ଆସନ୍ତା ମଇ ୧ରୁ ୪ ତାରିଖ ପର୍ଯ୍ୟନ୍ତ ମୁମ୍ବାଇଠାରେ ବିଶ୍ୱ ଅଡିଓ ଭିଜୁଆଲ ଏବଂ ମନୋରଞ୍ଜନ ଶିଖର ସମ୍ମିଳନୀ(ୱେଭ୍ସ) ଆୟୋଜନ କରାଯିବ । ଏହାର ଏକ ପ୍ରମୁଖ କାର୍ଯ୍ୟକ୍ରମ ଭାବେ ଇଲେକ୍ଟ୍ରୋନିକ ଡ୍ୟାନ୍ସ ମ୍ୟୁଜିକ୍‌ (ଇଡିଏମ୍) ପ୍ରତିଯୋଗିତା ଅନୁଷ୍ଠିତ ହେବାକୁ ଯାଉଛି ।

‘ରିଜୋନେଟ୍‌: ଦ ଇଡିଏମ ଚାଲେଞ୍ଜ’ ଶୀର୍ଷକ ଏହି ପ୍ରତିଯୋଗିତାରେ ଇଡିଏମ କ୍ଷେତ୍ରର ବିଶ୍ୱସ୍ତରୀୟ ପ୍ରତିଭାମାନେ ଏକତ୍ରିତ ହେବେ । ଏଥିରେ ନବସୃଜନ, ସୃଜନଶୀଳତା ଏବଂ ସଂଗୀତ ପ୍ରଯୋଜନା ଓ ଲାଇଭ୍‌ ପରଫର୍ମାନ୍ସ କ୍ଷେତ୍ରରେ ସହଭାଗିତା ସ୍ଥାନ ପାଇବ।

‘କ୍ରିଏଟ୍‌ ଇନ୍‌ ଇଣ୍ଡିଆ ଚାଲେଞ୍ଜ’ର ଅଂଶବିଶେଷ ସ୍ୱରୂପ ସୂଚନା ଓ ପ୍ରସାରଣ ମନ୍ତ୍ରଣାଳୟ ଏବଂ ଭାରତୀୟ ସଂଗୀତ ଶିଳ୍ପ (ଆଇଏମଆଇ) ଦ୍ୱାରା ମିଳିତ ଭାବେ ଏହି ଚାଲେଞ୍ଜ ଆୟୋଜନ କରାଯାଉଛି। ଏହାର ଉଦ୍ଦେଶ୍ୟ ହେଉଛି ସଂଗୀତର ମିଶ୍ରଣ ବା ଫ୍ୟୁଜନ୍‌, ଇଲେକ୍ଟ୍ରୋନିକ ମ୍ୟୁଜିକ୍‌ ଏବଂ ଡିଜେ କଳା ପ୍ରଦର୍ଶନର ବିଶ୍ୱସ୍ତରୀୟ କେନ୍ଦ୍ର ଭାବେ ଭାରତର ସ୍ଥିତିକୁ ସୁଦୃଢ଼ କରିବା।

ଇଡିଏମ ଚ୍ୟାଲେଞ୍ଜ ପାଇଁ ପଞ୍ଜୀକରଣ ବର୍ତ୍ତମାନ ଖୋଲା ରହିଛି ଏବଂ ୩୧ ମାର୍ଚ୍ଚ ୨୦୨୫କୁ ଆବେଦନର ଶେଷ ତାରିଖ ଭାବେ ଧାର୍ଯ୍ୟ କରାଯାଇଛି । ‘ରିଜୋନେଟ୍‌: ଦ ଇଡିଏମ ଚାଲେଞ୍ଜ’ ଇଲେକ୍ଟ୍ରୋନିକ୍ ସଙ୍ଗୀତ କଳାକାରମାନଙ୍କୁ ଅଡିଓ, ଭିଜୁଆଲ୍ ଏବଂ ମନୋରଞ୍ଜନ କ୍ଷେତ୍ରରେ ସେମାନଙ୍କର ସୃଜନଶୀଳତା ଓ ନବସୃଜନ ପ୍ରଦର୍ଶନ କରିବାକୁ ଏକ ଅତୁଳନୀୟ ମଞ୍ଚ ପ୍ରଦାନ କରିବ। ଏଥିରେ ଭାଗ ନେଉଥିବା ପ୍ରତିଯୋଗୀମାନଙ୍କୁ ଇଲେକ୍ଟ୍ରୋନିକ୍ ସଂଗୀତ ଉଦ୍ୟୋଗର ନେତୃବର୍ଗମାନଙ୍କ ଠାରୁ ଉପାଦେୟ ପରାମର୍ଶ ଓ ମାର୍ଗଦର୍ଶନ ମିଳିବ।

ପୂର୍ବରୁ ଇଲେକ୍ଟ୍ରୋନିକ୍ସ ଡ୍ୟାନ୍ସ ମ୍ୟୁଜିକ୍‌ କ୍ଷେତ୍ରରେ ଅଭିଜ୍ଞତା ଥିବା ବିଶ୍ୱସ୍ତରୀୟ କଳାକାର, ଗୀତିକାର, ସଂଗୀତଜ୍ଞ ଏବଂ ସଂଗୀତ ପରିବେଷଣକାରୀମାନେ ଏହି ପ୍ରତିଯୋଗିତାରେ ଅଂଶଗ୍ରହଣ କରିପାରିବେ। ଏହି ପ୍ରତିଯୋଗିତା ପ୍ରତିଭାମାନଙ୍କ ପାଇଁ ଏକ ଉପଯୁକ୍ତ ମଞ୍ଚ ଯୋଗାଇ ଦେବ । ଏକ ସମନ୍ୱିତ ଏବଂ ସାଂସ୍କୃତିକ ଭାବରେ ସମୃଦ୍ଧ ସଂଗୀତ ସର୍ଜନା ପାଇଁ ବିଶ୍ୱ ସଂଗୀତ ଶୈଳୀର ବ୍ୟବହାର ଉପରେ ଧ୍ୟାନ ଦେଇ ପ୍ରତିଯୋଗିତାର ବିଷୟବସ୍ତୁ ‘ରିଜୋନେଟ୍‌: ଦ ଇଡିଏମ ଚାଲେଞ୍ଜ’ ରଖାଯାଇଛି ।

ସୂଚନାଯୋଗ୍ୟ ଯେ ଭାରତ ସରକାରଙ୍କ ଦ୍ୱାରା ଆସନ୍ତା ମଇ ୧ରୁ ୪ ତାରିଖ ପର୍ଯ୍ୟନ୍ତ ମୁମ୍ବାଇ ଠାରେ ୱେଭ୍ସ ସମ୍ମିଳନୀ ଆୟୋଜନ କରାଯିବ । ଏହା ଶିଳ୍ପ ପେସାଦାର, ନିବେଶକ, ନିର୍ମାତା, ନବପ୍ରବର୍ତ୍ତକମାନଙ୍କୁ ଗଣମାଧ୍ୟମ ଓ ମନୋରଞ୍ଜନ ପରିଦୃଶ୍ୟରେ ଯୋଡ଼ି ହେବା, ସହଭାଗିତା ସ୍ଥାପନ କରିବା, ନବସୃଜନ ଏବଂ ଯୋଗଦାନ କରିବା ଲାଗି ଏକ ପ୍ରମୁଖ ବିଶ୍ୱସ୍ତରୀୟ ମଞ୍ଚ ଯୋଗାଇ ଦେବ ।

******

P.S.