କେନ୍ଦ୍ର ରେଳ, ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ଏବଂ ସୂଚନା ଏବଂ ପ୍ରସାରଣ ମନ୍ତ୍ରୀ ଶ୍ରୀ ଅଶ୍ୱିନୀ ବୈଷ୍ଣବ ଆଜି ଗୌହାଟୀରେ ଆୟୋଜିତ ଆଡଭାଣ୍ଟେଜ୍ ଆସାମ ୨.୦ ନିବେଶ ଏବଂ ଭିତ୍ତିଭୂମି ସମ୍ମିଳନୀରେ ଅଂଶଗ୍ରହଣ କରିଥିଲେ। ଏହି କାର୍ଯ୍ୟକ୍ରମରେ ସେ ଏହି ଅଞ୍ଚଳରେ ରେଳ ଏବଂ ଆଇଟି ଶିଳ୍ପର ଅଭିବୃଦ୍ଧିକୁ ତ୍ୱରାନ୍ୱିତ କରିବା ଉଦ୍ଦେଶ୍ୟରେ ଅନେକ ଗୁରୁତ୍ୱପୂର୍ଣ୍ଣ ପଦକ୍ଷେପ ଏବଂ ପ୍ରକଳ୍ପ ଘୋଷଣା କରିଥିଲେ।

ଭିତ୍ତିଭୂମି ଏବଂ ଶିଳ୍ପାୟନ ବୃଦ୍ଧି ପାଇଁ ସରକାରଙ୍କ ପ୍ରତିବଦ୍ଧତା ଉପରେ ଆଲୋକପାତ କରି ଶ୍ରୀ ବୈଷ୍ଣବ ଉତ୍ତର-ପୂର୍ବାଞ୍ଚଳକୁ ଭାରତର ବିକାଶ ପାଇଁ "ନୂତନ ଇଞ୍ଜିନ" ଭାବେ ବର୍ଣ୍ଣନା କରିଥିଲେ। ସେ ଆସାମରେ ଏକ ନୂତନ ସେମିକଣ୍ଡକ୍ଟର ପ୍ଲାଣ୍ଟ ପାଇଁ ଯୋଜନା ଉନ୍ମୋଚନ କରିଥିଲେ, ଯାହା ଇଲେକ୍ଟ୍ରୋନିକ୍ସ ଏବଂ ସେମିକଣ୍ଡକ୍ଟର ଉତ୍ପାଦନରେ ରାଜ୍ୟର ବର୍ଦ୍ଧିତ ଭୂମିକାକୁ ସୁଦୃଢ଼ କରିବ। ଏହାବ୍ୟତୀତ, ସେ ଘୋଷଣା କରିଥିଲେ ଯେ ଗୌହାଟୀ ରେଳ ଷ୍ଟେସନକୁ ଏକ ନୂତନ ଆଇଟି ହବ୍ ରେ ପରିଣତ କରାଯିବ, ଯାହା ଏହି ଅଞ୍ଚଳର ଡିଜିଟାଲ୍ ଭିତ୍ତିଭୂମିକୁ ଆହୁରି ମଜବୁତ କରିବ।

୨୦୧୪ ମସିହା ଠାରୁ ଆସାମ ଏବଂ ଉତ୍ତର-ପୂର୍ବରେ ୧୮୨୪ କିଲୋମିଟର ନୂତନ ରେଳ ଟ୍ରାକ୍ ନିର୍ମାଣ କରିବାରେ ସରକାରଙ୍କ ସଫଳତାକୁ ସେ ରେଖାଙ୍କିତ କରିଥିଲେ। ସେ ମଧ୍ୟ ଆସାମରେ ମୋଇନାରବନ୍ଦ ଏବଂ ସିନ୍ନମାରା ଠାରେ ଦୁଇଟି ଗତି ଶକ୍ତି କାର୍ଗୋ ଟର୍ମିନାଲ କାର୍ଯ୍ୟକ୍ଷମ ହେବା ବିଷୟରେ ଉଲ୍ଲେଖ କରିଥିଲେ ଏବଂ ଚାଇଗାଓଁ, ନ୍ୟୁ ବୋଙ୍ଗାଇଗାଓଁ, ବିହାରା, ହିଲାରା, ବୈହାଟା ଏବଂ ରଙ୍ଗଜୁଲିରେ 6ଟି ଅତିରିକ୍ତ ଗତି ଶକ୍ତି କାର୍ଗୋ ଟର୍ମିନାଲର ବିକାଶ ଘୋଷଣା କରିଥିଲେ ଯାହା ଏହି ଅଞ୍ଚଳର ରେଳ ନେଟୱାର୍କକୁ ଉଲ୍ଲେଖନୀୟ ଭାବେ ବୃଦ୍ଧି କରିବ। ଯୋଗାଯୋଗକୁ ଆହୁରି ସୁଦୃଢ଼ କରି ସେ ନିଶ୍ଚିତ କରିଛନ୍ତି ଯେ ଗୋଟିଏ ବନ୍ଦେ ଭାରତ ଏକ୍ସପ୍ରେସ୍ ଉତ୍ତର-ପୂର୍ବରେ କାର୍ଯ୍ୟକ୍ଷମ ହୋଇସାରିଛି, ଏବଂ ଅନ୍ୟଟି ଖୁବ୍ ଶୀଘ୍ର ଗୌହାଟୀ ଏବଂ ଅଗରତାଲାକୁ ସଂଯୋଗ କରିବ। ସେ ଦୁଇଟି ଅମୃତ ଭାରତ ଟ୍ରେନ୍ (ଗୌହାଟୀ-ଦିଲ୍ଲୀ ଏବଂ ଗୌହାଟୀ-ଚେନ୍ନାଇ ମଧ୍ୟରେ) ମଞ୍ଜୁର କରିବାକୁ ମଧ୍ୟ ଘୋଷଣା କରିଥିଲେ, ଯାହା ଚଳିତ ବର୍ଷ କାର୍ଯ୍ୟକ୍ଷମ ହେବ ଏବଂ ଲମଡିଂରେ ଏକ ରେଳ ଇଞ୍ଜିନ ମିଡଲାଇଫ୍ ପୁନଃନିର୍ମାଣ ସୁବିଧା ପ୍ରତିଷ୍ଠା କରାଯିବ। ମନ୍ତ୍ରୀ ମଧ୍ୟ ବୋଡୋଲ୍ୟାଣ୍ଡ ଅଞ୍ଚଳର ବାସବାରୀରେ ୩୦୦ କୋଟି ଟଙ୍କା ବ୍ୟୟରେ ଏକ ୱାଗନ ମରାମତି କାରଖାନା ପ୍ରତିଷ୍ଠା କରିବାର ଯୋଜନା ଘୋଷଣା କରିଥିଲେ।

ଶ୍ରୀ ବୈଷ୍ଣବ ଆସାମ ଏବଂ ଭୁଟାନ ମଧ୍ୟରେ ଯୋଗାଯୋଗ ବ୍ୟବସ୍ଥାରେ ଉନ୍ନତି ଆଣିବା ପାଇଁ ସରକାରଙ୍କ ଯୋଜନା ଉପରେ ଗୁରୁତ୍ୱାରୋପ କରିଥିଲେ, ଯାହାଦ୍ୱାରା ଆର୍ଥିକ ବିକାଶ ପାଇଁ ନୂତନ ସୁଯୋଗ ସୃଷ୍ଟି ହେବ। ବୋଡୋଲ୍ୟାଣ୍ଡ ଅଞ୍ଚଳର ବିକାଶକୁ ସମ୍ବୋଧିତ କରି ସେ ବାସବାରୀରେ ଏକ ୱାଗନ କାରଖାନା ପ୍ରତିଷ୍ଠା ଘୋଷଣା କରି ବୋଡୋ ରାଜିନାମା ଅଧୀନରେ ସରକାରଙ୍କ ପ୍ରତିବଦ୍ଧତାକୁ ଦୋହରାଇଥିଲେ।

ଇଲେକ୍ଟ୍ରୋନିକ୍ସ ଏବଂ ମୋବାଇଲ୍ ଉତ୍ପାଦନରେ ଭାରତର ଉଲ୍ଲେଖନୀୟ ଅଗ୍ରଗତି ବିଷୟରେ ଆଲୋଚନା କରି ମନ୍ତ୍ରୀ ଉଲ୍ଲେଖ କରିଥିଲେ ଯେ ବର୍ତ୍ତମାନ ୯୮ ପ୍ରତିଶତରୁ ଅଧିକ ମୋବାଇଲ୍ ଫୋନ୍ ଘରୋଇ ଭାବରେ ଉତ୍ପାଦିତ ହେଉଛି। ଏହି କ୍ଷେତ୍ରକୁ ଆହୁରି ସୁଦୃଢ଼ କରିବା ପାଇଁ ସେ ଇଲେକ୍ଟ୍ରୋନିକ୍ସ ଉତ୍ପାଦନ ଯୋଜନା ଅଧୀନରେ ୧୨୦ କୋଟି ଟଙ୍କା ବ୍ୟୟରେ କାମରୂପର ବୋଙ୍ଗୋରା ଠାରେ ଏକ ଗ୍ରୀନଫିଲ୍ଡ ଇଲେକ୍ଟ୍ରୋନିକ୍ ଉତ୍ପାଦନ କ୍ଲଷ୍ଟର (ଇଏମସି) ର ବିକାଶ ପାଇଁ ଘୋଷଣା କରିଥିଲେ। ଏହାବ୍ୟତୀତ, ସେ କହିଥିଲେ ଯେ ନ୍ୟାସନାଲ ଇନଷ୍ଟିଚ୍ୟୁଟ୍ ଅଫ୍ ଇଲେକ୍ଟ୍ରୋନିକ୍ସ ଆଣ୍ଡ ଇନଫର୍ମେସନ୍ ଟେକ୍ନୋଲୋଜି (ଏନ୍ଆଇଇଏଲ୍ଆଇଟି) କୁ 'ଡିମଡି-ଟୁ-ବି' ବିଶ୍ୱବିଦ୍ୟାଳୟରେ ଉନ୍ନୀତ କରାଯାଇଛି ଏବଂ ଜାଗୀରୋଡରେ ଏକ କ୍ୟାମ୍ପସ୍ ପ୍ରତିଷ୍ଠା କରିବାର ଯୋଜନା ରହିଛି।

ଶ୍ରୀ ବୈଷ୍ଣବ ଉତ୍ତର-ପୂର୍ବରେ ଭିତ୍ତିଭୂମି ଏବଂ ଶିଳ୍ପ ବିକାଶ ପ୍ରତି ସରକାରଙ୍କ ଉତ୍ସର୍ଗୀକୃତତାକୁ ଦୋହରାଇ ଆତ୍ମବିଶ୍ୱାସ ବ୍ୟକ୍ତ କରିଥିଲେ ଯେ ଆସାମ ଶୀଘ୍ର ଏକ ଗୁରୁତ୍ୱପୂର୍ଣ୍ଣ ଶିଳ୍ପ ହବ୍ ଭାବରେ ଉଭା ହେବ। ରାଜ୍ୟରେ ନୂତନ ପଦକ୍ଷେପକୁ ପ୍ରୋତ୍ସାହିତ କରିବାରେ କେନ୍ଦ୍ର ସରକାରଙ୍କ ନିରନ୍ତର ସମର୍ଥନକୁ ସ୍ୱୀକାର କରି ଆସାମ ମୁଖ୍ୟମନ୍ତ୍ରୀ ଡ. ହିମନ୍ତ ବିଶ୍ୱଶର୍ମା ଏହି ଭାବନା ପ୍ରତିଧ୍ୱନିତ କରିଥିଲେ। ସେ ଆଶାବ୍ୟକ୍ତ କରିଥିଲେ ଯେ ଆସାମ ବିଶ୍ୱର ସେମିକଣ୍ଡକ୍ଟର ଇକୋସିଷ୍ଟମରେ ଏକ ପ୍ରମୁଖ ଭୂମିକା ଗ୍ରହଣ କରିବ।

ଅଧିବେଶନ ସମୟରେ, ଆସାମ ସରକାର କେନ୍ଦ୍ର ମନ୍ତ୍ରୀଙ୍କ ଉପସ୍ଥିତିରେ ସିଙ୍ଗାପୁର, ମାଲେସିଆ ଏବଂ ଜାପାନରେ ସେମିକଣ୍ଡକ୍ଟର ଇକୋସିଷ୍ଟମର ୧୦ ଟି ଶିଳ୍ପ ଗୋଷ୍ଠୀ ସହିତ ବୁଝାମଣା ସ୍ୱାକ୍ଷର କରିଥିଲେ ଯାହା ଆନ୍ତର୍ଜାତୀୟ ଭାଗିଦାରୀକୁ ମଜବୁତ କରିବା ଏବଂ ରାଜ୍ୟର ବର୍ଦ୍ଧିତ ସେମିକଣ୍ଡକ୍ଟର ଶିଳ୍ପରେ ନିବେଶକୁ ପ୍ରୋତ୍ସାହିତ କରିବ ।

HS