ആഭ്യന്തരകാര്യ മന്ത്രാലയം
ഹൈദരാബാദിലെ ഇന്ത്യൻ നാഷണൽ സെന്റർ ഫോർ ഓഷ്യൻ ഇൻഫർമേഷൻ സർവീസസ് (INCOIS) സുഭാഷ് ചന്ദ്രബോസ് ദുരന്തനിവാരണ പുരസ്‌കാരം-2025 ന് തിരഞ്ഞെടുക്കപ്പെട്ടു
ദുരന്തനിവാരണ മേഖലയിൽ വ്യക്തികളും സംഘടനകളും നൽകുന്ന വിലമതിക്കാനാവാത്ത സംഭാവനകളെയും നിസ്വാർത്ഥ സേവനത്തെയും അംഗീകരിക്കുന്നതിനും ആദരിക്കുന്നതിനുമായി പ്രധാനമന്ത്രി ശ്രീ നരേന്ദ്ര മോദിയുടെ നേതൃത്വത്തിൽ ഇന്ത്യൻ ഗവൺമെന്റ് സുഭാഷ് ചന്ദ്രബോസ് ആപ്ഡ പ്രബന്ധൻ പുരസ്‌കാരം ഏർപ്പെടുത്തി.
കേന്ദ്ര ആഭ്യന്തര മന്ത്രി ശ്രീ അമിത് ഷായുടെ മാർഗ്ഗനിർദ്ദേശപ്രകാരം, പ്രകൃതി ദുരന്തങ്ങൾക്കിടയിലെ മരണങ്ങൾ ഗണ്യമായി കുറയ്ക്കുന്നതിന് കാരണമായ ദുരന്ത നിവാരണ രീതികൾ, തയ്യാറെടുപ്പ്, ലഘൂകരണം, പ്രതികരണ സംവിധാനങ്ങൾ എന്നിവ രാജ്യം ഗണ്യമായി മെച്ചപ്പെടുത്തി.
Posted On:
23 JAN 2025 9:18AM by PIB Thiruvananthpuram
ന്യൂ ഡൽഹി, 23 ജനുവരി 2025
ദുരന്തനിവാരണത്തിലെ മികച്ച പ്രവർത്തനത്തിന് സ്ഥാപന വിഭാഗത്തിൽ സുഭാഷ് ചന്ദ്രബോസ് ദുരന്തനിവാരണ പുരസ്‌കാരം (ആപതാ പ്രബന്ധന പുരസ്‌കാർ) 2025ന് ഇന്ത്യൻ നാഷണൽ സെന്റർ ഫോർ ഓഷ്യൻ ഇൻഫർമേഷൻ സർവീസസ് (INCOIS) തിരഞ്ഞെടുക്കപ്പെട്ടു.
ദുരന്തനിവാരണ മേഖലയിൽ ഇന്ത്യയിലെ വ്യക്തികളും സംഘടനകളും നൽകുന്ന വിലമതിക്കാനാവാത്ത സംഭാവനകളെയും നിസ്വാർത്ഥ സേവനത്തെയും അംഗീകരിക്കുന്നതിനും ആദരിക്കുന്നതിനുമായി പ്രധാനമന്ത്രി ശ്രീ നരേന്ദ്ര മോദിയുടെ നേതൃത്വത്തിൽ ഇന്ത്യാ ഗവൺമെന്റ് സുഭാഷ് ചന്ദ്രബോസ് ആപ്ത പ്രബന്ധൻ പുരസ്‌കാർ എന്നറിയപ്പെടുന്ന വാർഷിക അവാർഡ് ഏർപ്പെടുത്തിയിട്ടുണ്ട്. നേതാജി സുഭാഷ് ചന്ദ്രബോസിന്റെ ജന്മദിനമായ ജനുവരി 23-ന് എല്ലാ വർഷവും അവാർഡ് പ്രഖ്യാപിക്കപ്പെടുന്നു. ഒരു സ്ഥാപനത്തിന് 51 ലക്ഷം രൂപയും സർട്ടിഫിക്കറ്റും ഒരു വ്യക്തിക്ക് 5 ലക്ഷം രൂപയും സർട്ടിഫിക്കറ്റും ഈ അവാർഡ് നൽകുന്നു.
കേന്ദ്ര ആഭ്യന്തര മന്ത്രിയും സഹകരണ മന്ത്രിയുമായ ശ്രീ അമിത് ഷായുടെ മാർഗനിർദേശപ്രകാരം, പ്രകൃതിദുരന്തങ്ങൾക്കിടയിലെ മരണസംഖ്യ ഗണ്യമായി കുറയ്ക്കാൻ രാജ്യം ദുരന്തനിവാരണ രീതികൾ, തയ്യാറെടുപ്പ്, ലഘൂകരണം, പ്രതികരണ സംവിധാനങ്ങൾ എന്നിവ ഗണ്യമായി മെച്ചപ്പെടുത്തിയിട്ടുണ്ട്.
ഈ വർഷത്തെ അവാർഡിനായി, 2024 ജൂലൈ 1 മുതൽ നാമനിർദ്ദേശങ്ങൾ ക്ഷണിച്ചു. 2025 ലെ അവാർഡ് പദ്ധതിക്ക് അച്ചടി, ഇലക്ട്രോണിക്, സോഷ്യൽ മീഡിയ വഴി വ്യാപകമായ പ്രചാരണം നൽകി. അവാർഡ് പദ്ധതിക്ക് മറുപടിയായി, സ്ഥാപനങ്ങളിൽ നിന്നും വ്യക്തികളിൽ നിന്നും 297 നാമനിർദ്ദേശങ്ങൾ ലഭിച്ചു.
പുരസ്‌കാര ജേതാവിന്റെ മികച്ച പ്രവർത്തനങ്ങളുടെ സംഗ്രഹം:
1999-ൽ തെലങ്കാനയിലെ ഹൈദരാബാദിൽ സ്ഥാപിതമായ ഇന്ത്യൻ നാഷണൽ സെന്റർ ഫോർ ഓഷ്യൻ ഇൻഫർമേഷൻ സർവീസസ് (INCOIS). സമുദ്രവുമായി ബന്ധപ്പെട്ട അപകടങ്ങൾക്കുള്ള മുൻകൂർ മുന്നറിയിപ്പുകളിൽ വൈദഗ്ദ്ധ്യം നേടിയ INCOIS, ഇന്ത്യയുടെ ദുരന്തനിവാരണ തന്ത്രത്തിന്റെ അവിഭാജ്യ ഘടകമാണ്. ഇന്ത്യയ്ക്കും 28 ഇന്ത്യൻ മഹാസമുദ്ര രാജ്യങ്ങൾക്കും സേവനം നൽകിക്കൊണ്ട് 10 മിനിറ്റിനുള്ളിൽ സുനാമി മുന്നറിയിപ്പുകൾ നൽകുന്ന ഇന്ത്യൻ സുനാമി മുൻകൂർ മുന്നറിയിപ്പ് കേന്ദ്രം (Indian Tsunami Early Warning Centre) സ്ഥാപിച്ചു. യുനെസ്കോ മികച്ച സുനാമി സേവനദാതാവായി അംഗീകരിച്ചിട്ടുണ്ട്. ഭൂകമ്പ സ്റ്റേഷനുകൾ, വേലിയേറ്റ ഗേജുകൾ, മറ്റ് സമുദ്ര സെൻസറുകൾ എന്നിവയുടെ ഒരു ശൃംഖലയുടെ പിന്തുണയോടെ, ഉയർന്ന തിരമാല, ചുഴലിക്കാറ്റ്, കൊടുങ്കാറ്റ് തിരമാലാപ്രവചനങ്ങൾ എന്നിവയും നൽകുന്നു, ഇത് തീരദേശ പ്രദേശങ്ങളെയും സമുദ്ര പ്രവർത്തനങ്ങളെയും സംരക്ഷിക്കാൻ INCOIS സഹായിക്കുന്നു. 2013-ലെ ഫൈലിൻ, 2014-ലെ ഹുദ്ഹുദ് ചുഴലിക്കാറ്റുകളുടെ സമയത്ത് INCOIS-ന്റെ ഉപദേശങ്ങൾ സമയബന്ധിതമായ ഒഴിപ്പിക്കലിനും തീരദേശ ജനതയ്ക്ക് അപകടസാധ്യതകൾ കുറയ്ക്കുന്നതിനും കാരണമായി. കടലിൽ നഷ്ടപ്പെട്ട വ്യക്തികളെയോ വസ്തുക്കളെയോ കണ്ടെത്തുന്നതിൽ ഇന്ത്യൻ കോസ്റ്റ് ഗാർഡ്, നാവികസേന, കോസ്റ്റൽ സെക്യൂരിറ്റി പോലീസ് എന്നിവരെ സഹായിക്കുന്നതിനായി INCOIS സെർച്ച് ആൻഡ് റെസ്‌ക്യൂ എയ്ഡഡ് ടൂൾ (SARAT) വികസിപ്പിച്ചെടുത്തിട്ടുണ്ട്. അത്യധികം അപകടങ്ങളിൽ പ്രതികരണ ഏകോപനം ശക്തിപ്പെടുത്തുന്നതിന് തത്സമയ ഡാറ്റ സംയോജിപ്പിക്കുന്ന സിനോപ്‌സ് (SynOPS) വിഷ്വലൈസേഷൻ പ്ലാറ്റ്‌ഫോമും INCOIS സ്ഥാപിച്ചിട്ടുണ്ട്. 2024-ൽ ജിയോസ്‌പേഷ്യൽ വേൾഡ് എക്‌സലൻസ് ഇൻ മാരിടൈം സർവീസസ് അവാർഡും 2021-ൽ ഡിസാസ്റ്റർ റിസ്ക് റിഡക്ഷൻ എക്‌സലൻസ് അവാർഡും INCOIS നേടി.
(Release ID: 2095334)
Visitor Counter : 28