Ka Sorkar India ka kut jingmut ban kyntiew ïa ki jaidbynriew rit paid, da kaba phaikhmat kyrpang sha ki nongtrei kti kiba mihkhmat ïa ka deiriti kaba riewspah bad ka riti dustur jong ka ri jong ngi, la ong u Myntri sorkar pdeng ba dei khmih ia ka Tnad Minority Affairs, Kiren Rijiju, shuwa ban plie paidbah ia ka Lok Samvardhan Parv ha Srinagar, Jammu & Kashmir.

Kum ka dak jong ka ‘Sabka Saath, Sabka Vikas’, yn plie paidbah ïa ka Lok Samvardhan Parv da u Myntri ha ka por 3:00 Janmiet lashai ka sngi, ha Convention Centre Ground, Kashmir University, Srinagar. Ia kane ka jingialang la pynlong da ka tnad Minority Affairs bad kan bteng haduh 13 tarik Iaiong, 2025.

U Omar Abdullah, Myntri Rangbah ka Jammu & Kashmir, un plie paidbah ia ka jingialang kum u kongsan, bad u George Kurian, Myntri Khynnah jong ka Sorkar Pdeng ba dei khmih ia ka Tnad Minority Affairs and Fisheries, Animal Husbandry & Dairying, un iadon lang kum u Symbud Kongsan. La khmih lynti ruh ban iadonlang kiwei de ki kynrem ki lyndan, ki ophisar sorkar, bad ki nongshim bynta na kylleng ka ri.

Ka Lok Samvardhan Parv ka thmu ban ai ka rynsan kaba khlain ha ka ri na ka bynta ki nongtrei kti bad ki riewshemphang ha ka kam shet jingshet na ki jaidbynriew ritpaid ban pyni ia ki kam shna jingshna bad ki jingbam tynrai jong ki. Ha ka jingïahap bad ka aiom syntiew Tulip—kaba khring bha ia ki nongjngoh kai—la khmih lynti ba kane ka jingïalang kan khring ïa ki nong jngohkai kiba bun, kan kyntiew ïa ka jingïoh bynta ha ki ïew ki hat bad ki lad kamai jakpoh na ka bynta ki nongïashim bynta.

Ha kane ka exhibition yn don palat 100 ngut ki nongtrei kti na 25 tylli ki Jylla bad ki Union Territory, ki ban pyni ia ki jait jingshna bapher bapher kiba kynthup ia:

• Ki jingsaindur jong ki nong Kashmir kum ka jingthain Carpet, ka jingshna ia ki mar na ki kot. Ka jingthain jain Sozni, ka jingthain Crewel bad ka jingtrei Ari.
• Ki Shawl na Punjab
• Ki jain ba thain ha Uttarakhand
• Ki jingdeng tynrai na Nagaland
• Ka jingthain Crochet na Goa
• Ki tiar thri bad siej na Assam
• Ki mar snieh na Maharashtra
• Ki saree Matka Silk bad Baswara na Bihar

Nalor kata, 16 ngut ki riewshemphang ha ka kam shet jingshet na 12 tylli ki Jylla kin ai ïa ka jingïaid lynti kaba riewspah lyngba ki jingbam ba bang jong ka thaiñ, kynthup ïa:

• Ka Kashmiri Wazwan
• Ki jingbam Gujarati
• Bihar ka Swad
• UP ki Chaat
• Flavour & Fire Paan

Ban kyntiew shuh shuh ïa ka prokram, ki jingpyni kolshor man ka sngi ha ka janmiet kin rakhe ïa ka jingrwai, ka shad, bad ki dustur ïathuhkhana jong ki jaitbynriew rit paid jong ka ri.

Kum ka sienjam ba kongsan jong ka tnad Minority Affairs, ka Lok Samvardhan Parv ka ïahap bad ka thong ‘Vocal for Local’, kaba aiti ban pynneh pynsah bad kyntiew ïa ki kam shna jingshna bad ki jingbam tynrai. Ka jingïalang ka pynpaw ïa ka jingangnud jong ka Tnad ban pynkupbor ïa ki nongtrei kti lyngba ki jingpyniasoh bad ki ïew, ka jingkyntiew ïa ka sap, bad ka jingkynthup ha ki kam pisa tyngka, ha ka jingïatreilang bad ki kynhun bapher bapher.

Ka Tnad Minority Affairs ka khot sngewbha ïa ki nongshong shnong, ki nong jngohkai, ki briew kiba ieid ia ka kam saindur, ka kolshor ban leit jngoh ïa ka Lok Samvardhan Parv bad iadon bynta ha kane ka jingrakhe ïa ka deiriti ba riewspah bad bapher jong ka ri.

***