وشاکھاپٹنم کے جادوئی ساحل پر جیسے ہی صبح ہوئی اور خلیج بنگال کی لہریں سرگوشیاں کرنے لگیں، وزیر اعظم جناب نریندر مودی نے یوگا کے 11ویں بین الاقوامی دن کو منانے میں ملک اور دنیا بھر میں یوگا کے شائقین کی قیادت کی۔ دنیا کے اب تک کے سب سے بڑے یوگا اجتماع سے خطاب کرتے ہوئے، جسے اب گنیز بک آف ورلڈ ریکارڈ میں شامل کیا گیا ہے، وزیر اعظم نے سمندر کے کنارے تاریخی یوگا سیشن میں ہندوستان اور بیرون ملک کے ہزاروں شرکا کے ساتھ شمولیت اختیار کی۔

ملک گیر تقریب میں وزیر اعظم جناب نریندر مودی کے ساتھ آندھرا پردیش کے گورنر جناب عبدالنذیر اور آندھرا پردیش کے وزیر اعلیٰ جناب این چندرا بابو نائیڈو گارو بھی شامل تھے۔ مرکزی وزیر برائے شہری ہوا بازی جناب رام موہن نائیڈو گارو اور مرکزی وزیر مملکت (آزادانہ چارج) آیوش اور صحت اور خاندانی بہبود کے وزیر مملکت جناب پرتاپ راؤ جادھو بھی مرکزی وزیر مملکت ڈاکٹر چندر شیکھر پیمسانی کے ساتھ موجود تھے۔ نائب وزیر اعلیٰ جناب پون کلیان گارو اور ریاستی کابینہ کے وزیر جناب نارا لوکیش گارو بھی اس موقع پر موجود تھے۔

یوگا کے بین الاقوامی دن پر ہندوستان اور دنیا بھر کے لوگوں کو گرمجوشی سے مبارکباد پیش کرتے ہوئے، وزیر اعظم نے اس بات پر روشنی ڈالی کہ اس سال 11 واں موقع ہے جب دنیا 21 جون کو اجتماعی طور پر یوگا کی مشق کرنے کے لیے اکٹھا ہوئی ہے۔ انھوں نے تبصرہ کیا کہ یوگا کا جوہر ”متحد ہونا“ ہے اور یہ دیکھ کر خوشی ہوتی ہے کہ یوگا نے دنیا کو کس طرح متحد کیا ہے۔

گزشتہ ایک دہائی میں یوگا کے سفر پر روشنی ڈالتے ہوئے، جناب مودی نے اس لمحے کو یاد کیا جب ہندوستان نے اقوام متحدہ میں بین الاقوامی یوگا دن کا خیال پیش کیا تھا۔ انھوں نے کہا کہ 175 ممالک نے اس تجویز کی حمایت کی، جو اس طرح کے وسیع عالمی اتحاد کی ایک نادر مثال ہے۔ انھوں نے اس بات پر زور دیا کہ یہ حمایت محض ایک تجویز کے لیے نہیں تھی بلکہ انسانیت کی عظیم تر بھلائی کے لیے دنیا کی اجتماعی کوششوں کی نمائندگی کرتی ہے۔ انھوں نے مزید کہا کہ گیارہ سال بعد یوگا دنیا بھر میں لاکھوں لوگوں کے طرز زندگی کا ایک لازمی حصہ بن چکا ہے۔

وزیر اعظم نے یہ دیکھ کر فخر کا اظہار کیا کہ کس طرح معذور افراد بریل میں یوگک متن پڑھ رہے ہیں اور کس طرح سائنسدان خلا میں یوگا کی مشق کر رہے ہیں۔ انھوں نے یوگا اولمپیاڈ میں دیہی علاقوں کے نوجوانوں کی پرجوش شرکت کا بھی ذکر کیا۔ جناب مودی نے اس بات پر زور دیا کہ چاہے یہ سڈنی اوپیرا ہاؤس کی سیڑھیاں ہوں، ماؤنٹ ایورسٹ کی چوٹی ہو یا وسیع و عریض سمندر ہو، پیغام صرف ایک ہی ہے، ”یوگا سرحدوں، پس منظر عمر یا قابلیت سے پرے ہر کسی کے لیے اور سب کے لیے ہے۔“

وزیر اعظم نے وشاکھاپٹنم میں اپنی موجودگی پر مسرت کا اظہار کرتے ہوئے اسے قدرتی حسن اور جدید ترقی کا ایک متحرک امتزاج قرار دیا۔ یوگا کے بین الاقوامی دن کی تقریب کی ستائش کرتے ہوئے، انھوں نے این چندرابابو نائیڈو اور جناب پون کلیان کو ان کی بصیرت انگیز قیادت کے لیے سراہا۔ انہوں نے یوگندھرا ابھیان کے آغاز کی بھی ستائش کی جو ریاست کی طرف سے ان کی سرپرستی میں ایک اہم پہل ہے۔

اس بات پر روشنی ڈالتے ہوئے کہ دو کروڑ سے زیادہ لوگوں نے یوگندھرا ابھیان میں حصہ لیا ہے، وزیر اعظم نے کہا کہ یہ زبردست عوامی ردعمل جن بھاگیداری کے جذبے کی عکاسی کرتا ہے جو وکست بھارت کی بنیاد رکھتا ہے۔

آیوش کے مرکزی وزیر مملکت (آزادانہ چارج) اور صحت اور خاندانی بہبود کے وزیر مملکت جناب پرتاپ راؤ جادھو نے اپنی استقبالی تقریر میں کہا کہ ”وزیر اعظم جناب نریندر مودی جی نے یوگا کا عالمی دن منانے کے لیے اقوام متحدہ کی جنرل اسمبلی میں قرارداد منظور کروانے کا بے مثال قدم اٹھایا ہے۔ یہ اقدام اب 180 سے زیادہ ممالک میں منایا جانے والی عالمی صحت عامہ کی تحریک میں تبدیل ہو گیا ہے۔“

جناب پرتاپ راؤ جادھو نے مزید کہا کہ اس تحریک کی ایک دہائی مکمل کرنے کے موقع پر، ”ہم نے اس سال 10 خصوصی پروگراموں کا آغاز کیا ہے۔ ان میں ہرت یوگا (گرین یوگا) کے ساتھ درخت لگانے، یوگا کنیکٹ، یوگا پارک، یوگا بندھن، یوگا مہا کمبھ اور یوگا سنگم شامل ہیں، جو ملک بھر میں 10 لاکھ (10 لاکھ) تنظیموں کے ذریعے منائے جارہے ہیں۔“

آندھرا پردیش حکومت کو مبارک باد دیتے ہوئے مرکزی آیوش وزیر نے کہا کہ ”وزیراعلیٰ چندرابابو نائیڈو کی قیادت میں 21 مئی کو آندھرا پردیش میں ”یوگ آندھرا ابھیان“ کا آغاز کیا گیا تھا۔ اس مہم کے ایک حصے کے طور پر، 22,000 سے زیادہ قبائلی طلبا نے سوریہ نمسکار کے 12 چکر لگائے اور کل 15 منٹ میں اپنا نام عالمی کتاب میں درج کر لیا۔“

انھوں نے مزید کہا کہ وزیر اعظم سے متاثر ہو کر آیوش کی وزارت نے عوام میں صحت بخش خوراک کو فروغ دینے کے لیے ایک چھوٹی سی پہل کی ہے اور آج دہلی میں 70 مقامات پر وزارت نے اس آئی ڈی وائی پروگرام کے تمام شرکا میں آیوش آہار (آیوش ڈائٹ) تقسیم کیا ہے۔

آندھرا پردیش کو اس تاریخی تقریب کی میزبانی کا اعزاز دینے پر وزیر اعظم کا شکریہ ادا کرتے ہوئے چیف منسٹر جناب چندرا بابو نائیڈو نے کہا کہ آندھرا پردیش نے 11ویں بین الاقوامی یوگا ڈے کو بے مثال جوش و خروش کے ساتھ منایا کیونکہ 3 لاکھ سے زیادہ شہری وشاکھاپٹنم میں بڑے پیمانے پر یوگا کے مظاہرے کے لیے جمع ہوئے تھے۔ انھوں نے کہا، ”یہ تقریب ایک مہینے تک چلنے والی کامیاب یوگندھرا مہم کے ساتھ اختتام پذیر ہوئی جس میں ریاست بھر میں 2.17 کروڑ شرکا نے شرکت کی، جس نے کئی ریکارڈ بھی بنائے۔“

مرکزی وزیر دفاع جناب راج ناتھ سنگھ ادھم پور میں آئی ڈی وائی کی تقریبات میں شامل ہوئے۔ انھوں نے کہا، ”یوگا کی قدیم روایت جو ہمارے سنتوں نے منتقل کی تھی اب عالمی سطح پر اس کی پیروی کی جارہی ہے۔ ہندوستان میں یوگا صرف ایک مشق نہیں ہے، یہ زندگی کا ایک طریقہ ہے۔“

وزیر داخلہ جناب امت شاہ احمد آباد میں آئی ڈی وائی کی تقریبات میں شامل ہوئے اور ”X“ پر لکھا کہ یوگا جسم اور دماغ میں اتحاد پیدا کرتا ہے اور پوری دنیا کے لوگوں کے روزمرہ کے معمولات کا ایک لازمی حصہ بن گیا ہے۔

ملک گیر جوش میں اضافہ کرتے ہوئے، صحت اور خاندانی بہبود اور کیمیکل اور کھاد کے مرکزی وزیر، جناب جگت پرکاش نڈا نے بھی نئی دہلی کے کرتویہ پاتھ میں یوگا کے عالمی دن کی تقریبات میں شرکت کی۔ گزشتہ دہائی کے دوران یوگا کے تبدیلی کے سفر پر روشنی ڈالتے ہوئے، انھوں نے سوشل میڈیا پلیٹ فارم X پر پوسٹ کیا کہ، ”یوگا ہماری جسمانی، ذہنی اور روحانی جہتوں میں توازن کو فروغ دیتا ہے، جس سے ایک صحت مند اور زیادہ بھرپور زندگی کو اپنایا جا سکتا ہے۔ یہ عزت مآب وزیر اعظم جناب نریندر مودی کی دور اندیش قیادت کی وجہ سے ہے کہ یوگا کو عالمی سطح پر پہچان ملی ہے۔ گزشتہ 10 سالوں میں، دنیا بھر میں لوگوں نے یوگا کو اپنی روزمرہ کی زندگی کا ایک لازمی حصہ بنا لیا ہے۔' جناب نڈا نے یوگا کے 11ویں بین الاقوامی دن کے موقع پر تمام شہریوں سے اپنی دلی خواہش کا اظہار کرتے ہوئے ان پر زور دیا کہ وہ یوگا کو ایک طرز زندگی کے طور پر جاری رکھیں اور اسے فروغ دیں۔

قابل ذکر ہے کہ یوگا کے 11ویں بین الاقوامی دن کے موقع پر آج دہلی میں 100 سے زیادہ تقاریب کا اہتمام کیا گیا۔

********

ش ح۔ ف ش ع

                                                                                                                                       U: 1997