জি-৭ মীফমগী নাকলদা প্রধান মন্ত্রী মোদী অমসুং রাষ্ট্রপতি ত্রম্প উনগদবনি। অদুবু, রাষ্ট্রপতি ত্রম্প য়ু.এসতা ঙন্না হনখিবদদগী মীফম পাংথোকখিদ্রে।

মসিগী তুংদা, রাষ্ট্রপতি ত্রম্পনা হায়জরকপদগী, ঙসি লুচিংবা অনি তেলিফোন্দা ৱারি শানখ্রে। ৱারি শানবা অদু চাউরাক্না মিনিত ৩৫ রোম চৎথখি।

এপ্রিল ২২ দা পেহালগামদা তেরোরিস্তশিংনা খুৎথারকখিবগী থৌদোক মতুংদা রাষ্ট্রপতি ত্রম্পনা প্রধান মন্ত্রীনা ফোন তৌরক্তুনা মহাক্না অৱাবা ফোঙদোকখ্রে। মহাক্না তেরোরিজমগী মথক্ত চৎথরিবা থবক অসিশু শৌগৎপা ফোঙদোকখি। মতম অদুদগী হন্দক অসিনা লুচিংবা অনিগী মরক্ত ৱারি শানবা অহানবনি।

মতম অদুদা, প্রধান মন্ত্রী মোঈনা রাষ্ট্রপতি ত্রম্পতা ওপরেসন সিন্দুরগী মতাংদা মরি চুম্না পাউদমখি।

এপ্রিল ২২ গী মতুংদা, তেরোরিজমগী মথক্ত অকনবা থবক পায়খৎনবা লৈবাক অসিনা অচেৎপা ফিরেপ লৌখিবা অদু ভারতনা মালেমদা খঙহল্লে হায়না প্রধান মন্ত্রী মোদীনা রাষ্ট্রপতি ত্রম্পতা ময়েক শেংনা খঙহনখি। প্রধান মন্ত্রীনা হায়খি মদুদি মে ৬ অমসুং মে ৭ গী নুমিদাংদা, পাকিস্তান অমসুং পাকিস্তানগী শরুক্ত লৈরিবা কাস্মিরদা লৈবা তেরোরিস্ত কেম্পশিং খক্তদা ভারতনা লান্দাখি। ভারতকী থবকশিং অকক্নবা মফম খর খক্তদা ওইখি অমসুং লাল কাইহৌবা নত্তে। পাকিস্তান্না চৎথরকপা থবক খুদিংমক লৈবাক অসিনা অকনবা পাউখুম অমা পীগনি হায়না ভারতনা নাখৈ শেংনা ফোঙদোকখি।

মে ৯ গী নুমিদাংদা, উপ রাষ্ট্রপতি বান্সনা প্রধান মন্ত্রী মোদীদা ফোন তৌরকখি। পাকিস্তান্না ভারত্ত য়াম্না চাউনা লান্দারকপা য়াই হায়না উপ রাষ্ট্রপতি বান্সনা খঙহল্লকখি। করিগুম্বা অসিগুম্বা থবক চৎথরক্লবদি, ভারতনা অকনবা পাউখুম অমা পীগনি হায়না প্রধান মন্ত্রী মোদীনা মহাক্কী মফমদা খঙহনখি।

মে ৯ অমসুং মে ১০ গী নুমিদাংদা, ভারতনা পাকিস্তানগী মথক্ত অকনবা পাউখুম অমা পীখি অমসুং পাকিস্তানগী লান্মীদা য়াম্না চাউনা শোকহনখি। মখোয়গী মিলিতরি এয়রবেজশিং শীজিন্নবা য়াদনা থুগায়খি। ভারতকী অকনবা থবক অসিনা মরম ওইদুনা, মিলিতরিগী থবকশিং লেপ্নবা তঙাইফদনা পাকিস্তান্না হায়জবা তাখি।

ভারত অমসুং পাকিস্তানগী মরক্ত য়াশিন্নবা অমা পুরক্নবগী মতাংদা নত্ত্রগা ভারত-য়ু.এস ললোন-ইতিক্কী য়ানবা পুরক্নবা, থাক অমতদা, থৌদোকশিং অসিগী মনুংদা খন্নখিবা অমতা লৈখিদে হায়না প্রধান মন্ত্রীনা নাখৈ শেংনা রাষ্ট্রপতি ত্রম্পদা ফোঙদোকখ্রে। লৈবাক অনিগী আর্মদ ফোর্সশিংগী মরক্ত লৈনরিবা ই-পাউ ফাওন্নবা চেন্নেলশিংগী খুৎথাংদা ভারত অমসুং পাকিস্তানগী মরক্ত মিলিতরিগী থবকশিং লেপ্নবা খন্নখি অমসুং মসি পাকিস্তান্না হায়না হায়জবা হৌরকখিবনি। অতোপ্পা লৈবাক অমনা ৱায়েন অসিদা ভারতনা কৈদৌঙৈদা য়ারোই হায়না প্রধান মন্ত্রীনা ফোঙদোকখি। হিরম অসিগী মতাংদা ভারত্ত রাজনিতিগী অমতা ওইবা ৱাখল্লোন লৈরি।

প্রধান মন্ত্রীগী ৱাফমশিং রাষ্ট্রপতি ত্রম্পনা নিংথিনা তাখি অমসুং তেরোরিজমগী মায়োক্ত ভারতনা পায়খৎলিবা থবকশিং মহাক্না শৌগৎপা ফোঙদোকখি। প্রধান মন্ত্রী মোদীনা হায়খি মদুদি ভারতনা মখা তানা তেরোরিজম অসি প্রোক্সি ৱার অমনি হায়না উদ্রে, মসি লাল অমনি অমসুং ভারতকী ওপরেসন সিন্দুর হৌজিক চৎথরি।

মহাক্না কনাদাগী হল্লকপদা প্রধান মন্ত্রী মোদী য়ু.এসতা পনবা য়াগদরা হায়না রাষ্ট্রপতি ত্রম্পনা হংখি। হান্না য়ানখিবা থবকশিং লৈবনা, মহাক পনবা ঙম্লরোই হায়না প্রধান মন্ত্রী মোদীনা ফোঙদোকখি। তুংদা উন্নবা থবকশিং পায়খৎনবা লুচিংবা অনিমক্না য়ানখ্রে।

হৌজিক ইজরেল অমসুং ইরানগী মরক্ত লাল তৌনরিবা অসিগী মতাংদশু রাষ্ট্রপতি ত্রম্প অমসুং প্রধান মন্ত্রী মোদীনা খন্নখি। রুসিয়া-য়ুক্রেন্দা শান্তি পুরক্নবা লৈবাক অনি ৱারি শান্নবগী তঙাইফদবা অমসুং মসি থবক ওইনা পাংথোক্নবা মখা তানা থবকশিং পায়খৎনবা লুচিংবা অনিনা য়ানখ্রে।

ইন্দো-পেসিফিক লমদমগী মতাংদা, লুচিংবা অনিমক্না মখোয়গী ৱাখল্লোনশিং ফোঙদোক্নখি অমসুং লমদম অসিদা ক্বাদনা লৌরিবা শিংথানিংঙাই ওইবা থৌদাং মখোয়না শৌগৎখি। মথংগী ক্বাদ মীফম শরুক য়ানবা ভারত্ত লাক্নবা প্রধান মন্ত্রী মোদীনা রাষ্ট্রপতি ত্রম্পতা চেবাউ পীখি। রাষ্ট্রপতি ত্রম্পনা চেবাউ অদু লৌশিনখি অমসুং মহাক ভারত্ত চৎকনি হায়না ফোঙদোকখি।

দিসক্লেমর: মসি ফোরেন সেক্রেতরিগী ৱারোলদগী চাউরাক্না হন্দোকপনি। অশেংবা ৱারোল হিন্দীদা পীখি।

***