دلّی میٹرو ریل کارپوریشن(ڈی ایم آر سی)  نے آج نئی دلّی کے بھارت منڈپم میں اپنا 31 واں یوم تاسیس منایا۔

اس موقع پر معزز وزیر ہاؤسنگ اور شہری امور اور توانائی، جناب منوہر لال نے بطور مہمان خصوصی شرکت کی۔ دلّی کی معزز وزیر اعلیٰ، محترمہ ریکھا گپتا نے، مہمان اعزازی کے طور پر شرکت کی۔

معزز وزیر ہاؤسنگ اور شہری امور اور توانائی ، جناب منوہر لال نے دلّی میٹرو ریل کارپوریشن کے 31 ویں یوم تاسیس کے موقع پر بھارت منڈپم، نئی دلّی میں معزز وزیر اعلیٰ محترمہ ریکھا گپتا کے ساتھ شرکت کی۔

اپنے خطاب میں، معزز وزیر نے دہلی کے عام شہریوں کی روزمرہ زندگی میں دلّی میٹرو کے اہم کردار پر روشنی ڈالی۔ انہوں نے زور دیا کہ آسان، قابل اعتماد اور محفوظ نقل و حرکت ہر شہری کا بنیادی حق ہے، اور دلّی میٹرو جیسے شہری ٹرانسپورٹ سسٹم شہری زندگی کا ایک ناگزیر حصہ بن چکے ہیں۔

مستقبل کی طرف دیکھتے ہوئے، معزز وزیر نے کہا کہ 2047 تک ہندوستان کی تقریباً 50 فیصد آبادی شہری علاقوں میں رہائش پذیر ہوگی، جس سے آج شہری نقل و حرکت کے ڈھانچے کی منصوبہ بندی اور مضبوطی ناگزیر ہو جاتی ہے۔ انہوں نے میٹرو ٹرینوں میں کارگو کمپارٹمنٹس شامل کرنے کا ایک دور اندیش خیال پیش کیا، جو چھوٹے کاروباریوں، دکانداروں اور ہاکروں کو شہر بھر میں اپنا سامان بغیر کسی رکاوٹ کے منتقل کرنے کے قابل بنائے گا — یہ اقدام وقت بچائے گا، توانائی کی کھپت کو کم کرے گا، اور شہری محنت کش طبقے کے لیے کاروباری کارکردگی کو بڑھائے گا۔

مزید برآں، جناب منوہر لال نے میٹرو آپریشنز میں آلودگی سے پاک اور قابل تجدید توانائی کے حل کو مربوط کرنے کی ضرورت پر زور دیا، جو قومی پائیدار ترقی کے اہداف کے ساتھ ہم آہنگ ہے۔ انہوں نے دہرایا کہ میٹرو سسٹم ہندوستان کے ہر شہر کی لائف لائن ہوں گے، اور ان کی مسلسل توسیع اور جدید کاری اسمارٹ، جامع اور مستقبل کے لیے تیار شہری مراکز کی تعمیر کے لیے کلیدی حیثیت رکھتی ہے۔

دیگر معززین میں وزارت ہاؤسنگ اور شہری امور میں سکریٹری جناب کٹیکیتھلا سرینواس، اور چیئرمین، ڈی ایم آر سی؛ جناب دھرمیندر، چیف سیکریٹری، جی این سی ٹی ڈی؛ اور ڈاکٹر وکاس کمار، منیجنگ ڈائریکٹر، ڈی ایم آر سی شامل تھے۔

پروگرام کے دوران، ڈی ایم آر سی کے سالانہ ایوارڈز افراد اور ٹیموں کو ان کی تنظیم کے لیے شاندار شراکت کے لیے پیش کیے گئے۔

ایوارڈز میں شامل تھے:

• *میٹرو وومن آف دی ایئر*: محترمہ پریتی، سینئر اسٹیشن کنٹرولر/ٹرین آپریٹر

*میٹرو مین آف دی ایئر*: جناب سریش پوار، سینئر اسٹیشن منیجر/لائن سپروائزر

• *بہترین میٹرو اسٹیشن*: قرول باغ میٹرو اسٹیشن

• *بہترین میٹرو ڈپو*: کالندی کنج ڈپو

• *راج بھاشا پرسکار*: محترمہ۔ انجلی، سینئر کسٹمر ریلیشن اسسٹنٹ

ایک خصوصی ایوارڈ میٹرو ایڈونچر کلب (ایم اے سی)ٹیم کو بھی دیا گیا، جس نے سال بھر کی سرگرمیوں کے ذریعے ڈی ایم آر سی ملازمین کے درمیان ٹیم اسپرٹ اور ربط کو فروغ دیا۔

دلّی کی معزز وزیر اعلیٰ محترمہ ریکھا گپتا نے بھی اس موقع پر دلّی میٹرو کو مبارکباد دی۔ انہوں نے کہا، "دلّی میٹرو نے لوگوں کے دلوں میں جو مقام بنایا ہے، وہ واقعی لائف لائن سے کم نہیں ہے۔ جب کوئی مسافر دلّی میٹرو میں داخل ہوتا ہے تو ایک 'اچھا احساس' ہوتا ہے۔ وہ اسے صاف رکھتے ہیں اور قواعد کی بھی پابندی کرتے ہیں۔ اس سے رویے میں تبدیلی آئی ہے۔"

یہ تقریب اس بات پر غور کرنے کا موقع تھی کہ دلّی میٹرو کتنی ترقی کر چکی ہے اور اس سفر کا حصہ رہنے والے ہر فرد کی محنت کی قدر کرنے کا وقت تھا۔ یہ ڈی ایم آر سی کے دلّی اور اس کے آس پاس کے لوگوں کے لیے محفوظ، قابل اعتماد اور ماحول دوست سفر فراہم کرنے کے مسلسل عزم کی یاد دہانی بھی تھی۔

***********

ش ح ۔   م  د ۔  م  ص

(U :541 )

(Release ID: 2126623) Visitor Counter : 11