কেন্দ্ৰীয় ইলেক্ট্ৰনিক্স আৰু তথ্য প্ৰযুক্তি, ৰে'ল আৰু তথ্য তথা সম্প্ৰচাৰ মন্ত্ৰী শ্ৰী অশ্বিনী বৈষ্ণৱে আজি লোকসভাত কৃত্ৰিম বুদ্ধিমত্তাৰ শাসন আৰু উন্নয়ন সন্দৰ্ভত সংসদৰ প্ৰশ্নৰ উত্তৰত প্ৰযুক্তিৰ গণতান্ত্ৰিককৰণ কৰি কৃত্ৰিম বুদ্ধিমত্তাৰ প্ৰতি ভাৰত চৰকাৰৰ দৃষ্টিভংগীৰ বিষয়ে বৰ্ণনা কৰে।

কেন্দ্ৰীয় মন্ত্ৰীগৰাকীয়ে সাতটা সুনিৰ্ধাৰিত স্তম্ভৰ ওপৰত নিৰ্মাণ কৰা ভাৰত এআই মিছনৰ পৰিৱৰ্তনশীল প্ৰভাৱৰ ওপৰত গুৰুত্ব আৰোপ কৰে, যাৰ দ্বাৰা ৰাষ্ট্ৰীয় উন্নয়নৰ বাবে কৃত্ৰিম বুদ্ধিমত্তাৰ সুবিধাৰ অন্তৰ্ভুক্তি আৰু উদ্ভাৱন নিশ্চিত কৰা হয়।

ভৱিষ্যতৰ দক্ষতাত নাম ভৰ্তি হোৱা লোকৰ সংখ্যা সন্দৰ্ভত সংসদৰ প্ৰশ্নৰ উত্তৰ দি কেন্দ্ৰীয় মন্ত্ৰীগৰাকীয়ে উল্লেখ কৰে যে শেহতীয়া উদ্যোগৰ প্ৰয়োজনীয়তাৰ সৈতে সংগতি ৰাখি প্ৰশিক্ষণ প্ৰদান কৰাৰ বাবে উদ্যোগৰ অংশীদাৰসকলৰ সহযোগত বিকশিত হোৱা ভৱিষ্যতৰ দক্ষতা মঞ্চত ইতিমধ্যে ৮.৬ লাখ প্ৰাৰ্থীয়ে নাম ভৰ্তি কৰিছে।

প্ৰযুক্তিৰ গণতান্ত্ৰিককৰণ

শ্ৰী বৈষ্ণৱে বিশেষকৈ টায়াৰ ২ আৰু টায়াৰ ৩ চহৰসমূহক শক্তিশালী কৰি প্ৰযুক্তিগত সুবিধাসমূহৰ বিকেন্দ্ৰীকৰণৰ ওপৰত চৰকাৰৰ গুৰুত্বৰ বিষয়ে আলোকপাত কৰে। "গোৰখপুৰ, লক্ষ্ণৌ, চিমলা, ঔৰঙ্গাবাদ, পাটনা, বাক্সাৰ আৰু মুজাফ্ফৰপুৰৰ দৰে চহৰত কৃত্ৰিম বুদ্ধিমত্তাৰ তথ্য গৱেষণাগাৰ স্থাপন কৰা হৈছে।

তেওঁ এনে এক পৰিস্থিতিতন্ত্ৰ গঢ়ি তোলাৰ বাবে চৰকাৰৰ প্ৰতিশ্ৰুতি পুনৰ ব্যক্ত কৰে য'ত ষ্টাৰ্টআপ, কৃত্ৰিম বুদ্ধিমত্তাৰ পৰীক্ষাগাৰ, ৫জি পৰীক্ষাগাৰ আৰু অৰ্ধপৰিবাহী প্ৰশিক্ষণ সুবিধাসমূহ সুলভ কৰি তোলা হয় যাতে প্ৰযুক্তিগত বিকাশ কেইটামান ক্ষেত্ৰতে কেন্দ্ৰীভূত নহৈ সমগ্ৰ দেশতে বিয়পি পৰে।

সামাজিক প্ৰভাৱৰ বাবে কৃত্ৰিম বুদ্ধিমত্তাৰ ব্যৱহাৰ

কেন্দ্ৰীয় মন্ত্ৰীগৰাকীয়ে কৃষি, শিক্ষা, স্বাস্থ্যসেৱা, লজিষ্টিক আৰু বিত্তকে ধৰি বিভিন্ন খণ্ডত ইতিবাচক প্ৰভাৱ পেলোৱাৰ বাবে কৃত্ৰিম বুদ্ধিমত্তাৰ সম্ভাৱনাৰ ওপৰতো গুৰুত্ব আৰোপ কৰে আৰু দায়িত্বশীল কৃত্ৰিম বুদ্ধিমত্তা উন্নয়নত বিশ্বব্যাপী নেতৃত্বৰ প্ৰতি ভাৰতৰ প্ৰতিশ্ৰুতি পুনৰ ব্যক্ত কৰে।

" কৃত্ৰিম বুদ্ধিমত্তাৰ আটাইতকৈ গুৰুত্বপূৰ্ণ প্ৰয়োগবোৰ হ'ব এনে ক্ষেত্ৰত যিবোৰে মানুহৰ জীৱনক প্ৰত্যক্ষভাৱে প্ৰভাৱিত কৰে। কৃষি, শিক্ষা, স্বাস্থ্যসেৱা, লজিষ্টিক আৰু বিত্তীয় খণ্ড দেশৰ প্ৰয়োজনীয়তা অনুসৰি কৃত্ৰিম বুদ্ধিমত্তা সমাধানৰ দ্বাৰা যথেষ্ট লাভান্বিত হ'ব," শ্ৰী বৈষ্ণৱে কয়।

*****

Dharmendra Tewari/Kshitij Singha/MK/BB