કેન્દ્રીય ગૃહ મંત્રી અને સહકારિતા મંત્રી શ્રી અમિત શાહે આજે બિહારનાં પટણામાં કેન્દ્ર અને રાજ્ય સરકારની રૂ. 800 કરોડથી વધારેની કિંમતની વિવિધ પરિયોજનાઓનું ઉદઘાટન અને શિલાન્યાસ કર્યા હતા. આ કાર્યક્રમમાં બિહારના મુખ્યમંત્રી શ્રી નીતિશ કુમાર અને કેન્દ્રીય ગૃહ રાજ્યમંત્રી શ્રી નિત્યાનંદ રાય સહિત અનેક મહાનુભવો ઉપસ્થિત રહ્યા હતા.

શ્રી અમિત શાહે તેમના સંબોધનમાં જણાવ્યું હતું કે, સહકારી ક્ષેત્ર અને અન્ય વિભાગો સાથે સંબંધિત કેટલીક યોજનાઓનું આજે ઉદઘાટન અને શિલાન્યાસ કરવામાં આવ્યું હતું. તેમણે ભારપૂર્વક જણાવ્યું હતું કે, છેલ્લાં 10 વર્ષમાં પ્રધાનમંત્રી શ્રી નરેન્દ્ર મોદીએ દેશભરમાં કરોડો ગરીબોનાં કલ્યાણ માટે અનેક પહેલો હાથ ધરી છે. શ્રી શાહે અગાઉની વિપક્ષી સરકારોની ગરીબોની ઉપેક્ષા કરવા બદલ ટીકા કરી હતી, ત્યારે પ્રધાનમંત્રી મોદીએ આવાસ, વીજળી, ગેસ, પીવાનું પાણી, શૌચાલયો, દવાઓ અને 5 કિલો મફત અનાજ જેવી આવશ્યક જરૂરિયાતો પૂર્ણ કરવા માટે જોગવાઈ કરી છે. તેમણે ભારપૂર્વક જણાવ્યું હતું કે, પીએમ મોદીના નેતૃત્વમાં, 80 કરોડ લોકોને દર મહિને વ્યક્તિ દીઠ 5 કિલો મફત અનાજ મળે છે, 4 કરોડ લોકોને મકાનો આપવામાં આવ્યા છે, 11 કરોડ ગેસ જોડાણો વહેંચવામાં આવ્યા છે, 12 કરોડથી વધુ શૌચાલયો બનાવવામાં આવ્યા છે અને 5 લાખ રૂપિયા સુધીની મફત તબીબી સારવાર ઉપલબ્ધ કરવામાં આવી છે.

કેન્દ્રીય ગૃહ મંત્રી અને સહકારિતા મંત્રી શ્રી અમિત શાહે જણાવ્યું હતું કે, પ્રધાનમંત્રી શ્રી નરેન્દ્ર મોદીએ આઝાદીનાં 75 વર્ષ પછી ગ્રામીણ અર્થતંત્રને વેગ આપવા, ખેડૂતોને, મહિલાઓને લાભ આપવા, ડેરી, મત્સ્યપાલન અને કૃષિ સંબંધિત પ્રવૃત્તિઓને પ્રોત્સાહન આપવા સહકાર મંત્રાલયની સ્થાપના કરી હતી. તેમણે ધ્યાન દોર્યું હતું કે, દાયકાઓ સુધી કોઈ પણ સરકારે સહકારી ક્ષેત્રને મજબૂત કરવાને પ્રાથમિકતા આપી નથી. શ્રી શાહે ભારપૂર્વક જણાવ્યું હતું કે, બિહારને તેની વિપુલ જમીન, જળ અને કુદરતી સંસાધનો સાથે આગામી વર્ષોમાં સહકારી ક્ષેત્રમાંથી નોંધપાત્ર લાભ થશે. તેમણે બિહારમાં સહકારની અવગણના કરવા બદલ અગાઉની વિપક્ષી સરકારોની ટીકા કરી હતી, જેના કારણે આ ક્ષેત્રનું પતન થયું હતું અને સેંકડો સુગર મિલો બંધ થઈ ગઈ હતી. તેમણે નોંધ્યું હતું કે, એક સમયે બિહારે દેશના ખાંડના ઉત્પાદનમાં 30 ટકાથી વધુનું યોગદાન આપ્યું હતું. પરંતુ વિપક્ષના શાસનમાં આ હિસ્સો ઘટીને 6 ટકાથી પણ ઓછો થઈ ગયો હતો. તેમણે ખાતરી આપી હતી કે મોદી સરકાર રાજ્યની બંધ ખાંડ મિલોને પુનર્જીવિત કરવા માટે પ્રતિબદ્ધ છે.

શ્રી અમિત શાહે જણાવ્યું હતું કે, મોદી સરકારે પ્રાઇમરી એગ્રિકલ્ચરલ ક્રેડિટ સોસાયટીઓ (પીએસીએસ)ને મજબૂત કરવા નોંધપાત્ર પ્રયાસો હાથ ધર્યા છે. તેમણે જણાવ્યું હતું કે, બિહારમાં મખાના બોર્ડની સ્થાપના કરવામાં આવી છે અને મકાઈના ખેડૂતોને ટેકો આપવા માટે વિવિધ યોજનાઓ શરૂ કરવાની સાથે સાથે રૂ. 1,000 કરોડના રોકાણ સાથે મકાઈ સંશોધન કેન્દ્રને પુનર્જીવિત કરવાની યોજનાની જાહેરાત કરવામાં આવી છે. તેમણે ભારપૂર્વક જણાવ્યું હતું કે, ભારત સરકાર હવે સંપૂર્ણ મકાઈ, કઠોળ, ઘઉં અને ચોખાની ખરીદી ખેડૂતો પાસેથી લઘુતમ ટેકાનાં ભાવ (એમએસપી) પર કરી રહી છે. શ્રી શાહે કૃષિ ઉત્પાદનમાં બિહારના અગ્રણી સ્થાનનો પણ ઉલ્લેખ કર્યો, જે લીચી, મશરૂમ અને મખાનાના ઉત્પાદનમાં પ્રથમ ક્રમે છે; મકાઈમાં બીજા ક્રમે છે; મસૂર અને મધમાં ત્રીજા ક્રમે છે; મગ અને શેરડીમાં પાંચમા ક્રમે છે; અને ઘઉં અને ચોખાના ઉત્પાદનમાં છઠ્ઠા ક્રમે છે. શ્રી શાહે ભારપૂર્વક જણાવ્યું હતું કે, બિહારમાં કૃષિ અને સહકારી ક્ષેત્રનાં વિકાસ માટે પુષ્કળ સંભવિતતા છે, જેનો સંપૂર્ણ ઉપયોગ થશે. તેમણે ખાતરી આપી હતી કે, સરકાર સંપૂર્ણ સમર્પણ અને પ્રયત્નો સાથે રાજ્યની તમામ ૩૦ બંધ ખાંડ મિલોને પુનર્જીવિત કરવા માટે પ્રતિબદ્ધ છે.

કેન્દ્રીય ગૃહ મંત્રી અને સહકારિતા મંત્રીએ જણાવ્યું હતું કે, PACS હવે વિવિધ પ્રકારનાં કામ કરી રહ્યું છે, તેમનું કમ્પ્યુટરાઇઝેશન કરવામાં આવ્યું છે અને તેમના મારફતે સમગ્ર બિહારમાં જિલ્લા સ્તરની બેંકોને મજબૂત બનાવવાની યોજના અમલમાં મૂકવામાં આવી રહી છે. તેમણે ઉલ્લેખ કર્યો હતો કે 1990 અને 2005 ની વચ્ચે, વિપક્ષી સરકારો બિહારમાં ખૂન, અપહરણ, ખંડણી, લૂંટ અને લૂંટફાટનો ઉદ્યોગ ચલાવતી હતી, જેણે રાજ્યને સંપૂર્ણપણે બરબાદ કરી નાખ્યું હતું. શ્રી શાહે જણાવ્યું હતું કે, બિહારમાં વિરોધપક્ષની સરકારોના શાસન દરમિયાન જ્ઞાતિવાદી નરસંહાર, સરકાર દ્વારા પ્રાયોજિત ભ્રષ્ટાચાર આચરવામાં આવ્યો હતો અને ઘાસચારા કૌભાંડને કારણે રાજ્ય દેશ અને દુનિયામાં બદનામ થયું હતું. તેમણે કહ્યું કે વિપક્ષી સરકારને બિહારના ઇતિહાસમાં "જંગલ રાજ" તરીકે હંમેશા યાદ કરવામાં આવશે.

શ્રી અમિત શાહે જણાવ્યું હતું કે, બિહારની નીતિશ સરકારનાં 10 વર્ષનાં કાર્યકાળ દરમિયાન દરેક ગામમાં માર્ગો, વીજળી અને નળનું પાણી પહોંચ્યું છે. તેમણે ઉલ્લેખ કર્યો હતો કે, પ્રધાનમંત્રી મોદીએ બિહારમાં ઘર, શૌચાલય, પાણી, દવાઓ અને રાશન આપીને ગરીબોના કલ્યાણ માટે કામ કર્યું છે. તેમણે કહ્યું કે પાછલી કેન્દ્ર સરકારના 10 વર્ષના કાર્યકાળ દરમિયાન બિહારને 2.8 લાખ કરોડ રૂપિયા આપવામાં આવ્યા હતા. જ્યારે મોદી સરકારના 10 વર્ષ દરમિયાન બિહારને 9.23 લાખ કરોડ રૂપિયા ફાળવવામાં આવ્યા છે. શ્રી શાહે જણાવ્યું હતું કે, બિહારને માર્ગો અને પુલો માટે રૂ. 4 લાખ કરોડ, રેલવે પ્રોજેક્ટ માટે રૂ. 1 લાખ કરોડ અને એરપોર્ટ પ્રોજેક્ટ માટે રૂ. 2,000 કરોડનાં મૂલ્યનાં વિવિધ પ્રોજેક્ટ મળ્યાં છે. તેમણે જણાવ્યું હતું કે, રૂ. 8,000 કરોડનાં ખર્ચે બિહારમાં સાત મુખ્ય પુલોનું નિર્માણ થઈ રહ્યું છે અને રૂ. 31,000 કરોડનાં ખર્ચે 5,000 કિલોમીટર લાંબી રેલવે લાઇનનું નિર્માણ થઈ રહ્યું છે, જેમાં સૌપ્રથમ ખેડૂતોની ટ્રેન પણ બિહારથી શરૂ થશે. તેમણે ઉમેર્યું હતું કે, મોદી સરકારે બિહારમાં મખાના બોર્ડની સ્થાપના કરી છે અને કેન્દ્ર સરકારની મદદથી રાજ્યમાં બરૌની ફર્ટિલાઇઝર પ્લાન્ટ સહિત અન્ય 766 પ્રોજેક્ટ શરૂ કરવામાં આવ્યા છે. તેમણે ભારપૂર્વક જણાવ્યું હતું કે, અમારી સરકાર વિકાસનો 20 વર્ષનો ટ્રેક રેકોર્ડ ધરાવે છે અને 'જંગલ રાજ'નો યુગ હવે અહીં પૂર્ણ થયો છે.

કેન્દ્રીય ગૃહમંત્રી અને સહકારિતા મંત્રી શ્રી અમિત શાહે આજે બિહારમાં જે યોજનાઓનું ઉદઘાટન અને શિલાન્યાસ કર્યો હતો, તેમાં વિશ્વની સૌથી મોટી ખાદ્ય સંગ્રહ યોજના હેઠળ કુલ પચીસ પીએસીએસમાં 62,200,500 મેટ્રિક ટનની સંગ્રહ ક્ષમતા વિકસાવવા માટે રૂ. 83.16 કરોડના ખર્ચે તૈયાર કરવામાં આવેલા પ્રોજેક્ટનો શિલાન્યાસ પણ સામેલ છે. આ ઉપરાંત ગૃહ વિભાગના કુલ 133 પોલીસ ભવનોના નિર્માણ માટે ભૂમિપૂજન કરવામાં આવ્યું હતું, જેની પાછળ 181.14 કરોડ રૂપિયાનો ખર્ચ થયો હતો. માર્ગ પરિવહન અને રાજમાર્ગ મંત્રાલયની રૂ. 109.16 કરોડની ત્રણ પરિયોજનાઓનો શિલાન્યાસ પણ આજે કરવામાં આવ્યો હતો. એટલું જ નહીં, પટનાની દીપ નારાયણ સિંહ રિજનલ કોઓપરેટિવ મેનેજમેન્ટ ઇન્સ્ટિટ્યૂટમાં 27.29 કરોડ રૂપિયાના ખર્ચે તૈયાર કરવામાં આવેલી હોસ્ટેલનું ઉદ્ઘાટન કરવામાં આવ્યું હતું. ઇન્ટિગ્રેટેડ કો-ઓપરેટિવ ડેવલપમેન્ટ પ્રોજેક્ટ અંતર્ગત રૂ.46 લાખના ખર્ચે નિર્માણ પામેલા મખાના પ્રોસેસિંગ કમ માર્કેટિંગ સેન્ટર અને રૂ.2.27 કરોડના ખર્ચે તૈયાર થયેલા કુલ 11 વખારોનું પણ આજે લોકાર્પણ કરવામાં આવ્યું હતું. આ સાથે શહેરી ગૃહ નિર્માણ અને વિકાસ વિભાગના અમૃત-1 પ્રોજેક્ટ અંતર્ગત આજે 421.41 કરોડ રૂપિયાની કુલ પાંચ પીવાના પાણી પુરવઠા યોજનાઓનું પણ લોકાર્પણ કરવામાં આવ્યું હતું.

AP/IJ/GP/JD