Ka Tnad Women and Child Development, Sorkar India ka la pynlong ia ka “Cyber Security Awareness Workshop” mynta ka sngi (27 tarik Jylliew 2025) ha Dr. Ambedkar International Centre, New Delhi. Ka la pynleit jingmut ha kaba pynphriang ia ka jingtip shaphang ka jingshngain ka bor internet, ki jingma kiba lah ban mih na ka internet, bad ki rukom treikam kiba shngain ha ka internet, khamtam eh na ka bynta ki kynthei bad ki khynnah, kiba don ha ka bynta kaba kongsan jong ka jingtei ia ka ri.

Kane ka jingialang ka pyni ia ka bynta ba nyngkong jong ka sienjam kaba kham heh. Ka bynta kaba bud kan rah ïa kane ka jingpyrshang sha ki jaka treikam, ban pynthikna ba ka jingpynsngewthuh shaphang ka cyber bad ki rukom ïada digital kin pur sha ki nongtrei ba don ha ki jaka treikam, ki nongtrei jong ka Anganwadi, bad ki nongshim bynta ha ka kyrdan jong ka jylla kiba long kiba kongsan bha ha ka rukom ai jingshakri jong ka Tnad.

Ha kane ka jingïalang la sakhi ïa ka jingïashim bynta shitrhem na ki ophisar bad ki heh jong ka Tnad Women and Child Development ba kynthup ïa ki tnad treikam jong ka bad ki kynhun treikam ba laitluid kum ka National Commission for Women (NCW), ka Savitribai Phule National Institute for Women and Child Development, ka Central Adoption Resource Authority (CARA), bad ka National Commission for Protection of Child Rights (NCPCR).

Ki riewstad ba pawnam ha ka kam ai jingïada ha ki kam cyber na ka sorkar bad ki kompani ki la iadonlang na ka bynta kane ka jingïalang ban peit pura ia ka jingïakhun ïa ki jingma kiba lah ban mih na ka digital. Ki riew shemphang na ka Indian Cyber ​​Crime Coordination Centre (I4C)- Ka Tnad Kam Pohiing ki la pynpaw ïa ka jingkiew ka jingeh jong ki kam runar lyngba ka bor internet bad ka jingdonkam ban long kiba husiar bha bad ka jingïatreilang kaba khlaiñ. Ka CERT-In (Indian Computer Emergency Response Team), ka tnad ba kongsan jong ka ri kaba don hapoh ka Tnad Electronics bad IT ka la ïasam ïa ki jingshemphang halor ka jingshngain ki kam cyber, ka polisi bad ka jingïada ïa ki jingtip. Ka PwC India ka la wanrah ïa ki jingpynbeit kiba treikam, kaba pynpaw balei ym lah ban khein sting haba iadei bad ka bor ïakhun pyrshah ha ka kam digital. Naduh ka phishing haduh ka jingïada ïa ki rynsan, ki jingïalang ki la ai bor ïa ki nongïashim bynta da ki atiar kiba lah ban treikam bad ki jingïalang ki la pynskhem ïa kawei ka khubor ba kongsan: Ka jingïada ha ka kam cyber kam dei ka jingpynbeit kaba tang shisien — ka dei ka jinglong ba man ka sngi kaba don tynrai ha ka jingpeitngor bad ka jingkitkhlieh.

Haba ai jingkren ha kane ka jingialang, u Anil Malik, Secretary, Tnad Women and Child Development, u la ong ba ngi im ha ka juk kaba ka jingtrei kam bad ka jingïakren jong ngi ka ïasoh bha bad ki rynsan digital. Kum ki nongtrei sorkar kiba pyniaid ia ki jingtip kiba kongsan, ka long kaba donkam ba ngin long kiba husiar bad kiba don ia ki jingtip. Kane ka jingïalang ka dei ka sienjam kaba biang por kaba thmu ban pynkhreh ïa ngi da ka jingtip bad ki rukom treikam kiba dei, u la ong. U la kyntu ia baroh ban pyndonkam hok ia kine ki jingialang.

Ha kine ki shiphew snem ba la leit, ka Tnad Women and Child Development ka la pyndonkam ia ka teknoloji ban pyniaid ia ka jingpynroi kaba kynthup lang bad ka jingai jingshakri kaba paka. Ki sienjam kum ka Poshan Tracker- La ithuh da ka khusnam Prime Minister’s Award for Excellence 2024, ki la wanrah bujli ïa ki jingthoh ba rim da kaba wanrah ia ki dashboard ha ki 14 lak tylli ki Anganwadi Centre, kaba iarap ïa ka jingshim rai ba la pynïaid da ki jingtip bad ka jingai jingshakri na ka bynta palat 10 klur ngut ki nongïoh jingmyntoi. Kumjuh ruh, ka Pradhan Mantri Matru Vandana Yojana ka treikam lyngba ka rukom DBT kaba khlem da pyndonkam da ki kot ki sla, kaba lah ban pyntreikam da u Aadhaar ryngkat bad ka jingpynrung kyrteng da ka mobile bad ka jingpynbeit ia ki jingeh ha ka por na ka bynta ban ai pisa beit beit sha ka bank account jong ki nongioh jingmyntoi. Ka jingpdiang ia ka jingithuh durkhmat ka pynthikna ia ka jingpynshisha kaba thikna jong ki nongioh jingmyntoi, katba ki rynsan kum ka SHe-Box bad ka Mission Shakti Portal, ka Mission Vatsalya Portal ki ai ia ka lad ba la ialam da ka teknoloji sha ka jingshngain bad jingpynbeit katkum ka ain. Katba ka jingshaniah ha ka digital ka nang kiew, ka jingpynthikna ia ka jingshngain ha ka cyber ka long kaba kongsan. Ka jingpynsngewthuh bad jingkyntiew ia ka bor treikam ha kaba iadei bad ka jingkhuid ha ki kam cyber ka long kaba donkam ban iada ia ki data bad ban pynneh ia ka jingshaniah ha kine ki rynsan treikam.

Lyngba kane ka sienjam, ka Tnad ka la pynskhem biang ïa ka jingkut jingmut jong ka ban ïada ïa ki kam digital bad ban pynbiang ïa ka rukom synshar digital kaba shngain, kaba shai, bad kaba don ka jingkitkhlieh. Katba ka India ka nang iaid shaphrang ha ka Amrit Kaal jong ka—ka por jong ka jingkylla sha ka jinglong ka ri kaba la kiew shuwa u snem 2047—ka Tnad ka aiti ban pynkhreh ia ka jinglong jingman jong ka da ki atiar bad jingtip kiba donkam ban noh synniang kaba don jingmut sha ka Viksit Bharat.

****