وزیر دفاع جناب راج ناتھ سنگھ نے 4 جون 2025 کو نئی دہلی میں آسٹریلیا کے نائب وزیر اعظم اور وزیر دفاع جناب  رچرڈ مارلس کے ساتھ دو طرفہ میٹنگ کی۔ دونوں وزراء نے پہلگام میں دہشت گردانہ حملے کی سخت مذمت کی اور متاثرہ خاندانوں کے ساتھ گہری تعزیت کا اظہار کیا۔ وزیردفاع نے سرحد پار دہشت گردی کے خلاف اپنے دفاع میں جواب دینے کے ہندوستان کے حق پر روشنی ڈالی اور پاکستان کے خلاف نئی دہلی کے اقدامات کو ناپے تولے، غیر اشتعال انگیز، متناسب اور ذمہ دار قرار دیا۔ دونوں فریقوں نے دہشت گردی کی تمام شکلوں سے نمٹنے کے لیے مل کر کام کرنے پر اتفاق کیا۔

میٹنگ کے بعد ایکس پر ایک پوسٹ کے ذریعے، وزیر دفاع نے پہلگام میں دہشت گردی کی وحشیانہ کارروائی کے خلاف ہندوستان کے پُرعزم ردعمل کے لیے اس کی واضح حمایت کے لیے آسٹریلیا کا شکریہ ادا کیا۔

دونوں وزراء نے آسٹریلیا-بھارت مشترکہ تحقیقی پروجیکٹ پر دستخط کا خیرمقدم کیا اور دفاعی صنعت میں تعاون کو تیز اور متنوع بنانے پر اتفاق کیا۔ انہوں نے دفاعی سائنس اور ٹکنالوجی کے تعاون کے منصوبوں کو آگے بڑھانے پر غور کیا جب وہ اس سال کے آخر میں آسٹریلیا میں تیسری ہندوستان-آسٹریلیا 2+2 وزارتی میٹنگ کے لئے ملیں گے۔ انہوں نے نومبر 2023 میں منعقدہ آخری 2+2 وزارتی مذاکرات کے بعد ہونے والی پیش رفت کا بھی جائزہ لیا۔

ملاقات نے دونوں فریقوں کو ابھرتے ہوئے علاقائی اور عالمی منظرناموں کے تناظر میں دو طرفہ مصروفیات کی صورتحال کا جائزہ لینے کا موقع فراہم کیا۔ بات چیت میں دفاعی اسٹریٹجک تعاون اور سلامتی جیسے مسائل،بشمول صنعت تعاون، سائبر اور نئی ابھرتی ہوئی ٹیکنالوجیز، انسداد دہشت گردی، ہائیڈروگرافی اور میری ٹائم سلامتی ایک وسیع رینج کا احاطہ کیا گیا۔ دونوں فریقین نے باہمی دلچسپی کے علاقائی اور عالمی سلامتی کے امور پر بھی تبادلہ خیال کیا۔

ہندوستان-آسٹریلیا جامع اسٹریٹجک پارٹنرشپ پر دستخط کی پانچویں سالگرہ پر، دونوں فریقوں نے اطمینان کا اظہار کیا اور تسلیم کیا کہ دفاع تعاون کے ایک اہم ستون کے طور پر ابھرا ہے۔ دونوں ممالک نے دو طرفہ  ممالک کے درمیان بڑھتے ہوئے اسٹریٹجک کنورجنسی پر اطمینان کا اظہار کیا اور بحر ہند اور بحرالکاہل کے جزیرے کے آزاد اور کھلے علاقے کے لیے مل کر کام کرنے پر اتفاق کیا۔

دونوں فریقوں نے دوطرفہ دفاعی تعاون کو جاری رکھنے اور ہند-بحرالکاہل خطے میں امن، خوشحالی، استحکام اور ترقی کے اپنے مشترکہ مقصد کے حصول کے لیے اپنے عزم پر زور دیا۔

وزیر دفاع نے آسٹریلیا میں حال ہی میں ہونے والے وفاقی انتخابات میں لیبر پارٹی کی شاندار کامیابی کے بعد جناب  رچرڈ مارلس کو ان کی دوبارہ تقرری پر مبارکباد دی۔

قبل ازیں آسٹریلیا کے نائب وزیراعظم اور وزیر دفاع نے نیشنل وار میموریل پر پھولوں کی چادر چڑھائی اور شہید ہونے والے ہیروز کو خراج عقیدت پیش کیا۔

مانیک شا سنٹر میں بات چیت سے قبل مہمان معزز کا سہ فریقی گارڈ آف آنر کے ساتھ رسمی استقبال کیا گیا۔

جناب مارلس 3 اور 4 جون 2025 کو ہندوستان کے سرکاری دورے پر ہیں۔ آسٹریلیا کے نائب وزیر اعظم اور وزیر دفاع کے طور پر ان کی دوبارہ تقرری کے بعد یہ ہندوستان کا ان کا پہلا دورہ ہے۔

ش ح۔ اس ک۔ ج

Uno1437