భారత సృజనాత్మక, వినోద రంగంలో ప్రధాన ఘట్టానికి సంబంధించి ప్రధానమంత్రి శ్రీ నరేంద్ర మోదీ మన్ కీ బాత్ 117వ ఎపిసోడ్ లో ఉత్తేజకరమైన సమాచారాన్ని పంచుకున్నారు. జాతినుద్దేశించి ప్రసంగిస్తూ, వచ్చే ఏడాది ఫిబ్రవరి 5-9 మధ్య ప్రపంచ శ్రవ్య దృశ్య వినోద సదస్సు (వరల్డ్ ఆడియో విజువల్ ఎంటర్టైన్మెంట్ సమ్మిట్ – వేవ్స్)ను మొదటిసారిగా భారత్ లో నిర్వహించబోతున్నట్టు ప్రకటించారు.

వేవ్స్ సదస్సు: భారత సృజనాత్మక ప్రతిభకు అంతర్జాతీయ వేదిక

ప్రపంచంలోని ఆర్థిక దిగ్గజాలు సమావేశమయ్యే దావోస్ వంటి కార్యక్రమాలతో వేవ్స్ సదస్సును పోలుస్తూ.. ‘‘భారత సృజనాత్మక ప్రతిభను ప్రపంచానికి చాటిచెప్పే గొప్ప అవకాశం రాబోతున్నది. మీడియా, వినోద పరిశ్రమకు చెందిన దిగ్గజాలతోపాటు ప్రపంచవ్యాప్తంగా ఉన్న సృజనకారులందరూ భారత్ కు వస్తారు. సృజనాత్మక రంగంలో భారత్ ను అంతర్జాతీయ వేదికగా నిలిపే దిశగా ఈ సదస్సు ముఖ్యమైన ముందడుగు’’ అని ప్రధానమంత్రి ప్రముఖంగా పేర్కొన్నారు.

వేవ్స్ సన్నాహకాల్లో యువ సృజనకారుల పాత్ర కీలకమైనదనీ, భారత సృజనాత్మక రంగపు చేతనాత్మకమైన స్ఫూర్తిని అది ప్రతిబింబిస్తుందని ఉద్ఘాటించారు. దేశ యువత ఉత్సాహమూ, సృజనాత్మక ఆర్థిక వ్యవస్థ త్వరితంగా వృద్ధి చెందడంలో వారి పాత్రా గర్వకారణమని ప్రధానమంత్రి అన్నారు. 5 ట్రిలియన్ డాలర్ల ఆర్థిక వ్యవస్థగా ఎదిగే దిశగా పురోగమించడంలో భారత్ కు అది కీలకమైన చోదకంగా ఉపయోగపడుతుందన్నారు.

‘‘మీరు యువ సృజనకారులైనా, లబ్ధ ప్రతిష్ఠులైన ప్రముఖులైనా.. మీది బాలీవుడ్ అయినా, ప్రాంతీయ సినిమా అయినా.. టీవీ పరిశ్రమ నిష్ణాతులైనా లేదా యానిమేషన్ - గేమింగ్ నిపుణులైనా లేదా వినోద సాంకేతికతలో ఆవిష్కర్తలైనా.. వేవ్స్ సదస్సులో భాగం కావాలని నేను మిమ్మల్ని కోరుతున్నాను’’ అని ఆయన అన్నారు. వినోద, సృజనాత్మక పరిశ్రమల్లో భాగస్వాములందరినీ వేవ్స్ సదస్సులో క్రియాశీలకంగా పాల్గొనవలసిందిగా ప్రధానమంత్రి విజ్ఞప్తి చేశారు.

సహకారాన్ని పెంపొందించడంతోపాటు ప్రపంచ స్థాయి సృజనాత్మక రంగ కేంద్రంగా భారత సామర్థ్యాన్ని చాటుతూ.. భారత సృజనాత్మక ప్రతిభకు అంతర్జాతీయ వేదికగా నిలిచేందుకు వేవ్స్ సదస్సు సిద్ధమవుతోంది. యానిమేషన్, గేమింగ్, వినోద సాంకేతికత, ప్రాంతీయ ప్రధానస్రవంతి సినిమాలలో భారత పురోగతిని కూడా ఇది ప్రముఖంగా చాటుతుంది. భారత సృజనాత్మక ఆర్థిక వ్యవస్థను బలోపేతం చేయడానికి ప్రభుత్వం కట్టుబడి ఉందన్న ప్రధానమంత్రి.. మీడియా, వినోద రంగాల్లో అంతర్జాతీయ అగ్రగామిగా భారత స్థానాన్ని సుస్థిరం చేయడానికి ముందుకు రావాలని పిలుపునిచ్చారు.

శత జయంతి సందర్భంగా సినీ దిగ్గజాల సంస్మరణ

పలువురు భారత సినీ దిగ్గజాల శత జయంత్యుత్సవాల సందర్భంగా ప్రధానమంత్రి హృదయపూర్వక నివాళి అర్పించారు. చిరస్మరణీయమైన తన చిత్రాల ద్వారా భారత కళాత్మక శక్తిని రాజ్ కపూర్ చాటి చెప్పారనీ, మంత్ర ముగ్ధులను చేయగల మహమ్మద్ రఫీ గాత్రం అన్ని తరాల్లోనూ ప్రతిధ్వనిస్తుందనీ, భారతీయ సంప్రదాయాలను ప్రతిబింబిస్తూ తెలుగు సినిమాను ఉన్నత స్థాయికి తీసుకెళ్లడంలో అక్కినేని నాగేశ్వరరావు విశేషంగా కృషి చేశారనీ ప్రధానమంత్రి గుర్తుచేశారు. ఐక్యతా స్ఫూర్తినీ, అవగాహననూ కలిగించేలా తపన్ సిన్హా సామాజిక స్పృహతో సినిమాలు తీశారన్నారు. భారత చలనచిత్ర రంగంలో స్వర్ణయుగాన్ని రూపుదిద్దడంతోపాటు... భారతయ సాంస్కృతిక వారసత్వాన్ని ఈ దిగ్గజాలు ఏ విధంగా బలోపేతం చేశారో శ్రీ మోదీ ప్రముఖంగా ప్రస్తావించారు. తరతరాలకూ ఆరాధ్యనీయమైన, అందరిలోనూ స్ఫూర్తిని నింపగల శాశ్వతమైన వారసత్వాన్ని వారు మిగిల్చారన్నారు.

55వ భారత అంతర్జాతీయ చలనచిత్రోత్సవం (ఇఫీ) సందర్భంగా కూడా రాజ్ కపూర్, తపన్ సిన్హా, అక్కినేని నాగేశ్వరరావు (ఏఎన్నార్), మహమ్మద్ రఫీలకు వారి అద్వితీయమైన ఘనతను స్మరించుకుంటూ ప్రదర్శనలు, ముఖాముఖి వంటి కార్యక్రమాల ద్వారా నివాళి అర్పించడమూ.. తద్వారా ఈ దిగ్గజాల సేవలను సినిమా ప్రపంచానికి చాటడమూ తెలిసిందే.

***