|
വാണിജ്യ വ്യവസായ മന്ത്രാലയം
പുരോഗതിയുടെ നൂലിഴകൾ
'മെയ്ക്ക് ഇൻ ഇന്ത്യ' യിലൂടെ വസ്ത്ര-തുണിത്തര നിർമ്മാണ വ്യവസായത്തിന്റെ ഭാവി രൂപപ്പെടുത്തുന്നതെങ്ങനെ
Posted On:
01 APR 2025 7:46PM by PIB Thiruvananthpuram
ആമുഖം
2014-ൽ ആരംഭിച്ച മെയ്ക്ക് ഇൻ ഇന്ത്യ സംരംഭം, ഇന്ത്യയെ ഒരു ആഗോള വസ്ത്ര, തുണിത്തര നിർമ്മാണ കയറ്റുമതി കേന്ദ്രമാക്കി മാറ്റുന്നതിൽ ഒരു നിർണ്ണായക പങ്ക് വഹിച്ചിട്ടുണ്ട്. ഇന്ത്യൻ സമ്പദ്‌വ്യവസ്ഥയ്ക്ക് വലിയ സംഭാവന നൽകുന്ന ഒരു മേഖലയാണ് വസ്ത്ര നിർമ്മാണ വ്യവസായം. ഈ വ്യവസായം, കോടിക്കണക്കിന് ജനങ്ങൾക്ക് തൊഴിൽ നൽകുകയും ഗണ്യമായ വിദേശനാണ്യം നേടിത്തരികയും ചെയ്യുന്നു. ശക്തമായ നയപിന്തുണ, അടിസ്ഥാന സൗകര്യ വികസനം, നൈപുണ്യവും വൈദഗ്ധ്യവുമുള്ള തൊഴിൽ ശക്തി എന്നിവയുടെ പിൻബലത്തിൽ, ആഗോള വസ്ത്ര നിർമ്മാണ മേഖലയിലെ വിശ്വസനീയ നിക്ഷേപ കേന്ദ്രമായി ഇന്ത്യ ഉയർന്നുവന്നിട്ടുണ്ട്.
ഇന്ത്യയുടെ വസ്ത്ര, തുണിത്തര നിർമ്മാണ വ്യവസായത്തെക്കുറിച്ചുള്ള അവലോകനം
വസ്ത്ര, തുണിത്തര നിർമ്മാണ വ്യവസായം ഇന്ത്യയുടെ മൊത്ത ആഭ്യന്തര ഉത്പാദനത്തിൽ (GDP) 2.3% ഉം വ്യാവസായിക ഉത്പാദനത്തിൽ 13%ഉം കയറ്റുമതിയിൽ 12% ഉം സംഭാവന ചെയ്യുന്നു. 2023-24 ൽ 34.4 ബില്യൺ യുഎസ് ഡോളറിന്റെ തുണിത്തരങ്ങൾ ഇന്ത്യ കയറ്റുമതി ചെയ്തു. കയറ്റുമതിയുടെ 42% തുണിത്തരങ്ങളാണ്. തൊട്ടു പിന്നിൽ 34% അസംസ്കൃത വസ്തുക്കൾ / അന്തിമ ഉപയോഗത്തിന് സജ്ജമാകാത്ത വസ്തുക്കൾ, 30% ഫിനിഷ്ഡ് തുണിത്തരഇതര ഉത്പന്നങ്ങൾ എന്നിവയാണ്. കൃഷി കഴിഞ്ഞാൽ രണ്ടാമത്തെ വലിയ തൊഴിൽദാതാവ് കൂടിയാണ് ഈ മേഖല. വനിതകളും ഗ്രാമീണ ജനതയും ഉൾപ്പെടെ 4.5 കോടിയിലധികം ജനങ്ങൾക്ക് ഈ മേഖലയിൽ നേരിട്ട് തൊഴിൽ ലഭിക്കുന്നു. വസ്ത്ര, തുണിത്തര നിർമ്മാണ വ്യവസായത്തിന്റെ ഏകദേശം 80% രാജ്യത്തെ സൂക്ഷ്മ, ചെറുകിട, ഇടത്തരം സംരംഭങ്ങളുടെ (MSME) ക്ലസ്റ്ററുകളിലായി വ്യാപിച്ചു കിടക്കുന്നു എന്നത് ഈ വ്യവസായത്തിന്റെ സർവ്വാശ്ലേഷിത്വത്തിന് തെളിവാണ്.
മെയ്ക്ക് ഇൻ ഇന്ത്യ, സ്കിൽ ഇന്ത്യ, വനിതാ ശാക്തീകരണം, ഗ്രാമീണ യുവജനങ്ങൾക്ക് തൊഴിൽ, സർവ്വാശ്ലേഷിയായ വളർച്ച എന്നിങ്ങനെയുള്ള സർക്കാരിന്റെ സമഗ്ര ലക്ഷ്യങ്ങൾക്ക് അനുപൂരകമായി ഈ മേഖല വർത്തിക്കുന്നു. ഈ വ്യവസായം പ്രതിവർഷം ഏകദേശം 22,000 ദശലക്ഷം വസ്ത്രങ്ങളും തുണിത്തരങ്ങളും ഉത്പാദിപ്പിക്കുന്നു. വിപണി വലുപ്പം നിലവിലെ 174 ബില്യൺ ഡോളറിൽ നിന്ന് 2030 ആകുമ്പോഴേക്കും 350 ബില്യൺ യുഎസ് ഡോളറിലെത്തുമെന്ന് പ്രതീക്ഷിക്കുന്നു.
2024 ഏപ്രിൽ മുതൽ ഡിസംബർ വരെയുള്ള കാലയളവിൽ, മുൻ വർഷം ഇതേ കാലയളവിനെ അപേക്ഷിച്ച്, കരകൗശല വസ്തുക്കൾ ഉൾപ്പെടെയുള്ള തുണിത്തരങ്ങളുടെയും വസ്ത്രങ്ങളുടെയും കയറ്റുമതിയിൽ 7% വർദ്ധനവ് ഉണ്ടായതായി ടെക്സ്റ്റൈൽസ് മന്ത്രാലയം അടുത്തിടെ റിപ്പോർട്ട് ചെയ്തു. വളർച്ചാ പാതയിൽ, ഇന്ത്യൻ വസ്ത്ര വിപണി നിലവിൽ ആഗോളതലത്തിൽ അഞ്ചാം സ്ഥാനത്താണ്. അടുത്ത അഞ്ച് വർഷത്തിനുള്ളിൽ വളർച്ച 15-20% എന്ന നിരക്കിൽ ത്വരിതപ്പെടുത്താൻ സർക്കാർ സജീവമായി പ്രവർത്തിക്കുന്നു.
ടെക്സ്റ്റൈൽ വ്യവസായത്തിൽ 'മെയ്ക്ക് ഇൻ ഇന്ത്യ'യുടെ സ്വാധീനം
നയപരമായ സുപ്രധാന ഇടപെടലുകൾ, മെച്ചപ്പെട്ട അടിസ്ഥാന സൗകര്യങ്ങൾ, പ്രോത്സാഹനങ്ങൾ എന്നിവയിലൂടെ മെയ്ക്ക് ഇൻ ഇന്ത്യ സംരംഭം വസ്ത്ര നിർമ്മാണത്തെയും കയറ്റുമതിയെയും ഉത്തേജിപ്പിക്കുന്നു. 2024-25 ലെ കേന്ദ്ര ബജറ്റിൽ, ആഭ്യന്തര തുണി ഉത്പാദനം പ്രോത്സാഹിപ്പിക്കുന്നതിനായി, സർക്കാർ പൂർണ്ണമായും നികുതി ഒഴിവാക്കിയ തുണിത്തര നിർമ്മാണ യന്ത്രങ്ങളിൽ രണ്ട് തരം ഷട്ടിൽ-ലെസ് ലൂമുകൾ കൂടി ഉൾപ്പെടുത്തിയിട്ടുണ്ട്. വസ്ത്ര, തുണിത്തര നിർമ്മാണം ത്വരിതപ്പെടുത്തുന്നതിനും നിക്ഷേപങ്ങൾ ആകർഷിക്കുന്നതിനും കയറ്റുമതി പ്രോത്സാഹിപ്പിക്കുന്നതിനുമായി സർക്കാർ വിവിധ പദ്ധതികൾ അവതരിപ്പിച്ചിട്ടുണ്ട്:
1. വസ്ത്രനിർമ്മാണത്തിനായുള്ള ഉത്പാദന ബന്ധിത പ്രോത്സാഹന പദ്ധതി (PLI)
ലക്ഷ്യം:
മനുഷ്യനിർമ്മിത നൂലിഴകളുടെയും (MMF) സാങ്കേതിക തുണിത്തരകളുടെയും ഉത്പാദനം വർദ്ധിപ്പിക്കുക.
ബജറ്റ്: ₹10,683 കോടി.
പ്രോത്സാഹനങ്ങൾ:
വൻകിട വസ്ത്ര നിർമ്മാതാക്കൾക്കുള്ള സാമ്പത്തിക പ്രോത്സാഹനങ്ങൾ.
2. പി.എം. മിത്ര (മെഗാ ഇന്റഗ്രേറ്റഡ് ടെക്സ്റ്റൈൽ റീജിയൻ ആൻഡ് അപ്പാരൽ) പാർക്കുകൾ
ലക്ഷ്യം:
വസ്ത്ര, തുണിത്തര നിർമ്മാണത്തിനായി ലോകോത്തര വ്യാവസായിക അടിസ്ഥാന സൗകര്യങ്ങൾ വികസിപ്പിക്കുക.
ശ്രദ്ധയൂന്നുന്ന മേഖലകൾ:
നൂൽനൂൽപ്, നെയ്ത്ത്, സംസ്ക്കരണം, ധരിക്കുന്നതിന് സജ്ജമായ വസ്ത്രങ്ങൾ, വസ്ത്ര- തുണിത്തര നിർമ്മാണം, തുണിത്തര നിർമ്മാണ യന്ത്ര വ്യവസായം തുടങ്ങിയ വസ്ത്ര വ്യവസായത്തിന്റെ മൂല്യ ശൃംഖലയ്ക്കുതകും വിധം സമഗ്രവും ആധുനികവുമായ വ്യാവസായിക അടിസ്ഥാന സൗകര്യങ്ങൾ വികസിപ്പിക്കുക.
ബജറ്റ്:
2021-22 മുതൽ 2027-28 വരെയുള്ള കാലയളവിൽ ₹4,445 കോടി.
പ്രധാന നേട്ടങ്ങൾ:
ഗതാഗത ചെലവുകൾ കുറഞ്ഞു. നേരിട്ടുള്ള വിദേശ നിക്ഷേപം (FDI) വർദ്ധിച്ചു. ആഗോള വിപണികളിലെ മികച്ച മത്സരശേഷി വർദ്ധിച്ചു.
നിലവിലെ സ്ഥിതി:
ഗുജറാത്ത്, മഹാരാഷ്ട്ര, മധ്യപ്രദേശ്, തമിഴ്നാട്, കർണാടക, ഉത്തർപ്രദേശ്, തെലങ്കാന എന്നീ സംസ്ഥാനങ്ങളിലായി ആകെ 7 പാർക്കുകൾ സ്ഥാപിച്ചു.
3. ഭേദഗതി ചെയ്ത ടെക്നോളജി അപ്‌ഗ്രഡേഷൻ ഫണ്ട് സ്കീം (ATUFS)
ലക്ഷ്യം:
സൂക്ഷ്മ ചെറുകിട ഇടത്തരം സംരംഭക മേഖലയാൽ (MSME) നയിക്കപ്പെടുന്ന ടെക്സ്റ്റൈൽ വ്യവസായത്തിൽ മൂലധന നിക്ഷേപത്തെ പിന്തുണയ്ക്കുന്നതിനായി വായ്‌പാധിഷ്ഠിത സാങ്കേതിക നവീകരണത്തിനുള്ള ഇളവുകൾ പ്രോത്സാഹിപ്പിക്കുക.
ബജറ്റ്:
₹17,822 കോടി.
പ്രോത്സാഹനങ്ങൾ:
സാങ്കേതികവിദ്യ നവീകരണത്തിനുള്ള മൂലധന സബ്‌സിഡികൾ.
4. സമർത്ഥ് (വസ്ത്ര തുണിത്തര നിർമ്മാണ മേഖലയിലെ കാര്യക്ഷമത വർദ്ധിപ്പിക്കുന്നതിനുള്ള പദ്ധതി)
ലക്ഷ്യം:
നൈപുണ്യ വികസന, സംരംഭകത്വ മന്ത്രാലയവുമായി സഹകരിച്ച് ടെക്സ്റ്റൈൽസ് വ്യവസായത്തിലെ തൊഴിലാളികൾക്ക് നൈപുണ്യ പരിശീലനം നൽകുക.
ബജറ്റ് വിഹിതം:
2023-24 സാമ്പത്തിക വർഷത്തിൽ ₹115 കോടി അനുവദിച്ചു, അതിൽ ₹114.99 കോടി (99.9%) വിതരണം ചെയ്തു.
നിലവിലെ സ്ഥിതി:
2025 മാർച്ച് 27 വരെ, 4.78 ലക്ഷത്തിലധികം ഉപയോക്താക്കൾ സമർത്ഥ് പോർട്ടലിൽ രജിസ്റ്റർ ചെയ്തിട്ടുണ്ട്. 2025 മാർച്ച് 19 വരെ, ആകെ 3.82 ലക്ഷം ഗുണഭോക്താക്കൾക്ക് പരിശീലനം നൽകി (പാസായി) 2.97 ലക്ഷം ഗുണഭോക്താക്കൾക്ക് (77.74%) നിയമം ലഭിച്ചു.
5. ടെക്സ്റ്റൈൽ ക്ലസ്റ്റർ വികസന പദ്ധതി (TCDS)
ലക്ഷ്യം:
നിലവിലുള്ളതും സാധ്യതയുള്ളതുമായ ടെക്സ്റ്റൈൽ യൂണിറ്റുകൾ/ക്ലസ്റ്ററുകൾ എന്നിവ പ്രവർത്തനക്ഷമമാക്കുന്നതിനും സാമ്പത്തികമായി ലാഭകരമാക്കുന്നതിനും സംയോജിത തൊഴിലിടങ്ങളും, പരസ്പര ബന്ധിത ആവാസവ്യവസ്ഥയും സൃഷ്ടിക്കുക.
നേട്ടങ്ങൾ:
ടെക്സ്റ്റൈൽ ക്ലസ്റ്റർ വികസന പദ്ധതിയുടെ (TCDS) ക്ലസ്റ്റർ വികസന മാതൃക, ഉപയോക്തൃ കേന്ദ്രീകൃത ഇടപെടലുകൾ, സമ്പദ്‌വ്യവസ്ഥയുടെ വളർച്ച, ഉത്പാദനത്തിലെ മത്സരക്ഷമത, കുറഞ്ഞ ചെലവ്, സാങ്കേതികവിദ്യയിലേക്കും വിവരങ്ങളിലേക്കും പ്രവേശനം എന്നിവ മുഖേന നിർണ്ണായക നേട്ടങ്ങൾ സാധ്യമാക്കും
ബജറ്റ്:
₹853 കോടി.
നിലവിലെ സ്ഥിതി:
2025 മാർച്ച് 18 വരെ, പദ്ധതിക്ക് കീഴിൽ ഏകദേശം 1.22 ലക്ഷം തൊഴിലവസരങ്ങൾ സൃഷ്ടിക്കപ്പെട്ടു. 2024-25 കാലയളവിൽ, ₹34.48 കോടി അനുവദിച്ചു.
6. ദേശീയ സാങ്കേതിക തുണിത്തര ദൗത്യം (NTTM)
ലക്ഷ്യം:
രാജ്യത്തെ സാങ്കേതിക തുണിത്തര മേഖലയെ ഉത്തേജിപ്പിക്കുക
ലക്ഷ്യമിടുന്ന വർഷങ്ങൾ:
2020-21 മുതൽ 2025-26 വരെ
ബജറ്റ്:
₹1480 കോടി
ദൗത്യം ശ്രദ്ധ കേന്ദ്രീകരിക്കുന്നത്:
(i) ഗവേഷണം, നൂതനാശയങ്ങൾ, വികസനം,
(ii) പ്രോത്സാഹനവും വിപണി വികസനവും
(iii) വിദ്യാഭ്യാസവും വൈദഗ്ധ്യവും
(iv) സാങ്കേതിക തുണിത്തരങ്ങളിൽ ആഗോള നേതൃത്വത്തിലേക്ക് രാജ്യത്തെ ഉയർത്തുന്നതിന് സാങ്കേതിക തുണിത്തര കയറ്റുമതിയ്ക്ക് പ്രോത്സാഹനം.
നിലവിലെ സ്ഥിതി:
2025 ജനുവരി 1 ലെ കണക്കനുസരിച്ച്, സ്പെഷ്യാലിറ്റി ഫൈബറുകളുടെയും സാങ്കേതിക തുണിത്തരങ്ങളുടെയും വിഭാഗത്തിൽ ₹509 കോടി (ഏകദേശം) മൂല്യമുള്ള 168 പദ്ധതികൾക്ക് അംഗീകാരം ലഭിച്ചു.
ടെക്സ്റ്റൈൽസ് മന്ത്രാലയത്തിനുള്ള കേന്ദ്ര ബജറ്റ് വിഹിതം
2025-26 ലെ ടെക്സ്റ്റൈൽസ് മന്ത്രാലയത്തിന് കേന്ദ്ര ബജറ്റ് ₹5272 കോടി വിഹിതം പ്രഖ്യാപിച്ചു. 2024-25 ലെ ബജറ്റ് അടങ്കലിനേക്കാൾ 19% വർദ്ധനവാണിത് (4417.03 കോടി രൂപ).
പ്രധാന പ്രഖ്യാപനങ്ങൾ
പരുത്തി ദൗത്യം: ശാസ്ത്ര സാങ്കേതിക പിന്തുണയോടെ പരുത്തി ഉത്പാദനക്ഷമത, പ്രത്യേകിച്ച് അധിക നീളവും ഉന്നതനിലവാരവുമുള്ള നൂലിനങ്ങളുടെ ഉത്പാദനം, മെച്ചപ്പെടുത്തുന്നതിനുള്ള പഞ്ചവത്സര പദ്ധതി.
യന്ത്രത്തറികൾക്കുള്ള നികുതി ഇളവുകൾ: ചെലവ് കുറയ്ക്കുന്നതിനും നെയ്ത്ത് നവീകരിക്കുന്നതിനുമായി തിരഞ്ഞെടുക്കപ്പെട്ട ഷട്ടിൽ-ലെസ് ലൂമുകളുടെ തീരുവ ഒഴിവാക്കി.
നെയ്ത തുണിത്തരങ്ങളുടെ കസ്റ്റംസ് തീരുവ: വിലകുറഞ്ഞ നെയ്ത തുണിത്തരങ്ങളുടെ ഇറക്കുമതി തടയുന്നതിന് “10% അല്ലെങ്കിൽ 20%” എന്നതിൽ നിന്ന് “കിലോയ്ക്ക് 20% അല്ലെങ്കിൽ ₹115, ഏതാണ് ഉയർന്നത്” അതായി നികുതി വർദ്ധിപ്പിച്ചു.
കരകൗശല കയറ്റുമതി: കരകൗശല കയറ്റുമതി കാലയളവ് ആറ് മാസത്തിൽ നിന്ന് ഒരു വർഷമായി നീട്ടി. കൂടുതൽ അസംസ്കൃത ഇനങ്ങൾ നികുതി രഹിത ഇറക്കുമതിക്ക് അർഹമാണ്.
MSME Boost-സൂക്ഷ്മ ചെറുകിട ഇടത്തരം സംരംഭങ്ങൾക്ക് പ്രോത്സാഹനം : കയറ്റുമതി, വായ്പാ ലഭ്യത എന്നിവയിലും തൊഴിലവസരങ്ങളും സംരംഭകത്വവും പ്രോത്സാഹിപ്പിക്കുന്നതിനായി നാഷണൽ മാനുഫാക്ചറിംഗ് മിഷൻ, എക്സ്പോർട്ട് പ്രൊമോഷൻ മിഷൻ, ഭാരത് ട്രേഡ് നെറ്റ്, ഫണ്ട് ഓഫ് ഫണ്ട്സ് തുടങ്ങിയ ദൗത്യങ്ങളിലും ശ്രദ്ധ കേന്ദ്രീകരിക്കുന്നു.
ആഭ്യന്തര ഉത്പാദനം വർദ്ധിപ്പിക്കുക, സൂക്ഷ്മ ചെറുകിട ഇടത്തരം സംരംഭങ്ങളെ പിന്തുണയ്ക്കുക, ടെക്സ്റ്റൈൽ മേഖലയെ നവീകരിക്കുക, ഇന്ത്യയുടെ ആഗോള മത്സരശേഷി വർദ്ധിപ്പിക്കുക എന്നിവയാണ് ഈ നടപടികളിലൂടെ ലക്ഷ്യമിടുന്നത്.
കയറ്റുമതി വളർച്ചയും വിപണി വ്യാപനവും
ലോകത്തിലെ ഏറ്റവും വലിയ ആറാമത്തെ വസ്ത്ര, തുണിത്തര കയറ്റുമതി രാജ്യമാണ് ഇന്ത്യ. 2023-24 ൽ ഇന്ത്യയുടെ മൊത്തം കയറ്റുമതിയിൽ കരകൗശല വസ്തുക്കൾ ഉൾപ്പെടെയുള്ള വസ്ത്ര, തുണിത്തര മേഖലയുടെ (T&A) പങ്ക് 8.21% ആണെന്നത് ശ്രദ്ധേയമാണ്. വസ്ത്ര, തുണിത്തര മേഖലയിലെ ആഗോള വ്യാപാരത്തിന്റെ 3.91% പങ്കാണ് ഇന്ത്യക്കുള്ളത്. ഇന്ത്യയുടെ പ്രധാന വസ്ത്ര, തുണിത്തര കയറ്റുമതി ലക്ഷ്യസ്ഥാനങ്ങൾ യുഎസ്എയും യൂറോപ്യൻ യൂണിയനുമാണ്. മൊത്തം വസ്ത്ര, തുണിത്തര കയറ്റുമതിയിൽ ഏകദേശം 47% വിഹിതവുമുണ്ട്. സർക്കാർ പ്രോത്സാഹനങ്ങളും വ്യാപാര കരാറുകളും കാരണം വസ്ത്ര, തുണിത്തര മേഖല ഗണ്യമായ കയറ്റുമതി വളർച്ച കൈവരിച്ചു.
വസ്ത്ര, തുണിത്തര മേഖലയിലെ കയറ്റുമതി വർദ്ധിപ്പിക്കുന്നതിന് സർക്കാർ ചുവടെപ്പറയുന്നവ ഉൾപ്പടെ, ഒട്ടേറെ നടപടികൾ കൈക്കൊണ്ടിട്ടുണ്ട്:
കേന്ദ്ര, സംസ്ഥാന നികുതികളിലും തീരുവകളിലും ഇളവ് (RoSCTL):
2019 മാർച്ച് 7-ന്, വസ്ത്രങ്ങൾ/തുണിത്തരങ്ങൾ, മേഡ്-അപ്പുകൾ എന്നിവയുടെ കയറ്റുമതിയിലെ കേന്ദ്ര, സംസ്ഥാന നികുതികളിലും തീരുവകളിലും ഇളവ് നൽകുന്നതിനായി സർക്കാർ RoSCTL പദ്ധതി അംഗീകരിച്ചു.
വസ്ത്ര തുണിത്തര നിർമ്മാണ മേഖലയ്ക്കുള്ള ഉത്പാദന ബന്ധിത പ്രോത്സാഹന (PLI) പദ്ധതി:
ഈ പദ്ധതി പ്രകാരം, 166 കോടി രൂപയുടെ കയറ്റുമതി ഉൾപ്പെടെ 1,355 കോടി രൂപയുടെ വിറ്റുവരവ് നേടിയതായി 31.03.2024-ന് പുറത്തിറക്കിയ ത്രൈമാസ അവലോകന റിപ്പോർട്ടുകൾ (QRRs) വ്യക്തമാക്കുന്നു.
സ്വതന്ത്ര വ്യാപാര കരാറുകൾ:
ഇന്ത്യ ഇതുവരെ 14 സ്വതന്ത്ര വ്യാപാര കരാറുകളിൽ (FTA) ഒപ്പുവച്ചിട്ടുണ്ട്. യുണൈറ്റഡ് അറബ് എമിറേറ്റ്സ് (UAE), ഓസ്ട്രേലിയ എന്നിവയുമായി അടുത്തിടെ അന്തിമമാക്കിയ കരാറുകളും സ്വിറ്റ്സർലൻഡ്, ഐസ്ലാൻഡ്, നോർവേ, ലിച്ചെൻസ്റ്റൈൻ എന്നിവ ഉൾപ്പെടുന്ന EFTA (യൂറോപ്യൻ ഫ്രീ ട്രേഡ് അസോസിയേഷൻ) രാജ്യങ്ങളുമായുള്ള TEPA (ട്രേഡ് ആൻഡ് ഇക്കണോമിക് പാർട്ണർഷിപ്പ് കരാർ) എന്നിവയും ഇതിൽ ഉൾപ്പെടുന്നു. വിവിധ വ്യാപാര പങ്കാളികളുമായി ഇന്ത്യയ്ക്ക് 6 പ്രിഫറൻഷ്യൽ ട്രേഡ് എഗ്രിമെന്റുകൾ (PTA) ഉണ്ട്. ഇന്ത്യ നിലവിൽ ചില വ്യാപാര പങ്കാളികളുമായി സ്വതന്ത്ര വ്യാപാര കരാർ (FTA) ചർച്ചകളിൽ ഏർപ്പെടുന്നു. അവയിൽ പ്രധാനപ്പെട്ടവ ഇന്ത്യ-യുകെ സ്വതന്ത്ര വ്യാപാര കരാർ, ഇന്ത്യ-EU സ്വതന്ത്ര വ്യാപാര കരാർ, ഇന്ത്യ-ഒമാൻ സ്വതന്ത്ര വ്യാപാര കരാർ എന്നിവയാണ്.
ഗുണനിലവാര നിയന്ത്രണ ഉത്തരവുകൾ:
ബ്യൂറോ ഓഫ് ഇന്ത്യൻ സ്റ്റാൻഡേർഡ്സുമായി ഏകോപിപ്പിച്ച് തുണിത്തരങ്ങൾക്കായുള്ള മാനദണ്ഡങ്ങളുടെ വിജ്ഞാപനം മന്ത്രാലയം സജീവമായി ഏറ്റെടുത്തിട്ടുണ്ട്. ഗുണനിലവാരം നിയന്ത്രിക്കുന്നതിനും നിലവാരമില്ലാത്ത ഇറക്കുമതികൾ തടയുന്നതിനുമായി ഗുണനിലവാര നിയന്ത്രണ ഓർഡറുകൾ (QCOs) പുറപ്പെടുവിക്കുന്നു.
മനുഷ്യ നിർമ്മിത നൂലിനങ്ങൾക്കായുള്ള ടെക്സ്റ്റൈൽ അഡ്വൈസറി ഗ്രൂപ്പ് (MMF):
വിസ്കോസ് ഉൾപ്പെടെയുള്ള രാജ്യത്തെ മുഴുവൻ മനുഷ്യനിർമിത നൂലിനങ്ങളുടെയും (MMF) നിർമ്മാതാക്കളെ ഉൾപ്പെടുത്തി, ഈ മേഖലയിലെ പ്രശ്നങ്ങളും ആശങ്കകളും ചർച്ച ചെയ്യാനും ശുപാർശകൾ നൽകാനും മന്ത്രാലയം ഒരു "മനുഷ്യ നിർമ്മിത നൂലിനങ്ങൾക്കായുള്ള ടെക്സ്റ്റൈൽ അഡ്വൈസറി ഗ്രൂപ്പ്" രൂപീകരിച്ചു.
കയറ്റുമതി പ്രോത്സാഹനത്തിനായി എക്സ്പോർട്ട്സ് പ്രമോഷൻ കൗൺസിലുകൾ (EPCs):
നൂലിനങ്ങൾ മുതൽ വില്പന സജ്ജമായ ഉത്പന്നങ്ങൾ വരെയുള്ള വസ്ത്ര, തുണിത്തര മൂല്യ ശൃംഖലയുടെ വിവിധ വിഭാഗങ്ങളെയും കൈത്തറി, കരകൗശല വസ്തുക്കൾ, പരവതാനികൾ തുടങ്ങിയ പരമ്പരാഗത മേഖലകളെയും പ്രതിനിധീകരിക്കുന്ന പതിനൊന്ന് എക്സ്പോർട്ട്സ് പ്രമോഷൻ കൗൺസിലുകൾ (EPCs) നിലവിലുണ്ട്. ആഗോള വിപണികളിൽ അതത് മേഖലകളുടെ വളർച്ചയും കയറ്റുമതിയും പ്രോത്സാഹിപ്പിക്കുന്നതിന് ടെക്സ്റ്റൈൽസ് മന്ത്രാലയവുമായും മറ്റ് മന്ത്രാലയങ്ങളുമായും ഈ കൗൺസിലുകൾ സഹകരിച്ച് പ്രവർത്തിക്കുന്നു.
വസ്ത്ര, തുണിത്തര വ്യവസായത്തിലെ നേരിട്ടുള്ള വിദേശ നിക്ഷേപം (FDI)
ഇന്ത്യൻ വസ്ത്ര, തുണിത്തര നിർമ്മാണ മേഖലയിൽ നേരിട്ടുള്ള വിദേശ നിക്ഷേപം (FDI) സുപ്രധാന പങ്ക് വഹിക്കുന്നു. 2000 ജനുവരി മുതൽ 2024 മാർച്ച് വരെ, ടെക്സ്റ്റൈൽ മേഖലയ്ക്ക് 4,472.79 മില്യൺ യുഎസ് ഡോളർ (₹28,304.10 കോടി) നേരിട്ടുള്ള വിദേശ നിക്ഷേപം ലഭിച്ചു. വർഷങ്ങളായി ടെക്സ്റ്റൈൽ മേഖലയ്ക്ക് ലഭിക്കുന്ന നേരിട്ടുള്ള വിദേശ നിക്ഷേപം താഴെയുള്ള ഗ്രാഫിൽ വിശദമാക്കിയിട്ടുണ്ട്:
ഭാരത് ടെക്സ് 2024
ടെക്സ്റ്റൈൽസ് മന്ത്രാലയത്തിന്റെ പിന്തുണയോടെ 11 ടെക്സ്റ്റൈൽസ് എക്സ്പോർട്ട് പ്രൊമോഷൻ കൗൺസിലുകളുടെ കൺസോർഷ്യം ഫെബ്രുവരി 26 മുതൽ ഫെബ്രുവരി 29 വരെ വിജയകരമായി സംഘടിപ്പിച്ച ആഗോള ടെക്സ്റ്റൈൽ എക്സ്പോയാണ് ഭാരത് ടെക്സ് 2024. വ്യാപാരത്തിന്റെയും നിക്ഷേപത്തിന്റെയും ഇരട്ട സ്തംഭങ്ങളിൽ കെട്ടിപ്പടുത്തതും സുസ്ഥിരതയിൽ ശ്രദ്ധ കേന്ദ്രീകരിക്കുന്നതുമായ ഈ 4 ദിവസത്തെ പരിപാടി നയരൂപകർത്താക്കളെയും ആഗോള സിഇഒമാരെയും കൂടാതെ 3,500 പ്രദർശകരെയും 111 രാജ്യങ്ങളിൽ നിന്നുള്ള 3,000 വ്യാപാരികളെയും ഒരു ലക്ഷത്തിലധികം സന്ദർശകരെയും ആകർഷിച്ചു. ഏകദേശം 2 ദശലക്ഷം ചതുരശ്ര അടി വിസ്തൃതിയിൽ വ്യാപിച്ചുകിടക്കുന്ന പ്രദർശനം, കലാപരമായി തയ്യാറാക്കിയ തുണിത്തരങ്ങളുടെ നിർമ്മാണ കഥ ഉൾപ്പെടെ മുഴുവൻ മൂല്യ ശൃംഖലയെയും ഉൾക്കൊള്ളുന്നു - 'വസ്ത്ര കഥ' യായിരുന്നു പരിപാടിയുടെ പ്രധാന ആകർഷണം. ഡൽഹിയിലെ രണ്ട് അത്യാധുനിക വേദികളായ ഭാരത് മണ്ഡപം, യശോഭൂമി എന്നിവിടങ്ങളിൽ ഒരേസമയം പരിപാടി സംഘടിപ്പിച്ചു. രണ്ട് വേദികളും പൂർണ്ണമായും സബ്‌സ്‌ക്രൈബുചെയ്‌തു.
70 സെഷനുകളും 112 അന്താരാഷ്ട്ര പ്രഭാഷകരും അടങ്ങുന്ന ഈ ആഗോളതല സമ്മേളനത്തിൽ ടെക്സ്റ്റൈൽ മെഗാ ട്രെൻഡ്സ്, സുസ്ഥിരത, പ്രതിരോധശേഷിയുള്ള ആഗോള വിതരണ ശൃംഖലകൾ, മാനുഫാക്ചറിംഗ് 4.0 എന്നിവയുൾപ്പെടെ, പ്രധാന ടെക്സ്റ്റൈൽ വിഷയങ്ങളെക്കുറിച്ച് ആകർഷകമായ ചർച്ചകൾ നടന്നു.
ഭാരത് ടെക്സ് 2025
ഇന്ത്യയിലെ ഏറ്റവും വലിയ ആഗോള ടെക്സ്റ്റൈൽ മാമാങ്കമായ ഭാരത് ടെക്സ് 2025, ഫെബ്രുവരി 14 മുതൽ 17 വരെ ന്യൂഡൽഹിയിലെ ഭാരത് മണ്ഡപത്തിൽ വിജയകരമായി സംഘടിപ്പിച്ചു. 2.2 ദശലക്ഷം ചതുരശ്ര അടി വിസ്തൃതിയിൽ സംഘടിപ്പിച്ച ഈ പരിപാടിയിൽ 5,000-ത്തിലധികം പ്രദർശകർ പങ്കെടുത്തു. ഇന്ത്യയുടെ ടെക്സ്റ്റൈൽ ആവാസവ്യവസ്ഥയുടെ സമഗ്രമായ പ്രദർശനം ആയിരുന്നു ഇത്. ആഗോള സിഇഒമാർ, നയരൂപകർത്താക്കൾ, വ്യവസായ പ്രമുഖർ എന്നിവരുൾപ്പെടെ 120 ലധികം രാജ്യങ്ങളിൽ നിന്നുള്ള 1,20,000-ത്തിലധികം വ്യാപാര സന്ദർശകർ പരിപാടിയിൽ പങ്കെടുത്തു.
സർക്കാരിന്റെ "ഫാം ടു ഫൈബർ, ഫാബ്രിക്, ഫാഷൻ, ഫോറിൻ മാർക്കറ്റ്സ് " എന്ന ദർശനം ത്വരിതപ്പെടുത്തുന്നതിനുള്ള ഒരു വേദിയായി ഭാരത് ടെക്സ് 2025 മാറി. ഇന്ത്യയുടെ തുണിത്തര കയറ്റുമതി ഇതിനോടകം 3 ലക്ഷം കോടി രൂപയിലെത്തിയിട്ടുണ്ട്. ആഭ്യന്തര ഉത്പാദനം ശക്തിപ്പെടുത്തുന്നതിലൂടെയും ആഗോള സ്വാധീനം വിപുലീകരിക്കുന്നതിലൂടെയും 2030 ആകുമ്പോഴേക്കും ഇത് 9 ലക്ഷം കോടി രൂപയായി ഉയർത്തുക എന്നതാണ് ലക്ഷ്യം. തുണിത്തര മേഖലയിലെ ഇന്ത്യയുടെ നേതൃത്വവും നൂതനാശയങ്ങളും , സുസ്ഥിരത, ആഗോള സഹകരണം എന്നിവയോടുള്ള പ്രതിബദ്ധതയും ഈ പരിപാടി പ്രകടമാക്കി.
ടെക്സ്റ്റൈൽ മേഖലയിലെ നൂതനാശയങ്ങൾ
ടെക്സ്റ്റൈൽസ് മേഖലയിലെ നൂതനാശയങ്ങളെ സംബന്ധിച്ചിടത്തോളം, ടെക്സ്റ്റൈൽസ് മന്ത്രാലയം സ്റ്റാർട്ടപ്പ് ഇന്ത്യ, ആഭ്യന്തര വ്യവസായ വ്യാപാര പ്രോത്സാഹന വകുപ്പ് (DPIIT) എന്നിവയുമായി സഹകരിച്ച് ഒരു നൂതനാശയ ചലഞ്ച് സംഘടിപ്പിച്ചു. ഈ ചലഞ്ചിൽ, 9 വിജയികളെ പ്രഖ്യാപിക്കുകയും പുരസ്‌ക്കാരങ്ങൾ നൽകുകയും ചെയ്തു. അടൽ ഇന്നൊവേഷൻ മിഷൻ (AIM) പ്രകാരം 6 പുരസ്‌ക്കാര ജേതാക്കൾക്ക് ഇൻകുബേഷൻ അവസരങ്ങൾ നൽകി. ഇതിനുപുറമെ, നേച്ചർ ഫൈബർ ബോർഡുകൾ തനത് വിഷയങ്ങൾ ആസ്പദമാക്കി 3 വ്യത്യസ്ത ഇന്നൊവേഷൻ ചലഞ്ചുകൾ നടത്തി.
125 അപേക്ഷകരിൽ 3 വിജയികളെ NJB ടെക്നോളജിക്കൽ ഇന്നൊവേഷൻ ഗ്രാൻഡ് ചലഞ്ചിൽ ആദരിക്കുകയും പുരസ്‌ക്കാരങ്ങൾ നൽകുകയും ചെയ്തു.
CSB സ്റ്റാർട്ട്-അപ്പ് ഗ്രാൻഡ് ചലഞ്ചിൽ 58 അപേക്ഷകരിൽ നിന്ന് 4 വിജയികളെ കണ്ടെത്തി ആദരിക്കുകയും പുരസ്‌ക്കാരങ്ങൾ നൽകുകയും ചെയ്തു.
CWDB വൂൾ ഇന്നൊവേഷൻ ചലഞ്ചിൽ 24 അപേക്ഷകരിൽ നിന്ന് 3 വിജയികളെ കണ്ടെത്തി ആദരിക്കുകയും പുരസ്‌ക്കാരങ്ങൾ നൽകുകയും ചെയ്തു.
മുകളിൽ പറഞ്ഞ വിജയികളിൽ 17 പേർ തുണിത്തര മാലിന്യ പുനരുപയോഗം, ജൈവാഷ്ഠിത നാരുകൾ, സുസ്ഥിര വസ്ത്ര ഉത്പാദനം പോലുള്ള പ്രവർത്തനങ്ങളിൽ നേരിട്ട് ഏർപ്പെടുന്നു.
ഇന്ത്യയിലെ പരുത്തി വ്യവസായം
ഇന്ത്യയിലെ ഒരു സുപ്രധാന വാണിജ്യ വിളയാണ് പരുത്തി. ആഗോള പരുത്തി ഉത്പാദനത്തിൽ ഏകദേശം 24% സംഭാവന ചെയ്യുകയും കോടിക്കണക്കിന് കർഷകരുടെയും തൊഴിലാളികളുടെയും ഉപജീവനമാർഗ്ഗം നിലനിർത്തുകയും ചെയ്യുന്നു. അസംസ്കൃത പരുത്തി, ഇടത്തരം ഉത്പന്നങ്ങൾ, വില്പന സജ്ജമായ ഉത്പന്നങ്ങൾ എന്നിവയുടെ കയറ്റുമതിയിലൂടെ ഇന്ത്യയുടെ വിദേശനാണ്യ വരുമാനത്തിൽ ഇത് നിർണ്ണായക പങ്ക് വഹിക്കുന്നു. ലോകത്തിലെ ഏറ്റവും വിസ്തൃതിയിൽ ഇന്ത്യ പരുത്തി കൃഷി ചെയ്യുന്നു.
വിസ്തൃതിയും വിളവും:
വിസ്തൃതിയുടെ അടിസ്ഥാനത്തിൽ ആഗോളതലത്തിൽ ഏറ്റവും കൂടുതൽ പരുത്തി കൃഷി ചെയ്യുന്നത് ഇന്ത്യയാണ്; ഉത്പാദനക്ഷമതയിൽ 36-ാം സ്ഥാനത്താണ്.
ഉത്പാദനവും ഉപഭോഗവും:
ലോകത്തിലെ ഏറ്റവും വലിയ രണ്ടാമത്തെ പരുത്തി ഉത്പാദകരും ഉപഭോക്താക്കളുമാണ് ഇന്ത്യ.
പരുത്തി ഇനങ്ങൾ:
ഇന്ത്യ നാല് തരം പരുത്തികൾ വളർത്തുന്നു: ജി. അർബോറിയം, ജി. ഹെർബേഷ്യം (ഏഷ്യൻ കോട്ടൺ), ജി. ബാർബഡെൻസ് (ഈജിപ്ഷ്യൻ കോട്ടൺ), ജി. ഹിർസുറ്റം (അമേരിക്കൻ അപ്‌ലാൻഡ് കോട്ടൺ).
പ്രധാന കാർഷിക മേഖലകൾ:
പരുത്തി പ്രധാനമായും ഇന്ത്യയുടെ വടക്കൻ, മധ്യ, തെക്കൻ മേഖലകളിലാണ് കൃഷി ചെയ്യുന്നത്.
പരുത്തിയുടെ ഉത്പാദനവും ഉപഭോഗവും (ലക്ഷം ബെയ്‌ലുകളിൽ)
|
Cotton Year
|
Production
|
Consumption
|
|
2021-22
|
311.17
|
322.41
|
|
2022-23
|
336.60
|
313.63
|
|
2023-24 (P)
|
325.22
|
323.00
|
പരുത്തിയുടെ ഇറക്കുമതിയും കയറ്റുമതിയും (ലക്ഷം ബെയ്‌ലുകളിൽ)
|
Cotton Season
|
Import (in lakh bales)
|
Export (in lakh bales)
|
|
2021-22
|
21.13
|
42.25
|
|
2022-23
|
14.60
|
15.89
|
|
2023-24*
|
6.73
|
26.24
|
സർക്കാർ പദ്ധതികളും സംരംഭങ്ങളും:
പരുത്തി കർഷകർക്ക് ആദായകരമായ വില ഉറപ്പാക്കുന്നതിന് കുറഞ്ഞ താങ്ങുവില (MSP) നിശ്ചയിച്ചു
പരുത്തി കർഷകർക്കുള്ള "കോട്ട്-അല്ലി" മൊബൈൽ ആപ്പ്.
കുറഞ്ഞ താങ്ങുവിലയുമായി ബന്ധപ്പെട്ട ആനുകൂല്യങ്ങൾക്കായി ആധാർ അധിഷ്ഠിത കർഷക രജിസ്ട്രേഷൻ.
പരുത്തി സ്റ്റോക്കിന്റെ സുതാര്യമായ വിൽപ്പനയ്ക്കുള്ള ഇ-ലേലം.
പരുത്തിയുടെ കൃഷി മുതൽ അന്തിമ ഉത്പന്നം വരെയുള്ള നിരീക്ഷണത്തിനായി ബ്ലോക്ക് ചെയിൻ സാങ്കേതികവിദ്യ ഉപയോഗിച്ചുള്ള ക്യുആർ കോഡ്.
ഇന്ത്യൻ പരുത്തിയെ ബ്രാൻഡ് ചെയ്യുന്നതിനുള്ള കസ്തൂരി കോട്ടൺ ഭാരത് പരിപാടി.
ഇന്ത്യയിലെ പട്ട് വ്യവസായം
തിളക്കം, മനോഹാരിത, കരുത്ത് എന്നിവയ്ക്ക് പേരുകേട്ട ഒരു ഷഡ്പദ നൂലാണ് സിൽക്ക് അഥവാ പട്ട്. "തുണിത്തരങ്ങളുടെ രാജ്ഞി" എന്നാണ് ലോകമെമ്പാടും ഇത് എന്നറിയപ്പെടുന്നത്. പട്ടുമായി ബന്ധപ്പെട്ട ഒരു സുദീർഘമായ ചരിത്രം ഇന്ത്യയ്ക്കുണ്ട്. ലോകത്തിലെ രണ്ടാമത്തെ വലിയ പട്ട് ഉത്പാദക രാജ്യവും ഏറ്റവും വലിയ ഉപഭോക്താവുമാണ് ഇന്ത്യ. മൾബറി, ട്രോപ്പിക്കൽ, ഓക്ക് ടാസർ (രണ്ട് തരം മൾബറി സിൽക്ക്), മുഗ, എറി എന്നീ നാല് വാണിജ്യ പട്ട് ഇനങ്ങളും ഉത്പാദിപ്പിക്കുന്നതിൽ ഇന്ത്യയ്ക്ക് അദ്വിതീയ സ്ഥാനമാണുള്ളത്. ധാരാളം തൊഴിലവസരങ്ങൾ സൃഷ്ടിക്കുന്നതിനാലും കുറഞ്ഞ മൂലധനം ആവശ്യമുള്ളതിനാലും കർഷകർക്ക് നല്ല വരുമാനം ഉറപ്പാക്കുന്നതിനാലും ഇന്ത്യൻ പട്ട് വ്യവസായത്തിന് ഏറെ പ്രാധാന്യമുണ്ട്. 38,913 മെട്രിക് ടൺ പട്ട് ഉത്പാദിപ്പിക്കുന്ന ഇന്ത്യ ചൈനയ്ക്ക് പിന്നിൽ ലോകത്തിലെ രണ്ടാമത്തെ വലിയ പട്ട് ഉത്പാദക രാജ്യമായി മാറി.
|
Years
|
Mulberry
|
Tasar
|
Eri
|
Muga
|
Total
|
|
2004-05
|
14,620
|
322
|
1,448
|
110
|
16,500
|
|
2014-15
|
21,390
|
2,434
|
4,726
|
158
|
28,708
|
|
2020-21
|
23,896
|
2,689
|
6,946
|
239
|
33,770
|
|
2021-22
|
25,818
|
1,466
|
7,364
|
255
|
34,903
|
|
2022-23
|
27,654
|
1,318
|
7,349
|
261
|
36,582
|
|
2023-24
|
29,892
|
1,586
|
7,183
|
252
|
38,913
|
|
2024-25 (April-September)
|
14,233
|
106
|
3,924
|
92
|
18,355
|
ഇന്ത്യാ ഗവണ്മെന്റ് വിവിധ സംരംഭങ്ങളിലൂടെയും പദ്ധതികളിലൂടെയും പട്ടുനൂൽ വ്യവസായത്തെ പിന്തുണയ്ക്കുന്നു:
പട്ടുനൂൽ വ്യവസായം ശക്തിപ്പെടുത്തുന്നതിനായി 1948-ൽ ടെക്സ്റ്റൈൽസ് മന്ത്രാലയത്തിന് കീഴിൽ സ്ഥാപിതമായ ഒരു നിയമാനുസൃത സംവിധാനമാണ് സെൻട്രൽ സിൽക്ക് ബോർഡ് (CSB).
സമഗ്ര സിൽക്ക് പദ്ധതി പ്രകാരം ടെക്സ്റ്റൈൽസ് മന്ത്രാലയം പട്ടികജാതി ഉപപദ്ധതി (SCSP), ഗോത്ര ഉപപദ്ധതി (TSP) എന്നിവ നടപ്പിലാക്കുന്നു.
2023-24 ൽ, ഭാരത സർക്കാരിന്റെ ടെക്സ്റ്റൈൽസ് മന്ത്രാലയം പട്ടുനൂൽ കൃഷിക്കായി SCSP നടപ്പിലാക്കുന്നതിനായി ₹25 കോടി അനുവദിച്ചു. SCSP പ്രകാരം അനുവദിച്ച മുഴുവൻ ഫണ്ടുകളും ഗുണഭോക്തൃ കേന്ദ്രീകൃതമായി പൂർണ്ണമായും വിനിയോഗിച്ചു/അനുവദിച്ചു.
ഉത്പാദനക്ഷമതയും ഗുണനിലവാരവും മെച്ചപ്പെടുത്തുന്നതിനായി പട്ടുനൂൽ കൃഷി മേഖലയിൽ ഗവേഷണ വികസനം ലക്ഷ്യമിട്ടും സർക്കാർ പ്രവർത്തിക്കുന്നു. മണ്ണ് പരിശോധന, ജൈവകൃഷി, പട്ടുനൂൽ ഉപോത്പന്നങ്ങളുടെ ഉപയോഗം എന്നിവ ഇതിൽ ഉൾപ്പെടുന്നു. മെയ്ക്ക് ഇൻ ഇന്ത്യ പദ്ധതി പ്രകാരം റീലിംഗ് സാങ്കേതികവിദ്യ നവീകരിക്കുകയും തദ്ദേശീയ ഓട്ടോമാറ്റിക് റീലിംഗ് യന്ത്രങ്ങൾ പ്രോത്സാഹിപ്പിക്കുകയും ചെയ്യുന്നു.
ഇന്ത്യൻ പട്ടുനൂൽ വ്യവസായത്തെ പ്രോത്സാഹിപ്പിക്കുന്നതിനും നിർമ്മാതാക്കളെയും കയറ്റുമതിസ്ഥാപനങ്ങളെയും നൂതന ഡിസൈനുകളും തുണിത്തരങ്ങളും സൃഷ്ടിക്കാൻ സഹായിക്കുന്നതിനുമായി ഉത്പന്ന രൂപകൽപ്പന വികസനത്തിലും വൈവിധ്യവത്ക്കരണത്തിലും വ്യവസായം കൂടുതൽ ശ്രദ്ധ കേന്ദ്രീകരിക്കുന്നു.
ഇന്ത്യയിലെ ചണ വ്യവസായം
ഇന്ത്യൻ സമ്പദ്‌വ്യവസ്ഥയിൽ, പ്രത്യേകിച്ച് പശ്ചിമ ബംഗാൾ പോലുള്ള കിഴക്കൻ പ്രദേശങ്ങളിൽ, ചണ വ്യവസായം ഒരു പ്രധാന പങ്ക് വഹിക്കുന്നു. ഒരു സുപ്രധാന തൊഴിൽ സ്രോതസ്സാണ് ചണ വ്യവസായം. വൻകിട മില്ലുകളിലെയും ചെറു യൂണിറ്റുകളിലെയും തൊഴിലാളികൾക്ക് ഉപജീവനമാർഗ്ഗം ഒരുക്കുന്നു. കൂടാതെ ഒട്ടേറെ കർഷക കുടുംബങ്ങളെ ഇതിലൂടെ പിന്തുണയ്ക്കുന്നു. ഉത്പാദനക്ഷമത മെച്ചപ്പെടുത്തുക, കർഷകർക്ക് ന്യായ വില ഉറപ്പാക്കുക, ചണ ഉത്പന്നങ്ങളുടെ ഉപയോഗം പ്രോത്സാഹിപ്പിക്കുക എന്നിവ ലക്ഷ്യമിട്ടുള്ള വിവിധങ്ങളായ സംരംഭങ്ങളിലൂടെ കേന്ദ്ര സർക്കാർ ചണ മേഖലയെ സജീവമായി പിന്തുണയ്ക്കുന്നു.
വൻകിട മില്ലുകളിലും ചെറു യൂണിറ്റുകളിലും തൃതീയ മേഖലയിലും അനുബന്ധ പ്രവർത്തനങ്ങളിലും ഉൾപ്പെടെ 4 ലക്ഷം തൊഴിലാളികൾക്ക് ചണ വ്യവസായം നേരിട്ട് തൊഴിൽ നൽകുന്നു.
40 ലക്ഷം കർഷക കുടുംബങ്ങളുടെ ഉപജീവനമാർഗ്ഗത്തെ ഇത് പിന്തുണയ്ക്കുന്നു.
ചണ കമ്മീഷണറുടെ ഓഫീസ് രേഖകൾ പ്രകാരം, 116 സംയോജിത ചണ മില്ലുകളുണ്ട്.
പശ്ചിമ ബംഗാളിലാണ് ഏറ്റവും കൂടുതൽ ചണ മില്ലുകൾ (86) ഉള്ളത്.
ജൂട്ട് കോർപ്പറേഷൻ ഓഫ് ഇന്ത്യയുടെ കുറഞ്ഞ താങ്ങുവില നൽകിയുള്ള സംഭരണത്തിലൂടെയും, ചണം നേരിട്ട് വാങ്ങുന്നതിലൂടെയും ഭാരത സർക്കാർ ചണം കർഷകർക്ക് പിന്തുണ നൽകുന്നു.
അസംസ്കൃത ചണം, മെസ്റ്റ കൃഷി ചെയ്യുന്ന ശരാശരി ഭൂമി 799 ആയിരം ഹെക്ടറാണ് (കഴിഞ്ഞ നാല് വർഷത്തെ ശരാശരി).
അസംസ്കൃത ചണം, മെസ്റ്റ എന്നിവയുടെ ശരാശരി ഉത്പാദനം 10,990 ആയിരം ബെയ്ൽസ് (കഴിഞ്ഞ നാല് വർഷത്തെ ശരാശരി).
ചണ ഉത്പന്നങ്ങളുടെ ശരാശരി കയറ്റുമതി പ്രതിവർഷം 133 ആയിരം മെട്രിക് ടൺ ആണ്, ഇതിന്റെ മൂല്യം പ്രതിവർഷം 21,150 ദശലക്ഷം രൂപ (കഴിഞ്ഞ നാല് വർഷത്തെ ശരാശരി).
നാരുകളുടെ ഗുണനിലവാരവും ഉത്പാദനക്ഷമതയും മെച്ചപ്പെടുത്തുന്നതിനും, ചണ ഉത്പാദനച്ചെലവ് കുറയ്ക്കുന്നതിനും, ചണ കർഷകരുടെ വരുമാനം വർദ്ധിപ്പിക്കുന്നതിനുമായി Jute- ICARE ആരംഭിച്ചു.
ചണ മേഖലയെ പ്രോത്സാഹിപ്പിക്കുന്നതിനുള്ള പദ്ധതികൾ പ്രധാനമായും ദേശീയ ചണ ബോർഡാണ് നടപ്പിലാക്കുന്നത്.
ഉപസംഹാരം
ലക്ഷ്യവേധിയായ നയങ്ങൾ, അടിസ്ഥാന സൗകര്യ വികസനം, നിക്ഷേപ പ്രോത്സാഹനം എന്നിവയിലൂടെ ആഗോള തുണിത്തര നിർമ്മാണത്തിലും കയറ്റുമതിയിലും ഇന്ത്യയുടെ സ്ഥാനം മെയ്ക്ക് ഇൻ ഇന്ത്യ സംരംഭം ഗണ്യമായി വർദ്ധിപ്പിച്ചു. തുടർച്ചയായ ശ്രമങ്ങളിലൂടെ, സാമ്പത്തിക വളർച്ചയും തൊഴിലവസര സൃഷ്ടിയും നയിക്കുന്ന ഒരു ആഗോള തുണിത്തര നേതാവാകാൻ ഇന്ത്യ ഒരുങ്ങിയിരിക്കുന്നു.
അവലംബം
https://www.texmin.nic.in/textile-data
https://jutecomm.gov.in/FAQ.html
https://www.investindia.gov.in/sector/textiles-apparel
https://pib.gov.in/PressReleasePage.aspx?PRID=2089306
https://pib.gov.in/PressReleasePage.aspx?PRID=2098352
https://pib.gov.in/PressReleasePage.aspx?PRID=2099411
https://pib.gov.in/PressReleasePage.aspx?PRID=2114277
https://pib.gov.in/PressReleaseIframePage.aspx?PRID=2104423
https://www.indiabudget.gov.in/economicsurvey/doc/echapter.pdf
https://www.texmin.nic.in/sites/default/files/Indian%20Jute%20At%20a%20Glance.pdf
https://www.texmin.nic.in/sites/default/files/Note%20on%20Cotton%20Sector_0.pdf
https://sansad.in/getFile/loksabhaquestions/annex/184/AU4118_0othg1.pdf?source=pqals
https://sansad.in/getFile/loksabhaquestions/annex/184/AS245_n0CCI6.pdf?source=pqals
https://sansad.in/getFile/loksabhaquestions/annex/184/AU2877_YZdL4e.pdf?source=pqals
https://sansad.in/getFile/loksabhaquestions/annex/184/AU2873_sOQ5IE.pdf?source=pqals
https://sansad.in/getFile/loksabhaquestions/annex/184/AS110_T8V4VD.pdf?source=pqals
https://www.texmin.nic.in/sites/default/files/FDI%20inflow%20at%20a%20glance.pdf
https://www.texmin.nic.in/sites/default/files/Table-2%20Raw%20Silk%20Production%20Statistics.pdf
https://texmin.nic.in/sites/default/files/MOT%20Annual%20Report%20English%20%2807.11.2024%29.pdf
https://www.texmin.nic.in/sites/default/files/FDI%20inflow%20%28Finacial%20year%20wise%29.pdf
https://ddnews.gov.in/en/india-sets-new-record-with-7-rise-in-textile-exports-government-implements-multiple-schemes-to-boost-sector/
(Release ID: 2118244)
|