ਕੇਂਦਰੀ ਵਣਜ ਅਤੇ ਉਦਯੋਗ ਮੰਤਰੀ ਸ਼੍ਰੀ ਪੀਯੂਸ਼ ਗੋਇਲ ਨੇ 1 ਜੂਨ, 2025 ਨੂੰ ਫਰਾਂਸ ਦੀ ਤਿੰਨ ਦਿਨਾਂ ਸਰਕਾਰੀ ਯਾਤਰਾ ਸ਼ੁਰੂ ਕੀਤੀ। ਇਹ ਯਾਤਰਾ 1-5 ਜੂਨ 2025 ਤੱਕ ਫਰਾਂਸ ਅਤੇ ਇਟਲੀ ਦੀ ਉਨ੍ਹਾਂ ਦੀ ਚਲ ਰਹੀ ਯਾਤਰਾ ਦਾ ਹਿੱਸਾ ਹੈ। ਇਹ ਯਾਤਰਾ ਪ੍ਰਮੁੱਖ ਯੂਰੋਪੀਅਨ ਭਾਗੀਦਾਰਾਂ ਦੇ ਨਾਲ ਰਣਨੀਤਕ ਅਤੇ ਆਰਥਿਕ ਸਬੰਧਾਂ ਨੂੰ ਗਹਿਰਾ ਕਰਨ ਅਤੇ ਲਚਕੀਲੇ ਅਤੇ ਸਮਾਵੇਸ਼ੀ ਗਲੋਬਲ ਵਿਕਾਸ ਦੇ ਲਈ ਸਾਂਝੇ ਦ੍ਰਿਸ਼ਟੀਕੋਣ ਨੂੰ ਅੱਗੇ ਵਧਾਉਣ ਦੀ ਭਾਰਤ ਦੀ ਨਿਰੰਤਰ ਪ੍ਰਤੀਬੱਧਤਾ ਨੂੰ ਦਰਸਾਉਂਦੀ ਹੈ।

ਫਰਾਂਸ ਵਿੱਚ ਆਪਣੇ ਪ੍ਰੋਗਰਾਮਾਂ ਦੌਰਾਨ, ਸ਼੍ਰੀ ਗੋਇਲ ਫਰਾਂਸ ਦੇ ਮੰਤਰੀਆਂ ਦੇ ਨਾਲ ਦੁਵੱਲੀ ਮੀਟਿੰਗਾਂ ਕਰਨਗੇ ਜਿਨ੍ਹਾਂ ਵਿੱਚ ਆਰਥਿਕ ਮੰਤਰੀ ਸ਼੍ਰੀ ਐਰਿਕ ਲੋਮਬਾਰਡ ਅਤੇ ਫਰਾਂਸ ਦੇ ਵਪਾਰ ਮੰਤਰੀ ਸ਼੍ਰੀ ਲੌਰੇਂਟ ਸੇਂਟ ਮਾਰਟਿਨ ਸ਼ਾਮਲ ਹਨ। ਇਹ ਚਰਚਾ ਭਾਰਤ-ਫਰਾਂਸ ਆਰਥਿਕ ਸਾਂਝੇਦਾਰੀ ਨੂੰ ਮਜ਼ਬੂਤ ਕਰਨ ਅਤੇ ਵਪਾਰ ਅਤੇ ਨਿਵੇਸ਼ ਸਹਿਯੋਗ ਵਧਾਉਣ ਦੇ ਨਵੇਂ ਰਾਹ ਖੋਜਣ ‘ਤੇ ਹੋਵਗੀ।

ਫਰਾਂਸ ਦੀ ਉੱਚ ਪੱਧਰੀ ਯਾਤਰਾ ਦੇ ਇੱਕ ਹਿੱਸੇ ਵਜੋਂ, ਰਣਨੀਤਕ ਵਪਾਰਕ ਮੀਟਿੰਗਾਂ ਅਤੇ ਪ੍ਰੋਗਰਾਮਾਂ ਦਾ ਇੱਕ ਵਿਆਪਕ ਏਜੰਡਾ ਨਿਰਧਾਰਿਤ ਕੀਤਾ ਗਿਆ ਹੈ- ਜਿਸ ਵਿੱਚ ਵਿਕੈਟ, ਟੋਟਲ ਐਨਰਜੀਜ਼, ਲੋਰੀਅਲ, ਰੇਨੌਲਟ, ਵੈਲਿਓ, ਈਡੀਐੱਫ ਅਤੇ ਏਟੀਆਰ ਜਿਹੀਆਂ ਪ੍ਰਮੁੱਖ ਫਰਾਂਸੀਸੀ ਕੰਪਨੀਆਂ ਦੀ ਟੌਪ ਲੀਡਰਸ਼ਿਪ ਸ਼ਾਮਲ ਹੋਵੇਗੀ। ਇਸ ਯਾਤਰਾ ਵਿੱਚ ਭਾਰਤ-ਫਰਾਂਸ ਵਪਾਰ ਗੋਲਮੇਜ਼ ਸੰਮੇਲਨ ਅਤੇ ਭਾਰਤ-ਫਰਾਂਸ ਸੀਈਓ ਫੋਰਮ ਦੀ ਮੀਟਿੰਗ ਹੋਵੇਗੀ। ਇਸ ਨਾਲ ਦੋਵਾਂ ਦੇਸ਼ਾਂ ਦੇ ਪ੍ਰਮੁੱਖ ਉਦਯੋਗ ਹਿਤਧਾਰਕਾਂ ਦਰਮਿਆਨ ਸੰਵਾਦ ਨੂੰ ਹੁਲਾਰਾ ਮਿਲੇਗਾ।

ਆਪਣੇ ਪ੍ਰਵਾਸ ਦੌਰਾਨ, ਮੰਤਰੀ ਓਈਸੀਡੀ ਮੰਤਰੀ ਪੱਧਰੀ ਪ੍ਰੀਸ਼ਦ ਦੀ ਮੀਟਿੰਗ ਤੋਂ ਇਲਾਵਾ ਡਬਲਿਊਟੀਓ ਮੰਤਰੀਆਂ ਦੇ ਗੈਰ-ਰਸਮੀ ਇਕੱਠ ਵਿੱਚ ਵੀ ਹਿੱਸਾ ਲੈਣਗੇ। ਇਸ ਮਹੱਤਵਪੂਰਨ ਮੰਚ ‘ਤੇ ਉਹ ਪ੍ਰਮੁੱਖ ਬਹੁਪੱਖੀ ਵਪਾਰ ਮੁੱਦਿਆਂ ‘ਤੇ ਗਲੋਬਲ ਹਮਰੁਤਬਾ ਦੇ ਨਾਲ ਗੱਲਬਾਤ ਕਰਨਗੇ ਅਤੇ ਭਾਰਤ ਦੇ ਦ੍ਰਿਸ਼ਟੀਕੋਣ ਅਤੇ ਪ੍ਰਾਥਮਿਕਤਾਵਾਂ ਨੂੰ ਸਪਸ਼ਟ ਕਰਨਗੇ।

ਇਸ ਯਾਤਰਾ ਦੇ ਹਿੱਸੇ ਵਜੋਂ, ਮੰਤਰੀ ਪ੍ਰਮੁੱਖ ਅੰਤਰਰਾਸ਼ਟਰੀ ਭਾਗੀਦਾਰਾਂ ਦੇ ਨਾਲ ਕਈ ਉੱਚ ਪੱਧਰੀ ਦੁਵੱਲੀ ਮੀਟਿੰਗਾਂ ਕਰਨਗੇ। ਇਨ੍ਹਾਂ ਵਿੱਚ ਯੂਨਾਈਟਿਡ ਕਿੰਗਡਮ ਦੇ ਵਪਾਰ ਅਤੇ ਵਪਾਰ ਸਕੱਤਰ ਸ਼੍ਰੀ ਜੋਨਾਥਨ ਰੇਨੋਲਡਜ਼; ਸਿੰਗਾਪੁਰ ਦੇ ਉਪ ਪ੍ਰਧਾਨ ਮੰਤਰੀ ਅਤੇ ਵਪਾਰ ਅਤੇ ਉਦਯੋਗ ਮੰਤਰੀ ਸ਼੍ਰੀ ਗਣ ਕਿਮ ਯੋਂਗ; ਅਤੇ ਸਊਦੀ ਅਰਬ ਦੇ ਵਣਜ ਮੰਤਰੀ ਡਾ. ਮਾਜਿਦ ਬਿਨ ਅਬਦੁੱਲਾ ਅਲ-ਕਸਾਬੀ ਸ਼ਾਮਲ ਹਨ। ਮੰਤਰੀ ਇਜ਼ਰਾਈਲ ਦੇ ਵਪਾਰ ਅਤੇ ਨਿਵੇਸ਼ ਮੰਤਰੀ ਸ਼੍ਰੀ ਨੀਰ ਬਰਕਤ; ਨਾਈਜੀਰੀਆ ਦੇ ਵਪਾਰ, ਉਦਯੋਗ ਅਤੇ ਨਿਵੇਸ਼ ਮੰਤਰੀ ਡਾ. ਜੁਮੋਕੇ ਓਡੂਵੋਲੇ ਓਓਐੱਨ; ਅਤੇ ਬ੍ਰਾਜ਼ੀਲ ਦੇ ਵਿਦੇਸ਼ ਮੰਤਰੀ ਸ਼੍ਰੀ ਮੌਰੋ ਲੁਇਸ ਇਕੇਰ ਵਿਏਰਾ ਦੇ ਨਾਲ ਵੀ ਗੱਲਬਾਤ ਕਰਨਗੇ। ਇਨ੍ਹਾਂ ਗੱਲਾਬਾਤਾਂ ਦਾ ਉਦੇਸ਼ ਰਣਨੀਤਕ ਆਰਥਿਕ ਸਹਿਯੋਗ ਨੂੰ ਅੱਗੇ ਵਧਾਉਣਾ ਅਤੇ ਖੇਤਰਾਂ ਵਿੱਚ ਆਪਸੀ ਤੌਰ ‘ਤੇ ਲਾਭਕਾਰੀ ਸਾਂਝੇਦਾਰੀ ਨੂੰ ਹੁਲਾਰਾ ਦੇਣਾ ਹੈ। ਉਹ ਭਾਰਤ-ਯੂਰੋਪੀਅਨ ਸੰਘ ਐੱਫਟੀਏ ਗੱਲਬਾਤ ਨੂੰ ਵੀ ਅੱਗੇ ਵਧਾਉਣਗੇ।

ਖੇਤਰੀ ਬਲਾਕਾਂ ਦੇ ਨਾਲ ਭਾਰਤ ਦੀ ਭਾਗੀਦਾਰੀ ਨੂੰ ਹੋਰ ਮਜ਼ਬੂਤ ਕਰਨ ਲਈ, ਵਪਾਰ ਅਤੇ ਆਰਥਿਕ ਸੁਰੱਖਿਆ, ਅੰਤਰ-ਸੰਸਥਾਗਤ ਸਬੰਧ ਅਤੇ ਪਾਰਦਰਸ਼ਿਤਾ ਕਮਿਸ਼ਨਰ ਸ਼੍ਰੀ ਮਾਰੋਸ ਸ਼ੇਫਕੋਵਿਕ ਅਤੇ ਯੂਰੋਪੀਅਨ ਖੇਤੀਬਾੜੀ ਅਤੇ ਖੁਰਾਕ ਕਮਿਸ਼ਨਰ ਸ਼੍ਰੀ ਕ੍ਰਿਸਟੋਫ ਹੇਨਸਨ ਸਮੇਤ ਪ੍ਰਮੁੱਖ ਯੂਰੋਪੀਅਨ ਯੂਨੀਅਨ ਦੇ ਅਧਿਕਾਰੀਆਂ ਦੇ ਨਾਲ ਮੀਟਿੰਗਾਂ ਦੀ ਯੋਜਨਾ ਬਣਾਈ ਗਈ ਹੈ। ਇਹ ਭਾਗੀਦਾਰੀ ਦੁਵੱਲੀ ਅਤੇ ਬਹੁਪੱਖੀ ਸਾਂਝੇਦਾਰੀ ਨੂੰ ਮਜ਼ਬੂਤ ਕਰਨ ਅਤੇ ਗਲੋਬਲ ਵਪਾਰ ਅਤੇ ਨਿਵੇਸ਼ ਵਿੱਚ ਖੁਦ ਨੂੰ ਇੱਕ ਮਹੱਤਵਪੂਰਨ ਖਿਡਾਰੀ ਦੇ ਰੂਪ ਵਿੱਚ ਸਥਾਪਿਤ ਕਰਨ ਦੇ ਭਾਰਤ ਦੇ ਚਲ ਰਹੇ ਯਤਨਾਂ ਨੂੰ ਦਰਸਾਉਂਦੀ ਹੈ।

ਫਰਾਂਸ ਵਿੱਚ ਆਪਣੇ ਪ੍ਰੋਗਰਾਮਾਂ ਦੇ ਬਾਅਦ ਸ਼੍ਰੀ ਗੋਇਲ ਆਪਣੀ ਯਾਤਰਾ ਦੇ ਅਗਲੇ ਪੜਾਅ ਲਈ ਇਟਲੀ ਜਾਣਗੇ।

************

ਅਭਿਜੀਤ ਨਾਰਾਇਣਨ