صدر جمہوریہ ہندمحترمہ دروپدی مرمو نے آج (3 جنوری 2025) کرناٹک کے بیلگاوی میں کے ایل ای کینسر اسپتال کا افتتاح کیا۔

اس موقع پر صدر جمہوریہ نے کہا کہ ایک عالمی تحقیق کے مطابق کینسر دنیا میں اموات کی سب سے بڑی وجہ ہے۔ 2022 میں ایک اندازے کے مطابق دنیا بھر میں کینسر کے دو کروڑ نئے معاملات سامنے آئے ہیں اور97 لاکھ اموات ہوئی ہیں۔ ہندوستان میں ہر ایک لاکھ افراد پر کینسر کے تقریباً 100 مریض ہیں۔ آئی سی ایم آر کے ذریعہ کئے گئے ایک مطالعہ کے مطابق، ہندوستان میں کینسر کے واقعات میں 2020 کے مقابلے 2025 میں تقریباً 13 فیصد اضافہ ہونے کا تخمینہ لگایا گیا ہے۔

صدر جمہوریہ نے اس بات پر زور دیا کہ صحت کی دیکھ بھال کرنے والے پیشہ ور افراد کا فرض ہے کہ وہ جامع دیکھ بھال فراہم کریں، جو کینسر کے مریضوں کی جسمانی اور نفسیاتی ضروریات کو پورا کرتی ہے۔ انہوں نے کہا کہ ہمدردی اور دردمندی کا ہر لفظ جو ایک ڈاکٹر کہتا ہے اس میں یہ طاقت ہوتی ہے کہ وہ اس کے مریض کی زندگی کو بہتر بناسکے۔

صدر جمہوریہ نے کہا کہ کینسر کی وجوہات، تشخیص اور علاج کے حوالے سے زیادہ سے زیادہ آگاہی پھیلانے کی ضرورت ہے۔ ایسے کئی معاملات ہمارے سامنے آتے ہیں جہاں یا تو مریض اور لواحقین کی لاعلمی کی وجہ سے یا پھر مالی مجبوریوں کی وجہ سے بیماریوں کی تشخیص اور علاج میں تاخیر ہوتی ہے۔ کینسر کی صورت میں یہ جان لیوا ثابت ہو سکتا ہے۔ انہوں نے کہا کہ کینسر جیسی بیماریوں کے خلاف جنگ ایک اجتماعی کوشش ہے۔ انہوں نے سب پر زور دیا کہ وہ صحت کی دیکھ بھال کا ایک ایسا نظام بنانے کے لیے مل کر کام کریں جو عالمی معیار کے ساتھ ساتھ مریض پر مرکوز اور مساوی ہو۔

صدر جمہوریہ نے کہا کہ ہم نے دیکھا ہے کہ بعض خاندانوں میں لڑکوں کی صحت کو لڑکیوں کی صحت پر زیادہ ترجیح دی جاتی ہے۔ اس مختلف سلوک کو بعد میں مردوں اور عورتوں کے حوالے سے بھی دیکھا جاتا ہے۔ اکثر اوقات، ایک خاندان کی خواتین کو اپنے صحت کے مسائل کی بروقت تشخیص اور علاج نہیں ملتا۔ انہوں نے کہا کہ اس طرح کی کوئی بھی تاخیر، خاص طور پر کینسر کی صورت میں تشویشناک ہو سکتی ہے۔ انہوں نے ہر گھر پر زور دیا کہ وہ خواتین کو اپنے مسائل بتانے کی ترغیب دیں۔ انہوں نے کہا کہ خاندان اور مجموعی طور پر معاشرے کے ہر فرد کو خواتین کی صحت کو زیادہ سنجیدگی سے لینے اور ان کی دیکھ بھال اور ان کے مناسب بروقت علاج کی سہولت فراہم کرنے میں فعال کردار ادا کرنے کی ضرورت ہے۔

صدر جمہوریہ کی تقریر دیکھنے کے لیے براہ کرم یہاں کلک کریں۔

***************

 (ش ح۔ش ت۔م الف)

U:4830