രാജസ്ഥാൻ ഗവർണർ ശ്രീ ഹരിഭാവു ബഗ്ഡെ ജി, സംസ്ഥാനത്തെ ജനകീയനായ മുഖ്യമന്ത്രി ശ്രീ ഭജൻലാൽ ജി ശർമ്മ, രാജസ്ഥാൻ ​ഗവണ്മെൻ്റിലെ മന്ത്രിമാർ, പാർലമെന്റ് അംഗങ്ങൾ, നിയമസഭാ അംഗങ്ങൾ, വ്യവസായ സഹപ്രവർത്തകർ, വിവിധ അംബാസഡർമാർ, എംബസി പ്രതിനിധികൾ, മറ്റ് വിശിഷ്ട വ്യക്തികൾ, മഹതികളേ, മാന്യരേ.

രാജസ്ഥാന്റെ വികസന യാത്രയിൽ ഇന്ന് മറ്റൊരു സുപ്രധാന ദിനമാണ്. രാജ്യത്തുനിന്നും ലോകമെമ്പാടുമുള്ള നിരവധി പ്രതിനിധികളും നിക്ഷേപകരും ഇന്ന് പിങ്ക് സിറ്റിയിൽ ഒത്തുകൂടിയിരിക്കുന്നു. വ്യാവസായിക മേഖലയിൽ നിന്നുള്ള നിരവധി സഹപ്രവർത്തകരും ഇവിടെയുണ്ട്. നിങ്ങളെയെല്ലാം റൈസിംഗ് രാജസ്ഥാൻ ഉച്ചകോടിയിലേക്ക് സ്വാഗതം ചെയ്യുന്നു. ഈ മഹത്തായ പരിപാടി സംഘടിപ്പിച്ചതിന് രാജസ്ഥാനിലെ ബിജെപി ​ഗവണ്മെൻ്റിനെ ഞാൻ അഭിനന്ദിക്കുന്നു.

സുഹൃത്തുക്കളേ,

ഇന്ന്, ലോകമെമ്പാടുമുള്ള എല്ലാ വിദഗ്ധരും നിക്ഷേപകരും ഭാരതത്തെക്കുറിച്ച് വളരെയധികം ശുഭാപ്തി വിശ്വാസം ഉള്ളവരാണ്. പരിഷ്കരണം-പ്രകടനം-പരിവർത്തനം എന്ന മന്ത്രം പിന്തുടർന്ന്, എല്ലാ മേഖലകളിലും ദൃശ്യമാകുന്ന ശ്രദ്ധേയമായ വളർച്ച ഭാരതം നേടിയിട്ടുണ്ട്. സ്വാതന്ത്ര്യത്തിനു ശേഷമുള്ള ഏഴ് പതിറ്റാണ്ടുകളിൽ, ലോകത്തിലെ 11-ാമത്തെ വലിയ സമ്പദ്‌വ്യവസ്ഥയായി മാറുന്നതിനേ ഭാരതത്തിന് കഴിഞ്ഞുള്ളൂ. ഇതിനു വിപരീതമായി, കഴിഞ്ഞ പത്ത് വർഷത്തിനിടയിൽ, ഭാരതം 10-ാമത്തെ വലിയ സമ്പദ്‌വ്യവസ്ഥയിൽ നിന്ന് 5-ാമത്തെ വലിയ സമ്പദ്‌വ്യവസ്ഥയിലേക്ക് മാറി. ഈ 10 വർഷത്തിനിടയിൽ, ഭാരതം അതിന്റെ സമ്പദ്‌വ്യവസ്ഥയുടെ വലുപ്പം ഏതാണ്ട് ഇരട്ടിയാക്കി. കഴിഞ്ഞ ദശകത്തിൽ കയറ്റുമതിയും ഏതാണ്ട് ഇരട്ടിയായി. 2014 ന് മുമ്പുള്ള ദശകവുമായി താരതമ്യപ്പെടുത്തുമ്പോൾ, കഴിഞ്ഞ ദശകത്തിൽ നേരിട്ടുള്ള വിദേശ നിക്ഷേപം (എഫ്ഡിഐ) ഇരട്ടിയിലധികമായി. കൂടാതെ, ഈ സമയത്ത് ഭാരതം അതിന്റെ അടിസ്ഥാന സൗകര്യ ചെലവ് ഏകദേശം 2 ട്രില്യൺ രൂപയിൽ നിന്ന് 11 ട്രില്യൺ രൂപയായി വർദ്ധിപ്പിച്ചു.

സുഹൃത്തുക്കളേ,

ഭാരതത്തിന്റെ വിജയത്തിൽ നിന്ന് ജനാധിപത്യത്തിന്റെയും ജനസംഖ്യയുടെയും ഡിജിറ്റൽ ഡാറ്റയുടെയും വിതരണത്തിന്റെയും ശക്തി വ്യക്തമാണ്. ഭാരതം പോലുള്ള വൈവിധ്യപൂർണ്ണമായ ഒരു രാജ്യത്ത്, ജനാധിപത്യം അഭിവൃദ്ധി പ്രാപിക്കുക മാത്രമല്ല, കൂടുതൽ ശക്തമാവുകയും ചെയ്യുന്നു, ഇത് തന്നെ ഒരു പ്രധാന നേട്ടമാണ്. ജനാധിപത്യപരമായി തുടരുമ്പോൾ തന്നെ, ഭാരതത്തിന്റെ തത്ത്വചിന്ത മാനവികതയുടെ ക്ഷേമത്തിൽ കേന്ദ്രീകരിച്ചിരിക്കുന്നു, അത് അതിന്റെ സ്വഭാവത്തിൽ അന്തർലീനമാണ്. ഇന്ന്, ഭാരതത്തിലെ ജനങ്ങൾ അവരുടെ ജനാധിപത്യ അവകാശങ്ങളിലൂടെ സ്ഥിരതയുള്ള ഒരു ​ഗവണ്മെൻ്റിനായി വോട്ട് ചെയ്യുന്നു.

സുഹൃത്തുക്കളേ,

ഭാരതത്തിന്റെ ഈ പുരാതന മൂല്യങ്ങളെ അതിന്റെ ജനസംഖ്യാ ശക്തിയിലൂടെ - അതിന്റെ 'യുവശക്തി' (യുവശക്തി) മുന്നോട്ട് കൊണ്ടുപോകുന്നു. വരും വർഷങ്ങളിൽ, ലോകത്തിലെ ഏറ്റവും പ്രായം കുറഞ്ഞ രാജ്യങ്ങളിലൊന്നായി ഭാരതം തുടരും. യുവജനങ്ങളുടെ ഒരു വലിയ കൂട്ടം ഉള്ളതിനൊപ്പം, ഏറ്റവും വൈദഗ്ധ്യമുള്ളവരും ഭാരതത്തിലുണ്ടാകും. ഈ സാധ്യതകൾ പ്രയോജനപ്പെടുത്തുന്നതിന്, ​ഗവണ്മെൻ്റ് തന്ത്രപരമായ തീരുമാനങ്ങളുടെ ഒരു പരമ്പര തന്നെ എടുക്കുന്നു.

സുഹൃത്തുക്കളേ,

കഴിഞ്ഞ ദശകത്തിൽ, ഭാരതത്തിലെ യുവജനങ്ങൾ അവരുടെ കഴിവുകളിലേക്ക് ഒരു പുതിയ മാനം ചേർത്തു. ഈ പുതിയ മാനം ഭാരതത്തിന്റെ സാങ്കേതിക ശക്തിയും ഡാറ്റാ ശക്തിയുമാണ്. ഇന്ന് എല്ലാ മേഖലയിലും സാങ്കേതികവിദ്യയും ഡാറ്റയും എത്രത്തോളം നിർണായകമാണെന്ന് നിങ്ങൾക്കെല്ലാവർക്കും അറിയാം. ഇത് സാങ്കേതികവിദ്യാധിഷ്ഠിതവും ഡാറ്റാധിഷ്ഠിതവുമായ ഒരു നൂറ്റാണ്ടാണ്. കഴിഞ്ഞ ദശകത്തിൽ, ഭാരതത്തിലെ ഇന്റർനെറ്റ് ഉപയോക്താക്കളുടെ എണ്ണം ഏകദേശം നാലിരട്ടിയായി വർദ്ധിച്ചു. ഡിജിറ്റൽ ഇടപാടുകൾ പുതിയ റെക്കോർഡുകൾ സൃഷ്ടിക്കുന്നു, ഇത് ഒരു തുടക്കം മാത്രമാണ്. ഭാരതം ലോകത്തിന് ജനാധിപത്യത്തിന്റെയും ജനസംഖ്യയുടെയും ഡാറ്റയുടെയും യഥാർത്ഥ ശക്തി തെളിയിച്ചുകൊണ്ടിരിക്കുകയാണ്. ഡിജിറ്റൽ സാങ്കേതികവിദ്യയുടെ ജനാധിപത്യവൽക്കരണം എല്ലാ മേഖലയ്ക്കും എല്ലാ സമൂഹത്തിനും എങ്ങനെ പ്രയോജനം ചെയ്യുന്നുവെന്ന് ഭാരതം കാണിച്ചുതരുന്നു. യുപിഐ, നേരിട്ടുള്ള ആനുകൂല്യ കൈമാറ്റ (ഡിബിടി) പദ്ധതികൾ, ജെം (ഗവൺമെന്റ് ഇ-മാർക്കറ്റ്പ്ലേസ്), ഒഎൻഡിസി (ഓപ്പൺ നെറ്റ്‌വർക്ക് ഫോർ ഡിജിറ്റൽ കൊമേഴ്‌സ്) തുടങ്ങിയ പ്ലാറ്റ്‌ഫോമുകൾ ഭാരതത്തിന്റെ ഡിജിറ്റൽ ആവാസവ്യവസ്ഥയുടെ ശക്തി പ്രകടമാക്കുന്നു. ഈ ഡിജിറ്റൽ പരിവർത്തനം രാജസ്ഥാനിലും കാര്യമായ സ്വാധീനം ചെലുത്തും. സംസ്ഥാനങ്ങളുടെ വികസനം രാജ്യത്തിന്റെ വികസനത്തിലേക്ക് നയിക്കുമെന്ന് ഞാൻ ഉറച്ചു വിശ്വസിക്കുന്നു. രാജസ്ഥാൻ വളർച്ചയുടെ പുതിയ ഉയരങ്ങളിലെത്തുമ്പോൾ, അത് മുഴുവൻ രാജ്യത്തെയും ഉയർത്തുന്നതിന് കാരണമാകും.

സുഹൃത്തുക്കളേ,

വിസ്തൃതിയുടെ കാര്യത്തിൽ, രാജസ്ഥാൻ ഭാരതത്തിലെ ഏറ്റവും വലിയ സംസ്ഥാനമാണ്, അവിടുത്തെ ജനങ്ങളുടെ ഹൃദയവും അത്രതന്നെ വിശാലമാണ്. കഠിനാധ്വാനം, സത്യസന്ധത, ഏറ്റവും കഠിനമായ ലക്ഷ്യങ്ങൾ പോലും നേടാനുള്ള ദൃഢനിശ്ചയം, എല്ലാറ്റിനുമുപരി രാഷ്ട്രത്തിന് മുൻഗണന നൽകാനുള്ള മനോഭാവം, രാജ്യത്തിനായി എന്തും ചെയ്യാനുള്ള പ്രചോദനം - ഈ ഗുണങ്ങൾ രാജസ്ഥാന്റെ ഓരോ മണ്ണിലും രൂഢമൂലമാണ്. എന്നിരുന്നാലും, സ്വാതന്ത്ര്യാനന്തരം, ഗവൺമെന്റുകളുടെ മുൻഗണനകൾ രാഷ്ട്രത്തിന്റെ വികസനമോ പൈതൃക സംരക്ഷണമോ ആയിരുന്നില്ല. ഈ അവഗണനയുടെ വലിയൊരു ആഘാതം രാജസ്ഥാൻ വഹിച്ചു. എന്നാൽ ഇന്ന്, നമ്മുടെ ഗവൺമെന്റ് 'വികാസ്' (വികസനം), 'വിരാസത്ത്' (പൈതൃകം) എന്നീ രണ്ട് മന്ത്രങ്ങളുമായി പ്രവർത്തിക്കുന്നു, രാജസ്ഥാൻ അതിൽ നിന്ന് ഗണ്യമായ നേട്ടങ്ങൾ കൊയ്യുന്നു.

സുഹൃത്തുക്കളേ,

രാജസ്ഥാൻ ഉയർന്നുവരുക മാത്രമല്ല, വിശ്വാസയോഗ്യവുമാണ്. അത് പുതിയ ആശയങ്ങൾ പൂർണ്ണമനസ്സോടെ കൈക്കൊള്ളുന്നതും കാലത്തിനനുസരിച്ച് സ്വയം എങ്ങനെ പരിഷ്കരിക്കാമെന്ന് അറിയുന്നതുമാണ്. വെല്ലുവിളികളെ നേർക്കുനേർ നേരിടുന്നതും പുതിയ അവസരങ്ങൾ സൃഷ്ടിക്കുന്നതും രാജസ്ഥാൻ പ്രതീകപ്പെടുത്തുന്നു. രാജസ്ഥാനിലെ ഈ ആർ-ഫാക്ടറിൽ, ഒരു പുതിയ മാനം ചേർത്തിരിക്കുന്നു. ഇവിടുത്തെ പ്രതികരണശേഷിയുള്ളതും പരിഷ്കരണവാദിയുമായ ബിജെപി ​ഗവണ്മെൻ്റിന് രാജസ്ഥാനിലെ ജനങ്ങൾ മികച്ച ജനവിധി നൽകി. വളരെ ചുരുങ്ങിയ സമയത്തിനുള്ളിൽ, ഭജൻ ലാൽ ജിയും അദ്ദേഹത്തിന്റെ മുഴുവൻ സംഘവും ശ്രദ്ധേയമായ ഫലങ്ങൾ സൃഷ്ടിച്ചു. സംസ്ഥാന 
​ഗവണ്മെൻ്റ് ഉടൻ തന്നെ ഒന്നാം വർഷം പൂർത്തിയാക്കാൻ പോകുന്നു. രാജസ്ഥാന്റെ ദ്രുതഗതിയിലുള്ള വികസനത്തിനായി ഭജൻ ലാൽ ജിയുടെ കാര്യക്ഷമതയും പ്രതിബദ്ധതയുമുള്ള പ്രവർത്തനം ശരിക്കും പ്രശംസനീയമാണ്. ദരിദ്രരുടെയും, കർഷകരുടെയും ക്ഷേമമായാലും, യുവജനങ്ങൾക്ക് പുതിയ അവസരങ്ങൾ സൃഷ്ടിക്കുന്നതായാലും, റോഡുകൾ, വൈദ്യുതി, ജലം എന്നിവ ഉറപ്പാക്കിയാലും - വികസനത്തിന്റെ എല്ലാ വശങ്ങളും രാജസ്ഥാനിൽ അതിവേഗം പുരോഗമിക്കുന്നു. കുറ്റകൃത്യങ്ങളും അഴിമതിയും നിയന്ത്രിക്കുന്നതിൽ ​ഗവണ്മെൻ്റ് കാണിക്കുന്ന വേഗത പൗരന്മാരിലും നിക്ഷേപകരിലും ഒരുപോലെ പുതിയ ആവേശം സൃഷ്ടിച്ചു.

സുഹൃത്തുക്കളേ,

രാജസ്ഥാന്റെ ഉയർച്ച ശരിക്കും അനുഭവിക്കണമെങ്കിൽ, അതിന്റെ യഥാർത്ഥ സാധ്യതകൾ തിരിച്ചറിയേണ്ടത് അത്യാവശ്യമാണ്. രാജസ്ഥാൻ സമൃദ്ധമായ പ്രകൃതിവിഭവങ്ങൾ, ആധുനിക കണക്റ്റിവിറ്റി ശൃംഖല, സമ്പന്നമായ പൈതൃകം, വിശാലമായ ഭൂപ്രകൃതി, ചലനാത്മകമായ യുവശക്തി എന്നിവയാൽ അനുഗ്രഹീതമാണ്. റോഡുകൾ മുതൽ റെയിൽവേ വരെ, ഹോസ്പിറ്റാലിറ്റി മുതൽ കരകൗശല വസ്തുക്കൾ വരെ, കൃഷിയിടങ്ങൾ മുതൽ കോട്ടകൾ വരെ, രാജസ്ഥാനിൽ അവസരങ്ങളുടെ സമൃദ്ധിയുണ്ട്. ഈ സാധ്യതകൾ രാജസ്ഥാനെ നിക്ഷേപത്തിന് വളരെ ആകർഷകമായ ഒരു സ്ഥലമാക്കി മാറ്റുന്നു. രാജസ്ഥാന് ഒരു സവിശേഷ ഗുണമുണ്ട് - പഠിക്കാനും അതിന്റെ ശക്തി വർദ്ധിപ്പിക്കാനുമുള്ള കഴിവ്. അതുകൊണ്ടാണ് ഒലിവ്, ജട്രോഫ തുടങ്ങിയ വിളകളുടെ കൃഷി വികസനത്തിലൂടെ ഇവിടുത്തെ മണൽക്കൂനകളിൽ പോലും ഇപ്പോൾ ഫലം കായ്ക്കുന്നത്. ജയ്പൂരിലെ നീല മൺപാത്രങ്ങൾ, പ്രതാപ്ഗഡിലെ ഥേവ ജ്വല്ലറി, ഭിൽവാരയിലെ നൂതന തുണിത്തരങ്ങൾ എന്നിവയ്ക്ക് പേരും പെരുമയുമുണ്ട്. മകരാനാ മാർബിളും കോട്ട ഡോറിയയും ലോകമെമ്പാടും അംഗീകരിക്കപ്പെട്ടിട്ടുണ്ട്, അതുപോലെ നാഗൗറിലെ ഉലുവയ്ക്ക് മറ്റേതിനേക്കാളും സുഗന്ധമുണ്ട്. നിലവിലെ ബിജെപി ​ഗവണ്മെൻ്റ് ഓരോ ജില്ലയുടെയും അതുല്യമായ ശക്തികളെ സജീവമായി തിരിച്ചറിയുകയും ഉപയോഗപ്പെടുത്തുകയും ചെയ്യുന്നു.

സുഹൃത്തുക്കളേ,

നിങ്ങൾക്കറിയാവുന്നതുപോലെ, ഭാരതത്തിന്റെ ധാതു സമ്പത്തിന്റെ ഒരു പ്രധാന ഭാഗം രാജസ്ഥാനിലാണ് കാണപ്പെടുന്നത്. സിങ്ക്, ലെഡ്, ചെമ്പ്, മാർബിൾ, ചുണ്ണാമ്പുകല്ല്, ഗ്രാനൈറ്റ്, പൊട്ടാഷ് എന്നിവയുടെ കരുതൽ ശേഖരം ഈ സംസ്ഥാനത്തിനുണ്ട്, ഇത് ആത്മനിർഭർ ഭാരതം (സ്വയം പര്യാപ്തമായ ഇന്ത്യ) എന്നതിന് ശക്തമായ അടിത്തറ സൃഷ്ടിക്കുന്നു. ഭാരതത്തിന്റെ ഊർജ്ജ സുരക്ഷയിൽ രാജസ്ഥാൻ ഒരു പ്രധാന സംഭാവന നൽകുന്നു. ഈ ദശകത്തിന്റെ അവസാനത്തോടെ 500 GW പുനരുപയോഗ ഊർജ്ജ ശേഷി കൈവരിക്കാൻ ഭാരതം ലക്ഷ്യം വച്ചിട്ടുണ്ട്, കൂടാതെ ഈ ദൗത്യത്തിൽ രാജസ്ഥാൻ നിർണായക പങ്ക് വഹിക്കുന്നു. രാജ്യത്തെ ഏറ്റവും വലിയ സൗരോർജ്ജ പാർക്കുകളിൽ ചിലത് ഇവിടെയാണ് വികസിപ്പിച്ചുകൊണ്ടിരിക്കുന്നത്.

സുഹൃത്തുക്കളേ,

രണ്ട് പ്രധാന സാമ്പത്തിക കേന്ദ്രങ്ങളായ ഡൽഹിയും മുംബൈയും തമ്മിലുള്ള ഒരു സുപ്രധാന കണ്ണിയായി രാജസ്ഥാൻ പ്രവർത്തിക്കുന്നു. മഹാരാഷ്ട്ര, ഗുജറാത്ത് തുറമുഖങ്ങളെ വടക്കേ ഇന്ത്യയുമായി ഇത് ബന്ധിപ്പിക്കുന്നു. ഇത് പരിഗണിക്കുക: ഡൽഹി-മുംബൈ വ്യാവസായിക ഇടനാഴിയുടെ (DMIC) 250 കിലോമീറ്റർ രാജസ്ഥാൻ വഴിയാണ് കടന്നുപോകുന്നത്, ഇത് ആൽവാർ, ഭരത്പൂർ, ദൗസ, സവായ് മധോപൂർ, ടോങ്ക്, ബുണ്ടി, കോട്ട തുടങ്ങിയ ജില്ലകൾക്ക് ഗുണം ചെയ്യും. അതുപോലെ, രാജസ്ഥാനിലൂടെ കടന്നുപോകുന്ന സമർപ്പിത ചരക്ക് ഇടനാഴിയുടെ 300 കിലോമീറ്റർ, ജയ്പൂർ, അജ്മീർ, സീക്കർ, നാഗൗർ, ആൽവാർ തുടങ്ങിയ ജില്ലകളെ ഉൾക്കൊള്ളുന്നു. ഈ വിപുലമായ കണക്റ്റിവിറ്റി പദ്ധതികൾ രാജസ്ഥാനെ നിക്ഷേപത്തിനുള്ള മികച്ച സ്ഥലമാക്കി മാറ്റുന്നു, പ്രത്യേകിച്ച് ഉൾനാടൻ തുറമുഖങ്ങളിലും, ലോജിസ്റ്റിക്സ് മേഖലകളിലും. ഏകദേശം രണ്ട് ഡസൻ സെക്ടർ-നിർദ്ദിഷ്ട വ്യാവസായിക പാർക്കുകൾക്കൊപ്പം ഞങ്ങൾ ഇവിടെ മൾട്ടി-മോഡൽ ലോജിസ്റ്റിക്സ് പാർക്കുകൾ വികസിപ്പിക്കുന്നു. കൂടാതെ, രണ്ട് എയർ കാർഗോ കോംപ്ലക്സുകൾ സ്ഥാപിച്ചിട്ടുണ്ട്, ഇത് രാജസ്ഥാനിൽ വ്യവസായങ്ങൾ സ്ഥാപിക്കുന്നതും വ്യാവസായിക കണക്റ്റിവിറ്റി വർദ്ധിപ്പിക്കുന്നതും എളുപ്പമാക്കുന്നു.

സുഹൃത്തുക്കളേ,

ഭാരതത്തിന്റെ സമ്പന്നമായ ഭാവിക്ക് വിനോദ സഞ്ചാരം വളരെയധികം സാധ്യതകൾ നൽകുന്നു. പ്രകൃതി, സംസ്കാരം, സാഹസികത, സമ്മേളനങ്ങൾ, ഡെസ്റ്റിനേഷൻ വിവാഹങ്ങൾ, പൈതൃക ടൂറിസം എന്നിവയിൽ പരിധിയില്ലാത്ത അവസരങ്ങൾ ഭാരതം വാഗ്ദാനം ചെയ്യുന്നു. ഭാരതത്തിന്റെ ടൂറിസം ഭൂപടത്തിൽ രാജസ്ഥാൻ ഒരു പ്രധാന കേന്ദ്രബിന്ദുവാണ്. സമ്പന്നമായ ചരിത്രം, മനോഹരമായ പൈതൃകം, വിശാലമായ മരുഭൂമികൾ, മനോഹരമായ തടാകങ്ങൾ എന്നിവയുടെ കേന്ദ്രമാണിത്. അതിന്റെ സംഗീതം,രുചി വൈവിധ്യം, പാരമ്പര്യങ്ങൾ എന്നിവ താരതമ്യം ചെയ്യാൻ കഴിയാത്തതാണ്. ടൂറിസം, യാത്ര, ഹോസ്പിറ്റാലിറ്റി മേഖല എന്നിവയ്ക്ക് ആവശ്യമായതെല്ലാം രാജസ്ഥാനിൽ കാണാം. വിവാഹങ്ങൾ പോലുള്ള ജീവിതത്തിലെ പ്രധാന പരിപാടികൾ യഥാർത്ഥത്തിൽ അവിസ്മരണീയമാക്കുന്നതിന് ലോകത്തിലെ ഏറ്റവും പ്രിയപ്പെട്ട സ്ഥലങ്ങളിലൊന്നാണ് രാജസ്ഥാൻ. വന്യജീവി ടൂറിസത്തിനും സംസ്ഥാനം വലിയ സാധ്യതകൾ നൽകുന്നു, രൺതംബോർ, സരിസ്ക, മുകുന്ദ്ര കുന്നുകൾ, കിയോലാഡിയോ ദേശീയോദ്യാനം തുടങ്ങിയ സ്ഥലങ്ങൾ വന്യജീവി പ്രേമികളുടെ സങ്കേതങ്ങളായി വർത്തിക്കുന്നു. രാജസ്ഥാൻ 
​ഗവണ്മെൻ്റ് അതിന്റെ വിനോദസഞ്ചാര കേന്ദ്രങ്ങളിലേക്കും പൈതൃക കേന്ദ്രങ്ങളിലേക്കും കണക്റ്റിവിറ്റി വർദ്ധിപ്പിക്കുന്നത് കാണുന്നതിൽ എനിക്ക് സന്തോഷമുണ്ട്. വിവിധ തീം സർക്യൂട്ടുകളുമായി ബന്ധിപ്പിച്ച പദ്ധതികളും ഇന്ത്യൻ ​ഗവണ്മെൻ്റ് അവതരിപ്പിച്ചിട്ടുണ്ട്. 2004 നും 2014 നും ഇടയിൽ ഏകദേശം അഞ്ച് കോടി വിദേശ വിനോദസഞ്ചാരികൾ ഭാരതം സന്ദർശിച്ചു.2014 മുതൽ 2024 വരെ, കൊറോണ മഹാമാരി ഏകദേശം മൂന്നോ നാലോ വർഷങ്ങളെ ബാധിച്ചിട്ടും, ഏഴ് കോടിയിലധികം വിദേശ വിനോദസഞ്ചാരികൾ ഇവിടെ സന്ദർശിച്ചു. കൊറോണ മഹാമാരി സമയത്ത് ടൂറിസം സ്തംഭിച്ചിരുന്നു. എന്നിരുന്നാലും, ഭാരതം സന്ദർശിക്കുന്ന വിനോദസഞ്ചാരികളുടെ എണ്ണത്തിൽ ശ്രദ്ധേയമായ വളർച്ചയുണ്ടായി. നിരവധി രാജ്യങ്ങളിൽ നിന്നുള്ള വിനോദസഞ്ചാരികൾക്ക് ഭാരതം ഇ-വിസ സൗകര്യങ്ങൾ നൽകുന്നത് അന്താരാഷ്ട്ര സന്ദർശകർക്ക് വളരെയധികം ഗുണം ചെയ്തു, ഇത് അവരുടെ യാത്രാനുഭവം കൂടുതൽ സൗകര്യപ്രദവും തടസ്സരഹിതവുമാക്കുന്നു. ഭാരതത്തിലെ ആഭ്യന്തര ടൂറിസവും പുതിയ ഉയരങ്ങളിലെത്തുന്നു. ഉഡാൻ (ഉഡേ ദേശ് കാ ആം നാഗരിക്), വന്ദേ ഭാരത് ട്രെയിനുകൾ,പ്രസാദ് പദ്ധതി (പിൽ​ഗ്രിം റെജുവനേഷൻ ആൻഡ്
സ്പിരിച്വൽ ഓഗ്മെന്റേഷൻ ഡ്രൈവ്) പരിപാടി തുടങ്ങിയ പദ്ധതികൾ രാജസ്ഥാന് വളരെയധികം ഗുണം ചെയ്യുന്നു. വൈബ്രന്റ് വില്ലേജുകൾ പോലുള്ള പരിപാടികൾ സംസ്ഥാനത്തിന്റെ വികസനത്തിന് കൂടുതൽ സഹായകമാകുന്നു. "ഇന്ത്യയിൽ വിവാഹം" നടത്താൻ ഞാൻ പൗരന്മാരോട് ആഹ്വാനം ചെയ്തിട്ടുണ്ട്, ഈ സംരംഭത്തിൽ നിന്ന് രാജസ്ഥാൻ ഗണ്യമായ നേട്ടം കൈവരിക്കും. രാജസ്ഥാനിൽ പൈതൃക ടൂറിസം, സിനിമാ ടൂറിസം, ഇക്കോ ടൂറിസം, ഗ്രാമീണ ടൂറിസം, അതിർത്തി പ്രദേശ ടൂറിസം എന്നിവ വികസിപ്പിക്കുന്നതിന് വിപുലമായ അവസരങ്ങളുണ്ട്. ഈ മേഖലകളിലെ നിങ്ങളുടെ നിക്ഷേപം രാജസ്ഥാന്റെ ടൂറിസം വ്യവസായത്തെ ശക്തിപ്പെടുത്തുക മാത്രമല്ല, നിങ്ങളുടെ ബിസിനസിന് ശക്തമായ വളർച്ച ഉറപ്പാക്കുകയും ചെയ്യും.

സുഹൃത്തുക്കളേ,

ആഗോള വിതരണ, മൂല്യ ശൃംഖലകളുമായി ബന്ധപ്പെട്ട വെല്ലുവിളികളെക്കുറിച്ച് നിങ്ങൾക്കെല്ലാവർക്കും പരിചിതമാണ്. ഇന്ന്, വലിയ പ്രതിസന്ധികൾക്കിടയിലും ശക്തമായി തുടരുകയും തടസ്സങ്ങളില്ലാതെ പ്രവർത്തിക്കുകയും ചെയ്യുന്ന ഒരു സമ്പദ്‌വ്യവസ്ഥയാണ് ലോകത്തിന് ആവശ്യം. ഇതിനായി, ഭാരതത്തിൽ വിശാലമായ ഒരു ഉൽ‌പാദന അടിത്തറ സ്ഥാപിക്കേണ്ടത് അത്യാവശ്യമാണ്. ഇത് ഭാരതത്തിന് മാത്രമല്ല, ആഗോള സമ്പദ്‌വ്യവസ്ഥയ്ക്കും പ്രധാനമാണ്. ഈ ഉത്തരവാദിത്തം തിരിച്ചറിഞ്ഞുകൊണ്ട്, ഗണ്യമായ തോതിൽ ഉൽ‌പാദനത്തിൽ സ്വയംപര്യാപ്തത കൈവരിക്കാൻ ഭാരതം പ്രതിജ്ഞാബദ്ധമാണ്. 'മെയ്ക്ക് ഇൻ ഇന്ത്യ' പരിപാടിയുടെ കീഴിൽ, കുറഞ്ഞ ചെലവിലുള്ള ഉൽ‌പാദനത്തിന് ഭാരതം ഊന്നൽ നൽകുന്നു. രാജ്യത്തെ പെട്രോളിയം ഉൽ‌പ്പന്നങ്ങൾ, മരുന്നുകൾ, വാക്സിനുകൾ, ഇലക്ട്രോണിക് ഉൽപ്പന്നങ്ങൾ എന്നിവ ലോകത്തിന് പ്രയോജനം ചെയ്യുന്ന റെക്കോർഡ് തകർക്കുന്ന ഉൽ‌പാദന ശ്രമങ്ങളുടെ ഉദാഹരണങ്ങളാണ്. കഴിഞ്ഞ വർഷം ഏകദേശം 84,000 കോടി രൂപയുടെ കയറ്റുമതിയോടെ രാജസ്ഥാൻ തന്നെ ഈ ശ്രമത്തിന് ഗണ്യമായ സംഭാവന നൽകി. 84,000 കോടി രൂപ! ഇതിൽ എഞ്ചിനീയറിംഗ് ഉൽപ്പന്നങ്ങൾ, രത്നങ്ങൾ, ആഭരണങ്ങൾ, തുണിത്തരങ്ങൾ, കരകൗശല വസ്തുക്കൾ, കാർഷിക-ഭക്ഷ്യ ഉൽപ്പന്നങ്ങൾ എന്നിവ ഉൾപ്പെടുന്നു.

സുഹൃത്തുക്കളേ,

ഭാരതത്തിലെ ഉൽപ്പാദനം വർദ്ധിപ്പിക്കുന്നതിൽ ഉത്പാദന ബന്ധിത ആനുകൂല്യ (പിഎൽഐ) പദ്ധതി കൂടുതൽ പ്രധാന പങ്ക് വഹിക്കുന്നു. ഇലക്ട്രോണിക്സ്, സ്പെഷ്യാലിറ്റി സ്റ്റീൽ, ഓട്ടോമൊബൈൽസ്, ഓട്ടോ ഘടകങ്ങൾ, സോളാർ ഫോട്ടോവോൾട്ടെയ്‌ക്‌സ്, ഫാർമസ്യൂട്ടിക്കൽ മരുന്നുകൾ തുടങ്ങിയ മേഖലകളിൽ ശ്രദ്ധേയമായ അഭിനിവേശം ഉണ്ടായിട്ടുണ്ട്. പിഎൽഐ പദ്ധതിയുടെ ഫലമായി, 1.25 ലക്ഷം കോടി രൂപയുടെ നിക്ഷേപങ്ങൾ വന്നു, ഏകദേശം 11 ലക്ഷം കോടി രൂപയുടെ ഉൽപ്പന്നങ്ങൾ നിർമ്മിക്കപ്പെട്ടു, കയറ്റുമതി 4 ലക്ഷം കോടി രൂപ വർദ്ധിച്ചു. മാത്രമല്ല, ദശലക്ഷക്കണക്കിന് യുവജനങ്ങൾക്ക് തൊഴിലവസരങ്ങൾ ലഭിച്ചു. രാജസ്ഥാനിൽ, ഓട്ടോമോട്ടീവ്, ഓട്ടോ-ഘടക വ്യവസായങ്ങൾക്ക് ശക്തമായ അടിത്തറ ഇതിനകം സ്ഥാപിക്കപ്പെട്ടിട്ടുണ്ട്. ഇലക്ട്രിക് വാഹന നിർമ്മാണത്തിന് സംസ്ഥാനത്തിന് വളരെയധികം സാധ്യതകളുണ്ട്, കൂടാതെ ഇലക്ട്രോണിക്സ് നിർമ്മാണത്തിന് ആവശ്യമായ അടിസ്ഥാന സൗകര്യങ്ങളും എളുപ്പത്തിൽ ലഭ്യവുമാണ്. രാജസ്ഥാന്റെ ഉൽപ്പാദന സാധ്യതകൾ പര്യവേക്ഷണം ചെയ്യാനും അവസരങ്ങൾ പ്രയോജനപ്പെടുത്താനും ഞാൻ എല്ലാ നിക്ഷേപകരോടും അഭ്യർത്ഥിക്കുന്നു.

സുഹൃത്തുക്കളേ,

റൈസിംഗ് രാജസ്ഥാന്റെ പ്രധാന ശക്തികളിൽ ഒന്ന് അതിന്റെ എംഎസ്എംഇ മേഖലയാണ്. എംഎസ്എംഇകളുടെ കാര്യത്തിൽ ഇന്ത്യയിലെ മികച്ച അഞ്ച് സംസ്ഥാനങ്ങളിൽ രാജസ്ഥാൻ ഇടം നേടിയിട്ടുണ്ട്. ഈ ഉച്ചകോടിയിൽ എംഎസ്എംഇകളെക്കുറിച്ചുള്ള ഒരു സമർപ്പിത കോൺക്ലേവും നടക്കും. 50 ലക്ഷത്തിലധികം ആളുകൾ ജോലി ചെയ്യുന്ന 27 ലക്ഷത്തിലധികം ചെറുകിട, സൂക്ഷ്മ സംരംഭങ്ങളുള്ള രാജസ്ഥാനിലെ എംഎസ്എംഇകൾക്ക് സംസ്ഥാനത്തിന്റെ ഭാഗധേയം മാറ്റാൻ കഴിവുണ്ട്. അധികാരത്തിൽ വന്നയുടനെ രാജസ്ഥാനിലെ പുതിയ ​ഗവണ്മെൻ്റ് പുതിയ എംഎസ്എംഇ നയം അവതരിപ്പിച്ചതിൽ എനിക്ക് സന്തോഷമുണ്ട്. ഇന്ത്യൻ ​ഗവണ്മെൻ്റ് അതിന്റെ നയങ്ങളിലൂടെയും സംരംഭങ്ങളിലൂടെയും എംഎസ്എംഇകളെ സ്ഥിരമായി ശാക്തീകരിക്കുന്നു. ഭാരതത്തിന്റെ എംഎസ്എംഇകൾ ആഭ്യന്തര സമ്പദ്‌വ്യവസ്ഥയെ ശക്തിപ്പെടുത്തുക മാത്രമല്ല, ആഗോള വിതരണ, മൂല്യ ശൃംഖലകളിലും നിർണായക പങ്ക് വഹിക്കുന്നു. കൊറോണ മഹാമാരി സമയത്ത് ആഗോള മരുന്ന് വിതരണ ശൃംഖലയിൽ തടസ്സങ്ങൾ ഉയർന്നുവന്നപ്പോൾ ഞങ്ങൾ ഇത് കണ്ടു, ലോകത്തെ സഹായിക്കാൻ ഭാരതത്തിന്റെ ശക്തമായ ഔഷധ വ്യവസായ മേഖല മുന്നിട്ടിറങ്ങി. ഔഷധ മേഖലയിൽ ഭാരതം ശക്തമായ ഒരു അടിത്തറ കെട്ടിപ്പടുത്തതിനാലാണ് ഇത് സാധ്യമായത്. അതുപോലെ, എംഎസ്എംഇകൾ നിർണായക പങ്ക് വഹിക്കാൻ കഴിയുന്ന മറ്റ് വിവിധ ഉൽപ്പന്നങ്ങളുടെ നിർമ്മാണത്തിനായി ശക്തമായ ഒരു അടിത്തറ സ്ഥാപിക്കുക എന്നതാണ് ഞങ്ങളുടെ ലക്ഷ്യം.

സുഹൃത്തുക്കളേ,

എം‌എസ്‌എം‌ഇകൾക്ക് കൂടുതൽ വളർച്ചാ അവസരങ്ങൾ നൽകുന്നതിനായി നമ്മുടെ ​ഗവണ്മെൻ്റ് മാനദണ്ഡങ്ങൾ പുനർനിർവചിച്ചു. ഏകദേശം അഞ്ച് കോടി എം‌എസ്‌എം‌ഇകളെ ഔപചാരിക സമ്പദ്‌വ്യവസ്ഥയിൽ സംയോജിപ്പിച്ച് വായ്പ ലഭിക്കുന്നത് ലളിതമാക്കി. ചെറുകിട വ്യവസായങ്ങൾക്ക് ഏകദേശം 7 ലക്ഷം കോടി രൂപയുടെ പിന്തുണ നൽകിയ ഒരു ക്രെഡിറ്റ് ഗ്യാരണ്ടി ലിങ്ക്ഡ് സ്കീമും ഞങ്ങൾ അവതരിപ്പിച്ചു. കഴിഞ്ഞ ദശകത്തിൽ, എം‌എസ്‌എം‌ഇകളിലേക്കുള്ള വായ്പാ പ്രവാഹം ഇരട്ടിയിലധികമായി. 2014 ൽ ഇത് ഏകദേശം 10 ലക്ഷം കോടി രൂപയായിരുന്നു, എന്നാൽ ഇന്ന് അത് 22 ലക്ഷം കോടി രൂപ കവിഞ്ഞു. ഈ വളർച്ചയുടെ ഒരു പ്രധാന ഗുണഭോക്താവാണ് രാജസ്ഥാൻ. എം‌എസ്‌എം‌ഇകളുടെ വർദ്ധിച്ചുവരുന്ന ശക്തി രാജസ്ഥാന്റെ വികസനത്തെ പുതിയ ഉയരങ്ങളിലേക്ക് എത്തിക്കും.

സുഹൃത്തുക്കളേ,

‘ആത്മനിർഭർ ഭാരത്’ (സ്വയം പര്യാപ്ത ഇന്ത്യ) എന്ന ലക്ഷ്യത്തിലേക്കുള്ള ഒരു പുതിയ യാത്രയിലേക്ക് നമ്മൾ പ്രവേശിച്ചിരിക്കുന്നു. ഈ ‘ആത്മനിർഭർ ഭാരത്’ ദൗത്യത്തിന് ആഗോള അഭിലാഷങ്ങളും ആഗോള സ്വാധീനവുമുണ്ട്. ​ഗവണ്മെൻ്റ് തലത്തിൽ, ഞങ്ങൾ ഒരു സമ്പൂർണ്ണ ഗവണ്മെൻ്റ് സമീപനത്തോടെ മുന്നോട്ട് പോകുകയാണ്. വ്യാവസായിക വളർച്ചയ്ക്കായി, എല്ലാ മേഖലകളെയും എല്ലാ ഘടകങ്ങളെയും ഞങ്ങൾ ഏകകണ്ഠമായി പ്രോത്സാഹിപ്പിക്കുന്നു. ‘സബ്ക പ്രയാസ്’ (എല്ലാവരുടെയും കൂട്ടായ ശ്രമം) എന്ന ഈ മനോഭാവം ഒരു ‘വികസിത് രാജസ്ഥാനും’ (വികസിത രാജസ്ഥാൻ)  ‘വികസിത ഭാരതവും’ (വികസിത ഇന്ത്യ) കെട്ടിപ്പടുക്കുമെന്ന് ഞാൻ ഉറച്ചു വിശ്വസിക്കുന്നു.

സുഹൃത്തുക്കളേ,

ഈ ഉച്ചകോടിയിൽ രാജ്യത്തിനകത്ത് നിന്നും ലോകമെമ്പാടുമുള്ള പ്രതിനിധികളെ സ്വാഗതം ചെയ്തിട്ടുണ്ട്. നിങ്ങളിൽ പലർക്കും, ഇത് ഭാരതത്തിലേക്കോ രാജസ്ഥാനിലേക്കോ ഉള്ള നിങ്ങളുടെ ആദ്യ സന്ദർശനമായിരിക്കാം. നിങ്ങൾ നാട്ടിലേക്ക് മടങ്ങുന്നതിന് മുമ്പ്, രാജസ്ഥാനും ഭാരതവും പര്യവേക്ഷണം ചെയ്യാൻ ഞാൻ നിങ്ങളെ പ്രോത്സാഹിപ്പിക്കുന്നു. വർണ്ണാഭമായ വിപണികൾ, ജനങ്ങളുടെ ചടുലമായ ചൈതന്യം, ഈ നാടിന്റെ സമാനതകളില്ലാത്ത മനോഹാരിത എന്നിവ അനുഭവിക്കുക - ഇത് നിങ്ങൾ എന്നേക്കും വിലമതിക്കുന്ന ഒരു അനുഭവമായിരിക്കും. ഒരിക്കൽ കൂടി, എല്ലാ നിക്ഷേപകർക്കും എന്റെ ആശംസകൾ നേരുന്നു, ഉയരുന്ന രാജസ്ഥാൻ എന്ന ദർശനത്തോടുള്ള അവരുടെ പ്രതിബദ്ധതയെ അഭിനന്ദിക്കുന്നു.

നന്ദി!

***