U Myntri sorkar pdeng ba dei khmih ia ka tnad Ports, Shipping & Waterways (MoPSW),  u la ïashim bynta ha ka jingialang ïasoi ia ka MoU ba kongsan hapdeng ka Garden Reach Shipbuilders and Engineers Limited (GRSE) kaba don ha Kolkata bad ka Kongsberg Oslo jong ka Norway mynta ka sngi. Ka MoU ka plie lad ia ka India ban shna ha ka ri ia ka Polar Research Vessel (PRV) kaba nyngkong eh jong ka ri.

Haba ai jingkren ha kane ka jingialang, u Sarbananda Sonowal u la ong, “Ai ba kane ka jingsoi MoU kan long ka dak jong ka jingkyrmen bad ka jingkiew shaphrang, kaba pyni ïa ka jingshimkhia ba khlem artatien jong ka India na ka bynta ka jingkiew ha ka science bad ka roi ka par kaba iaineh. Ryngkat, ngi shna ym tang ia ka lieng hynrei ia ka pateng—ka pateng jong ka jingsaindur, ka jingwad bniah, bad ka jingiatreilang hapdeng ki ri ka ban ai mynsiem ia ki pateng ban wan. Hapoh ka jingïalam jong u Myntri Rangbahduh Narendra Modi ji, kane ka MoU ka dei ka jingkular ban kyntiew ïa ka jingwad bniah ha ka liang ka science, ban kyntiew ïa ki sap jong ka India ha ka jingwad bniah ha ki jaka sop thah bad duriaw, bad ban nohsynñiang sha ki sienjam ha ka pyrthei ban weng ïa ki jingeh kum ka jingkylla ka suiñbneng. Ia kane ka lieng yn pynbit pynbiang da ki tiar science kiba thymmai tam, ki ban iarap ia ki nongwad bniah jong ngi ban wad bniah ia ki jingjylliew jong ki duriaw, ban peit ia ka jinglong jingman jong ki jingim ha duriaw, bad ban plie ia ki jingshem thymmai shaphang ka pyrthei jong ngi kaba la leit noh, kaba mynta bad ka lawei. Kane kan long ka dak jong ki sap ba kongsan jong ka India ban shna lieng — ban kyntiew shuh shuh ïa ka sienjam ‘Make In India’ jong ka sorkar. Nga ai khublei ïa baroh ki nongshim bynta na ka bynta ka jingaiti lut jong ki bad nga khmih lynti ïa ka sngi ba kane ka Polar Research Vessel kan mih, ban rah ïa ki jingthmu jong ka India sha ki jaka ba jngai tam jong ka pyrthei.”

Ka MoU hapdeng ka GRSE bad ka Knogsberg ka dei u mawmer ba kongsan na ka bynta ka kam shna lieng jong ka India namar kan ïoh ïa ka jingstad ha ka jingsaindur na ka bynta ban pynmih ïa ka PRV, katba ka shimkhia ïa ka jingdonkam jong ka National Centre for Polar and Ocean Research (NCOPR), ka ban pyndonkam ïa ka na ka bynta ki kam wad bniah ha ki jaka ba shathie bad ki duriaw ha ka thain shathie. Ka GRSE, lyngba ka jingshemphang jong ka ban shna ïa ki rynsan ba bun bynta kum ki lieng iakhun, ki lieng jurip & wad bniah, kan shna ïa kane ka PRV ha jaka jong ka ha Kolkata, kaba pynthikna ïa ka jingkyntiew ïa ka sienjam ‘Make In India’ jong ka sorkar. Ki nongialam jong ka Kongsberg bad kumjuh ruh ka GRSE ki la iadon lang bad u Myntri sorkar pdeng, ki ophisar sorkar na Norway bad India ha kane ka jingialang.

U Sonowal u pynskhem biang ia ka jingthmu MAHASAGAR jong ka India ha ka jingialang Shipping & Ocean Business

U Myntri Sorkar Pdeng Sarbananda Sonowal u la mihkhmat ruh ïa ka India ha ka jingïalang jong ki Myntri ba hakhlieh duh halor ka ‘Role of Shipping in Shaping the Future.’ Ha ka jingïalang la ban jur ïa ka jingdonkam jong ka karkhana ban pyniahap bad ka jinglong jingman kaba skhem, ki kyndon kiba slem samoi ha kaba iadei bad ka mariang kaba kyrshan ïa ka jingkhaii kaba kynthup lang bad kaba la pynduh ïa ka carbon. Ki Myntri na Brazil, Japan, UN, US, China, bad Norway ki la ia snohkti lang bad u Sonowal ha kane ka jingialang.

Haba ai jingkren ha ka jingialang, u Myntri Sorkar pdeng Sarbananda Sonowal u la ong, “U Myntri Rangbah duh Narendra Modi u la pynbna ia ka thong jong ka India na ka bynta ka “roi ka par ia baroh”, kaba la pynpaw kum ka SAGAR (Security and Growth for All in the Region). Ka jingthmu ba kongsan jong kane ka thong ka pyndonkam ia ka rud duriaw kaba heh jong ka India, ka jaka kaba donkam, bad ka kam duriaw ban wanrah ia ka roi ka par, ban kyntiew ia ka jingshngain ha ka thain, bad ban pynthikna ia ka jingroi kaba iaineh na ka bynta baroh ki nongshim bynta. Kane ka kynthup ia ka jingiatreilang ha ka ioh ka kot, ka jingkyntiew ia ka bor, ka jingiada na ki jingjia lynshop ka mariang, ka jingsam jingtip bad ka jingsumar ia ka mariang. Da kaba kyntiew na ka sienjam SAGAR, u Myntri Rangbah duh Narendra Modi u la pynbna ïa ka MAHASAGAR — kaba dei ka jingïaid shaphrang na ka bynta ka jingshngaiñ ha kylleng ki thaiñ, kaba pynpaw ïa ka jingpynskhem shuh shuh bad ka rukom treikam kaba la pynïar sha ka jingïatreilang bad ka jingkiew shaphrang ha ka kam duriaw.”

U Sarbananda Sonowal u la bynrap shuh shuh, “Da kaba tei ïa ka jingjop jong ka bynta ba nyngkong, ka prokram Sagarmala 2.0 jong ka Tnad ba nga dei khmih, ka pynleit jingmut ha kaba pyndap ïa ki jingduna kiba kongsan ha ki jingdon jingem, ban kyntiew ïa ka jingshna lieng, ka jingmaramot ïa ki lieng, bad ka jingpyndonkam biang ïa ki mar, bad ban buh ïa ka India kum ka nongïalam ha ka kam khaii duriaw ha ka pyrthei. Ka jingthmu jong ka sorkar India halor ka kam pynkit mar da ki lieng bad ka kam khaii lyngba ki duriaw ka long ban kyntiew ia ka roi ka par kaba pura bad kaba ai jingmyntoi lang, lyngba ka jingiatreilang kaba khlain hapdeng ki ri, bad ka jingaiti kaba khlain ha ka jingpynneh pynsah bad ki sienjam ba iadei bad ka jingkhuid.

U Myntri sorkar pdeng Sarbananda Sonowal u la pynlong jingialang bad ki trai lieng na Norway, u la khot sngewbha ia ka jingbei tyngka ha ka kam duriaw jong ka India

U Myntri sorkar pdeng ba dei khmih ia ka Tnad Ports, Shipping and Waterways, Sarbananda Sonowal u la khot sngewbha ïa ki trai lieng na Norway ban bei tyngka ha ka kam duriaw jong ka ri India kaba dang kiew ha ka jingïalang bad ka Norwegian Shipowners’ Association (NSA) hangne mynta ka sngi. Haba ai khublei ïa u President ka NSA, u Harald Fotland uba la pynlong ïa ka jingïakren, u Sonowal u la pynpaw ïa ki jingiahap jingmut ka India bad ka Norway ha ka jingpynneh pynsah, ka jingsaindur thymmai, bad ka jingioh myntoi lang. “Ka kam duriaw jong ka India ka don ha ka lynti kaba pynkylla, kaba kyntiew ia ka jingiaineh, ka jingsaindur thymmai, bad ki jingïatreilang ha ka pyrthei. Ngi khot sngewbha ïa ka jingïatreilang kaba kham khraw bad ka Norway ban tei ïa ka jinglong jingman kaba khuid, kaba stad, bad kaba skhem ha ki kam duriaw. Lyngba ki jingbei tyngka ha ki kad lieng kiba khuid, ki lad pyndonkam umphniang kum ka green hydrogen, bad ki jingioh jingmyntoi ba kongsan, ka India ka thmu ban long ka nongïalam ha ka pyrthei ha ka jingshna lieng. Ka jingiatreilang jong ngi kaba nang kiew bad ka Norway — kaba paw ha ki jaka shna lieng jong ka India kiba pynpoi ia ki lieng kiba thymmai sha ki kompeni jong ka Norway — ka pyni ia ka jingmih jong ka India kum ka jaka kaba lah ban shaniah, kaba la pynkhreh na ka bynta ka lawei na ka bynta ki lad pynbeit kiba jem dor bad kiba lah ban neh. To ngin pynkhlaiñ lang ïa kane ka kam,” la ong u Myntri Sorkar Pdeng, Sarbananda Sonowal

Ha kane ka jingïalang, u Sarbananda Sonowal u la pynpaw ïa ki bynta ba kongsan na ka bynta ka jingïatreilang hapdeng ka India bad ka Norway ha ka kam duriaw. U la ong ba ki karkhana shna lieng ha India mynta ki bat 11% na ka kot jingpan mar jong ka Norwegian Shipowners’ Association (NSA). U la kyntu ban pynïar shuh shuh ïa ki jingpan mar, kynthup ïa ka jingpyndonkam ïa ka skhim ai ram jong ka India ban pynpra ïa ki lieng ba rim. Da kaba ban jur ïa ka bor trei kam ha ki duriaw kaba khlaiñ jong ka India—kaba don ha ka kyrdan kaba ar ha ki kynhun suiñ jong ka NSA ha ka pyrthei—u la kyntu ïa ki jingïatreilang kiba kham iar ha kaba thung kam. U la pynpaw ruh ïa ki lad bei tyngka kiba kongsan kiba don hapoh ka prokram Sagarmala jong ka India $2.9 billion ka Maritime Development Fund, kaba ai jingmyntoi ha ki kam shna lieng, ki kad liengsuiñ, bad ki kam logistics. U Myntri Sorkar Pdeng u la ban jur ïa ka jingangnud jong ka India ban thaw thymmai lyngba ki lad digital kum ka ONOP bad ka MAITRI bad u la khot ïa ka jingïatreilang jong ka Norway ha ki lynti ïaid lieng kiba khuid, ka jingpyndonkam biang ia ki lieng ba rim, bad ki thong net zero jong ka IMO, da kaba kdew ba 87% na ki jaka pynthymmai biang ïa ki lieng ba rim ha India mynta ki long kiba ïahap bad ka HKC.

U Myntri Sorkar Pdeng Sarbananda Sonowal u don ha ka jingleit jngoh ba san sngi sha Norway ban ïashim bynta ha ka jingïalang jong ka Nor-Shipping bad kumjuh ruh sha Denmark, da ka jingthmu ban pynkhlaiñ shuh shuh ïa ka jingïadei ha ka kam duriaw bad ki nongïalam jong ka kam duriaw jong ka pyrthei.

***