U Myntri Kam Pohiing bad Cooperation jong ka Sorkar Pdeng, Amit Shah, mynta ka sngi u la plie paidbah bad buh maw nongrim na ka bynta ki projek kam pynroi bapher bapher ba shongdor palat T. 668 klur ha Dhalai, Tripura. U Amit Shah u la iakren bad ki briew na ka jaitbynriew Bru Reang ha Haduklau Para Bru Settlement Colony (BRUHA PARA) ha Dhalai bad leit jngoh ruh ia ki iingsah jong ki bad iakynduh ia ki. Ha kane ka sngi, u Myntri Rangbah jong ka jylla Tripura, Prof. (Dr.) Manik Saha, u Union Home Secretary, Director, Intelligence Bureau bad Director General, Bureau of Police Research and Development (BPR&D) ruh ki la iadonlang.

Ha ka jingai jingkren jong u, u Myntri Kam Pohiing jong ka sorkar pdeng u la ong ba hapoh ka jingialam jong u Myntri Rangbah duh, Narendra Modi, ka sorkar pdeng ka la iarap ban pynbiang jaka sah ia 38,000 ngut ki briew na ka jaitbynriew Bru Reang. U la ong ba la jan 25 snem, ki Bru Reang, kiba im ka jingim kaba jynjar, kim ioh ia ki jingdonkam ba hakhmat eh kum ka um, ki painkhana, ka bording, ka pule puthi, ka ioh kam ioh jam, bad ki lad jingsumar. U la ong ba kito kiba synshar hangne la slem bha kim iohi ia ka jingjynjar jong ki Bru Reang, hynrei u Modi u iohi, u sngewthuh, bad pynbeit ia ki jingeh jong ki. U Shah u la ong haba ka jingkylla ka wan ha Tripura bad ka party jong ki ka ioh thaw sorkar, ha katei ka por ka don ruh ka sorkar jong u Narendra Modi ji ha ka sorkar pdeng. U la ong namar ka soskular ba la iasoi ha katei ka por, la pynkynriah 40,000 ngut ki briew, bad la pynbiang na ka bynta ka ioh kam ioh jam, ki lad ioh jingsumar, ka pule puthi, ka umdih kaba khuid, ki painkhana bad ki cooperative na ka bynta ki longkmie. U la bynrap ba ha ka samoi treikam jong ka sorkar kaba rim, la don bun ki skhim, hynrei kim shym la pyntreikam.

U Amit Shah u la ong ba ym tangba u Myntri Rangbah duh Modi u la pynkhreh ki kam na ka bynta ki Bru Reang, kiba shong ba sah hapdeng ka jingim kaba jynjar naduh u snem 1998, hynrei la pynkynriah ruh ha 11 tylli ki shnong ha ka jinglut kaba T. 900 klur. U la ong ba kine ki shnong mynta ki ioh ka bording elektrik, ki surok, ka umdih, ka lad jingpyniasoh, ki solar street light, ki dukan reshon, ki skul anganwadi, bad ki jaka ai jingsumar. U Myntri Rangbah duh Modi u la pynthikna ba ki briew kiba sah ha kine ki 11 tylli ki jaka ki ioh baroh ki hok, kumba long kiwei kiwei ki nongshong shnong jong ka ri. U Shah u la bynrap ba ia kine ki briew la kynthup ha ka thup jong ki nongthep vote, bad ka sorkar Modi ka la ai ki card reshon, ki health card bad ki cooperative ia ki ban pynthikna ka jingioh kam jong ki. U la bynrap shuh shuh ba kine ki briew mynta ki long trai ia ka jaka kaba 1200 square phut, bad lyngba ka jingiarap jong ka sorkar India, la shna ia ki iing jong ki. Shuh shuh, ka sorkar Modi ka ai ruh ka jingiarap kaba man ka bnai kaba long T. 5,000 na ka bynta 24 bnai.

U Myntri Kam Pohiing bad Cooperation jong ka sorkar pdeng u la ong ba ha ka samoi treikam jong ka sorkar kaba rim, tang 2.5% ki briew ki ioh umdih, katba mynta 85% ki longiing ki la ioh ia ki kor um. Mynshuwa, ym don u briew baduk ba ioh ei ia ki mar bam, hynrei mynta, hapoh ka jingialam jong u Modi, 82% ki briew ha Tripura ki ioh ei 5 kilo u khaw. U Shah u la ong ba ka sorkar Modi ka iarap baroh ki jinglut ha ka jingsumar na ka bynta 80% ki briew ha Tripura, haduh T. 5 lak.  U la bynrap ruh ba ki jingbei tyngka ki la wan ha Tripura, la shna ia ki surok, bad la pynpoi bording elektrik bad ki painkhana ha man ki longiing. Ka jingdon kiba ieh shiteng por ia ka jingpule ha Tripura ka la hiar sha ka 3%, bad ka jingpynrung kyrteng ha ki skul ka la kiew na ka 67% sha ka 99.5. U Shah u la ong ba ka sorkar Modi bad ka sorkar Tripura ki la pyni haba kito kiba ngeit ha ka synshar paidbah ki wan ha ka bor, ka ialam sha ka roi ka par jong ka ri bad ka jylla. U la ban jur ba ka sorkar jong u Narendra Modi ha ka sorkar pdeng, bad ki sorkar jong u Biplab Deb bad mynta u Prof. (Dr.) Manik Saha ha Tripura, ki rah shakhmat ia ka kam jong ka roi ka par. Ka jingshna ia ka temple jong ka Maa Tripura Sundari ka dang iaid shaphrang, ka ban pynsuk ia ki riewngeit na kylleng ka pyrthei ban ioh ia ka jingkyrkhu jong ka Blei.

U Amit Shah u la ong ba mynta ka Tripura kalong ka jylla kaba shongsuk shongsain bad ka jingiaumsnam ka la kut. U la ong, ka sorkar Modi ka la pynneh ia ka shongsuk shongsain ha ka jylla da kaba iasoi lai tylli ki soskular bad ki kynhun kieng atiar jong ka Tripura bad kawei bad ka jaitbynriew Bru Reang. U la ong shuh shuh ba mynta, ka Tripura ka jam shaphrang ha ka lynti jong ka roi ka par ba ialam da u Modi ryngkat ka shongsuk shongsain.

U Myntri Kam Pohiing bad Cooperation jong ka sorkar pdeng mynta ka sngi u la buh maw nongrim na ka bynta ki projek kam pynroi bapher bapher ba kynthup ia ka Central Detective Training Institute (CDTI) ha Agartala. Ka jingthmu jong kane ka sienjam kaba kongsan da ka Tnad Kam Pohiing kalong ban pynkhlain ia ka jingshngain ha ka thain shatei lammihngi bad ki ri ba marjan, bad ban wanrah I ki rukom treikam ba bha tam ha ki kam pulit. Kum ban shu kdew ba ha ka jingialang plenary ba 69 jong ka North Eastern Council (NEC) ba la long ha nongbah Shillong, ka la don ka jingai jingmut ban plie ia ka academic research center ha ka jingiatreilang bad ki jaka pule ban wad bniah ia ki jingeh ba iadei bad ka jingshngain jong ka thain shatei lammihngi.

Ka sorkar Tripura ka la mang 9.57 acre ka jaka ha Jirania sub-division jong ka West Tripura district, na ka bynta kane ka kam. Ka Tnad kam pohiing ka la mynjur T. 120 klur ban shna ia ki jingdon jingem. La pyndep ia ka jingjurip ia ka jaka ba la mang. Ka CDTI ha Agartala kan ai jinghikai pyntbit ia palat 6,000 ngut ki shipai man ka snem na ki jylla ka thain shatei lammihngi bad ki Central Armed Police Force (CAPF). Ka institute kan dei kaba la biang baroh ki jingdonkam katkum ka juk mynta kum ki advanced classroom, ki simulation lab, ki IT data center, bad ki jaka na ka bynta ka practical training ka ban ai ki sap treikam katkum ka juk mynta ia ki pulit.

Kane ka institute kan ai jinghikai pyntbit bad ki lad wadbniah shaphang ki jinglong jingman jong ka jingshngain hapoh bad shabar ka ri, ha ka thain shatei lammihngi. Ka institute kan don ruh ki jaka wad bniah, ka ban iatrei lang bad ki jaka ai jinghikai ban peit ia ki jingeh ha ka jingshngain kum ki lad ban ialeh pyrshah ia ki kam pyntriem, ka jingpeit ia ki jaka khap pud, ki jingdie ia ki briew, ka jingshalan ia ki drok, ka jingrung beain jong ki briew sha ka ri bad ka jingshalan beain ia ki tiar ialeh.

Ka jingseng ia ka CDTI ha Agartala ym tangba kan kyntiew ia ka jingtbit treikam ki kynhun pulit hynrei kan kyntiew ruh ia ka jingiatreilang bad kiwei ki ri ban weng ia ki jingeh ba iadei bad ka jingshngain ha ki jaka khappud.

*****