കേന്ദ്ര മന്ത്രിസഭയിലെ എന്റെ സഹപ്രവർത്തകരായ ശ്രീ രാജ്‌നാഥ് സിംഗ് ജി, സഞ്ജയ് സേത്ത് ജി, സി‌ ഡി‌ എസ്- ജനറൽ അനിൽ ചൗഹാൻ ജി, മൂന്ന് സായുധ സേനാ മേധാവികൾ, പ്രതിരോധ സെക്രട്ടറി ശ്രീ, എൻ‌ സി‌ സി ഡി‌ ജി, മറ്റ് അതിഥികൾ, എൻ‌സി‌സിയിലെ എന്റെ പ്രിയ സുഹൃത്തുക്കൾ! എൻ‌സി‌സി ദിനത്തിൽ നിങ്ങൾക്കെല്ലാവർക്കും ആശംസകൾ. ഇന്ന്, 18 സൗഹൃദ രാജ്യങ്ങളിൽ നിന്നുള്ള ഏകദേശം 150 കാഡറ്റുകളും ഇവിടെയുണ്ട്. ഈ കാഡറ്റുകളെയും ഞാൻ സ്വാഗതം ചെയ്യുന്നു. രാജ്യവുമായി ബന്ധപ്പെട്ട മേരാ യുവ ഭാരത്, എന്റെ ഭാരത് എന്നിവയുടെ സഹപ്രവർത്തകരെയും ഞാൻ അഭിനന്ദിക്കുന്നു.

സുഹൃത്തുക്കളേ,

റിപ്പബ്ലിക് ദിന പരേഡിലേക്ക് തിരഞ്ഞെടുക്കപ്പെട്ടത് തന്നെ ഒരു നേട്ടമാണ്. നമ്മുടെ റിപ്പബ്ലിക് 75 വർഷം പൂർത്തിയാക്കിയതിനാൽ ഈ വർഷത്തെ പരേഡും സവിശേഷമായിരുന്നു. സുഹൃത്തുക്കളേ, ഈ ഓർമ്മകൾ ജീവിതകാലം മുഴുവൻ നിങ്ങളോടൊപ്പമുണ്ടാകും. ഭാവിയിൽ, റിപ്പബ്ലിക് 75 വർഷം പൂർത്തിയാക്കിയപ്പോൾ ഞങ്ങൾ പരേഡിൽ പങ്കെടുത്തത് നിങ്ങൾ തീർച്ചയായും ഓർക്കും. മികച്ച കേഡറ്റ് അവാർഡ് ലഭിച്ച ആ സുഹൃത്തുക്കൾക്ക് എന്റെ ഹൃദയംഗമമായ അഭിനന്ദനങ്ങൾ. അടുത്തിടെ ഇവിടെ നിരവധി എൻ‌ സി‌ സി ദൗത്യങ്ങൾക്ക് തുടക്കം കുറിക്കാൻ എനിക്ക് അവസരം ലഭിച്ചു. എൻ‌ സി‌ സിയുടെ ഇത്തരം ശ്രമങ്ങൾ ഇന്ത്യയുടെ പൈതൃകത്തെ യുവജന അഭിലാഷങ്ങളുമായി ബന്ധിപ്പിക്കുന്നു. ഈ ദൗത്യങ്ങളിൽ ഉൾപ്പെട്ടിരിക്കുന്ന കേഡറ്റുകൾക്ക് ഞാൻ എല്ലാ ആശംസകളും നേരുന്നു. 

സുഹൃത്തുക്കളേ, 

രാജ്യത്തിന് സ്വാതന്ത്ര്യം ലഭിച്ച കാലഘട്ടത്തിലാണ് എൻ‌ സി‌ സി സ്ഥാപിതമായത്. ഒരു തരത്തിൽ, രാജ്യത്തിന്റെ ഭരണഘടനയ്ക്ക് മുമ്പുതന്നെ നിങ്ങളുടെ സംഘടനയുടെ യാത്ര ആരംഭിച്ചു. റിപ്പബ്ലിക്കിന്റെ 75 വർഷങ്ങളിൽ, ഇന്ത്യൻ ഭരണഘടന എല്ലായ്പ്പോഴും രാജ്യത്തിന് ജനാധിപത്യ പ്രചോദനം നൽകുകയും പൗര കടമകളുടെ പ്രാധാന്യം വിശദീകരിക്കുകയും ചെയ്തു. അതുപോലെ, എൻ‌ സി‌ സിയും എല്ലായ്‌പ്പോഴും ഇന്ത്യയിലെ യുവാക്കളെ രാഷ്ട്രം കെട്ടിപ്പടുക്കാൻ പ്രചോദിപ്പിക്കുകയും അച്ചടക്കത്തിന്റെ പ്രാധാന്യം അവർക്ക് വിശദീകരിക്കുകയും ചെയ്തു. കഴിഞ്ഞ വർഷങ്ങളിൽ, എൻ‌ സി‌ സിയുടെ വ്യാപ്തിയും ഉത്തരവാദിത്തവും വർദ്ധിപ്പിക്കുന്നതിന് ​ഗവൺമെന്റ് വളരെയധികം പ്രവർത്തനങ്ങൾ നടത്തിയതിൽ ഞാൻ സംതൃപ്തനാണ്. നമ്മുടെ അതിർത്തി പ്രദേശങ്ങളിലും, കടൽ അതിർത്തിയോട് ചേർന്നുള്ള ജില്ലകളിലും എൻ‌ സി‌ സി വികസിപ്പിച്ചിട്ടുണ്ട്.

ഇന്ന്, എൻ‌ സി‌ സി 170 ലധികം അതിർത്തി താലൂക്കുകളിലും രാജ്യത്തെ ഏകദേശം 100 തീരദേശ താലൂക്കുകളിലും എത്തിയിട്ടുണ്ട്. മൂന്ന് സേനകളെയും ഞാൻ അഭിനന്ദിക്കുന്നു. ഈ ജില്ലകളിലെ യുവ എൻ‌ സി‌ സി കേഡറ്റുകൾക്ക് പ്രത്യേക പരിശീലനം നൽകാനുള്ള ഉത്തരവാദിത്തം നിങ്ങൾ ഏറ്റെടുത്തു. ഇന്ന് അതിർത്തിയിൽ താമസിക്കുന്ന ആയിരക്കണക്കിന് യുവാക്കൾക്ക് ഇതിന്റെ പ്രയോജനം ലഭിച്ചു. എൻ സി സിയിലെ കേഡറ്റുകളുടെ എണ്ണത്തിലെ പരിഷ്കരണത്തിന്റെ ഫലവും നാം കാണുന്നു. 2014 ൽ എൻ സി സി കേഡറ്റുകളുടെ എണ്ണം ഏകദേശം 14 ലക്ഷമായിരുന്നു. ഇന്ന് ഈ എണ്ണം 20 ലക്ഷത്തിലെത്തി. നമ്മുടെ പെൺമക്കളായ 8 ലക്ഷത്തിലധികം പെൺകുട്ടികൾ കേഡറ്റുകളാണെന്നത് അഭിമാനകരമാണ്. ഇന്ന് നമ്മുടെ എൻസിസി കേഡറ്റുകൾ ദുരന്തനിവാരണത്തിൽ ഒരു പ്രധാന പങ്ക് വഹിക്കുന്നു. കായിക ലോകത്തും എൻ സി സി കേഡറ്റുകൾ വിജയപതാക ഉയർത്തുന്നു. ലോകത്തിലെ ഏറ്റവും വലിയ യൂണിഫോം ധരിച്ച യുവജന സംഘടനയാണ് എൻ സി സി എന്നതിൽ ഞാൻ അഭിമാനിക്കുന്നു.

സുഹൃത്തുക്കളേ,

ഇരുപത്തൊന്നാം നൂറ്റാണ്ടിൽ ഇന്ത്യയുടെയും ലോകത്തിന്റെയും വികസനം നിങ്ങൾ നിർണ്ണയിക്കാൻ പോകുന്നു. ഇന്ത്യയിലെ യുവാക്കൾ ഇന്ത്യയുടെ മാത്രമല്ല, ആഗോള നന്മയ്ക്കുള്ള ശക്തിയുമാണ്. ഇന്ന് ലോകം ഇത് അംഗീകരിക്കുന്നു. അടുത്തിടെ പത്രങ്ങളിൽ ഒരു റിപ്പോർട്ട് പ്രസിദ്ധീകരിച്ചു. അതിൽ പറഞ്ഞിരിക്കുന്നത് വളരെ പ്രധാനമാണ്. കഴിഞ്ഞ ദശകത്തിൽ, ഇന്ത്യയിലെ യുവാക്കൾ 1.5 ലക്ഷം സ്റ്റാർട്ടപ്പുകളും 100-ലധികം യൂണികോണുകളും സൃഷ്ടിച്ചു. ഇന്ന് ലോകത്തിലെ 200-ലധികം വൻകിട കമ്പനികളെ നയിക്കുന്നത് ഇന്ത്യൻ വംശജരാണ്. കോടിക്കണക്കിന് ആളുകളുടെ ജീവിതം മാറ്റാൻ സഹായിക്കുന്ന ഈ കമ്പനികൾ ആഗോള ജിഡിപിയിലേക്ക് ദശലക്ഷക്കണക്കിന് കോടി രൂപ സംഭാവന ചെയ്യുന്നു. ഇന്ത്യൻ ശാസ്ത്രജ്ഞർ, ഇന്ത്യൻ ഗവേഷകർ, ഇന്ത്യയിലെ അധ്യാപകർ എന്നിവരും ലോകത്തിന്റെ പുരോഗതിയെ ത്വരിതപ്പെടുത്തുന്നു. അതായത്, ഏത് മേഖലയായാലും, ഇന്ത്യയുടെ യുവശക്തിയില്ലാതെ, ഇന്ത്യയുടെ പ്രതിഭയില്ലാതെ ലോകത്തിന്റെ ഭാവി സങ്കൽപ്പിക്കാൻ പ്രയാസമാണ്. അതുകൊണ്ടാണ് ഞാൻ നിങ്ങളെയെല്ലാം ആഗോള നന്മയ്ക്കുള്ള ശക്തികൾ എന്ന് വിളിക്കുന്നത്.

സുഹൃത്തുക്കളേ,

ഒരു വ്യക്തിയായാലും രാജ്യമായാലും, അനാവശ്യമായ തടസ്സങ്ങളെ മറികടക്കുമ്പോഴാണ് അതിന്റെ ശക്തി വർദ്ധിക്കുന്നത്. കഴിഞ്ഞ 10 വർഷത്തിനിടയിൽ, ഇന്ത്യയിലെ യുവാക്കൾ നേരിട്ട എല്ലാ തടസ്സങ്ങളും, അവ എന്തുതന്നെയായാലും, നീക്കം ചെയ്യാൻ ഞങ്ങൾ പ്രവർത്തിച്ചിട്ടുണ്ട് എന്നതിൽ എനിക്ക് സംതൃപ്തിയുണ്ട്. ഇത് ഇന്ത്യയിലെ യുവാക്കളുടെ ശക്തി, രാജ്യത്തിന്റെ ശക്തി വർദ്ധിപ്പിച്ചു. 2014 ൽ, നിങ്ങൾക്ക് 10 അല്ലെങ്കിൽ 12 അല്ലെങ്കിൽ 14 വയസ്സ് പ്രായമുണ്ടാകുമായിരുന്നു, നിങ്ങളുടെ കുടുംബത്തോട് നേരത്തെയുള്ള സാഹചര്യം എന്താണെന്ന് ചോദിക്കുക, ഉദാഹരണത്തിന്, രേഖകളുടെ സാക്ഷ്യപ്പെടുത്തൽ. മുമ്പ്, പ്രവേശനം, പരീക്ഷ, റിക്രൂട്ട്മെന്റ്, ഏതെങ്കിലും ഫോം പൂരിപ്പിക്കൽ എന്നിവയായാലും, ഒരു ഗസറ്റഡ് ഓഫീസറെക്കൊണ്ട് രേഖകൾ സാക്ഷ്യപ്പെടുത്തേണ്ടതായിരുന്നു, ഇതിൽ ധാരാളം ഓട്ടം ഉണ്ടായിരുന്നു. യുവാക്കളുടെ ഈ ബുദ്ധിമുട്ട് നമ്മുടെ ​ഗവൺമെന്റ് നീക്കം ചെയ്തു, നിങ്ങളെ വിശ്വസിച്ചു, ഇപ്പോൾ നിങ്ങൾക്ക് സ്വയം സാക്ഷ്യപ്പെടുത്തി നിങ്ങളുടെ രേഖകൾ പരിശോധിക്കാൻ കഴിയും. മുമ്പ്, സ്കോളർഷിപ്പിന് അപേക്ഷിക്കുന്നതിലും സ്കോളർഷിപ്പുകൾ നേടുന്നതിലും യുവാക്കൾക്ക് ധാരാളം ബുദ്ധിമുട്ടുകൾ നേരിടേണ്ടി വന്നിരുന്നു. സ്കോളർഷിപ്പ് പണത്തിൽ ധാരാളം കൃത്രിമത്വം ഉണ്ടായിരുന്നു, പണം കുട്ടികളുടെ അക്കൗണ്ടുകളിലേക്ക് പോയില്ല. ഇപ്പോൾ ഏകജാലക സംവിധാനം പഴയ പ്രശ്നങ്ങളെല്ലാം ഇല്ലാതാക്കി. മുമ്പ് വിഷയങ്ങളുടെ തിരഞ്ഞെടുപ്പുമായി ബന്ധപ്പെട്ട് മറ്റൊരു വലിയ പ്രശ്‌നമുണ്ടായിരുന്നു. ബോർഡ് പഠനത്തിനിടെ നിങ്ങൾ ഒരു വിഷയം എടുത്തിരുന്നെങ്കിൽ, അത് മാറ്റുന്നത് ബുദ്ധിമുട്ടായിരുന്നു. ഇപ്പോൾ പുതിയ ദേശീയ വിദ്യാഭ്യാസ നയം നിങ്ങളുടെ ഇഷ്ടത്തിനനുസരിച്ച് വിഷയങ്ങൾ മാറ്റാനുള്ള സൗകര്യം നൽകുന്നു.

സുഹൃത്തുക്കളേ,

10 വർഷം മുമ്പ് യുവാക്കൾക്ക് ബാങ്ക് വായ്പകൾ എളുപ്പത്തിൽ ലഭിക്കാത്ത ഒരു കാലമുണ്ടായിരുന്നു. വായ്പ വേണമെങ്കിൽ ആദ്യം ഈട് നൽകണമെന്ന് ബാങ്കുകൾ പറയാറുണ്ടായിരുന്നു. 2014 ൽ, രാജ്യത്തെ ജനങ്ങൾ എനിക്ക് പ്രധാനമന്ത്രിയായി സേവനമനുഷ്ഠിക്കാൻ അവസരം നൽകിയപ്പോൾ, എന്റെ രാജ്യത്തെ യുവാക്കൾക്ക് വേണ്ടി ഞാൻ ഗ്യാരണ്ടി സ്വീകരിക്കുമെന്ന് ഞാൻ പറഞ്ഞു. ബാങ്ക് ഗ്യാരണ്ടി ഇല്ലാതെ വായ്പ നൽകുന്ന മുദ്ര യോജന ഞങ്ങൾ ആരംഭിച്ചു. നേരത്തെ, 10 ലക്ഷം രൂപ വരെയുള്ള വായ്പകൾ ഗ്യാരണ്ടി ഇല്ലാതെ ലഭ്യമായിരുന്നു. ഇപ്പോൾ ​ഗവൺമെന്റിന്റെ മൂന്നാം ടേമിൽ, ഞങ്ങൾ അത് 20 ലക്ഷമായി ഉയർത്തി. 10 വർഷത്തിനുള്ളിൽ, മുദ്ര വായ്പയ്ക്ക് കീഴിൽ ഞങ്ങൾ 40 ലക്ഷം കോടിയിലധികം രൂപ നൽകി. നിങ്ങളെപ്പോലുള്ള ലക്ഷക്കണക്കിന് യുവാക്കൾ ഈ വായ്പയിൽ നിന്ന് സഹായം സ്വീകരിച്ച് അവരുടെ ബിസിനസ്സ് ആരംഭിച്ചു.

സുഹൃത്തുക്കളേ,

യുവാക്കളുടെ ഭാവിയുമായി ബന്ധപ്പെട്ട മറ്റൊരു പ്രധാന വിഷയം രാജ്യത്തെ തിരഞ്ഞെടുപ്പ് സംവിധാനമാണ്. രണ്ട് ദിവസം മുമ്പ്, നമ്മൾ ദേശീയ വോട്ടർ ദിനം ആഘോഷിച്ചു. നിങ്ങളിൽ പലരും ആദ്യമായി വോട്ടർമാരായി മാറിയിരിക്കുന്നു. പരമാവധി വോട്ടർമാർ പങ്കെടുക്കുകയും അവരുടെ അവകാശം ഉപയോഗിക്കുകയും ചെയ്യുക എന്നതാണ് വോട്ടർ ദിനത്തിന്റെ ഉദ്ദേശ്യം. ഇന്ന്, ലോകത്തിലെ ഏറ്റവും വലിയ തിരഞ്ഞെടുപ്പുകൾ ഇന്ത്യയിൽ നടക്കുന്നു, എന്നാൽ ഇതിന്റെ മറ്റൊരു വശം ഇന്ത്യയിൽ ഏതാനും മാസങ്ങൾ കൂടുമ്പോൾ തിരഞ്ഞെടുപ്പുകൾ നടക്കുന്നു എന്നതാണ്. സ്വാതന്ത്ര്യാനന്തരം, ലോക്‌സഭാ, നിയമസഭാ തിരഞ്ഞെടുപ്പുകൾ ഒരേസമയം നടന്നിരുന്ന കാലം വളരെക്കാലമായി അങ്ങനെയായിരുന്നു. എന്നാൽ പിന്നീട് ഈ രീതി തകർന്നു, ഇതുമൂലം രാജ്യം വളരെയധികം കഷ്ടപ്പെട്ടു. എല്ലാ തിരഞ്ഞെടുപ്പുകളിലും, വോട്ടിംഗ് പട്ടിക അപ്‌ഡേറ്റ് ചെയ്യപ്പെടുന്നു, ധാരാളം ജോലികൾ ചെയ്യപ്പെടുന്നു, നമ്മുടെ അധ്യാപകരെ പലപ്പോഴും ഇതിൽ ഡ്യൂട്ടിക്കായി നിയമിക്കുന്നത് നിങ്ങൾ കണ്ടിരിക്കണം, ഇതുമൂലം പഠനത്തെയും പരീക്ഷകൾക്കുള്ള തയ്യാറെടുപ്പുകളെയും ബാധിക്കുന്നു. ഇടയ്ക്കിടെയുള്ള തിരഞ്ഞെടുപ്പുകൾ കാരണം, ഭരണത്തിലും ബുദ്ധിമുട്ടുകൾ ഉണ്ട്. അതിനാൽ, ഈ ദിവസങ്ങളിൽ രാജ്യത്ത് വളരെ പ്രധാനപ്പെട്ട ഒരു ചർച്ച നടക്കുന്നു. ഈ വിഷയത്തിൽ എല്ലാവരും തങ്ങളുടെ അഭിപ്രായങ്ങൾ പറയുന്നുണ്ട്, ജനാധിപത്യത്തിൽ ഈ ചർച്ച വളരെ അത്യാവശ്യമാണ്, എല്ലാവരും അവരുടെ അഭിപ്രായങ്ങൾ പ്രകടിപ്പിക്കണം, ഇത് ആവശ്യമാണ്, ചർച്ച എന്താണ് - ഒരു രാഷ്ട്രം ഒരു തിരഞ്ഞെടുപ്പ്. ലോക്‌സഭാ, നിയമസഭാ തിരഞ്ഞെടുപ്പുകൾ ഒരുമിച്ച് നടത്തണം, സമയം നിശ്ചയിക്കുമ്പോൾ ഓരോ 5 വർഷത്തിലും അത് നടത്തണം. അതിനാൽ, ഇടയ്ക്ക് നിർത്തുന്ന പുതിയ ജോലികളിൽ നിന്ന് ആശ്വാസം ലഭിക്കും.

ഇന്ന്, ഇന്ത്യയിലെ യുവാക്കളോട് ഞാൻ പ്രത്യേകിച്ച് അഭ്യർത്ഥിക്കുന്നു, എൻ‌സി‌സി കേഡറ്റുകളോട് ഞാൻ അഭ്യർത്ഥിക്കുന്നു, എന്റെ ഭാരതത്തിന്റെ വളണ്ടിയർമാരോട് ഞാൻ അഭ്യർത്ഥിക്കുന്നു, എൻ‌ എസ്‌ എസ് സഖാക്കളോട് ഞാൻ അഭ്യർത്ഥിക്കുന്നു, നമ്മൾ എവിടെയായിരുന്നാലും, നമ്മൾ ഈ ചർച്ച നടത്തണം, ചർച്ച മുന്നോട്ട് കൊണ്ടുപോകണം, ചർച്ചയ്ക്ക് നേതൃത്വം നൽകണം, ഈ ചർച്ചയിൽ വലിയ തോതിൽ പങ്കെടുക്കണം. ഇത് നിങ്ങളുടെ ഭാവിയുമായി നേരിട്ട് ബന്ധപ്പെട്ട ഒരു വിഷയമാണ്. അമേരിക്ക പോലുള്ള ഒരു രാജ്യത്ത് പോലും, ഒരു പുതിയ ​ഗവൺമെന്റ് രൂപീകരണ തീയതി നിശ്ചയിച്ചിട്ടുണ്ട്, അവിടെ നാല് വർഷം കൂടുമ്പോൾ തിരഞ്ഞെടുപ്പുകൾ നടക്കുന്നു. നിങ്ങളുടെ സ്വന്തം കോളേജിലോ സ്കൂളിലോ, വിദ്യാർത്ഥി കൗൺസിൽ തിരഞ്ഞെടുപ്പുകൾ ഒറ്റയടിക്ക് പൂർത്തിയാക്കുന്നു. ചിന്തിക്കുക, എല്ലാ മാസവും തിരഞ്ഞെടുപ്പുകൾ നടന്നുകൊണ്ടിരിക്കുകയാണെങ്കിൽ, ഒരു സർവകലാശാലയിലോ കോളേജിലോ പഠിക്കാൻ കഴിയുമോ? അതിനാൽ, ഒരു രാഷ്ട്രം-ഒരു തിരഞ്ഞെടുപ്പിനെക്കുറിച്ചുള്ള ചർച്ചയ്ക്ക് നിങ്ങൾ നേതൃത്വം നൽകണം; രാജ്യത്തിന് ശരിയായ ദിശയിലേക്ക് നീങ്ങാൻ തീരുമാനിക്കുന്നതിന് രാജ്യവ്യാപകമായി ഒരു ചർച്ച നടക്കണം.

സുഹൃത്തുക്കളേ,

ഇന്ന്, 21-ാം നൂറ്റാണ്ടിലെ ലോകം വളരെ വേഗത്തിൽ മാറിക്കൊണ്ടിരിക്കുന്നു. ഇന്ന്, കാലത്തിന്റെ ആവശ്യമനുസരിച്ച് നമ്മളും വളരെ വേഗത്തിൽ മുന്നോട്ട് പോകേണ്ടതുണ്ട് എന്നതാണ്. രാജ്യത്തെ യുവാക്കളായ നിങ്ങൾക്കെല്ലാവർക്കും ഇതിൽ വലിയ പങ്കുണ്ട്. എല്ലാ മേഖലയിലും, എല്ലാ രം​ഗത്തും, അത് കല, ഗവേഷണം, നവീകരണം തുടങ്ങിയ മേഖലകളായാലും, നിങ്ങളുടെ നൂതന ആശയങ്ങൾ, സർഗ്ഗാത്മകത എന്നിവ ഉപയോഗിച്ച് നിങ്ങൾ പുതിയ ഊർജ്ജം സൃഷ്ടിക്കേണ്ടതുണ്ട്. അത്തരമൊരു പ്രധാനപ്പെട്ട മറ്റൊരു മേഖല രാഷ്ട്രീയമാണ്. നമ്മുടെ രാജ്യത്തെ യുവാക്കൾ കഴിയുന്നത്ര രാഷ്ട്രീയ മേഖലയിലേക്ക് വരണം, പുതിയ നിർദ്ദേശങ്ങളുമായി വരണം, പുതിയ ഊർജ്ജവുമായി വരണം, നൂതന ആശയങ്ങളുമായി വരണം. ഇതാണ് ഇന്നത്തെ രാജ്യത്തിന്റെ ആവശ്യം. അതുകൊണ്ടാണ് ഒരു ലക്ഷം യുവാക്കൾ രാഷ്ട്രീയത്തിലേക്ക് വരണമെന്ന് ഞാൻ ചെങ്കോട്ടയിൽ നിന്ന് പറഞ്ഞത്. യുവാക്കളുടെ ശക്തി എന്താണ്, വികാസ് ഭാരത്: യംഗ് ഇന്ത്യ ഡയലോഗിലും നമ്മൾ ഇത് കണ്ടിട്ടുണ്ട്. രാജ്യത്തുടനീളമുള്ള ലക്ഷക്കണക്കിന് യുവാക്കൾ അവരുടെ വിലമതിക്കാനാവാത്ത നിർദ്ദേശങ്ങൾ നൽകി, ഒരു വികസിത ഇന്ത്യയുടെ സൃഷ്ടിക്കായി അവരുടെ അഭിപ്രായങ്ങൾ പ്രകടിപ്പിച്ചു.

സുഹൃത്തുക്കളേ,

സ്വാതന്ത്ര്യസമരകാലത്ത്, രാജ്യത്തെ എല്ലാ തൊഴിലുകളിലെയും ആളുകൾ അവരുടെ ഒരേയൊരു ലക്ഷ്യം - രാജ്യത്തിന്റെ സ്വാതന്ത്ര്യം - നിശ്ചയിച്ചിരുന്നു, യുവാക്കൾ അതിൽ വളരെ ആവേശത്തോടെ പങ്കെടുത്തു, ത്യാഗങ്ങൾ ചെയ്തു, അവരുടെ യൗവനം ജയിലുകളിൽ ചെലവഴിച്ചു. അതുപോലെ, ഈ അമൃത് കാലത്ത്, നമുക്ക് ഒരു ലക്ഷ്യം മാത്രമേ നിലനിർത്തേണ്ടതുള്ളൂ - വികസിത ഇന്ത്യ. നമ്മുടെ ഓരോ തീരുമാനത്തിന്റെയും മാനദണ്ഡം, ഓരോ പ്രവൃത്തിയുടെയും മാനദണ്ഡം, ഒരു വികസിത ഇന്ത്യ ആയിരിക്കണം. ഇതിനായി, നമ്മുടെ പഞ്ചപ്രാണ തത്വങ്ങളെ എപ്പോഴും ഓർമ്മിക്കേണ്ടതുണ്ട്. പഞ്ചപ്രാണ എന്നാൽ - നാം ഒരു വികസിത ഇന്ത്യയെ സൃഷ്ടിക്കണം, അടിമത്തത്തെക്കുറിച്ചുള്ള എല്ലാ ചിന്തകളിൽ നിന്നും നമുക്ക് സ്വാതന്ത്ര്യം നേടണം, നമ്മുടെ പൈതൃകത്തെക്കുറിച്ച് അഭിമാനിക്കണം, ഇന്ത്യയുടെ ഐക്യത്തിനായി നാം പ്രവർത്തിക്കണം, നമ്മുടെ കടമകൾ സത്യസന്ധമായി നിർവഹിക്കണം. ഈ പഞ്ചപ്രാണയാണ് ഓരോ ഇന്ത്യക്കാരനും ദിശാബോധം നൽകുന്നത്, അവർ ഓരോ ഇന്ത്യക്കാരന്റെയും പ്രചോദനമാണ്. നിങ്ങൾ ഇപ്പോൾ നൽകിയ അത്ഭുതകരമായ സാംസ്കാരിക പ്രകടനങ്ങളും ഇതിനെ പ്രതിഫലിപ്പിക്കുന്നു. ഒരു ഇന്ത്യ - മികച്ച ഇന്ത്യ എന്ന വികാരം രാജ്യത്തിന്റെ വലിയ ശക്തിയാണ്. ഈ ദിവസങ്ങളിൽ പ്രയാഗിൽ നടക്കുന്ന മഹാകുംഭമേളയിലും രാജ്യത്തിന്റെ ഐക്യത്തിന്റെ പ്രതിഫലനം ദൃശ്യമാണ്. അതുകൊണ്ട്, ഈ മഹാ കുംഭമേള ഐക്യത്തിന്റെ മഹാ കുംഭമേളയാണ്. രാജ്യത്തിന്റെ പുരോഗതിക്ക് ഈ ഐക്യം ആവശ്യമാണ്.

സുഹൃത്തുക്കളേ,

നിങ്ങൾ എപ്പോഴും നിങ്ങളുടെ കടമകൾ മനസ്സിൽ സൂക്ഷിക്കണം. കടമകളുടെ അടിത്തറയിൽ ഒരു മഹത്തായതും ദിവ്യവുമായ വികസിത ഇന്ത്യ കെട്ടിപ്പടുക്കപ്പെടും.

സുഹൃത്തുക്കളേ,

ഇന്ന് ഞാൻ നിങ്ങളുടെ ഇടയിലേക്ക് വരുമ്പോൾ, നിങ്ങളുടെ തീക്ഷ്ണതയും ആവേശവും ഞാൻ കാണുന്നു, ഒരിക്കൽ ഞാൻ ചില വരികൾ എഴുതിയിരുന്നു, ആ വരികൾ ഇന്ന് എൻ്റെ മനസ്സിലേക്ക് വരുന്നു, ഒരു കാലത്ത് ഞാൻ എഴുതിയിരുന്നു-

असंख्य भुजाओं की शक्ति है, हर तरफ देश की भक्ति है

तुम उठो तिरंगा लहरा दो, भारत के भाग्य को फहरा दो

कुछ ऐसा नहीं जो कर ना सको, कुछ ऐसा नहीं जो पा ना सको

तुम उठ जाओ, तुम जुट जाओ

सामर्थ्य को अपने पहचानो, कर्तव्य को अपने सब जानो !

സുഹൃത്തുക്കളേ,

ഒരിക്കൽ കൂടി, നിങ്ങളുടെ ശോഭനമായ ഭാവിക്കായി ഞാൻ നിങ്ങൾക്ക് എല്ലാ ആശംസകളും നേരുന്നു ഒപ്പം നിങ്ങൾക്കെല്ലാവർക്കും നന്ദി. എന്നോടൊപ്പം പറയൂ -

ഭാരത് മാതാ കീ ജയ്.

ഭാരത് മാതാ കീ ജയ്.

ഭാരത് മാതാ കീ ജയ്.

വന്ദേമാതരം. വന്ദേമാതരം.

വന്ദേമാതരം. വന്ദേമാതരം.

വന്ദേമാതരം. വന്ദേമാതരം.

വന്ദേമാതരം

****