नवी दिल्ली, 14 फेब्रुवारी 2025

उत्तर प्रदेशमधल्या वाराणसी येथे 15 ते 24 फेब्रुवारी 2025 या कालावधीत काशी तमीळ संगमम 3.0 चे आयोजन केले जाणार आहे. शिक्षण मंत्रालयाने विविध मंत्रालये आणि उत्तर प्रदेश सरकारच्या सहकार्याने हा प्रतिष्ठेचा सांस्कृतिक उपक्रम आयोजित केला आहे. तामिळनाडू आणि काशी यांच्यातील प्राचीन संस्कृतीचे बंध साजरे करणे आणि ते दृढ करणे, हा या उपक्रमाचा उद्देश आहे.

यंदा हा उपक्रम अधिक महत्त्वपूर्ण आहे, कारण सहभागींना प्रथमच प्रयागराजमध्ये महाकुंभ पाहण्याची आणि नव्या राम मंदिराला भेट देण्याची संधी मिळणार आहे. या 10- दिवसांच्या कार्यक्रमाची सांगता 24 फेब्रुवारी 2025 रोजी होईल.

या वर्षी, सरकारने पाच श्रेणी/गटांमध्ये तामिळनाडूतील सुमारे 1000 प्रतिनिधींना आमंत्रित करण्याचा निर्णय घेतला आहे:

1. विद्यार्थी, शिक्षक आणि लेखक
2. शेतकरी आणि कारागीर (विश्वकर्मा श्रेणी)
3. व्यावसायिक आणि लघु उद्योजक
4. महिला बचत गट, मुद्रा कर्ज लाभार्थी,दक्षिण भारत हिंदी प्रचार सभा  प्रचारक
5. स्टार्ट-अप, नवोन्मेष, शिक्षण-तंत्रज्ञान,संशोधन क्षेत्रातल्या व्यक्ती

यंदा काशी आणि तामिळनाडूमधील बंध अधिक दृढ करण्यासाठी विविध केंद्रीय विद्यापीठांमध्ये शिक्षण घेणाऱ्या  तमिळ वंशाच्या सुमारे 200 विद्यार्थ्यांचा एक अतिरिक्त गट या कार्यक्रमाचा भाग असेल.या वर्षी सर्व श्रेणींमध्ये युवा वर्गाच्या सहभागाला प्रोत्साहन दिले जाईल.

S.Kane/S.Kakade/P.Malandkar

सोशल मिडियावर आम्हाला फॉलो करा:@PIBMumbai    /PIBMumbai    /pibmumbai  pibmumbai[at]gmail[dot]com  /PIBMumbai    /pibmumbai