કેન્દ્રીય ગૃહમંત્રી અને સહકારિતા મંત્રી શ્રી અમિત શાહે આજે ગુજરાતનાં ગાંધીનગરમાં ઇન્ડિયન ફાર્મર્સ ફર્ટિલાઇઝર કોઓપરેટિવ લિમિટેડ (ઇફ્કો)ની કલોલ શાખાની સુવર્ણ જયંતીની ઉજવણીમાં હાજરી આપી હતી અને બીજ અનુસંધાન કેન્દ્રનો શિલાન્યાસ કર્યો હતો. આ પ્રસંગે ગુજરાતના મુખ્યમંત્રી શ્રી ભૂપેન્દ્ર પટેલ સહિત અનેક મહાનુભાવો ઉપસ્થિત રહ્યા હતા.

કેન્દ્રીય ગૃહ મંત્રી અને સહકારિતા મંત્રી શ્રી અમિત શાહે તેમના સંબોધનમાં જણાવ્યું હતું કે, આજે ઇફ્કોના કાલોલ પ્લાન્ટની સુવર્ણ જયંતી અને બીજ અનુસંધાન કેન્દ્રનો શિલાન્યાસ સમારોહ છે. તેમણે જણાવ્યું હતું કે, ઇફ્કોની ભવ્ય યાત્રાનાં 50 વર્ષ દર્શાવે છે કે, જ્યારે સહકારી અને કોર્પોરેટ મૂલ્યો સાથે મળીને કામ કરે છે, ત્યારે કેવી રીતે અતુલ્ય પરિણામો પ્રાપ્ત થાય છે. તેમણે ઉલ્લેખ કર્યો હતો કે, ઇફ્કોએ સંશોધન અને વિકાસ, માર્કેટિંગ, બ્રાન્ડિંગ અને દરેક ઘર સુધી પહોંચવા સાથે સંબંધિત તમામ પાસાંઓનું અસરકારક રીતે સંચાલન કર્યું છે.

શ્રી શાહે ભારપૂર્વક જણાવ્યું હતું કે, અત્યારે ભારત અનાજનાં ક્ષેત્રમાં સ્વનિર્ભર છે અને ઇફ્કોએ આ સિદ્ધિમાં મહત્ત્વપૂર્ણ ભૂમિકા ભજવી છે. તેમણે જણાવ્યું હતું કે, ઇફ્કોએ ખેડૂતોને ખાતર સાથે જોડ્યા છે અને ખાતરોને સહકારી મંડળીઓ સાથે જોડવાનું કામ પણ કર્યું છે. તેમણે ઉમેર્યું હતું કે, ઇફ્કો તેની ભવ્ય યાત્રાનાં 50 વર્ષ પૂર્ણ કર્યા પછી હવે ગર્વથી ઊભી છે. કેન્દ્રીય સહકારિતા મંત્રીએ વિશ્વાસ વ્યક્ત કર્યો હતો કે, જ્યારે ઇફ્કો તેની શતાબ્દી ઉજવશે, ત્યારે ઇફ્કોની પ્રતિષ્ઠા વિશ્વભરમાં સહકારી સંસ્થાઓમાં નોંધપાત્ર રીતે વધશે.

શ્રી અમિત શાહે જણાવ્યું હતું કે, ઇફ્કોએ વિવિધ પ્રકારનાં સંશોધન અને વિકાસલક્ષી કાર્યો પણ હાથ ધર્યા છે. તેમણે ઉલ્લેખ કર્યો હતો કે, જ્યારે ઇફકોની કલોલ ફેક્ટરીનો ભૂમિપૂજન સમારોહ યોજાયો હતો, ત્યારે તે સમયે તેને એક મોટી ક્રાંતિ માનવામાં આવતી હતી. જેમ જેમ સમય આગળ વધતો ગયો તેમ તેમ ઇફ્કોએ નેનો યુરિયા, નેનો ડીએપી, નેનો લિક્વિડ યુરિયા, લિક્વિડ ડીએપી વગેરે ક્ષેત્રોમાં સંશોધન અને પ્રયોગો હાથ ધર્યા અને ઉત્પાદનમાં વધારો કર્યો.

તેમણે જણાવ્યું હતું કે, ઇફ્કોએ નેનો યુરિયા અને નેનો ડીએપીનાં ક્ષેત્રમાં ભારતનાં સહકારી ક્ષેત્રને વૈશ્વિક સ્તરે અગ્રણી બનાવ્યું છે. તેમણે ઉમેર્યું હતું કે, ઇફ્કોનું નેનો યુરિયા અને નેનો ડીએપી હવે સમગ્ર વિશ્વમાં પહોંચી રહ્યું છે. શ્રી શાહે વધુમાં જણાવ્યું હતું કે, ઇફ્કોએ તેની ક્ષમતામાં વધારો કર્યો છે, ખેડૂતોનાં ખેતરો સુધી તેની પહોંચ વધારી છે અને સંશોધન અને વિકાસ મારફતે પ્રયોગશાળાના પ્રયોગોનાં પરિણામો સીધા ક્ષેત્રોમાં પહોંચાડવાનું કામ કર્યું છે.

કેન્દ્રીય ગૃહમંત્રી અને સહકારિતા મંત્રીએ જણાવ્યું હતું કે, આજે ગાંધીનગરમાં બીજ અનુસંધાન કેન્દ્રની સ્થાપના છે. તેમણે ઉલ્લેખ કર્યો હતો કે, પ્રધાનમંત્રી શ્રી નરેન્દ્ર મોદીએ દેશનાં દરેક ક્ષેત્રમાં કેટલાંક નવા સાહસો શરૂ કર્યા છે. તેમણે જણાવ્યું હતું કે, પ્રધાનમંત્રી શ્રી નરેન્દ્ર મોદીનાં નેતૃત્વમાં સહકાર મંત્રાલયે દેશનાં સહકારી ક્ષેત્રમાં આશરે 62 અભૂતપૂર્વ પહેલો હાથ ધરી છે. તેમણે વધુમાં નોંધ્યું હતું કે, તાજેતરમાં જ ત્રિભુવન સહકારી યુનિવર્સિટીની સ્થાપના માટે સંસદે ખરડો પસાર કર્યો હતો.

શ્રી શાહે જણાવ્યું હતું કે, ત્રિભુવનદાસ પટેલનાં સહકારી ક્ષેત્રમાં પ્રદાનનાં સન્માનમાં પ્રધાનમંત્રી મોદીએ આ સહકારી યુનિવર્સિટીનું નામ તેમનાં નામ પરથી રાખ્યું છે. તેમણે સમજાવ્યું હતું કે, આ યુનિવર્સિટી પીએસીએસથી લઈને સર્વોચ્ચ સંસ્થાઓ સુધી સહકારનાં દરેક ક્ષેત્રમાં આધુનિક સહકારી શિક્ષણ અને પારદર્શકતા લાવવા કામ કરશે. તેમણે ઉમેર્યું હતું કે, આ યુનિવર્સિટી એઆઇ જેવી આધુનિક ટેકનોલોજીનો ઉપયોગ કરીને દેશમાં સંપૂર્ણ સહકારી ચળવળને આગળ વધારવા માટે કામ કરશે અને આ તારણોના આધારે આગામી 50 વર્ષ માટે દિશા નક્કી કરવા વિવિધ વિશ્લેષણ હાથ ધરશે.

શ્રી અમિત શાહે જણાવ્યું હતું કે, આજે ઇફ્કોએ બીજ અનુસંધાન કેન્દ્ર શરૂ કર્યું છે અને ઇફ્કો પોતાનાં દરેક કાર્યોને સફળતાપૂર્વક પૂર્ણ કરવાનો ટ્રેક રેકોર્ડ ધરાવે છે. તેમણે જણાવ્યું હતું કે, આ બીજ અનુસંધાન કેન્દ્ર આપણી જમીન પર ઉત્પાદકતા વધારશે, ઉત્પાદનને વધારે પોષક બનાવશે, પાણી અને ખાતરનો ઉપયોગ ઘટાડશે અને બિયારણની ગુણવત્તામાં સુધારો કરશે. આ કેન્દ્ર આપણા પ્રાચીન બીજની જાળવણી પર પણ કામ કરશે, જેમાંથી કેટલાક હજારો વર્ષ જૂના છે.

શ્રી શાહે વધુમાં જણાવ્યું હતું કે, જ્યારે 50 વર્ષ અગાઉ ઇફ્કોની સ્થાપના થઈ હતી, ત્યારે કોઈએ કલ્પના પણ નહોતી કરી કે, તે આ સ્તરે પહોંચશે. એ જ રીતે આજે જ્યારે બીજ અનુસંધાન કેન્દ્રનો પાયો નંખાઈ ગયો છે, ત્યારે આ કેન્દ્ર પણ આપણા ખેડૂતોની સમૃદ્ધિને વધારવામાં એક મહત્વપૂર્ણ પરિબળ સાબિત થશે.

કેન્દ્રીય સહકારિતા મંત્રીએ કહ્યું કે આપણી સહકારી સંસ્થાઓને મજબૂત કરવા માટે, આપણે પ્રાથમિક સહકારી મંડળીઓ અને સહકારી ડેરીઓને મજબૂત બનાવવા પર ધ્યાન કેન્દ્રિત કરવાની જરૂર છે. તેમણે જણાવ્યું હતું કે, આ માટે સરકારે કમ્પ્યુટરાઇઝેશન, પ્રાથમિક કૃષિ ધિરાણ મંડળીઓ (પીએસીએસ)ને નવી પ્રવૃત્તિઓ સાથે જોડવા અને વડા પ્રધાન મોદીના નેતૃત્વ હેઠળની સહકારી વ્યવસ્થામાં ડેરીઓના સંપૂર્ણ આર્થિક ચક્રને સામેલ કરવા પર કામ કર્યું છે.

તેમણે જણાવ્યું હતું કે, આજે ઇફ્કો કંડલા, કલોલ, ફુલપુર, આમળા અને પારાદીપ એમ ત્રણ રાજ્યોમાં પાંચ સ્થળોએ ઉત્પાદન એકમો ધરાવે છે અને ખાતર ક્ષેત્રે અમે આત્મનિર્ભર બન્યા છીએ. શ્રી શાહે વધુમાં જણાવ્યું હતું કે, હાલની ખાતર ઉત્પાદન ક્ષમતા 9 મિલિયન મેટ્રિક ટન છે, જેમાં વેચાણ 11 મિલિયન મેટ્રિક ટન, રૂ. 40,000 કરોડનું ટર્નઓવર અને રૂ. 3,200 કરોડનો નફો થયો છે.

શ્રી અમિત શાહે જણાવ્યું હતું કે, છેલ્લાં 50 વર્ષમાં ઇફ્કોનાં નેતૃત્વમાં રાસાયણિક ખાતરથી માંડીને નેનો ખાતરો અને જૈવ ખાતરો સુધીની સફર થઈ છે. તેમણે ઉલ્લેખ કર્યો હતો કે, જ્યારે ઇફકોની સ્થાપના થઈ હતી, ત્યારે ખાતરોમાં અમારું ધ્યાન જથ્થાબંધ ઉપયોગ પર હતું, પણ અત્યારે અમારું ધ્યાન લક્ષિત અને નિયંત્રિત પ્રકાશન પર કેન્દ્રિત છે, જે સુનિશ્ચિત કરે છે કે આપણી જમીનને નુકસાન પહોંચાડ્યા વિના પોષકતત્વોનું વિતરણ થાય છે. તેમણે ઉમેર્યું હતું કે, અગાઉ ખાતરોનો ખર્ચ ઊંચો હતો અને તેની કાર્યક્ષમતા ઓછી હતી, પણ હવે ઇફ્કોએ ખાતરોને ઓછા ખર્ચે અને ઊંચી કાર્યદક્ષતાવાળું બનાવ્યું છે.

કેન્દ્રીય સહકારિતા મંત્રીએ નોંધ્યું હતું કે, નેનો યુરિયા અને નેનો ડીએપી લિક્વિડ સાથે વધારાનાં ખાતરો લાગુ કરવાની જરૂર નથી. તેમણે ભારપૂર્વક જણાવ્યું હતું કે, આજે ઇફ્કોએ તેની ઉત્પાદન ક્ષમતામાં એટલી હદે વધારો કર્યો છે કે હવે તેના ઉત્પાદનોની નિકાસ સમગ્ર વિશ્વમાં થઈ રહી છે. તેમણે કહ્યું હતું કે, ઇફ્કોનાં 50 વર્ષ કૃષિ, અનાજનાં ઉત્પાદન, ગ્રામીણ અર્થતંત્ર અને ખેડૂતોની સમૃદ્ધિને સમર્પિત છે. તેમણે ઉલ્લેખ કર્યો હતો કે, ઇફ્કોનાં આગામી 50 વર્ષ, એક સદી તરફ આગળ વધી રહ્યાં છે, જે ખેતીને આધુનિક બનાવવા, તેને સૌથી વધુ ઉત્પાદક બનાવવા, આપણી કૃષિ જમીનનું સંરક્ષણ કરવા અને પર્યાવરણનું સંરક્ષણ કરવા પર ધ્યાન કેન્દ્રિત કરશે.

AP/IJ/GP/JD