خطرات سے پُر فضلہ  کی دستی طور پر صفائی کی مسلسل روایت کے پیش نظر،بھارت کے نیشنل ہیومن رائٹس کمیشن (این ایچ آر سی)نے ریاستوں اور مرکز کے زیر انتظام علاقوں کے تمام چیف سکریٹریز اور ایڈمنسٹریٹرز کو لکھے گئے ایک خط میں سپریم کورٹ کی طرف سے اپنے تاریخی 2023 کے فیصلے(ڈاکٹر بلرام سنگھ بنام یونین آف انڈیا2023 آئی این ایس سی950)  میں جاری کردہ 14 ہدایات پر فوری عمل درآمد کو یقینی بنانے کو کہا ہے، جس کا مقصد دستی صفائی اور گٹر کی خطرناک صفائی کے غیر انسانی اور ذات پات پر مبنی عمل کو ختم کرنا ہے۔ کمیشن نے کہا ہے کہ یہ عمل انسانی حقوق  خاص طور پر وقار کے ساتھ زندگی گزارنے کا حق  اورقانون کی رو سےمساوات کے حق کی سنگین خلاف ورزی ہے۔

کمیشن کو معلوم ہوا ہے کہ آئینی اور قانونی تحفظات کے ساتھ ساتھ سپریم کورٹ کی طرف سے 29 جنوری 2025 کو چھ بڑے شہروں دہلی، ممبئی، چنئی، کولکاتہ، بنگلورو اور حیدرآباد میں مکمل پابندی کے اعلان کے باوجود ملک کے بعض حصوں میں خطرناک کچرے کی دستی طور پر صفائی کی خبریں ابھی بھی آ رہی ہیں۔

لہذا، این ایچ آر سی، بھارت نے مندرجہ ذیل اقدامات کے فوری نفاذ کی سفارش کی ہے:

• اسٹیک ہولڈرز بشمول مقامی حکام، ٹھیکیداروں اور عام لوگوں کے درمیان دستی صفائی کی ممانعت اور متعلقہ عدالتی ہدایات کا وسیع پیمانے پر پھیلانا؛
• حکومتی اہلکاروں، صفائی کے کارکنوں اور کمیونٹیز کے لیے دستی صفائی کے قانونی، سماجی اور انسانی حقوق کے مختلف پہلوؤں پر مبنی  حساسیت سے متعلق  پروگرام؛
• بروقت عمل آوری  اور ازالہ کو یقینی بنانے کے لیے مضبوط نگرانی کے نظام کا قیام؛
• پیش رفت پر نظر رکھنے، عمل درآمد میں حائل رکاوٹوں کی نشاندہی کرنے اور ہر سطح پر جوابدہی کو یقینی بنانے کے لئے باقاعدگی سے فالو اپ اور جائزہ لینے کے طریقہ کار۔

کمیشن نے متعلقہ حکام سے آٹھ ہفتہ کے اندر کارروائی کی رپورٹ پیش کرنے کو بھی کہا ہے۔

***

ش ح۔ ک ا۔  ع ر

U.NO.307