ಒಟ್ಟಾರೆ ಆಹಾರ ಭದ್ರತೆಯನ್ನು ನಿರ್ವಹಿಸಲು ಮತ್ತು ಸಂಗ್ರಹ ಮತ್ತು ಅನೈತಿಕ ಊಹಾಪೋಹಗಳನ್ನು ತಡೆಗಟ್ಟಲು, ಭಾರತ ಸರ್ಕಾರವು ಎಲ್ಲಾ ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಲ್ಲಿ ವ್ಯಾಪಾರಿಗಳು/ಸಗಟು ವ್ಯಾಪಾರಿಗಳು, ಚಿಲ್ಲರೆ ವ್ಯಾಪಾರಿಗಳು, ದೊಡ್ಡ ಸರಪಳಿ ಚಿಲ್ಲರೆ ವ್ಯಾಪಾರಿಗಳು ಮತ್ತು ಸಂಸ್ಕಾರಕರಿಗೆ ಅನ್ವಯಿಸುವ ಗೋಧಿಯ ಮೇಲೆ ಸಂಗ್ರಹ ಮಿತಿಗಳನ್ನು ವಿಧಿಸಿದೆ. ನಿರ್ದಿಷ್ಟ ಆಹಾರ ಪದಾರ್ಥಗಳ ಮೇಲಿನ ಪರವಾನಗಿ ಅವಶ್ಯಕತೆಗಳು, ಸಂಗ್ರಹ ಮಿತಿಗಳು ಮತ್ತು ಚಲನೆಯ ನಿರ್ಬಂಧಗಳ ತೆಗೆದುಹಾಕುವಿಕೆ (ತಿದ್ದುಪಡಿ) ಆದೇಶ, 2025 ಅನ್ನು 27 ಮೇ 2025 ರಂದು ಹೊರಡಿಸಲಾಗಿದೆ ಮತ್ತು ಇದು ಎಲ್ಲಾ ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಿಗೆ 31 ಮಾರ್ಚ್ 2026 ರವರೆಗೆ ಅನ್ವಯಿಸುತ್ತದೆ.

ಗೋಧಿಯ ದಾಸ್ತಾನು ಮಿತಿಗಳು ಈ ಕೆಳಕಂಡಂತಿವೆ:

(i) ವ್ಯಾಪಾರಿಗಳು/ಸಗಟು ವ್ಯಾಪಾರಿಗಳು: 3000 ಮೆಟ್ರಿಕ್ ಟನ್ ಗಳು;

(ii) ಚಿಲ್ಲರೆ ವ್ಯಾಪಾರಿ: ಪ್ರತಿ ರಿಟೇಲ್ ಔಟ್ ಲೆಟ್ ಗೆ 10 ಮೆಟ್ರಿಕ್ ಟನ್ ಗಳು.

(iii) ಬೃಹತ್ ಸರಣಿ ಚಿಲ್ಲರೆ ಮಾರಾಟಗಾರರು (ಬಿಗ್ ಚೈನ್ ರಿಟೇಲರ್ ಗಳು): ಪ್ರತಿ ರಿಟೇಲ್ ಔಟ್ ಲೆಟ್‌ ಗೆ ಗರಿಷ್ಠ 10 ಮೆಟ್ರಿಕ್ ಟನ್ ಗಳು, ಹಾಗೂ ಎಲ್ಲಾ ಔಟ್ ಲೆಟ್‌ ಗಳ ಒಟ್ಟು ದಾಸ್ತಾನು (ಒಟ್ಟು ಔಟ್ಲೆಟ್ ಗಳ ಸಂಖ್ಯೆ x 10) ಮೆಟ್ರಿಕ್ ಟನ್ ಗಳ ಗರಿಷ್ಠ ಮಿತಿಗೆ ಒಳಪಟ್ಟಿರುತ್ತದೆ. ಈ ಗರಿಷ್ಠ ದಾಸ್ತಾನು ಅವರ ಎಲ್ಲಾ ರಿಟೇಲ್ ಔಟ್ ಲೆಟ್ ಗಳು ಮತ್ತು ಡಿಪೋಗಳಲ್ಲಿ ಒಟ್ಟಾಗಿ ಇಡಬಹುದಾದ ಒಟ್ಟು ಪ್ರಮಾಣವಾಗಿರುತ್ತದೆ.

(iv) ಸಂಸ್ಕರಣಕಾರರು: 2025-26ನೇ ಹಣಕಾಸು ವರ್ಷದ ಬಾಕಿ ಉಳಿದ ತಿಂಗಳುಗಳಿಂದ ಗುಣಿಸಲ್ಪಟ್ಟ, ಮಾಸಿಕ ಸ್ಥಾಪಿತ ಸಾಮರ್ಥ್ಯದ (ಎಂ.ಐ.ಸಿ) 70% ರಷ್ಟು.

ಎಲ್ಲಾ ಗೋಧಿ ದಾಸ್ತಾನು ಮಾಡುವ ಘಟಕಗಳು ಗೋಧಿ ದಾಸ್ತಾನು ಪೋರ್ಟಲ್ ನಲ್ಲಿ (https://evegoils.nic.in/wsp/login – ಇದು ಕಾಲಕ್ರಮೇಣ https://foodstock.dfpd.gov.in ಗೆ ಸ್ಥಳಾಂತರಿಸಲ್ಪಡುತ್ತದೆ) ಪ್ರತಿ ಶುಕ್ರವಾರ ತಮ್ಮ ದಾಸ್ತಾನು ವಿವರಗಳನ್ನು ಘೋಷಿಸಬೇಕು/ನವೀಕರಿಸಬೇಕು. ಪೋರ್ಟಲ್ ನಲ್ಲಿ ನೋಂದಾಯಿಸಿಕೊಳ್ಳದಿರುವುದು ಕಂಡುಬಂದಲ್ಲಿ ಅಥವಾ ದಾಸ್ತಾನು ಮಿತಿಗಳನ್ನು ಉಲ್ಲಂಘಿಸುವ ಯಾವುದೇ ಘಟಕವು ಅವಶ್ಯಕ ವಸ್ತುಗಳ ಕಾಯಿದೆ, 1955 ರ ಸೆಕ್ಷನ್ 6 ಮತ್ತು 7 ರ ಅಡಿಯಲ್ಲಿ ಸೂಕ್ತ ದಂಡನಾತ್ಮಕ ಕ್ರಮಕ್ಕೆ ಒಳಪಡುತ್ತದೆ.

ಒಂದು ವೇಳೆ, ಮೇಲೆ ತಿಳಿಸಿದ ಘಟಕಗಳು ಹೊಂದಿರುವ ದಾಸ್ತಾನುಗಳು ನಿಗದಿತ ಮಿತಿಗಿಂತ ಹೆಚ್ಚಾಗಿದ್ದರೆ, ಅಧಿಸೂಚನೆ ಹೊರಡಿಸಿದ 15 ದಿನಗಳೊಳಗೆ ಅವರು ತಮ್ಮ ದಾಸ್ತಾನನ್ನು ನಿಗದಿತ ಮಿತಿಗಳಿಗೆ ತರಬೇಕಾಗುತ್ತದೆ. ದೇಶದಲ್ಲಿ ಗೋಧಿಯ ಕೃತಕ ಅಭಾವ ಸೃಷ್ಟಿಯಾಗದಂತೆ ಖಚಿತಪಡಿಸಿಕೊಳ್ಳಲು, ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳ ಅಧಿಕಾರಿಗಳು ಈ ದಾಸ್ತಾನು ಮಿತಿಗಳ ಜಾರಿಯನ್ನು ನಿಕಟವಾಗಿ ಮೇಲ್ವಿಚಾರಣೆ ಮಾಡುತ್ತಾರೆ.

ಕೇಂದ್ರ ಸರ್ಕಾರವು ರಾಜ್ಯ ಸರ್ಕಾರಿ ಸಂಸ್ಥೆಗಳು ಮತ್ತು ಭಾರತೀಯ ಆಹಾರ ನಿಗಮದ (FCI) ಮೂಲಕ (27.05.2025 ರವರೆಗೆ) 298.17 ಲಕ್ಷ ಮೆಟ್ರಿಕ್ ಟನ್ ಗಳಷ್ಟು (LMT) ಗೋಧಿಯನ್ನು ಸಂಗ್ರಹಿಸಿದೆ. ಇದು ಸಾರ್ವಜನಿಕ ವಿತರಣಾ ವ್ಯವಸ್ಥೆ (PDS), ಇತರ ಕಲ್ಯಾಣ ಯೋಜನೆಗಳು (OWS) ಮತ್ತು ಇತರೆ ಮಾರುಕಟ್ಟೆ ಮಧ್ಯಪ್ರವೇಶ ಯೋಜನೆಗಳ ಅಗತ್ಯವನ್ನು ಪೂರೈಸಲು ಸಾಕಷ್ಟಿದೆ. ಆಹಾರ ಮತ್ತು ಸಾರ್ವಜನಿಕ ವಿತರಣಾ ಇಲಾಖೆಯು ದೇಶದಲ್ಲಿ ಬೆಲೆಗಳನ್ನು ನಿಯಂತ್ರಿಸಲು ಮತ್ತು ಸುಲಭ ಲಭ್ಯತೆಯನ್ನು ಖಚಿತಪಡಿಸಿಕೊಳ್ಳಲು ಗೋಧಿಯ ದಾಸ್ತಾನು ಸ್ಥಿತಿಗತಿಗಳ ಮೇಲೆ ನಿರಂತರ ನಿಗಾ ಇರಿಸಿದೆ.

*****