സിവിൽ സർവീസ് ഉദ്യോഗസ്ഥരുടെ സംഭാവനകളെ അംഗീകരിച്ചുകൊണ്ട്, പൊതുഭരണത്തിലെ മികവിനുള്ള പ്രധാനമന്ത്രിയുടെ 2025 ലെ പുരസ്‌കാരങ്ങൾ മൂന്ന് വിഭാഗങ്ങളിലായി 16 എണ്ണം നൽകും

 പൊതുഭരണത്തിലെ മികവിനുള്ള പ്രധാനമന്ത്രിയുടെ 2025-ലെ പുരസ്‌കാര പദ്ധതി സംബന്ധിച്ച വിജ്ഞാപനം കേന്ദ്ര ഭരണ പരിഷ്കാര& പൊതു പരാതി വകുപ്പ് 2025 ജൂലൈ 1-ന് കേന്ദ്ര മന്ത്രാലയങ്ങൾ/വകുപ്പുകൾ, സംസ്ഥാനങ്ങൾ, ജില്ലകൾ എന്നിവയ്ക്ക് നൽകി

2. പ്രധാനമന്ത്രിയുടെ പുരസ്കാരങ്ങൾക്കായി രജിസ്റ്റർ ചെയ്യുന്നതിനും നാമനിർദ്ദേശങ്ങൾ സമർപ്പിക്കുന്നതിനുമുള്ള വെബ് പോർട്ടൽ 2025 ഒക്ടോബർ 2 മുതൽ ഔദ്യോഗികമായി ആരംഭിക്കും. അതിനുശേഷം നാമനിർദ്ദേശങ്ങൾ സമർപ്പിക്കാം.

 3. ഇന്ത്യയുടെ സമഗ്ര വികസനത്തിനായുള്ള ശ്രമങ്ങളെ കൂടുതൽ പ്രോത്സാഹിപ്പിക്കുന്നതിനാണ് പുരസ്കാരപദ്ധതി വിജ്ഞാപനം ചെയ്തിരിക്കുന്നത്. പദ്ധതികളുടെ പൂർത്തീകരണ സമീപനം, ഡാറ്റ/ഡോക്യുമെന്ററി തെളിവുകളുടെ സമാഹരണം, സദ് ഭരണം,11 മുൻഗണനാ മേഖല പദ്ധതികളുടെ നടത്തിപ്പുമായി ബന്ധപ്പെട്ട ഗുണപരമായ വശങ്ങൾ എന്നിവയാണ് പുരസ്കാരത്തിനായി സമഗ്രമായി വിലയിരുത്തപ്പെടുന്നത്.

4. പ്രധാനമന്ത്രി ശ്രീ നരേന്ദ്ര മോദിയുടെ നേതൃത്വത്തിൽ, മികവിനുള്ള പ്രധാനമന്ത്രിയുടെ പുരസ്കാര പദ്ധതിയുടെ ആശയവും രൂപവും 2014 മുതൽ വിപ്ലവകരമായ മാറ്റത്തിന് വിധേയമായിട്ടുണ്ട്. സൃഷ്ടിപരമായ മത്സരം, നൂതനാശയങ്ങൾ,മികച്ച രീതികളുടെ അനുകരണവും സ്ഥാപനവൽക്കരണവും എന്നിവ പ്രോത്സാഹിപ്പിക്കുകയാണ് പദ്ധതിയുടെ ലക്ഷ്യം. ഈ സമീപനത്തിൽ, ലക്ഷ്യങ്ങൾ കൈവരിച്ചതിന്റെ എണ്ണത്തേക്കാൾ , സദ് ഭരണം, ഗുണപരമായ നേട്ടം, എല്ലാ കോണിലും എത്തിച്ചേരൽ എന്നിവയിലായിരിക്കും ഊന്നൽ നൽകുക.  ലക്ഷ്യമിടുന്ന വ്യക്തിഗത ഗുണഭോക്താക്കൾക്കെല്ലാം നിശ്ചിത പദ്ധതിയുടെ ഗുണങ്ങൾ പൂർണമായും ലഭ്യമാക്കുന്നതിന് ജില്ലാ കളക്ടർ സ്വീകരിച്ച പ്രവർത്തനങ്ങൾ അംഗീകരിക്കുക എന്നതാണ് ഈ വർഷത്തെ പുരസ്കാര പദ്ധതിയുടെ ഒരു ലക്ഷ്യം. ഇതിന്റെ ഭാഗമായി പുരസ്കാരങ്ങൾക്കുള്ള അപേക്ഷകൾ സദ് ഭരണം, ഗുണം, അളവ് എന്നീ മൂന്ന് മാനദണ്ഡങ്ങളാൽ വിലയിരുത്തപ്പെടും.

5. പൊതുഭരണത്തിലെ മികവിനുള്ള പ്രധാനമന്ത്രിയുടെ 2025 ലെ ഈ പുരസ്‌കാര പദ്ധതിയിൽ എല്ലാ ജില്ലകളും പങ്കെടുക്കുമെന്ന് പ്രതീക്ഷിക്കുന്നു.

6. പൊതുഭരണത്തിലെ മികവിനുള്ള പ്രധാനമന്ത്രിയുടെ 2025 ലെ പുരസ്കാരങ്ങൾ മൂന്ന് വിഭാഗങ്ങളിലായി സിവിൽ സർവീസുകാരുടെ സംഭാവനകളെ അംഗീകരിക്കാൻ ലക്ഷ്യമിടുന്നു:

വിഭാഗം I- 11 മുൻഗണനാ മേഖലാ പരിപാടികൾ പ്രകാരം ജില്ലകളുടെ സമഗ്ര വികസനം. ഈ വിഭാഗത്തിൽ 5 പുരസ്‌കാരങ്ങൾ നൽകും.

വിഭാഗം II- ആസ്പിരേഷണൽ ബ്ലോക്ക് പ്രോഗ്രാം. ഈ വിഭാഗത്തിൽ, 5 പുരസ്കാരങ്ങൾ നൽകും.

വിഭാഗം III- കേന്ദ്ര മന്ത്രാലയങ്ങൾ/വകുപ്പുകൾ, സംസ്ഥാനങ്ങൾ, ജില്ലകൾ എന്നിവയ്ക്കുള്ള നൂതനാശയങ്ങൾ . ഈ വിഭാഗത്തിൽ, 6 പുരസ്‌കാരങ്ങൾ നൽകും.

7. കാറ്റഗറി-1 (ജില്ലകളുടെ സമഗ്ര വികസനം)- 2022 ഏപ്രിൽ 1 മുതൽ 2025 സെപ്റ്റംബർ 30 വരെയും കാറ്റഗറി-2 നും (ആസ്പിരേഷണൽ ബ്ലോക്ക് പ്രോഗ്രാം) കാറ്റഗറി -3 (നൂതനാശയം) നും 2023 ഏപ്രിൽ 01 മുതൽ 2025 സെപ്റ്റംബർ 30 വരെയുമായിരിക്കും പുരസ്കാരത്തിനായി പരിഗണിക്കുന്ന പ്രവർത്തന കാലയളവ്.

 8. മൂല്യനിർണ്ണയ പ്രക്രിയയിൽ (i) സ്ക്രീനിംഗ് കമ്മിറ്റി ജില്ലകളുടെ/സ്ഥാപനങ്ങളുടെ ചുരുക്കപ്പട്ടിക (ഒന്നും രണ്ടും ഘട്ടം) തയ്യാറാക്കൽ (ii) വിദഗ്ദ്ധ സമിതിയുടെ വിലയിരുത്തൽ, (iii) എംപവേർഡ് കമ്മിറ്റി ശുപാർശ എന്നിവ ഉൾപ്പെടും. പുരസ്‌കാരങ്ങൾക്കായി എംപവേർഡ് കമ്മിറ്റി നൽകുന്ന ശുപാർശകളിൽ പ്രധാനമന്ത്രിയുടെ അംഗീകാരം തേടും.

9. 2025 ലെ പിഎം അവാർഡുകളിൽ ട്രോഫി, അംഗീകാര പത്രം,20 ലക്ഷം രൂപ എന്നിവ ഉൾപ്പെടുന്നു.പുരസ്‌കാരം ലഭിച്ച ജില്ലയ്‌ക്കോ/സ്ഥാപനത്തിനോ പദ്ധതി/പരിപാടി നടപ്പിലാക്കുന്നതിനോ പൊതുജനക്ഷേമത്തിന്റെ ഏതെങ്കിലും മേഖലയിലെ വിഭവ വിടവുകൾ നികത്തുന്നതിനോ ഈ തുക ഉപയോഗിക്കാവുന്നതാണ്.

**************************