ઇપીએફ સભ્યો માટે જીવનની સરળતા અને નોકરીદાતાઓ માટે વેપાર-વાણિજ્યની સરળતા વધારવાની દિશામાં વધુ એક પગલું ભરતાં એમ્પ્લોઇઝ પ્રોવિડન્ટ ફંડ ઓર્ગેનાઇઝેશન (ઇપીએફઓ)એ તેની દાવાની પતાવટની પ્રક્રિયામાં બે મુખ્ય સરળીકરણ પ્રસ્તુત કર્યા છે. આ પગલાં દાવાની પતાવટની પ્રક્રિયાને નોંધપાત્ર રીતે સુવ્યવસ્થિત કરશે અને દાવાના અસ્વીકારથી સંબંધિત ફરિયાદો ઘટાડશે.

1. ચેક લીફ/એટેસ્ટેડ બેંક પાસબુકની તસવીર અપલોડ કરવાની જરૂરિયાતને દૂર કરવી

EPFO એ ઓનલાઇન દાવાઓ ફાઇલ કરતી વખતે ચેકના પાન અથવા પ્રમાણિત બેંક પાસબુકની તસવીર અપલોડ કરવાની આવશ્યકતાને સંપૂર્ણપણે સમાપ્ત કરી દીધી છે. આ જરૂરિયાતને શરૂઆતમાં કેટલાક કેવાયસી-અપડેટેડ સભ્યો માટે પ્રાયોગિક ધોરણે હળવી કરવામાં આવી હતી. 28 મે, 2024ના રોજ લોન્ચ થયા પછી, આ પગલાથી 1.7 કરોડ ઇપીએફ સભ્યોને લાભ થયો છે.

સફળ પાયલોટ બાદ હવે ઇપીએફઓએ આ છૂટછાટ તમામ સભ્યો સુધી લંબાવી દીધી છે. યુનિવર્સલ એકાઉન્ટ નંબર (યુએએન) સાથે બેંક એકાઉન્ટ સીડિંગ સમયે બેંક ખાતાધારકનું નામ ઇપીએફ સભ્યની વિગતો સાથે પહેલેથી જ ચકાસાયેલું હોવાથી, આ વધારાના દસ્તાવેજોની હવે જરૂર નથી.

આ જરૂરિયાતને દૂર કરીને, ઇપીએફઓ તાત્કાલિક આશરે 6 કરોડ સભ્યોને લાભ આપશે, નબળી ગુણવત્તા / વાંચી ન શકાય તેવા અપલોડને કારણે દાવાના અસ્વીકારને દૂર કરશે અને સંબંધિત ફરિયાદો ઘટાડશે.

2. યુનિવર્સલ એકાઉન્ટ નંબર (યુએએન) સાથે બેંક એકાઉન્ટ વિગતો સીડ કરવા માટે એમ્પ્લોયરની મંજૂરીની જરૂરિયાતને દૂર કરવી

યુએએન સાથે બેંક ખાતાઓને સીડ કરવાની પ્રક્રિયાને સરળ બનાવવા માટે, ઇપીએફઓએ હવે બેંક વેરિફિકેશન પછી એમ્પ્લોયરની મંજૂરીની આવશ્યકતાને દૂર કરી દીધી છે.

હાલમાં, દરેક સભ્યએ તેમના પીએફ ઉપાડને આવા ખાતામાં એકીકૃત રીતે જમા કરાવવા માટે યુએએન સાથે તેના બેંક ખાતાને સીડ કરવું જરૂરી છે. એફ.વાય. 2024-25 દરમિયાન, 1.3 કરોડ સભ્યોએ તેમના બેંક એકાઉન્ટ્સ સીડ કરવા માટે તેમની વિનંતીઓ સબમિટ કરી છે અને સંબંધિત બેંક / એનપીસીઆઈ સાથે યોગ્ય મેળ ખાધા પછીની વિનંતીઓને ડીએસસી / ઇ-સાઇન મારફતે એમ્પ્લોયર દ્વારા મંજૂરી આપવામાં આવશે.

એવું જોવામાં આવે છે કે સભ્યો દ્વારા દૈનિક ધોરણે બેંક ખાતાના સીડિંગ માટે આશરે 36,000 વિનંતીઓ કરવામાં આવી રહી છે અને બેંકોને ચકાસણી પૂર્ણ કરવામાં સરેરાશ 3 દિવસનો સમય લાગે છે. જો કે, બેંક ચકાસણી બાદ, એમ્પ્લોયર દ્વારા આ પ્રક્રિયાને મંજૂર કરવામાં લાગતો સરેરાશ સમય આશરે 13 દિવસનો હોય છે, જેના પરિણામે એમ્પ્લોયરના સ્તરે કામના ભારણનો ભરાવો થાય છે અને તેના પરિણામે સભ્ય માટે બેંક એકાઉન્ટના સીડિંગમાં વિલંબ થાય છે. આ ઉપરાંત, આ મંજૂરીનું પગલું ચકાસણી પ્રક્રિયામાં કોઈ મૂલ્ય ઉમેરી રહ્યું નથી.

અત્યારે દર મહિને 7.74 કરોડ સભ્યોનું યોગદાન છે, તેમાંથી 4.83 કરોડ સભ્યોએ યુએએનમાં તેમનાં બેંક ખાતાંઓ સીડ કરી દીધાં છે અને 14.95 લાખ મંજૂરીઓ નોકરીદાતાઓનાં સ્તરે વિલંબિત છે.

તદનુસાર, નોકરીદાતાઓને 'ઇઝ ઑફ ડૂઇંગ બિઝનેસ' અને સભ્યોને 'ઇઝ ઓફ લિવિંગ'ની સુવિધા પ્રદાન કરવા માટે હવે સભ્યના બેંક ખાતાની સીડિંગ પ્રક્રિયામાં બેંક ખાતાની ખરાઈને મંજૂરી આપવા માટે એમ્પ્લોયરની ભૂમિકાને દૂર કરવામાં આવી છે. આનાથી 14.95 લાખથી વધુ સભ્યોને તાત્કાલિક લાભ થશે, જેમની મંજૂરીઓ નોકરીદાતાઓ પાસે બાકી છે.

ઉપરોક્ત સરળ પ્રક્રિયા તે સભ્યોને પણ સુવિધા આપશે કે જેઓ તેમના નવા બેંક ખાતા નંબર દાખલ કરીને તેમના પહેલાથી જ સીડેડ બેંક ખાતાને બદલવા માંગે છે. આઇએફએસસી કોડની સાથે આધાર ઓટીપી દ્વારા યોગ્ય રીતે પ્રમાણિત કરવામાં આવ્યું છે.

જે સભ્યોએ હજુ સુધી તેમના બેંક ખાતાનું સીડિંગ કરવાનું બાકી છે અથવા તેમના સીડેડ બેંક એકાઉન્ટમાં ફેરફાર કર્યો નથી, તેઓ ઉપરોક્ત સરળ પ્રક્રિયાનો લાભ લઈને વહેલામાં વહેલી તકે તેમના બેંક ખાતાને સીડ કરાવી શકે છે.

AP/IJ/GP/JD