صحت و خاندانی بہبود کے مرکزی وزیر جناب جگت پرکاش نڈا نے آج مرکزی وزیر مملکت برائے صحت اور خاندانی بہبود ،محترمہ انوپریہ پٹیل کی موجودگی میں نیشنل انسٹی ٹیوٹ آف ہیلتھ اینڈ فیملی ویلفیئر (این آئی ایچ ایف ڈبلیو) کے 48ویں سالانہ یوم تاسیس کی تقریبات کی عملی طور پر صدارت کی۔ ڈائرکٹر جنرل ہیلتھ سروسز، پروفیسر (ڈاکٹر) اتل گوئل نے بھی اس تقریب میں بطور مہمان خصوصی شرکت کی۔

نیشنل انسٹی ٹیوٹ آف ہیلتھ اینڈ فیملی ویلفیئر (این آئی ایچ ایف ڈبلیو) ایک خود مختار ادارہ ہے، جو وزارت صحت اور خاندانی بہبود، حکومت ہند کے تحت ہے۔ یہ ادارہ اپنی تعلیم، تربیت، تحقیق، اور خصوصی مشاورتی خدمات کے لیے جانا جاتا ہے، این آئی ایچ ایف ڈبلیو ملک میں صحت اور خاندانی بہبود کے پروگراموں کے فروغ کے لیے ایک 'اعلی تکنیکی ادارے' کے ساتھ ساتھ 'تھنک ٹینک' کے طور پر کام کرتا ہے۔ ایونٹ کے دوران این آئی ایچ ایف ڈبلیو میں اوپن جمنازیم پارک، آروگیہ شکتی پارک اور سکشم- میڈیا لیب کی نئی سہولیات کا آغاز کیا گیا۔

اپنے ورچوئل خطاب میں، جناب نڈا نے این آئی ایچ ایف ڈبلیو کی ستائش کی کہ "ملک میں صحت عامہ کے پیشہ ور افراد، پالیسی سازوں اور منتظمین کے لیے تربیت، تحقیق اور صلاحیت سازی کی سرگرمیوں کے انعقاد میں سب سے آگے ہے۔" انہوں نے اس بات پر زور دیا کہ "انسٹی ٹیوٹ کی صلاحیت سازی کے عزم کا اظہار اس کے صحت عامہ میں ڈاکٹریٹ اور ماسٹر کے پروگراموں کے تعارف سے ہوتا ہے، جو ملک میں قابل پیشہ ور افراد کی فوری ضرورت کو پورا کرتا ہے۔ این آئی ایچ ایف ڈبلیو کے تحقیقی اقدامات، اور مختلف سرکاری پروگراموں کے جائزے نے ثبوت پر مبنی پالیسی سازی میں اہم کردار ادا کیا ہے۔"

جناب نڈا نے یہ بھی بتایا کہ "مشن کرمایوگی پروگرام کے تحت تمام سرگرمیوں کے لیے نوڈل آرگنائزیشن کے طور پر نامزد کردہ ڈیجیٹل لرننگ کے اقدامات کی بڑھتی ہوئی اہمیت کے ساتھ مل کر، این آئی ایچ ایف ڈبلیو نے  کیپسٹی بلڈنگ کمیشن (سی بی سی)، انٹیگریٹڈ گورنمنٹ آن لائن ٹریننگ (آئی جی او ٹی) اور این آئی ایچ ایف ڈبلیو کے ٹریننگ ڈویژن کے تعاون سے این آئی ایچ ایف ڈبلیو کی تمام تنظیموں کی وزارت/محکمہ/تنظیم (ایم ڈی او) کے لیے اورینٹیشن ورکشاپ کا انعقاد کیا ہے۔

انہوں نے این آئی ایچ ایف ڈبلیو کو اس کی متعلقہ تحقیقی سرگرمیوں اور آن لائن پلیٹ فارم، ڈیجیٹل لرننگ کے لیے سکشم -میڈیا لیب کے لیے مزید مبارکباد پیش کی جو کہ صحت سے متعلق مواد تیار کرنے کے لیے انسٹی ٹیوٹ کی صحت کی دیکھ بھال کی تعلیم کو جدید بنانے کے عزم کی عکاسی کرتا ہے۔ انہوں نے مزید کہا کہ "یہ سہولت ملک بھر میں ڈیجیٹل لرننگ اور صحت کی دیکھ بھال کے علم کو قابل رسائی بنانے میں ایک ’انقلابی قدم‘  ثابت ہوگی۔"

انسٹی ٹیوٹ میں نیشنل کولڈ چین اور ویکسین مینجمنٹ ریسورس سینٹر(این سی سی وی ایم آر سی) کی اہمیت کو اجاگر کرتے ہوئے، جناب نڈا نے کہا کہ "مرکز خدمات فراہم کرنے سے متعلق پیشہ ور افراد کی صلاحیت سازی کا زبردست کام کر رہا ہے۔ سینٹر کو ایک بین الاقوامی مرکز برائے ایکسیلنس میں اپ گریڈ کیا جا رہا ہے۔ یہ توسیع نہ صرف ملک کے اندر بلکہ عالمی سطح پر بھی حفاظتی ٹیکوں اور سپلائی چین میں ہندوستان کی قیادت کا ثبوت ہے۔

اپنے اختتامی کلمات میں، جناب نڈا نے کہا کہ "آئیے ہم سب 'سب کے لیے صحت' کو یقینی بنانے اور صحت عامہ کے اپنے اداروں کو مضبوط بنانے کے لیے اپنے عزم کا اعادہ کریں" اور سبھی پر زور دیا کہ وہ ہندوستان کے صحت کے ماحولیاتی نظام کے مستقبل کی تشکیل میں اہم کردار ادا کرتے رہیں تاکہ "ہم ایک صحت مند، مضبوط اور زیادہ لچکدار ہندوستان کی تعمیر کر سکیں۔"

اجتماع سے خطاب کرتے ہوئے محترمہ انوپریہ پٹیل نے این آئی ایچ ایف ڈبلیو کی "ہندوستان کے صحت عامہ کے منظر نامے کو مضبوط بنانے اور صحت عامہ کی تعلیم، تحقیق اور پالیسی کی وکالت میں اس کی تقریباً پانچ دہائیوں کی عمدہ کارکردگی کے لیے اس کی غیر متزلزل عزم کے لیے" ستائش کی ۔

پیش رفت پر روشنی ڈالتے ہوئے، محترمہ پٹیل نے کہا کہ "ملک صحت عامہ کے منظر نامے کے ایک نئے دور میں داخل ہو گیا ہے، جس کی رہنمائی قومی صحت پالیسی 2017 اور آیوشمان بھارت پردھان منتری جن آروگیہ یوجنا (اے بی پی ایم -جے اے وائی) جیسی اسکیموں کے نفاذ اور آیوشمان آروگیہ مندروں کے قیام کے ذریعہ ہوئی ہے۔" انہوں نے مزید کہا کہ "پردھان منتری بھارتیہ جن او شدھی پریوجنا  (پی ایم بی جے پی) کے ذریعہ، عام لوگوں کی زندگیوں میں قابل ذکر تبدیلی لائی گئی ہے کیونکہ ملک بھر میں پھیلی امرت فارمیسیوں کے ذریعہ کفایتی قیمتوں پر دستیاب ادویات کی وجہ سے جیب سے باہر کے اخراجات میں نمایاں کمی آئی ہے۔"

ملک کے صحت کی دیکھ بھال کے ماحولیاتی نظام کو مضبوط بنانے کی سمت میں کی گئی پیش رفت پر روشنی ڈالتے ہوئے، محترمہ پٹیل نے کہا کہ "2014 کے بعد سے ملک میں میڈیکل کالجوں کی تعداد میں نمایاں اضافہ ہوا ہے، آج میڈیکل کالجوں کی تعداد 387 سے بڑھ کر 780 ہو گئی ہے، جس میں تقریباً 101 فیصد اضافہ ہوا ہے جبکہ ایمس کی تعداد 6 سے بڑھ کر 22 ہو گئی ہے۔" محترمہ پٹیل نے اس بات پر بھی زور دیا کہ "ہم نہ صرف علاج کے ساتھ کام کر رہے ہیں بلکہ ملک میں صحت کی دیکھ بھال کے حوالے سے بچاؤ، ترقی اور بحالی کے طریقہ کار پر بھی کام کر رہے ہیں۔"

انہوں نے این آئی ایچ ایف ڈبلیو کے مضبوط تربیتی ماڈل کی ستائش کی جس میں صحت کی دیکھ بھال کے پیشہ ور افراد کی تربیت کے ذریعہ صحت کی دیکھ بھال کے منظر نامے کو مضبوط کرنا اور انہیں وبائی امراض اور ہنگامی تیاریوں، اینٹی مائکروبیل مزاحمت اور موسمیاتی تبدیلی جیسے پیچیدہ چیلنجوں کے لیے تیار کرنا شامل ہے۔ نیز تعلیم اور تحقیق میں جدید ترین ٹیکنالوجی اور رجحانات کے علم کے ساتھ اپنی فیکلٹی کو مسلسل اپ ڈیٹ کرنے کے لیے ادارے کی تعریف کی۔ انہوں نے این آئی ایچ ایف ڈبلیو کو صحت عامہ اور صحت کے انتظام کے مختلف شعبوں میں 132 تربیتی پروگراموں اور ورکشاپ کے انعقاد پر مبارکباد پیش کی تاکہ مرکزی اور ریاستی ہیلتھ سروس، میڈیکل کالج فیکلٹی، نرسنگ پروفیشنل، پبلک سیکٹر انڈرٹیکنگس اور دیگر سرکاری تنظیموں کے تقریباً 4000 ہیلتھ اہلکاروں کو تربیت دی جا سکے جو کہ پچھلے سال کے تربیتی کورسوں کی تعداد میں ایک تہائی سے زیادہ  کا اضافہ ہے۔

صحت عامہ کے اہل پیشہ ور افراد کی ضرورت کو اجاگر کرتے ہوئے، محترمہ پٹیل نے میڈیکل طلباء کی صلاحیتوں کو بڑھانے اور اس مقصد کے لیے ڈیجیٹل لرننگ کی اہمیت پر زور دیا۔ انہوں نے مشن کرمایوگی کی کامیابی میں این آئی ایچ ایف ڈبلیو کی طرف سے ادا کیے گئے کردار اور طبی پیشہ ور افراد کے لیے ڈیجیٹل لرننگ کو یقینی بنانے کے لیے دیگر اداروں کے ہاتھ میں لیے جانے والے کردار پر روشنی ڈالی جو پیشہ اور مقام کی وجہ سے پیدا ہونے والے خلا کو پر کرے گی۔ انہوں نے مزید کہا کہ "انسٹی ٹیوٹ کا اس طرح کی تربیت میں فعال نقطہ نظر صحت کی دیکھ بھال کی تعلیم اور خدمات کی فراہمی کو جدید بنانے کے لیے اس کی لگن کو اجاگر کرتا ہے۔"

محترمہ پٹیل نے سوچھ بھارت مشن میں انسٹی ٹیوٹ کے تعاون کو بھی تسلیم کیا اور کہا کہ "اس کے آنے والے وقت میں مثبت اثرات مرتب ہوں گے"۔ انہوں نے مزید کہا کہ "انسٹی ٹیوٹ میں آروگیہ پارک کا افتتاح ایک صحت مند طرز زندگی کو برقرار رکھنے کو فروغ دے گا جو علاج معالجے کی بجائے احتیاطی صحت کی طرف بڑھنے میں سہولت فراہم کرے گا۔"

اس موقع پر خطاب کرتے ہوئے جناب اتل گوئل نے اس بات پر روشنی ڈالی کہ کس طرح تحقیق این آئی ایچ ایف ڈبلیو کی کلیدی طاقت رہی ہے اور ادارے نے قومی صحت کے پروگراموں کی تشخیص کے ذریعہ پالیسی اور عمل میں نمایاں تعاون کیا ہے۔ انہوں نے اس بات پر زور دیا کہ جہاں طبی تعلیم میں ای لرننگ اہم کردار ادا کر رہی ہے، وہیں طبی پیشہ ور افراد کی عملی تربیت پر زیادہ توجہ دی جانی چاہیے۔ انہوں نے این آئی ایچ ایف ڈبلیو کے ذریعہ بنیادی تحقیق اور اداروں کی سرگرمیوں کا مکمل جائزہ لینے کی ضرورت پر بھی زور دیا تاکہ ابھرتے ہوئے اور موجودہ چیلنجوں کے لیے بہتر حل تلاش کیے جا سکیں۔ جناب گوئل نے لوگوں کی روزمرہ کی زندگی میں جسمانی سرگرمیوں کو شامل کرنے کی ضرورت پر بھی زور دیا تاکہ معیار زندگی کو یقینی بنایا جا سکے۔

پروفیسر دھیرج شاہ، ڈائریکٹر، این آئی ایچ ایف ڈبلیو نے پچھلے سال کی انسٹی ٹیوٹ کی اہم کامیابیوں کو پیش کیا اور انسٹی ٹیوٹ کی جانب سے مستقبل میں کی جانے والی کچھ سرگرمیوں پر روشنی ڈالی۔ انہوں نے اس بات پر روشنی ڈالی کہ این آئی ایچ ایف ڈبلیو کا بنیادی مقصد حکومت ہند کی طرف سے شروع کئے گئے صحت اور خاندانی بہبود کے پروگراموں کے لئے تعلیم، تربیت، صلاحیت سازی، تحقیق اور وکالت کے ذریعہ ملک میں صحت اور خاندانی بہبود کے پروگراموں کو فروغ دینا ہے۔ انہوں نے مزید کہا کہ " این آئی ایچ ایف ڈبلیو علم فراہم کرنے اور صلاحیت کی تعمیر کے دائرہ کار کو بڑھانے کی اپنی بنیادی اقدار کے ساتھ جاری رکھے ہوئے ہے۔"

اس تقریب کے دوران این آئی ایچ ایف ڈبلیو کے نئے اقدامات کی بھی نقاب کشائی کی گئی جس میں ادارے کا نیا لوگو، کمیٹی ہالوں کے نام اور ہندی میگزین "جن سوستھیا دھرنا" کا اجرا شامل ہیں ۔ ادارے کے بہترین کارکنوں کو مختلف زمروں میں انعامات سے نوازا گیا۔ اس تقریب میں ڈاکٹر آر پی سینٹر فار اوتھلمک سائنسز، ایمس، نئی دہلی کے تعاون سے ایک جامع آنکھوں کی جانچ کیمپ کا بھی انعقاد کیا گیا۔ قومی اور بین الاقوامی تنظیموں کے مہمانوں، سابق طلباء اور ریٹائرڈ فیکلٹی اور ادارے کے عملے کے لیے سال کی مختلف سرگرمیوں کی نمائش کے لیے ایک نمائش بھی لگائی گئی۔

مرکزی وزارت صحت کے سینئر افسران، پروفیسر وی کے تیواری، ڈین، این آئی ایچ ایف ڈبلیو، بھی اس تقریب میں موجود تھے۔ ہندوستان اور بیرون ملک کے محققین، ماہرین تعلیم، اختراع کار اور صنعتی شراکت داروں نے بھی حصہ لیا، نیز اپنے نقطہ نظر اور خیالات کا اشتراک کیا۔

پس منظر: نیشنل انسٹی ٹیوٹ آف ہیلتھ اینڈ فیملی ویلفیئر (این آئی ایچ ایف ڈبلیو) ایک خود مختار ادارہ ہے ، جو وزارت صحت و خاندانی بہبود، حکومت ہند کے تحت، ملک میں صحت اور خاندانی بہبود کے پروگراموں کے فروغ کے لیے ایک 'اعلی تکنیکی ادارے' کے ساتھ ساتھ 'تھنک ٹینک' کے طور پر کام کرتا ہے۔ این آئی ایچ ایف ڈبلیو اپنی تعلیم، تربیت، تحقیق، اور خصوصی مشاورتی خدمات کے لیے جانا جاتا ہے۔

تعلیمی سرگرمیاں: انسٹی ٹیوٹ کی تعلیمی سرگرمیاں ملک میں صحت و خاندانی بہبود کے پروگراموں کے بہتر انتظام کے لیے انسانی وسائل کی ترقی میں اہم کردار ادا کرتی ہیں۔ کیمپس کے کورس کمیونٹی ہیلتھ ایڈمنسٹریشن میں تین سالہ پوسٹ گریجویٹ ڈگری ہیں۔ ہیلتھ ایڈمنسٹریشن میں دو سالہ پوسٹ گریجویٹ ڈپلومہ؛ اور پبلک ہیلتھ مینجمنٹ میں ایک سالہ پوسٹ گریجویٹ ڈپلومہ، پبلک ہیلتھ میں دو سالہ ماسٹر، انسٹی ٹیوٹ کے پبلک ہیلتھ ڈسٹنس لرننگ سیل میں ڈاکٹر آف فلاسفی، چھ پوسٹ گریجویٹ ڈپلوما ان مینجمنٹ (پی جی ڈی ایم-ایکزیکیوٹیو) پیش کرتا ہے جس میں ہسپتال مینجمنٹ، ہیلتھ اینڈ فیملی ویلفیئر مینجمنٹ اور ہیلتھ پروموشن کے ذریعہ 15 ماہ کے فاصلاتی لرننگ موڈ میں مہارت حاصل کی جاتی ہے۔ کورسز ضرورت پر مبنی اور کثیر الشعبہ ہیں۔ یہ سیل دو ای لرننگ سرٹیفکیٹ کورس بھی پیش کرتا ہے، یعنی پیشہ ورانہ ترقی میں پبلک ہیلتھ اور ہیلتھ سیکٹر ریفارم چھ ماہ کی مدت اور پروگرام مینجمنٹ برائے پبلک ہیلتھ کیئر تین ماہ کی مدت کے لیے سروس میں درمیانی سطح کے ہیلتھ پروفیشنل اور نیشنل ہیلتھ مشن کے تحت کام کرنے والے پروگرام مینیجروں کی مہارتوں اور قابلیت کو بڑھانے کے لیے۔ یہ ادارہ صحت عامہ اور بایو میڈیکل ریسرچ کے شعبے میں مختلف یونیورسٹیوں کے ساتھ مل کر ڈاکٹریٹ پروگرام بھی پیش کرتا ہے۔

تربیت اور ورکشاپس: تربیتی کورس اور ورکشاپ (اندرونی اور ایکسٹرامورل)، جن کی تعداد تقریباً 150-140 ہوتی ہے، ہر سال انسٹی ٹیوٹ کی طرف سے منعقد کیے جاتے ہیں، جس کا مقصد سروس میں موجود امیدواروں کو صحت و خاندانی بہبود کے پروگراموں کے اہداف اور مقاصد سے واقف کرنا ہے۔ ان کے علم کو اپ ڈیٹ کرنا اور نفاذ میں آپریشنل دشواریوں کو سمجھنا اور اس طرح کی رکاوٹوں کو دور کرنے کے لیے تدارکاتی اقدامات تجویز کرنا ہے۔

تحقیق اور تشخیص: ادارہ صحت اور خاندانی بہبود کے مختلف پہلوؤں میں تحقیق پر ترجیحی توجہ دیتا ہے۔ تعلیمی کوششوں میں معیار کو یقینی بنانے کے لیے انسٹی ٹیوٹ میں اکیڈمک کمیٹی اور ایک اعلیٰ سطحی پروگرام ایڈوائزری کمیٹی ہے۔ انسٹی ٹیوٹ قومی صحت کے پروگراموں اور حکومت ہند کی طرف سے شروع کی گئی مختلف دیگر متعلقہ سرگرمیوں کے جائزے کا مطالعہ بھی کرتا ہے۔

خصوصی خدمات: انسٹی ٹیوٹ کی خصوصی خدمات میں طبی خدمات، نیشنل کولڈ چین ویکسین مینجمنٹ ریجنل سینٹر، سینٹر فار ہیلتھ انفارمیٹکس، اسکل لیب، نیشنل ڈاکیومنٹیشن سینٹر، سکشم: ایل ایم آئی ایس، مشن کرمایوگی اور اشاعتیں شامل ہیں۔ صحت اور خاندانی بہبود کی وزارت (ایم او ایچ ایف ڈبلیو) نے ملک میں تولیدی اور بچوں کی صحت (آر سی ایچ) کے تربیتی پروگراموں کو منظم، ہم آہنگی اور نگرانی کے لیے ایک 'قومی نوڈل ایجنسی' کے طور پر انسٹی ٹیوٹ کا انتخاب کیا ہے۔ کلینک کا بنیادی مقصد ماں اور بچے کی صحت کی خدمات فراہم کرنا ہے۔ بانجھ پن، تولیدی عوارض، خاص طور پر اینڈو کرائنولوجی اور جنسی امراض سے متعلق طبی کام ذکر کے مستحق ہیں۔ نیشنل کولڈ چین ویکسین مینجمنٹ ریسورس سینٹر (این سی سی وی ایم آر سی) کے ذریعہ یونیسیف کے ساتھ شراکت میں این آئی ایچ ایف ڈبلیو پورے ملک میں نیشنل کولڈ چین مینجمنٹ انفارمیشن سسٹم (این سی سی ایم آئی ایس) کی مجموعی دیکھ بھال اور نفاذ اور نگرانی کے لیے ذمہ دار ہے جس میں اختتامی صارفین کو مدد فراہم کرنا بھی شامل ہے۔ نیشنل ڈاکومینٹیشن سینٹر کا حوالہ، پریس کلپنگ اور کتابیات کی خدمات اور شعبہ ابلاغیات کی اشاعت، آرٹ اور پروجیکشن سروسز انسٹی ٹیوٹ کی سرگرمیوں کی تکمیل کرتی ہیں۔

مشاورتی خدمات: انسٹی ٹیوٹ کے ڈائریکٹر اور فیکلٹی ممبران مختلف قومی، بین الاقوامی اور رضاکار تنظیموں کو مختلف صلاحیتوں میں مشاورتی خدمات فراہم کرتے ہیں۔

۔۔۔۔۔۔۔۔۔۔۔۔۔۔۔۔۔۔۔۔۔

(ش ح ۔ رض۔ خ م  (

8017