ಭಾರತ ಸರ್ಕಾರದ ಗ್ರಾಹಕ ವ್ಯವಹಾರಗಳ ಇಲಾಖೆಯು ಇಂದು 2025ರ ವಿಶ್ವ ಮಾಪನಶಾಸ್ತ್ರ ದಿನವನ್ನು ಆಚರಿಸಿತು, ಇದು 1875ರ ಮೇ 20 ರಂದು ಪ್ಯಾರಿಸ್‌ ನಲ್ಲಿ ಸಹಿ ಹಾಕಿದ ಐತಿಹಾಸಿಕ ಮೀಟರ್ ಸಮಾವೇಶದ 150 ನೇ ವಾರ್ಷಿಕೋತ್ಸವವನ್ನು ಸೂಚಿಸುತ್ತದೆ.

ಕೇಂದ್ರ ಗ್ರಾಹಕ ವ್ಯವಹಾರಗಳು, ಆಹಾರ ಮತ್ತು ಸಾರ್ವಜನಿಕ ವಿತರಣಾ ಸಚಿವರಾದ ಶ್ರೀ ಪ್ರಲ್ಹಾದ್ ಜೋಶಿ ಅವರು ತಮ್ಮ ವರ್ಚುವಲ್ ಭಾಷಣದಲ್ಲಿ, ಕಾನೂನು ಮಾಪನಶಾಸ್ತ್ರವನ್ನು ಆರ್ಥಿಕ ಬೆಳವಣಿಗೆ ಮತ್ತು ಗ್ರಾಹಕರ ವಿಶ್ವಾಸದ ಆಧಾರಸ್ತಂಭವಾಗಿ ಪರಿವರ್ತಿಸುವ ಸರ್ಕಾರದ ದೃಷ್ಟಿಕೋನವನ್ನು ಒತ್ತಿ ಹೇಳಿದರು. ಗೌರವಾನ್ವಿತ ಪ್ರಧಾನ ಮಂತ್ರಿಯವರು ಭಾರತೀಯ ಮಾನದಂಡಗಳನ್ನು ಜಾಗತಿಕ ಮಾನದಂಡಗಳಿಗೆ ಸಮಾನಾರ್ಥಕವಾಗಿಸುವ ಕರೆಗೆ ಅನುಗುಣವಾಗಿ ಇದು ನಡೆದಿದೆ ಎಂದು ಅವರು ಹೇಳಿದರು.

ಭಾರತವು ಅಂತರರಾಷ್ಟ್ರೀಯ ಕಾನೂನು ಮಾಪನಶಾಸ್ತ್ರ ಸಂಸ್ಥೆ (OIML) ಪ್ರಮಾಣಪತ್ರಗಳನ್ನು ನೀಡುವ ಅಧಿಕಾರ ಹೊಂದಿದೆ ಎಂದು ಕೇಂದ್ರ ಸಚಿವರು ಘೋಷಿಸಿದರು. ಭಾರತವು ಅಂತರರಾಷ್ಟ್ರೀಯ ಕಾನೂನು ಮಾಪನಶಾಸ್ತ್ರ ಸಂಸ್ಥೆ ಪ್ರಮಾಣಪತ್ರವನ್ನು ಅಧಿಕೃತವಾಗಿ ನೀಡುವ ವಿಶ್ವದ 13 ನೇ ರಾಷ್ಟ್ರವಾಗಿದೆ ಎಂದು ಅವರು ಹೇಳಿದರು. ಈ ಮಹತ್ವದ ಸಾಧನೆಯು ಭಾರತದ ಮಾಪನ ವ್ಯವಸ್ಥೆಗಳಲ್ಲಿ ಜಾಗತಿಕ ವಿಶ್ವಾಸವನ್ನು ಹೆಚ್ಚಿಸುತ್ತದೆ ಮತ್ತು ದೇಶವನ್ನು ಅಂತರರಾಷ್ಟ್ರೀಯ ವ್ಯಾಪಾರದಲ್ಲಿ ವಿಶ್ವಾಸಾರ್ಹ ಪಾಲುದಾರನನ್ನಾಗಿ ಸ್ಥಾಪಿಸುತ್ತದೆ, ಇದು ಜಾಗತಿಕ ಮಾರುಕಟ್ಟೆಗಳಲ್ಲಿ ಭಾರತೀಯ ತಯಾರಕರು ವ್ಯಾಪಕ ಸ್ವೀಕಾರವನ್ನು ಪಡೆಯಲು ಸಹಾಯ ಮಾಡುತ್ತದೆ ಎಂದು ಅವರು ಹೇಳಿದರು.

ಸರ್ಕಾರವು "ಒಂದು ರಾಷ್ಟ್ರ, ಒಂದು ಸಮಯ" ಉಪಕ್ರಮವನ್ನು ಕರಡು ಐ ಎಸ್‌ ಟಿ ನಿಯಮಗಳು, 2025 ರ ಅಡಿಯಲ್ಲಿ ಪ್ರಾರಂಭಿಸಿದೆ, ಇದು ವಿಶಾಲ ಸಮಯ ಪ್ರಸರಣ ಯೋಜನೆಯ ಭಾಗವಾಗಿದೆ ಎಂದು ಅವರು ಹೇಳಿದರು. ಈ ಉಪಕ್ರಮವು ಐದು ಪ್ರಾದೇಶಿಕ ಉಲ್ಲೇಖ ಪ್ರಮಾಣಿತ ಪ್ರಯೋಗಾಲಯಗಳ (ಆರ್‌ ಆರ್‌ ಎಸ್‌ ಎಲ್) ಮೂಲಕ ಭಾರತೀಯ ಕಾಲಮಾನವನ್ನು (ಐ ಎಸ್‌ ಟಿ) ಮಿಲಿಸೆಕೆಂಡ್ ಮಟ್ಟದ ನಿಖರತೆಯೊಂದಿಗೆ ತಲುಪಿಸುವ ಗುರಿಯನ್ನು ಹೊಂದಿದೆ. ದೂರಸಂಪರ್ಕ, ಬ್ಯಾಂಕಿಂಗ್ ಮತ್ತು ಸಾರಿಗೆಯಂತಹ ನಿರ್ಣಾಯಕ ವಲಯಗಳಿಗೆ ಇಂತಹ ನಿಖರವಾದ ಸಮಯ ಸಿಂಕ್ರೊನೈಸೇಶನ್ ನಿರ್ಣಾಯಕವಾಗಿದೆ, ಸಮಯಪಾಲನೆಯಲ್ಲಿ ರಾಷ್ಟ್ರೀಯ ಸ್ಥಿರತೆಯನ್ನು ಖಚಿತಪಡಿಸುತ್ತದೆ ಎಂದು ಅವರು ಹೇಳಿದರು.

ಹೆಚ್ಚಿನ ಮೌಲ್ಯದ ವಹಿವಾಟುಗಳಲ್ಲಿ, ವಿಶೇಷವಾಗಿ ಚಿನ್ನ ಮತ್ತು ಆಭರಣ ವಲಯದಲ್ಲಿ ಗ್ರಾಹಕರನ್ನು ರಕ್ಷಿಸಲು, ಸರ್ಕಾರವು 1 ಮಿಲಿಗ್ರಾಂ ನಿಖರ ತೂಕದ ಮಾಪಕಗಳನ್ನು ಕಡ್ಡಾಯವಾಗಿ ಬಳಸುವಂತೆ ಪ್ರಸ್ತಾಪಿಸಿದೆ ಎಂದು ಶ್ರೀ ಜೋಶಿ ಹೇಳಿದರು. ಈ ಕ್ರಮವು ಚಿನ್ನ, ಆಭರಣಗಳು ಮತ್ತು ಇತರ ಅಮೂಲ್ಯ ಲೋಹಗಳ ತೂಕದಲ್ಲಿ ಹೆಚ್ಚಿನ ನಿಖರತೆ ಮತ್ತು ನ್ಯಾಯಸಮ್ಮತತೆಯನ್ನು ಖಚಿತಪಡಿಸುತ್ತದೆ, ಗ್ರಾಹಕರ ಹಕ್ಕುಗಳು ಮತ್ತು ಮಾರುಕಟ್ಟೆ ಹೊಣೆಗಾರಿಕೆಯನ್ನು ಬಲಪಡಿಸುತ್ತದೆ ಎಂದು ಸಚಿವರು ಹೇಳಿದರು.

ಡಿಜಿಟಲ್ ಆಡಳಿತದತ್ತ ಗಮನಹರಿಸುವ ಸಲುವಾಗಿ, ಕಾನೂನು ಮಾಪನಶಾಸ್ತ್ರ ಪ್ರಕ್ರಿಯೆಗಳನ್ನು ಸುಗಮಗೊಳಿಸಲು ಮತ್ತು ಡಿಜಿಟಲೀಕರಣಗೊಳಿಸಲು ಇ-ಮ್ಯಾಪ್‌ ಪೋರ್ಟಲ್ ಅನ್ನು ಪ್ರಾರಂಭಿಸಲಾಗಿದೆ. ಪ್ರಸ್ತುತ 18 ರಾಜ್ಯಗಳನ್ನು ಸಂಯೋಜಿಸುತ್ತಿರುವ ಈ ಪೋರ್ಟಲ್ ಡಿಜಿಟಲ್ ಪರವಾನಗಿ, ನೋಂದಣಿ ಮತ್ತು ಅನುಷ್ಠಾನ ಚಟುವಟಿಕೆಗಳನ್ನು ಸಕ್ರಿಯಗೊಳಿಸುತ್ತದೆ ಎಂದು ಕೇಂದ್ರ ಸಚಿವರು ತಿಳಿಸಿದರು. ಈ ಏಕೀಕರಣವು ಅನುಸರಣೆ ಪ್ರಕ್ರಿಯೆಗಳನ್ನು ಸರಳಗೊಳಿಸುತ್ತದೆ, ಅಧಿಕಾರಶಾಹಿ ಅಡೆತಡೆಗಳನ್ನು ಕಡಿಮೆ ಮಾಡುತ್ತದೆ ಮತ್ತು ನಿಯಂತ್ರಕ ಕಾರ್ಯಾಚರಣೆಗಳಲ್ಲಿ ಪಾರದರ್ಶಕತೆಯನ್ನು ಹೆಚ್ಚಿಸುತ್ತದೆ ಎಂದು ನಿರೀಕ್ಷಿಸಲಾಗಿದೆ.

ಉತ್ತಮ ಉದ್ಯಮ ತೊಡಗಿಸಿಕೊಳ್ಳುವಿಕೆಯನ್ನು ಉತ್ತೇಜಿಸಲು, ಸಾಪ್ತಾಹಿಕ ಸೌಲಭ್ಯ ಸಹಾಯವಾಣಿಯನ್ನು ಪ್ರಾರಂಭಿಸಲಾಗಿದೆ. ಪ್ರತಿ ಮಂಗಳವಾರ ಸಂಜೆ 4–5 ಗಂಟೆಯವರೆಗೆ ನಡೆಯುವ ಈ ವೀಡಿಯೊ ಆಧಾರಿತ ಸಹಾಯವಾಣಿಯು, ವ್ಯವಹಾರಗಳನ್ನು ನಡೆಸುವವರು ಪ್ರಶ್ನೆಗಳನ್ನು ಕೇಳಲು ಮತ್ತು ರಾಜ್ಯ ಕಾನೂನು ಮಾಪನಶಾಸ್ತ್ರ ಇಲಾಖೆಗಳ ಸಕ್ರಿಯ ಭಾಗವಹಿಸುವಿಕೆಯೊಂದಿಗೆ ಅಧಿಕಾರಿಗಳಿಂದ ನೈಜ-ಸಮಯದ ಸಹಾಯವನ್ನು ಪಡೆಯಲು ಒಂದು ವೇದಿಕೆಯಾಗಿ ಕಾರ್ಯನಿರ್ವಹಿಸುತ್ತದೆ. ಈ ಉಪಕ್ರಮವು ಹೆಚ್ಚು ಸ್ಪಂದಿಸುವ ನಿಯಂತ್ರಕ ವಾತಾವರಣವನ್ನು ನಿರ್ಮಿಸುವ ಮತ್ತು ವ್ಯವಹಾರವನ್ನು ಸುಲಭಗೊಳಿಸುವ ಗುರಿಯನ್ನು ಹೊಂದಿದೆ ಎಂದು ಶ್ರೀ ಜೋಶಿ ಹೇಳಿದರು.

ಕೇಂದ್ರ ಗ್ರಾಹಕ ವ್ಯವಹಾರಗಳು, ಆಹಾರ ಮತ್ತು ಸಾರ್ವಜನಿಕ ವಿತರಣೆ ಮತ್ತು ಸಾಮಾಜಿಕ ನ್ಯಾಯ ಮತ್ತು ಸಬಲೀಕರಣ ರಾಜ್ಯ ಸಚಿವ ಶ್ರೀ ಬಿ.ಎಲ್. ವರ್ಮಾ ಅವರು ತಮ್ಮ ಮುಖ್ಯ ಭಾಷಣದಲ್ಲಿ, ನ್ಯಾಯಯುತ ಆರ್ಥಿಕತೆಯನ್ನು ನಿರ್ಮಿಸುವಲ್ಲಿ ಕಾನೂನು ಮಾಪನಶಾಸ್ತ್ರದ ಪ್ರಮುಖ ಪಾತ್ರವನ್ನು ಎತ್ತಿ ತೋರಿಸಿದರು. ಪ್ರಕ್ರಿಯೆಗಳನ್ನು ಸರಳೀಕರಿಸುವುದು ಮತ್ತು ಗ್ಯಾಸ್ ಮೀಟರ್‌, ಉಸಿರಾಟದ ವಿಶ್ಲೇಷಕಗಳು ಮುಂತಾದ ನಿಖರವಾದ ಸಾಧನಗಳನ್ನು ಖಚಿತಪಡಿಸಿಕೊಳ್ಳುವಂತಹ ಸಾಧನೆಗಳ ಬಗ್ಗೆ ಅವರು ಮಾತನಾಡಿದರು ಮತ್ತು ವ್ಯವಹಾರವನ್ನು ಸುಲಭಗೊಳಿಸಲು ಸಹಾಯವಾಣಿಯ ಮೂಲಕ ಸಂಪರ್ಕವನ್ನು ಸ್ಥಾಪಿಸಲಾಗಿದೆ ಎಂದು ಹೇಳಿದರು.

ಗ್ರಾಹಕರ ಸುರಕ್ಷತೆಯನ್ನು ಹೆಚ್ಚಿಸುವ ಮತ್ತು ನಿಯಂತ್ರಕ ಸ್ಪಷ್ಟತೆಯನ್ನು ಸುಧಾರಿಸುವ ಗುರಿಯನ್ನು ಹೊಂದಿರುವ ಪ್ರಮುಖ ನಿಯಂತ್ರಕ ಬೆಳವಣಿಗೆಗಳನ್ನು ಅವರು ಘೋಷಿಸಿದರು. ಸ್ಪೀಡ್ ಗನ್‌ ಮತ್ತು ಗ್ಯಾಸ್ ಮೀಟರ್‌ ಗಳಿಗಾಗಿ ಹೊಸ ಕಾನೂನು ಮಾಪನಶಾಸ್ತ್ರ ನಿಯಮಗಳನ್ನು ಔಪಚಾರಿಕವಾಗಿ ಅಧಿಸೂಚಿಸಲಾಗಿದೆ ಎಂದು ಅವರು ಹೇಳಿದರು. ಈ ನಿಯಮಗಳು ಕಾನೂನು ಜಾರಿ ಮತ್ತು ವ್ಯವಸ್ಥೆಗಳಲ್ಲಿ ಬಳಸುವ ನಿರ್ಣಾಯಕ ಸಾಧನಗಳ ಪ್ರಮಾಣೀಕರಣ ಮತ್ತು ನಿಖರತೆಯನ್ನು ಖಚಿತಪಡಿಸಿಕೊಳ್ಳಲು ಸಹಾಯ ಮಾಡುತ್ತದವೆ. ಇದಲ್ಲದೆ, ಉಸಿರಾಟದ ವಿಶ್ಲೇಷಕಗಳು ಮತ್ತು ತೇವಾಂಶ ಮೀಟರ್‌ ಗಳಿಗಾಗಿ ನಿಯಮಗಳು ಬರುತ್ತಿವೆ, ಇದು ವಲಯಗಳಾದ್ಯಂತ ಸುರಕ್ಷತಾ ಮಾನದಂಡಗಳು ಮತ್ತು ಗ್ರಾಹಕರ ರಕ್ಷಣೆಯನ್ನು ಬಲಪಡಿಸುವ ಸರ್ಕಾರದ ಬದ್ಧತೆಯನ್ನು ಒತ್ತಿಹೇಳುತ್ತದೆ ಎಂದು ಅವರು ಹೇಳಿದರು.

ಇದಲ್ಲದೆ, ನಿಯಂತ್ರಕ ಬದಲಾವಣೆಗಳ ಅನುಷ್ಠಾನದ ಕಾಲಮಿತಿಯಲ್ಲಿ ಸುಧಾರಣೆಗಳನ್ನು ಸಚಿವರು ಘೋಷಿಸಿದರು. ಮುಂದೆ, ಕಾನೂನು ಮಾಪನಶಾಸ್ತ್ರ (ಪ್ಯಾಕ್ ಮಾಡಿದ ಸರಕುಗಳು) ನಿಯಮಗಳಿಗೆ ಮಾಡಲಾದ ಎಲ್ಲಾ ತಿದ್ದುಪಡಿಗಳು ಜನವರಿ 1 ಅಥವಾ ಜುಲೈ 1 ರಿಂದ ಜಾರಿಗೆ ಬರಲಿವೆ. ಉದ್ಯಮದ ಪಾಲುದಾರರಿಗೆ ಹೊಂದಿಕೊಳ್ಳಲು ಸಾಕಷ್ಟು ಸಮಯವನ್ನು ನೀಡಲು 180 ದಿನಗಳ ಪರಿವರ್ತನೆಯ ಅವಧಿಯನ್ನು ಒದಗಿಸಲಾಗುವುದು, ಇದರಿಂದಾಗಿ ನಿಯಂತ್ರಕ ನವೀಕರಣಗಳ ಹೆಚ್ಚಿನ ಸಿದ್ಧತೆ ಮತ್ತು ಸುಗಮ ಅನುಷ್ಠಾನಕ್ಕೆ ಸಹಾಯವಾಗುತ್ತದೆ ಎಂದು ಅವರು ಹೇಳಿದರು.

ಭಾರತ ಸರ್ಕಾರದ ಗ್ರಾಹಕ ವ್ಯವಹಾರಗಳ ಇಲಾಖೆಯ ಕಾರ್ಯದರ್ಶಿ ಶ್ರೀಮತಿ ನಿಧಿ ಖರೆ ಅವರು ತಮ್ಮ ಮುಖ್ಯ ಭಾಷಣದಲ್ಲಿ, ಭಾರತದಲ್ಲಿ ಕಾನೂನು ಮಾಪನಶಾಸ್ತ್ರದ ಸ್ಥಿರ ಬೆಳವಣಿಗೆಯನ್ನು ವಿವರಿಸಿದರು. ವ್ಯಾಪಾರ ಸಂಘಗಳಿಂದ ಸ್ವಯಂಪ್ರೇರಿತ ಅನುಸರಣೆಯ ಮೂಲಕ ತೊಂದರೆ-ಮುಕ್ತ ಅನುಸರಣೆ, ವ್ಯವಸ್ಥೆಯ ಸುಧಾರಣೆಗಳು ಮತ್ತು ನಿಯಮಗಳನ್ನು ಹೆಚ್ಚು ಉದ್ಯಮ ಸ್ನೇಹಿಯನ್ನಾಗಿ ಮಾಡುವ ಅಗತ್ಯವನ್ನು ಅವರು ಒತ್ತಿ ಹೇಳಿದರು. ಪರೀಕ್ಷೆ ಮತ್ತು ಅಳತೆ ವ್ಯವಸ್ಥೆಗಳನ್ನು ನವೀಕರಿಸಲು ಕಟ್ಟುನಿಟ್ಟಾದ ಕಾರ್ಯವಿಧಾನಗಳು ಮತ್ತು ಆಧುನಿಕ ತಂತ್ರಜ್ಞಾನದ ಅಳವಡಿಕೆಗೆ ಭಾರತದ ಬದ್ಧತೆಯನ್ನು ಅವರು ಪುನರುಚ್ಚರಿಸಿದರು. 2025ರ ವಿಶ್ವ ಮಾಪನಶಾಸ್ತ್ರ ದಿನದ ಸಂದರ್ಭದಲ್ಲಿ ಅವರು "ಎಲ್ಲಾ ಕಾಲಕ್ಕೂ, ಎಲ್ಲಾ ಜನರಿಗೂ ಅಳತೆಗಳು" ಎಂಬ ವಿಷಯದ ಪೋಸ್ಟರ್ ಅನ್ನು ಬಿಡುಗಡೆ ಮಾಡಿದರು.

ಈ ಆಚರಣೆಯು ಅರ್ಥಶಾಸ್ತ್ರದಲ್ಲಿ ವಿವರಿಸಿದಂತೆ ಸಿಂಧೂ ಕಣಿವೆ ನಾಗರಿಕತೆಯಿಂದ ಹಿಡಿದು ಮೌರ್ಯ ಸಾಮ್ರಾಜ್ಯದ ನಿಯಂತ್ರಿತ ತೂಕ ವ್ಯವಸ್ಥೆಗಳವರೆಗೆ ಭಾರತದ ಶ್ರೀಮಂತ ಮಾಪನಶಾಸ್ತ್ರದ ಪರಂಪರೆ ಮತ್ತು ಬ್ಲಾಕ್‌ ಚೈನ್ ಬೆಂಬಲಿತ ಪತ್ತೆಹಚ್ಚುವಿಕೆ, ಸಾಫ್ಟ್‌ವೇರ್ ಪರೀಕ್ಷಾ ಪ್ರಯೋಗಾಲಯಗಳು ಮತ್ತು ಅಂತರ್ಗತ ನೀತಿ ಸುಧಾರಣೆಗಳೊಂದಿಗೆ ಭಾರತದ ಭವಿಷ್ಯಕ್ಕೆ-ಸಿದ್ಧವಾದ ವಿಧಾನಕ್ಕೆ ಗೌರವ ಸಲ್ಲಿಸಿತು.

*****