U Myntri Kam Pohiing bad Cooperation jong ka sorkar pdeng, Amit shah u la pyniaid ia ki jingialang ha New Delhi ban peit bniah ia ka jingshngain ha Jammu and Kashmir. Kine ki jingialang kidei ka jingbteng ia ki jingialang bad ka kynhun shipai jong ka ri bad ki pulit ka J&K ba la pynlong ha ka 4 bad 5 tarik Rymphang 2025. U Union Home Secretary, Director (IB), Director Generals of Central Reserve Police Force (CRPF) bad Border Security Force (BSF) bad kiwei ki ophisar ki la iadonlang ha ki jingialang.

U Myntri Kam Pohiing jong ka sorkar pdeng u la ong ba hapoh ka jingialam jong u Myntri Rangbah duh Narendra Modi, ka sorkar pdeng ka kut jingmut na ka bynta ka ‘Jammu & Kashmir kaba lait na ki kam pyntriem’. U la ban jur ia ka bynta jong ki shipai ban kot sha kane ka thong ban pyllait ia ka J&K na ki kam pyntriem. U Myntri Kam Pohiing u la bthah ia ki BSF ban pynthikna ka jingbym don ki briew kiba rung beain na ki jaka khappud da kaba pynthikna ia ka jingpeitngor kaba khlain, ka jingpynkhlain ia ka jingpeit ia ki jaka khappud bad ka jingpyndonkam ia ki teknoloji ban peit bniah bad pahara ia ka thain khappud. 

U Amit Shah u la bthah ia ka CRPF ban bteng ka jingiatreilang bad ka kynhun shipai jong ka ri bad ki pulit jong ka J&K. U la peit bniah ia ka rukom pynkhreh kam ha ka por tlang jong ka CRPF bad u la bthah ban pynthikna ba kam don kano kano ka jingduna ha ka jingpeit ia ka jaka. U Shah u la bthah ban phaikhmat sha ka thain Jammu bad pynskhem ia ki jaka ba kham kynjang.

U Myntri Kam Pohiing u la peit bniah ruh ia ka rynsan lum jingtip  ba treikam ha Jammu and Kashmir bad u la bthah ia ki ban kyntiew ka jaka ba peit bad ban lum ia ka jingtip kaba biang. U la ban jur ia ka jingkongsan ka teknoloji ha ka jinglum ia ki jingtip. U Shah u la bynrap ba ka jingpeitngor ia ka jingbei tyngka ha ki kam pyntriem, jingtehlakam ia ki kam pyntreim kaba iadei bad ki kam khaii ia ki drok bad ka jingpynkhyllem ia baroh kawei ka rynsan jong ka kam pyntriem ha Jammu & Kashmir kadei ka jingphaikhmat ba kyrpang jong ka sorkar Modi. U la ong ba la shim ia ki sienjam ba khlain na ka bynta ka ‘Zero Terror Plan’ ha Jammu and Kashmir.

U Myntri Kam Pohiing u la bthah ruh ban phaikhmat halor ka jingialeh pyrshah ia ka jingpynsaphriang ia ki khubor thok da ki kynhun kiba trei pyrshah ia ka ri khnang ba kan don ka jingsngewthuh ia ka jingshisha ha ki paidbah. U la bthah ban bteng ka jingiatreilang bad ki kynhun bad lamkhmat ban pdiang ia ka teknoloji bad kyntiew bad ka jingioh shuh shuh ia ki jingtip.

U Amit Shah u la bthah ia baroh ki kynhun pahara ban long kiba husiar bad bteng ban iatreilang ban pynduh ia ki kam pyntriem ha Jammu and Kashmir. U la pynthikna ba yn pynbiang baroh ki jingdonkam na ka bynta kane ka kam.

*****