قومی انسانی حقوق کمیشن (این ایچ آر سی) انڈیا نے کرناٹک کے ہبلی میں ایک نابالغ لڑکی کے اغوا ، عصمت دری اور قتل اور پولیس مڈبھیڑ میں گرفتار ملزم کی موت کے بارے میں میڈیا رپورٹ کا از خود نوٹس لیا ہے ۔اطلاعات کے مطابق یہ واقعہ 14 اپریل 2025 کو پیش آیا ۔

کمیشن نے مشاہدہ کیا ہے کہ خبروں کے مندرجات ، اگر سچ ہیں ، تو متاثرہ نابالغ لڑکی اور مبینہ مڈبھیڑ میں مارے گئے گرفتار مشتبہ مجرم کے انسانی حقوق کی سنگین خلاف ورزی کو جنم دیتے ہیں ۔اس لیے کمیشن نے چیف سکریٹری اور ڈائریکٹر جنرل آف پولیس ، حکومت کرناٹک کو نوٹس جاری کر کے چار ہفتوں کے اندر اس معاملے میں تفصیلی رپورٹ طلب کی ہے ۔توقع ہے کہ رپورٹ میں پوسٹ مارٹم معائنے اور دونوں متوفی کی مجسٹریٹ انکوائری رپورٹس شامل ہوں گی ۔

14 اپریل 2025 کو نشر ہونے والی میڈیا رپورٹ کے مطابق ، باتھ روم سے لڑکی کی لاش برآمد ہونے کے فورا ًبعد ، مشتعل رہائشیوں نے ملزم کی گرفتاری کا مطالبہ کرتے ہوئے اشوک نگر پولیس اسٹیشن کے باہر احتجاج کیا ۔مبینہ طور پر ، اسے پولیس نے واقعے کے چند گھنٹوں کے اندر ہی گرفتار کر لیا تھا اور اسے پوچھ گچھ کے لیے لے جایا جا رہا تھا اس وقت اس نے ان پر حملہ کرنے کی کوشش کی ، جس کے نتیجے میں اسے گولیوں کے زخم آئے ، جس کی وجہ سے اس کی موت ہوگئی ۔

*****

(ش ح۔   ام۔ج)

UR-389