസ്ഥിര വികസനത്തിന് പുറമെ സമഗ്രവും ഉത്തരവാദിത്തപൂര്‍ണവുമായ തൊഴില്‍ രീതികൾ സൃഷ്ടിക്കാന്‍ ദേശീയപാത അതോറിറ്റി കൈക്കൊള്ളുന്ന  പ്രതിബദ്ധതയും റിപ്പോർട്ട് എടുത്തുകാണിക്കുന്നു. റിപ്പോർട്ട് പ്രകാരം ദേശീയപാത അതോറിറ്റിയുടെ 100% പ്രത്യക്ഷ ജീവനക്കാരും കരാർ തൊഴിലാളികളും തൊഴില്‍സംബന്ധ ആരോഗ്യ - സുരക്ഷ  (ഒഎച്ച്എസ്) നിര്‍വഹണ ചട്ടക്കൂടിന്റെ ഭാഗമാണ്.  തൊഴിലിട വിവേചനത്തിന്റെ ഒരു സംഭവവും  റിപ്പോർട്ട് ചെയ്യാത്തത് വൈവിധ്യം, തുല്യത, ഉൾച്ചേര്‍ക്കല്‍ എന്നിവയോടുള്ള ദേശീയപാത അതോറിറ്റിയുടെ ശക്തമായ പ്രതിബദ്ധത പ്രതിഫലിപ്പിക്കുന്നു. 

കാര്യക്ഷമതയും സുതാര്യതയും വർധിപ്പിക്കാന്‍  സാങ്കേതികവിദ്യ പ്രയോജനപ്പെടുത്തി ദേശീയപാത അതോറിറ്റി വിജയകരമായി നടപ്പാക്കിയ എഐ അധിഷ്ഠിത 'ഡാറ്റ ലേക്ക് 3.0' പ്ലാറ്റ്‌ഫോം പദ്ധതി നിര്‍വഹണം  കാര്യക്ഷമമാക്കിയതിനൊപ്പം 155  തര്‍ക്കപരിഹാരങ്ങള്‍ക്ക് വഴിയൊരുക്കുകയും ഇതിലൂടെ ഏകദേശം  25,680 കോടി രൂപ ലാഭിക്കുകയും ചെയ്തു. കൂടാതെ, 98.5% ഫാസ്ടാഗ് വ്യാപനത്തിലൂടെ കാർബൺ പുറന്തള്ളല്‍ ലഘൂകരിച്ചതിനൊപ്പം ടോൾ കേന്ദ്രങ്ങളിലെ തിരക്കും വാഹന മലിനീകരണവും കുറയ്ക്കാനും സഹായിച്ചു.

പൂർണ  റിപ്പോർട്ട് ദേശീയപാത അതോറിറ്റി വെബ്‌സൈറ്റിൽ ലഭ്യമാണ്:  https://nhai.gov.in/nhai/sites/default/files/2025-07/Sustainability-Report-of-NHAI-for-FY-2023-24.pdf     

പുനരുപയോഗ  ഊർജ സ്രോതസ്സുകളുടെ ഉപയോഗം, ഹരിത ദേശീപാതകളുടെ പ്രോത്സാഹനം, മാലിന്യ സംസ്കരണ രീതികളുടെ അവലംബം എന്നിവയടക്കം സുസ്ഥിരവും പരിസ്ഥിതി സൗഹൃദവുമായ രീതികൾ സ്വീകരിക്കുന്നതിൽ ദേശീയപാത അതോറിറ്റി സുപ്രധാന നടപടികൾ കൈക്കൊണ്ടിട്ടുണ്ട്. ദേശീയപാത അതോറിറ്റിയുടെ പ്രകടനത്തിന്റെ സുതാര്യ വിവരണം നൽകുന്ന രണ്ടാമത് സുസ്ഥിരതാ റിപ്പോർട്ട് അതിവേഗ അടിസ്ഥാന സൗകര്യ വളർച്ചയും പരിസ്ഥിതി സുസ്ഥിരതയും സന്തുലിതമാക്കാൻ ലക്ഷ്യമിടുന്ന ഭാവി സംരംഭങ്ങള്‍ക്ക് വ്യക്തമായ രൂപരേഖ തയ്യാറാക്കുന്നു.