పెన్షన్ ఫండ్ రెగ్యులేటరీ - డెవలప్‌మెంట్ అథారిటీ (పీఎఫ్ఆర్‌డీఏ) చైర్‌పర్సన్‌గా శ్రీ శివసుబ్రమణియన్ రామన్ ఈరోజు బాధ్యతలు స్వీకరించారు. భారత ప్రభుత్వం 2025, ఏప్రిల్ 8న జారీ చేసిన నోటిఫికేషన్ ద్వారా ఆయనను అయిదు సంవత్సరాల పదవీకాలానికి చైర్‌పర్సన్‌గా నియమించింది. ఈ పదవీ బాధ్యతలు స్వీకరించిన తేదీ నుంచి అయిదేళ్లు లేదా ఆయనకు 65 సంవత్సరాల వయస్సు వచ్చే వరకు లేదా తదుపరి ఉత్తర్వులు ఇచ్చే వరకు, వీటిలో ఏది ముందుగా జరిగితే ఆ రోజు వరకు శివసుబ్రమణియన్ ఈ పదవిలో కొనసాగనున్నారు.

శ్రీ రామన్ 1991 బ్యాచ్ ఇండియన్ ఆడిట్-అకౌంట్స్ సర్వీస్ (ఐఏ-ఏఎస్) అధికారి. పీఎఫ్ఆర్‌డీఏలో చేరడానికి ముందు, ఆయన భారత కంప్ట్రోలర్ అండ్ ఆడిటర్ జనరల్ కార్యాలయంలో డిప్యూటీ కంప్ట్రోలర్ ఆడిటర్ జనరల్‌గా, చీఫ్ టెక్నాలజీ ఆఫీసర్‌గా పనిచేశారు. ఆయన గతంలో స్మాల్ ఇండస్ట్రీస్ డెవలప్‌మెంట్ బ్యాంక్ ఆఫ్ ఇండియా (ఎస్ఐడీబీఐ) చైర్మన్ కమ్ మేనేజింగ్ డైరెక్టర్‌గా.. నేషనల్ ఇ-గవర్నెన్స్ సర్వీసెస్ లిమిటెడ్ (ఎన్ఈఎస్ఎల్) మేనేజింగ్ డైరెక్టర్, చీఫ్ ఎగ్జిక్యూటివ్ ఆఫీసర్‌గా.. జార్ఖండ్ రాష్ట్ర ప్రిన్సిపల్ అకౌంటెంట్ జనరల్‌గా.. అనేక కీలక పదవుల్లో పనిచేశారు. సెక్యూరిటీస్ – ఎక్స్‌చేంజ్ బోర్డ్ ఆఫ్ ఇండియా (సెబీ)లో 2006 నుంచి 2013 వరకు చీఫ్ జనరల్ మేనేజర్ (సీజీఎమ్)గా, తరువాత ఎగ్జిక్యూటివ్ డైరెక్టర్‌గా కూడా ఆయన పనిచేశారు.

ఢిల్లీ విశ్వవిద్యాలయం నుంచి శ్రీ రామన్ ఆర్థిక శాస్త్రంలో బ్యాచిలర్ డిగ్రీ, ఎమ్‌బీఏ పట్టా పొందారు. లండన్ స్కూల్ ఆఫ్ ఎకనామిక్స్ - పొలిటికల్ సైన్స్ నుంచి ఫైనాన్షియల్ రెగ్యులేషన్‌లో ఎమ్మెస్సీ, ఇండియన్ స్కూల్ ఆఫ్ బిజినెస్ నుంచి ఎల్‌ఎల్‌బీ, పొలిటికల్ చీఫ్ డిజిటల్ ఆఫీసర్ సర్టిఫికేషన్, ఇనిస్టిట్యూట్ ఆఫ్ ఇంటర్నల్ ఆడిటర్స్ (ఐఐఏ), ఫ్లోరిడా నుంచి సర్టిఫైడ్ ఇంటర్నల్ ఆడిటర్ క్రెడెన్షియల్, సెక్యూరిటీస్ లా పోస్ట్ గ్రాడ్యుయేట్ డిప్లొమా వంటి వివిధ ప్రొఫెషనల్, అకడమిక్ అర్హతలను కూడా ఆయన కలిగి ఉన్నారు.

ప్రభుత్వ ఆర్థిక, సాంకేతికత రంగాలు, ఆర్థిక నియంత్రణలో తనకున్న అపార అనుభవంతో.. భారత పెన్షన్ వ్యవస్థను బలోపేతం చేస్తూ, పౌరులందరికీ పదవీ విరమణ భద్రతను ప్రోత్సహించే లక్ష్యంతో శ్రీ రామన్ పీఎఫ్ఆర్‌డీఏకి మార్గనిర్దేశం చేయనున్నారు.

***