പരിസ്ഥിതി, വനം മന്ത്രാലയം
മഹാകുംഭമേള 2025: പരിസ്ഥിതി സൗഹൃദ ജീവിതശൈലിയെക്കുറിച്ച് അവബോധം പകർന്ന് പ്രയാഗ്‌രാജിൽ പരിസ്ഥിതി - വനം - കാലാവസ്ഥാ വ്യതിയാന മന്ത്രാലത്തിന്റെ ‘ലൈഫ്’ പ്രദർശനമണ്ഡപം
ഗംഗാ ഡോൾഫിന്റെ ഭൗമശാസ്ത്രപരമായ വിഭജനവും പാരിസ്ഥിതിക - പൗരാണിക പ്രാധാന്യവും എടുത്തുകാട്ടി പ്രൊജക്റ്റ് ഡോൾഫിൻ പ്രദർശനം
Posted On:
27 JAN 2025 3:35PM by PIB Thiruvananthpuram
2025-ലെ മഹാകുംഭമേള സന്ദർശിക്കാൻ പ്രയാഗ്‌രാജിലെത്തുന്നവരിൽ പരിസ്ഥിതി സൗഹൃദ ജീവിതശൈലിയെക്കുറിച്ച് അവബോധം സൃഷ്ടിക്കുന്നതിന് കേന്ദ്ര പരിസ്ഥിതി - വനം - കാലാവസ്ഥാ വ്യതിയാന മന്ത്രാലയം 2025 ജനുവരി 13 മുതൽ 15 വരെ പ്രദർശനമണ്ഡപമൊരുക്കി. മഹാകുംഭമേളയിൽ പങ്കെടുക്കുന്നവർക്കിടയിൽ സുസ്ഥിര ജീവിതശൈലി പ്രോത്സാഹിപ്പിക്കുന്ന നിരവധി സാങ്കേതികവിദ്യകൾ ഈ ഡിജിറ്റൽ പവലിയനിൽ സംവേദനാത്മകമായി പ്രദർശിപ്പിച്ചു.
മഹാകുംഭമേളയിലെ ‘ലൈഫ്’ (പരിസ്ഥിതിക്ക് വേണ്ടിയുള്ള ജീവിതശൈലി) പവലിയൻ ലൈഫ് ദൗത്യത്തിൻ്റെ സമഗ്ര ലക്ഷ്യങ്ങളുമായി പൂർണ്ണമായും ചേർന്നുനിന്നുകൊണ്ട് ഒരു സുസ്ഥിര ജീവിതശൈലി സ്വീകരിക്കുന്നതിനുള്ള ഉൾക്കാഴ്ചകൾ സന്ദർശകർക്ക് നൽകി. പവലിയനിലെത്തിയവര്‍ക്ക് വെർച്വൽ റിയാലിറ്റി സംവിധാനം ഉപയോഗിച്ചുള്ള സൈക്കിളോട്ടം, നിർമിതബുദ്ധി അധിഷ്ഠിത സെൽഫി തുടങ്ങിയ ആധുനിക സാങ്കേതികവിദ്യകൾ ആസ്വദിക്കാനും അവസരം ലഭിച്ചു. പവലിയനിൽ സ്ഥാപിച്ച സെൽഫി പ്രതിജ്ഞാ കിയോസ്‌കിൽ സുസ്ഥിര ജീവിതശൈലി പിന്തുടരുന്നതിന് സന്ദർശകർ പ്രതിജ്ഞയെടുത്തു.
ഇതേ പവലിയനിലൊരുക്കിയ പ്രൊജക്ട് ഡോൾഫിൻ പ്രദർശനമായിരുന്നു സന്ദർശകര്‍ക്ക് മറ്റൊരു ആകർഷണം. ഗംഗാ നദീ ഡോൾഫിന്റെ ഭൗമശാസ്ത്രപരമായ വിഭജനവും പാരിസ്ഥിതിക - പൗരാണിക പ്രാധാന്യവും എടുത്തുകാണിക്കുന്ന പോസ്റ്ററുകളാണ് പ്രദര്‍ശനത്തിലുൾപ്പെടുത്തിയത്. നദികളിലെ ഡോൾഫിനുകളെയും അവയുടെ ആവാസവ്യവസ്ഥയെയും കുറിച്ച് അവബോധം പകരുന്നതിനായി രൂപകൽപ്പന ചെയ്ത സംവേദനാത്മക മത്സരങ്ങളിലും സന്ദർശകർ പങ്കെടുത്തു. യുവ വായനക്കാർക്കായി പ്രത്യേകം സജ്ജീകരിച്ച ദ്വിഭാഷാ ഹാസ്യങ്ങൾക്കും അഡ്വഞ്ചേഴ്സ് ഓഫ് സൂപ്പർ ഡോളിയ്ക്കുമൊപ്പം ഡോൾഫിനുകളുടെ ആവാസ വ്യവസ്ഥകളെയും നിലവിലെ സംരക്ഷണ ശ്രമങ്ങളെയും കുറിച്ച് ആഴമേറിയ ഉൾക്കാഴ്ചകൾ നൽകുന്ന വീഡിയോ പ്രദർശനവും ഒരുക്കിയിരുന്നു. പ്രദർശനമണ്ഡപത്തിൻ്റെ പ്രവേശന കവാടത്തിൽ ആകർഷണീയമായ രണ്ട് സെൽഫി സ്റ്റാൻഡുകൾ സന്ദർശകരെ വരവേറ്റു.
2025-ലെ മഹാകുംഭമേളയുടെ ഭാഗമായി പ്രയാഗ്‌രാജിൽ ഒരുക്കിയ പ്രോജക്ട് ഡോൾഫിൻ പ്രദർശനം നദീതീര ആവാസവ്യവസ്ഥയുടെയും അതിലെ പ്രധാന ജീവിവംശമായ ഗംഗാ നദീ ഡോൾഫിൻ്റെയും സംരക്ഷണത്തിൻ്റെ പ്രാധാന്യത്തെക്കുറിച്ച് അവബോധം പകരുന്നതിനുള്ള ആകർഷകമായ ഒരു വേദിയൊരുക്കി.
*****
(Release ID: 2096890)
Visitor Counter : 12