సమాచార హక్కు చట్టం (ఆర్టీఐ) పోర్టల్ పనితీరుపై అందిన సందేహాలను సమీక్షించిన సిబ్బంది, శిక్షణల విభాగం, ఓటీపీ(వన్ టైమ్ పాస్ వర్డ్) ఫీచర్ ను జోడించిన అనంతరం పోర్టల్ యధావిధిగా పనిచేస్తోందని, ఇప్పుడు మరింత మెరుగైన తీరులో కొనసాగుతోందని స్పష్టం చేసింది. పోర్టల్ కు కొత్తగా జోడించిన మెరుగైన భద్రత నియమావళి సహా అన్నీ ఫీచర్లు సక్రమంగా పనిచేస్తున్నాయని, వీటిని ఉపయోగించడం మరింత సులువయ్యిందని సమగ్ర సమీక్ష జరిపిన అనంతరం డీఓపీటీ తెలియజేసింది.

ఆర్‌టి‌ఐ పనితీరుపై అందిన ఫిర్యాదులకు స్పందిస్తూ, జనవరి 2వ తేదీన జోడించిన ఓటీపీ ఫీచర్, వేదిక వినియోగదారుల ధ్రువీకరణ కోసమే కాక సమాచార హక్కు వినతి పత్రాల్లోని వ్యక్తిగత సమాచార భద్రత కోసమేనని డీఓపీటీ స్పష్టం చేసింది. ధ్రువీకరణ పొందిన వారికే పోర్టల్లో ప్రవేశం కల్పించడం ద్వారా సైబర్ భద్రత మెరుగవుతుందని, ఇవి సంస్థ అమలు చేసే ఉత్తమ పద్ధతులకు అనుగుణమైన చర్యలని తెలిపింది.   

ఓటీపీలు అందడం ఆలస్యం అవుతోందన్న ఫిర్యాదులు అందడంతో, ఎన్ఐసీ ఈమెయిల్ డొమైన్ ద్వారా ఓటీపీలు ఎప్పటికప్పుడు పంపిణీ అవుతాయని వివరించిన డీఓపీటీ... ఎన్ఐసీ సర్వర్లపై కానీ, జీమెయిల్, యాహూ మెయిల్ వంటి ఇతర సర్వర్ల పై కానీ  అధిక ట్రాఫిక్ నమోదు అయిన సందర్భాల్లో అరుదుగా ఓటీపీలు ఆలస్యంగా అందే అవకాశం ఉందని చెప్పింది. ముఖ్యంగా ఓటీపీ ని ఎంటర్ చేసేంత వరకూ వాటిని నమోదు చేయడానికి వీలుకాకుండాపోయే అవకాశం లేదని, ఓటీపీ అందటం ఆలస్యం అయిన సందర్భాల్లో సైతం, అందిన వెంటనే ఓటీపీని యూజర్లు వినియోగించుకుని తమ దరఖాస్తు స్థితిని తెలుసుకోగలుగుతారని వివరించింది.

జనవరి 9వ తేదీ, ఉదయం 10.55 వరకూ 9,782 వినియోగదారులు కొత్త పద్ధతిని ఉపయోగించి తమ దరఖాస్తు పరిస్థితిని తెలుసుకున్నారని, దీంతో కొత్త పద్ధతి సజావుగా పనిచేస్తోందని నిర్ధారణ అయ్యిందని విభాగం తెలిపింది.

అదనంగా మరో మెట్టు జోడించడం వల్ల ప్రక్రియ జఠిలమైందన్న కొందరి విమర్శకు సమాధానమిస్తూ... వినియోగదారుల వ్యక్తిగత గోప్యతను కాపాడేందుకు కొత్త ఫీచర్ అనివార్యమని, కొత్త ప్రక్రియలు సజావుగా పనిచేస్తున్నాయన్న నిర్ధారణ కోసం పలు దఫాల్లో పరీక్షలు నిర్వహించామని చెప్పింది.

హెల్ప్ లైన్లు అందుబాటులో లేవన్న ఫిర్యాదులకు స్పందిస్తూ, 011-24622461 అనే ఆర్టీఐ హెల్ప్ డెస్క్ నంబర్ కు కార్యాలయ వేళల్లో (ప్రభుత్వ సెలవుదినాలు తప్ప, సోమవారం నుంచీ శుక్రవారం వరకూ, ఉదయం 9 గంటల నుంచి సాయంత్రం 5.30 లోపు) ఫోన్ చేసి తక్షణ సహాయం పొందవచ్చని స్పష్టం చేసింది.

పౌరులకు పారదర్శకమైన, అందుబాటులో ఉండే సేవలను అందించేందుకు కట్టుబడి ఉన్నామని డీఓపీటీ స్పష్టం చేసింది. వినియోగదారుల సంతృప్తి తమకు ముఖ్యమని, ప్రక్రియలన్నీ మరింత సమర్థంగా పనిచేస్తున్నాయో లేవో తెలుసుకునేందుకు ఆర్టీఐ పోర్టల్  పై పర్యవేక్షణ కొనసాగుతోందని డీఓపీటీ హామీ ఇచ్చింది. ఆర్టీఐ చట్టం కింద పౌరుల హక్కుల పరిరక్షణ సహా డిజిటల్ సేవల విస్తరణ, మెరుగుదల లక్ష్యాలుగా ప్రభుత్వం తీసుకుంటున్న అనేక చర్యల్లో భాగంగా కొత్త ఫీచర్ల జోడింపు ప్రక్రియ చేపట్టామని డీఓపీటీ తెలిపింది.  

***