U Myntri Rangbahduh ka ri u Narendra Modi u la pynïaid ïa ka jingïalang kaba shiphew jong ka Governing Council jong ka NITI Aayog ha Bharat Mandapam, New Delhi mynta ka sngi. La iashim bynta da ki Myntri Rangbah bad ki Lt. Governor kiba mihkhmat ia ki 24 tylli ki Jylla bad 7 tylli ki UT. Mynta u snem ka phang pdeng ka long ka Viksit Rajya na ka bynta ka Viksit Bharat@2047. La sdang ia ka jingialang da ka jingsngap jar shi minit kum ka jingkynmaw burom ia kiba la khlad noh ha ka jingthombor ki lehnoh ha Pahalgam.

U Myntri Rangbah duh u la ong ba ka dei ka jingangnud jong uwei pa uwei u nong India ba ka ri kan long ka Viksit Bharat. Kam dei ka jingthmu jong kano kano ka party hynrei ka dei ka jingangnud jong ki 140 klur ngut ki nong India. U la ong ba lada baroh ki Jylla ki iatreilang na ka bynta kane ka thong, te ngin sa ioh ia ka jingkiew kaba phylla. U la ong ruh ba ngi dei ban kular ba man la ka Jylla, man la ka sor, man la ka shnong kan kiew, bad nangta yn sa lah ban pynurlong ïa ka Viksit Bharat shwa u snem 2047.

U Myntri Rangbah Duh u la ong ba ka India ka dei kawei na ki phra tylli ki ri kiba la kiew tam ka ioh ka kot ha ka pyrthei bad 25 klur ngut ki la lait na ka jingduk. U la ban jur ba ka India ka donkam ban pynsted ia kane ka jingkylla. U la pynshlur ia ki Jylla ban pyndonkam ia ki bor shna tiar jong ki. Da ong ba ka Sorkar India ka la pynbna ia ka Manufacturing Mission.

U Myntri Rangbah Duh u la iohi ba ki nongbei tyngka na kylleng ka pyrthei ki phai sha ka ri India. U la pynshlur ia ki Jylla ban pyndonkam ia kane ka kabu bad ban pynsuk ia ki jingbei tyngka. Da kaba kdew ia ki jingiateh khaii pateng ba dang shen bad ka UAE, UK bad Australia, u la ong ba ki Jylla ki dei ban pyndonkam ia baroh ki lad kiba wan na kane.

Da kaba ban jur halor ka jingpyntbit, u Myntri Rangbah Duh u la ong ba ka NEP ka phai khmat sha ka jingpule bad ka jingkyntiew ia ki sap. U la ong ba ki Jylla ki dei ban thmu na ka bynta ki sap bapher bapher kiba iadei bad ki buit thymmai kum ka AI, Semiconductor, 3D Printing. U la ong ba ngi lah ban long ka jaka pdeng jong ki sap ha ka pyrthei namar ka jingbun ki khynnah samla jong ngi. U Myntri Rangbah Duh u la ong ba ia ka skhim kaba T.60,000 klur na ka bynta ka jingkyntiew ia ki sap la mynjur da ka Sorkar India. Ki jylla ki dei ban pynleit jingmut ha ki lad ai jinghikai kiba mynta bad ki jaka ai jinghikai ha ki jaka nongkyndong ban kyntiew ia ki sap.

U Myntri Rangbah Duh u la ong ba ka jingshngain ha ki kam cyber ka dei ka jingeh bad kumjuh ka lad. Ka Hydrogen bad ka bording kaba khuid la ban jur da u kum ki lad kiba heh bha.

U Myntri Rangbah Duh u la ong ba ka G20 Summit ka la iarap ia ka India ban ioh jingithuh kum ka jaka jngohkai pyrthei ha ka pyrthei hynrei ki Jylla ki dei ban pyndonkam ia kane ka kabu. U la kyntu ia ki Jylla ban kyntiew la kumno kumno kawei ka jaka jngohkai kaba iahap bad ki jinglong jingman ha kiwei kiwei ki bynta jong ka pyrthei. U la ong ba lah ban thaw 25-30 tylli kum kine ki jaka jngohkai pyrthei ha kylleng ka ri India.

U Myntri Rangbah Duh u la iohi ba ki jaka sor jong ka India ka nang kiew stet. U la kyrpad ia ki Jylla ban pynlong ia ki nongbah kum ka kor jong ka jingpynneh pynsah bad ka jingroi bad kyntu ia ki ban pynleit jingmut ha ki nongbah Tier 2 bad Tier 3. U la kdew ba la thaw ïa ka Urban Challenge Fund kaba T.1 lak klur tyngka na ka bynta ka pisa ban treikam.

U Myntri Rangbah Duh u la ban jur halor ka bor kaba khraw jong ka Nari Shakti jong ka ri India. U la kyntu ban pynkylla ia ki ain na ka bynta ki kynthei khnang ba kin lah ban iadon bynta ha ka lynti jong ka jingroi. U la ong ba dei ban don ki jingpynkylla ha ki kam paidbah bad ki kam shimet na ka bynta ki kynthei kiba trei da kaba pynleit jingmut ha ka jingsuk jong ki ban trei.

U Myntri Rangbah Duh u la pynshlur ia ki Jylla ban pyniasoh ia ki Wah hapoh ki Jylla ban ialeh pyrshah ia ka jingduna um bad kumjuh ruh ia ka jingshlei um. U la ai ka jingiaroh ia ka Bihar kaba dang shu sdang dang shen ban pyniasoh ia ka Kosi bad Mochi. U la ai ka jingiaroh ruh ia ka Aspirational Districts Programme kaba la long kaba jop lyngba ka jingiatrei lang.

U Myntri Rangbah Duh u la ong ba ha ka rep ka riang, ngi dei ban pynleit jingmut ha ki kam ha jong ki Laboratory kiba lah ban rah sha ki jaka rep. U la kren shaphang ka Viksit Krishi Sankalp Abhiyan ha kaba kumba 2,500 ngut ki stad saian kin leit sha ki shnong ki thaw bad ki Rural Centre ha kine ki sngi ban wan ha kaba kin iamir jingmut halor ki phang kum ka rukom rep ia ki mar bapher bapher bad ka kam rep khlem da pyndonkam ia ki dawai. U la kyrpad ia baroh ki Myntri Rangbah ban kyrshan ia kane ka jingthmu.

U Myntri Rangbah Duh u la ban jur halor ka jingdonkam ban pynleit jingmut ha ka jingai jingshakri ha ka koit ka khiah. U la ong ba ngi dei ban peit ia ki jaka pynmih oxygen bad ki jingpynkhreh na ka bynta kino kino ki jingeh kiba iadei bad ka khlam Covid. U la ong ba ki Jylla ki donkam ban pyniar ïa ka telemedicine khnang ba yn lah ban pynïasoh ïa ki doktor kiba la tbit na ki District Hospital bad dei ban pynbiang ïa ki jingmyntoi jong ka E-Sanjeevani bad teleconsultation.

U Myntri Rangbah Duh u la ong ba ‘Ka Operation Sindoor kam dei ban long kum ka sienjam kaba tang shisien bad ngi dei ban shim ia ka rukom treikam kaba jrong samoi. U Myntri Rangbah Duh u la ong ba ngi dei ban pynthymmai ia ka rukom treikam jong ngi ha ka jingpynkhreh paidbah. U la ong ba ki jinghikai mock drill ba dang shen ki la wanrah ia ka jingphai sa shisien sha ki jylla kiba don ha ka bynta jong ka jingiada paidbah kiba dei ban pynskhem shuh shuh ia ka jingpynkhreh na ka bynta ka jingiada paidbah.

Ki Myntri Rangbah bad ki Lieutenant Governor ki la iaroh ia ka Operation Sindoor namar ka jinglong thikna jong ka bad ki jingther kiba la pynjulor ia ki jingdon jingem jong ki lehnoh. Ha kawei ka sur, ki la iaroh ia ka jinglong nongialam jong u Myntri Rangbah Duh bad ia ka jingshlur jong ki shipai. Ki la iaroh ruh ia ki sienjam na ka bynta ka Aatmanirbharta ha ka liang ka jingiada ri kiba la pynkhlain ia ki bor iada ri bad pynskhem ia ka jingshaniah ha ka bor jong ngi.

Ki Myntri Rangbah / Lieutenant Governor ki la ai jingmut bapher bapher na ka bynta ka jingthmu jong ka Viksit Rajya na ka bynta ka Viksit Bharat @ 2047 bad ki la iakren ruh shaphang ki sienjam ba dang shim ha ki Jylla jong ki. Katto katne na ki jingai jingmut ba kongsan bad ki rukom treikam ba bha tam ba la pynpaw ki long ha ki bynta jong ka rep ka riang, ka jingpule bad ka jingpynroi ia ka sap, ka jingseng kam seng jam, ka um dih, ka jingpynduna ia ki kamram ba hap pyndep, ka jingsynshar, ka jingpynkylla digital, ka jingpynkupbor ia ki kynthei, ka jingshngain ha kin kam cyber, bad kiwei kiwei.

U Myntri Rangbah Duh u la bthah ia ka NITI Aayog ban peit bniah ia ki jingai jingmut jong ki Jylla bad ki UT ha kane ka jingialang. U la ong ba ka jingialang jong ka NITI Aayog kaba 10 ka long ka mawjam jong ka jingiaid lynti jong ka kaba shiphew snem kaba batai bad buh ia ka jingthmu na ka bynta u snem 2047. U la ong ba ki jingialang jong ka sorkar ki la iarap ha ka jingtei ia ka ri bad ka la long kum ka rynsan ban iatreilang bad ki jingangnud ba iadon lang. U la pynpaw ka jingsngewnguh ïa baroh ki Myntri Rangbah bad ki Lieutenant Governor kiba la ïashim bynta ha ka jingïalang bad kiba la ïasam ïa ki jingmut bad ki jingshem jong ki, bad u la pynpaw ka jingsngew skhem ba ka India ka ïaid shakhmat ha ka lynti ban pynurlong ïa ka jingthmu jong ka Viksit Rajya na ka bynta ka Viksit Bharat @2047 lyngba ka bor jong ka jingiatreilang hapdeng ki jylla bad ka Sorkar Pdeng.

***