প্ৰধানমন্ত্ৰী শ্ৰী নৰেন্দ্ৰ মোদীৰ নেতৃত্বত ভাৰত চৰকাৰে প্ৰাকৃতিক দুৰ্যোগ আৰু সংকটৰ সময়ত ৰাজ্য চৰকাৰসমূহৰ সৈতে কান্ধত কান্ধ মিলাই থিয় দিছে। ইয়াৰ অধীনত কেন্দ্ৰীয় গৃহ তথা সমবায় মন্ত্ৰী শ্ৰী অমিত শ্বাহৰ অধ্যক্ষতাত উচ্চ পৰ্যায়ৰ সমিতিখনে ২০২৪ চনৰ ভিতৰত বানপানী, আকস্মিক বানপানী, ডাৱৰ বিস্ফোৰণ, ভূমিস্খলন, ঘূৰ্ণীবতাহৰ ধুমুহাৰ ফলত ক্ষতিগ্ৰস্ত বিহাৰ, হিমাচলপ্ৰদেশ, তামিলনাডু আৰু কেন্দ্ৰীয় শাসিত অঞ্চললৈ ১২৮০.৩৫ কোটি টকাৰ অতিৰিক্ত কেন্দ্ৰীয় সাহায্যৰ অনুমোদন জনাইছে।

উচ্চ পৰ্যায়ৰ সমিতিয়ে ৰাষ্ট্ৰীয় দুৰ্যোগ সঁহাৰি পুঁজি (এনডিআৰএফ)ৰ পৰা তিনিখন ৰাজ্যক ১২৪৭.২৯ কোটি টকাৰ কেন্দ্ৰীয় সাহায্য প্ৰদানৰ অনুমোদন জনায়। ৰাজ্যিক দুৰ্যোগ সঁহাৰি পুঁজি (এছডিআৰএফ)ত উপলব্ধ বছৰৰ বাবে মুঠ ধনৰ ৫০% আৰু ৩৩.০৬ কোটি টকা এটা কেন্দ্ৰীয় শাসিত অঞ্চলক প্ৰদানৰ বাবে অনুমোদন জনায়। মুঠ ১২৮০.৩৫ কোটি টকাৰ ভিতৰত বিহাৰৰ বাবে ৫৮৮.৭৩ কোটি টকা, হিমাচল প্ৰদেশৰ বাবে ১৩৬.২২ কোটি টকা, তামিলনাডুৰ বাবে ৫২২.৩৪ কোটি টকা আৰু কেন্দ্ৰীয় শাসিত অঞ্চল পুডুচেৰীৰ বাবে ৩৩.০৬ কোটি টকা অনুমোদন জনায়।

এই অতিৰিক্ত সাহায্য ইতিমধ্যে ৰাজ্যসমূহ/কেন্দ্ৰীয় শাসিত অঞ্চলৰ নিষ্পত্তিত ৰখা এছডিআৰএফ আৰু কেন্দ্ৰীয় শাসিত অঞ্চল দুৰ্যোগ সঁহাৰি পুঁজি (ইউটিডিআৰএফ)ত কেন্দ্ৰই ৰাজ্যসমূহলৈ মুকলি কৰা ধনৰ অতিৰিক্ত। ২০২৪-২৫ বিত্তীয় বৰ্ষত কেন্দ্ৰীয় চৰকাৰে এছডিআৰএফৰ অধীনত ২৮খন ৰাজ্যলৈ ২০,২৬৪.৪০ কোটি টকা আৰু এনডিআৰএফৰ অধীনত ১৯খন ৰাজ্যলৈ ৫,১৬০.৭৬ কোটি টকা মুকলি কৰি দিছে। তদুপৰি, ৰাজ্যিক দুৰ্যোগ প্ৰশমন পুঁজিৰ পৰা ১৯খন ৰাজ্যলৈ ৪৯৮৪.২৫ কোটি টকাৰ লগতে ৰাষ্ট্ৰীয় দুৰ্যোগ প্ৰশমন পুঁজিৰ পৰা ০৮খন ৰাজ্যলৈ ৭১৯.৭২ কোটি টকা মুকলি কৰি দিয়া হৈছে।

কেন্দ্ৰীয় চৰকাৰে আনুষ্ঠানিক পত্ৰ লাভলৈ অপেক্ষা নকৰাকৈয়ে দুৰ্যোগৰ লগে লগে এই ৰাজ্যসমূহলৈ আন্তঃমন্ত্ৰালয় কেন্দ্ৰীয় দল (আইএমচিটি) প্ৰেৰণ কৰিছিল।

*****

RK/VV/ASH/PS/DB