జాతీయ పసుపు బోర్డును కేంద్ర వాణిజ్య, పరిశ్రమల శాఖ మంత్రి శ్రీ పీయూష్ ఈ రోజు న్యూఢిల్లీ నుండి ప్రారంభించారు. పసుపు బోర్డు మొదటి అధ్యక్షునిగా శ్రీ పల్లె గంగారెడ్డి పేరును శ్రీ గోయల్ ప్రకటించారు. నిజామాబాద్‌లో బోర్డు ప్రధాన కార్యాలయాన్ని ఏర్పాటు చేశారు.

దేశవ్యాప్తంగా సంబరాలు జరుపుకునే పండుగ రోజున జాతీయ పసుపు బోర్డు ప్రారంభోత్సవం జరిగిందని మంత్రి పేర్కొన్నారు. జాతీయ పసుపు బోర్డులో వివిధ మంత్రిత్వ శాఖల ప్రాతినిధ్యంతో పాటు ఎగుమతిదారులు, ఉత్పత్తిదారుల సంఘాల ప్రతినిధులు కూడా సభ్యులుగా ఉంటారని ఆయన పేర్కొన్నారు.

పసుపును 'గోల్డెన్ స్పైస్' అని కూడా పిలుస్తారన్న మంత్రి, మహారాష్ట్ర, తమిళనాడు, ఆంధ్రప్రదేశ్, తెలంగాణ, మధ్యప్రదేశ్, మేఘాలయ సహా 20 రాష్ట్రాల్లో గల పసుపు రైతుల సంక్షేమంపై కొత్తగా ఏర్పడిన బోర్డు ప్రత్యేక శ్రద్ధ చూపాలని కేంద్ర మంత్రి సూచించారు. ఆంధ్రప్రదేశ్, తెలంగాణ రాష్ట్రాల్లో పసుపు ఉత్పత్తిని పెంచేందుకు అపారమైన అవకాశాలున్నాయన్న ఆయన, పసుపు బోర్డు ఏర్పాటుతో దేశంలోని పసుపు ఉత్పత్తిదారుల ఆదాయం పెరుగుతుందన్నారు.

కొత్త పసుపు ఉత్పత్తుల పరిశోధన, అభివృద్ధిని కొత్త బోర్డు ప్రోత్సహిస్తుందని, అలాగే విదేశాల్లో మార్కెటింగ్ కోసం పసుపు సంబంధిత ఉత్పత్తుల విలువ పెంపును పరిశీలిస్తుందని కేంద్ర మంత్రి పేర్కొన్నారు. పసుపులో గల మేలైన, వైద్యపరమైన గుణాలను గురించి అవగాహన పెంపొందించడం, దాని దిగుబడిని పెంచే మార్గాలను అలాగే కొత్త మార్కెట్లలోకి వాణిజ్యాన్ని విస్తరించుటకు లాజిస్టిక్స్ అండ్ సప్లయి చైన్‌ను అభివృద్ధి చేసేందుకు మార్గాలను కూడా బోర్డు పరిశీలిస్తుందని ఆయన చెప్పారు. పసుపు ఉత్పత్తి, ఎగుమతుల నాణ్యతను అలాగే భద్రతా ప్రమాణాలను కూడా బోర్డు నిర్ధారిస్తుందని శ్రీ గోయల్ తెలిపారు.

గత 2023-24 సంవత్సరంలో, దేశంలో 3.05 లక్షల హెక్టార్ల విస్తీర్ణంలో పసుపు సాగుతో, 10.74 లక్షల టన్నుల ఉత్పత్తిని సాధించినట్లు శ్రీ గోయల్ చెప్పారు. ప్రపంచ పసుపు ఉత్పత్తిలో 70 శాతానికి పైగా భారతదేశంలోనే ఉత్పత్తి అవుతోందని అలాగే 30 రకాల పసుపు మన దేశంలో ఉత్పత్తి అవుతోందని ఆయన వివరించారు.

కేంద్ర హోంశాఖ సహాయ మంత్రి శ్రీ బండి సంజయ్ కుమార్, నిజామాబాద్ పార్లమెంట్ సభ్యులు శ్రీ అరవింద్ ధర్మపురి ఈ కార్యక్రమంలో పాల్గొన్నారు.

బోర్డు అధ్యక్షునితో పాటు, ఆయుష్ మంత్రిత్వ శాఖ, ఫార్మాస్యూటికల్స్ శాఖ, వ్యవసాయ, రైతు సంక్షేమ శాఖ అలాగే వాణిజ్య శాఖల ప్రతినిధులు కూడా బోర్డుకు నామినేట్ అయ్యారు. పసుపు అత్యధికంగా పండించే రెండు ప్రధాన రాష్ట్రాలైన మహారాష్ట్ర, తెలంగాణల ప్రతినిధులతో పాటు, లకడాంగ్ పసుపు సాగుతో ప్రసిధ్ది చెందిన మేఘాలయ రాష్ట్ర ప్రతినిధులకు కూడా బోర్డులో ప్రాతినిధ్యం కల్పించనున్నారు. దేశంలో పసుపు రంగం అభివృద్ధి, ఎదుగుదలపై జాతీయ పసుపు బోర్డు దృష్టి సారిస్తుంది.

జాతీయ పసుపు బోర్డు పసుపు రంగానికి సంబంధించిన విషయాల్లో నాయకత్వాన్ని, విస్తరణకు అవకాశాలను అందించడంతో పాటు ఇతర ప్రభుత్వ శాఖలు/ఏజెన్సీలతో సమన్వయాన్ని సులభతరం చేస్తుంది. అలాగే దేశంలో పసుపు రంగ అభివృద్ధి, విస్తరణ కోసం తోడ్పాటునందిస్తుంది. ముఖ్యంగా పసుపులో గల ఆరోగ్యం, శ్రేయస్సు సంబంధిత ప్రయోజనాల దృష్ట్యా పసుపు, దాని ఉత్పత్తుల వ్యాపారాభివృద్ధి కోసం గల విస్తారమైన సామర్థ్యాలపై దృష్టి సారించుటలో సహాయపడుతుంది.

భారతదేశం ప్రపంచంలోనే అతిపెద్ద పసుపు ఉత్పత్తిదారు, వినియోగదారు అలాగే ఎగుమతిదారుగా ఉంది.  ప్రపంచ వాణిజ్యంలో మన దేశం 62 శాతానికి పైగా వాటాను కలిగి ఉంది. 2023-24లో 226.5 మిలియన్ యూఎస్ డాలర్ల విలువైన 1.62 లక్షల టన్నుల పసుపు, పసుపు ఉత్పత్తులు ఎగుమతి అయ్యాయి.

***