ભારતના ઉપરાષ્ટ્રપતિ અને રાજ્યસભાના અધ્યક્ષ શ્રી જગદીપ ધનખર; ભારતના પ્રધાનમંત્રી શ્રી નરેન્દ્ર મોદી; ભારતના ભૂતપૂર્વ રાષ્ટ્રપતિ શ્રી રામનાથ કોવિંદ અને લોકસભાના સ્પીકર શ્રી ઓમ બિરલાએ આજે સંસદ ભવન સંકુલમાં પ્રેરણા સ્થળ ખાતે બાબાસાહેબ ડૉ. બી. આર. આંબેડકરની પ્રતિમાને તેમના 69મા મહાપરિનિર્વાણ દિવસ પર પુષ્પાંજલિ અર્પણ કરી હતી.

આ પ્રસંગે બાબાસાહેબ ડૉ. બી. આર. આંબેડકરની પ્રતિમાને કેટલાક કેન્દ્રીય મંત્રીઓ; રાજ્યસભામાં વિરોધ પક્ષના નેતા શ્રી મલ્લિકાર્જુન ખડગે; સંસદ સભ્યો, ભૂતપૂર્વ સંસદસભ્યો અને અન્ય મહાનુભાવોએ પણ શ્રદ્ધાંજલિ અર્પણ કરી હતી.

લોકસભાના મહાસચિવ શ્રી ઉત્પલ કુમાર સિંહ અને રાજ્યસભાના મહાસચિવ શ્રી પી સી મોદીએ પ્રેરણા સ્થળ ખાતે બાબાસાહેબ ડૉ. બી. આર. આંબેડકરને પુષ્પાંજલિ અર્પણ કરી હતી.

પ્રેરણા સ્થળ ખાતે આ કાર્યક્રમ માટે યોગ્ય વ્યવસ્થા કરવામાં આવી હતી, જેમાં 750 ચોરસ મીટરના વિસ્તારમાં વિશાળ તંબુ પથરાયેલો હતો - જે આ પ્રસંગ માટેનો અત્યાર સુધીનો સૌથી મોટો વિસ્તાર છે. તેમાં 900 લોકોની બેસવાની ક્ષમતા હતી, જે અગાઉના સ્થળ કરતાx મોટી હતી. પ્રેરણા સ્થળ અપગ્રેડેડ ટેકનિકલ સુવિધાઓ સાથેનું સુવિકસિત સ્થળ છે, જ્યાં તમામ ભારતીયો માટે પ્રેરણાસ્ત્રોત તરીકે કામ કરતા આપણા મહાન નેતાઓની પ્રતિમાઓ સ્થાપિત કરવામાં આવી છે. પ્રેરણા સ્થળ પર પણ મૂર્તિઓ વિશેની માહિતી ડિજિટલી ઉપલબ્ધ છે. બાબા સાહેબને શ્રદ્ધાંજલિ આપવા માટે મોટી સંખ્યામાં પ્રેરણા સ્થળની મુલાકાતે આવેલા સંસદ પુસ્તકાલય દ્વાર તરફથી મુલાકાતીઓના સુચારૂ પ્રવેશની વ્યવસ્થા કરવામાં આવી હતી.

આ પ્રસંગે શ્રી બિરલાએ તેમના ટ્વીટ સંદેશમાં જણાવ્યું હતું કે, "હું રાષ્ટ્ર નિર્માતા, સામાજિક ન્યાયના સંરક્ષક અને ભારતરત્ન બાબાસાહેબ ડૉ. બી. આર. આંબેડકરને તેમના મહાપરિનિર્વાણ દિવસ પર શ્રદ્ધાંજલિ અર્પણ કરું છું. સમાનતાવાદી સમાજનું તેમનું સ્વપ્ન, તેમના અમૂલ્ય ઉપદેશો અને બંધારણના નિર્માણમાં તેમનું અનુપમ યોગદાન હંમેશા આપણને પ્રેરણા આપતું રહેશે."

AP/IJ/GP/JD