অৱাং নোংপোক ভারতকী নাৎশিং অসি চহি চা কয়াগী চৎনবী, খেন্নবা লোলশিং, ইনাক খুল্লবা ফুঙ্গা ৱারীশিং, পুক্নিং হুনা নীংথিরবা মফমশিংনা ফিজন ওইদুনা শেম্বা মশক মচু থোক্লবা পরিং অমনি‍। মফম অসি ফুরুপ খুদিং, স্তেত খুদিংমক্কী মশাগী ওইবা তোপ তোপ্পা শক্তম লৈজবা অরিবা মতমগী চৎনবী অমদি হৌজিক মতমগী খোঙজেল অনি পুনশিন্দুনা চৎমিন্নবা তোপ তোপ্পা মফম অমনি‍। অসামগী মালহৌনরবা চাগী বগানদগী হৌরগা মিজোরমগী মরী মরী লৈখ্রিবা চীংশিং ফাওবা, মনিপুরগী তরু তরুবা তুরেলশিংদগী হৌরগা নাগালেন্দগী মচু মমেন্না থল্লবা কুম্হৈশিং ফাওবদা, অৱাং নোংপোক অসি পুন্সি, কলা, অমদি পারী পুরীগী লনগী ইহুলশিংনা পুরিবা লমদম অমনি‍।

শিংথানিংঙাই ওইরবা নাৎশিং অসিবু সেলেব্রেত তৌরদুনা, ইহান হান্বা অস্তলক্সমী মহোতসব অসি ভারত মন্দপম, প্রগতি মৈদান, দিল্লীদা দিসেম্বর ৬ দগী ৮, ২০২৪ ফাওবা চত্থগনি‍। অচৌবা কুমহৈ অসি ইকায়খুম্নরবা প্রধান মন্ত্রীনা দিসেম্বর ৬ তা হৌদোক্কনি, অমদি মসিনা অৱাং নোংপোক ভারতকী স্তেত নিপান – অসাম, অরুনাচল প্রদেশ, মেঘালয়, মনিপুর, নাগালেন্দ, মিজোরম, ত্রিপুরা, অমদি সিক্কিমগী ফজবা শক্তমশিং, খেন্নবা মচৎশিং অমদি লেপ্লিবা ফিরেপশিং উৎনবা পান্দম থম্লি‍। ‘অস্তলক্সমী’ হায়না খঙনবা স্তেতশিং অসিনা লাইরেম্বী লক্সমীদা চেল্লিবা, নুংঙাই য়াইফবা, অরং অরাক, তরু তরুবা, লন-থুম, ৱাখল লৌশিং, থৌদাং, লৌউ-শিংউ, অমদি শা-শন লোইবা হায়রিবা নুংঙাই য়াইফবগী মওং নিপানগী মহুৎ শিল্লি‍‍।

স্তেতশিং অসিনা মশা মশাগী ইনাক খুল্লবা নাৎ অমসুং চৎনবী মীমাঙদা পুথোক্তুনা ভারতকী নাৎকী লনগী পাক চাউরবা ফিজন্দা অহেন্বা শক্তমশিং হাপচিল্লি‍। কুমহৈ অসি হায়রিবা খেন্নবা মশকশিং অসি হরাও তয়াম্না পাঙথোক্নবা, মালেম অসিদা লমদম অসিগী কলা, খুৎশা হৈবা, ঈশৈ-নোংমাই, অমদি শেন্মিৎলোনগী খোঙজেল উবা ফংহন্নবা পান্দম থম্লি‍। কুমহৈ অসি অৱাংনোংপোক্না নাৎকী মকোন অমা ওইবগী খক্তা নত্তনা, ভারতকী তুংলমচৎকী চাওখৎপা শেন্মিৎলোন অমদি অপুন্বগী শক্তমদা চাউনা থৌদাং য়াগদবা লমদম অমা ওইনা তরং তরং ঙানগদবা মীৎকুপ অমসু ওইগনি‍।

পান্দম অমদি মরুওইবা

ইহান হান্বা অস্তলক্সমী মহোতসব অসিনা অৱাং নোংপোক ভারতকী মশক মচু থোক্লবা তেক্সতাইল সেক্তর, তুরিজমগী খুদোংচাবশিং, থায়নদগী চৎনরক্লবা খুৎ-শা হৈবগী মশিল, অমদি তোপ তোপ্না লৈরিবা জিওগ্রাফিকেল ইন্দিকেসন (GI) তেগ তৌরবা পোত্থোকশিং উত্থোক্নবা ইচঙ থৌরবা ফম্পাক অমা পীননবা পান্দম থম্লি‍। মসিনা, ভারতকী তুংগী চাওখৎ খোঙথাংদা লমদমসিগী মরুওইবা ৱাফমশিংদা মীৎয়েঙ থম্বগা লোয়ননা লমদম অসিগী নাৎকী লনশিংবু সেলেব্রেত তৌনবা ফম্পাক অমসু ওইগনি‍। কুমহৈ অসি, অৱাং নোংপোক ভারতকী খেন্নবা শক্তমশিং অমদি নাৎকী ইনাক খুন্ববু মখা তানা ইকায়খুম্নদুনা লমদম অসিদা তুংদা শেন্মিৎলোনগী খুমাঙ চাওশিন্বা পুরক্নবা মথৌ হাপ্নবা ৱাখল্লোন্দা শেমগৎখিবা চহিগী ওইবা থৌরম অমনি‍।

মহোতসব অসিনা অৱাং নোংপোক ভারত্তা ইনফ্রাস্ত্রকচর শেমগৎপগী মরুওইবা অমদি মসিনা পীগদবা অওন্বা পুরক্কদবা ইথিলশিংদা মরুওইবা মীৎয়েঙ থমগনি‍। লমদম অসিগী ফগৎলবা কন্নেক্তিবিতী, ইন্দস্ত্রিএল গ্রোথ, অমসুং ত্রান্সপোর্ত, ইনর্জী, অমদি দিজিতেল ইনফ্রাস্ত্রকচরনচিংবা সেক্তরশিংদা চাওখৎ থৌরাংগী থবক পায়খৎলিবশিং অসিনা ভারতকী চাওখৎ খোঙচত্তা লমদমসিগী থৌদাং হেন্না মশক থোকহনগদৌরি অমদি ত্রেদ অমদি বিজিনেসকী অনৌবা খুদোংচাবশিং পুরক্কনি‍।

মহোতসব অসিগী মাস্কোত: পুর্বী

থৌরম অসিনা পুর্বী হায়রিবা অস্তলক্সমী মহোতসবকী মাস্কোত অসি পুথোকখি‍। নৌরিবা নুপীমচা অমা ওইরিবা পুর্বীনা অৱাং নোংপোক ভারতকী স্তেত পুম্নমক্কী মহুৎ শৎল্লি‍। খেন্নবা কয়াগী লক্তা অমত্তা ওইবা শক্তমবু তাক্লিববা, পুর্বীনা লমদম অসিগী পারী পুরীগী লন, নাৎ, অমসুং মঙলিবা মঙলানশিং থৌরম অসি লোইখ্রবা মতুং ফাওবদা মহুৎ শিন্দুনা লৈহৌগনি‍।

পুর্বী, দি মাস্কোত

মরুওইবা থৌরমশিং

অসস্তলক্সমী মহোতসব অসিদা অৱাং নোংপোক ভারতকী ইনাক খুল্লবা নাৎ অমদি শেন্মিৎলোন উত্থোকপা মখল মখা কয়াগী থৌরমশিং পাঙথোক্কনি‍। খুৎহৈবা ২৫০ হেন্বনা GI-তেগ তৌরবা পোৎলম ৩৪ য়াওনা তোপ তোপ্পা হেন্দিক্রাফ্ত, হেন্দলুম, অমসুং এগ্রি-হোর্তিগী পোত্থোকশিং উৎকনি‍।

তেক্নিকেল সেসনশিংনা নুপীগী লীদর্সিপ, IT, ইনর্জী, হেল্থকেয়র, অমদি অতৈ অতৈ কয়া য়াওনা মরুওইবা চাওখৎ থৌরাংগী লমশিংদা মীৎয়েঙ থমগনি‍। ইনভেস্তর্স রাউন্দতেবল অমনা হেন্দিক্রাফ্ত, এগ্রিকলচর, অমদি তুরিজম্নচিংবা সেক্তরশিংদা খুদোংচাবশিং নৈনগনি, অদুগা বাইয়র-সেল্লর মীতশিংনা বিজিনেস কোলাবোরেসন য়োকখৎকনি‍। দিজাইন কনক্লব অমদি ফেসন সোশিংনা থায়নদগী চৎনরকপা অমদিম তমগী ফেসন অনি পুনশিন্নবগী শক্তমশিং উৎকনি‍। অস্তলক্সমী গ্রামীন হাত অসিনা ত্রেদিস্নেল কৈথেলগী ইহুল ফাওহন্বগা লোয়ননা অস্তলক্সমী সিম্ফনী, সিলোং চেম্বর কোইর, অমদি ত্রেদিস্নেল জগোয়নচিংবা মচু মমেন্না থল্লবা কলচরেল পর্ফোর্মেন্সশিংনা মীৎয়েঙ তারিবশিংগী পুক্নিং চিংশিনগনি‍। পন্বা য়াবশিংগী মরক্তা PANGPARI বেন্দ, SOFIYUM, প্রসাদ বিদাপাগী ফেসন সো, অমসুং পুক্নিং হুরবা BASAV, ফীদরহেদ হাউকুই, অমসুং তাই খমতি জগোয়গী পর্ফোরমেন্সশিং লোইবা নুমিত্তা খুদোল তমগনি‍।

অৱাং নোংপোক ভারত্তা শেল থাদবগী খুদোংচাবশিংয়

অস্তলক্সমী মহোতসব অসিনা খোঙজেল অমদি চৎনবী অনিগী শক্তমশিং নীংথিনা উত্তুনা অৱাং নোংপোক ভারতকী অওন্বা পুরকপগী খোঙচৎকী শক্তম অমা উবা ফংহনগদৌরি‍। লমদম অসিনা মখা তানা অওনবা পুরকপগা লোয়ননা, হৌজিক পায়খৎলিবা ইনফ্রাস্ত্রকচর দিভেলপমেন্তকী থবকশিংনা তোঙান তোঙানবা সেক্তরশিংদা ইনভেস্তমেন্তকী খুদোংচাবা কয়া পুরক্লি‍। চাওখৎপগী মরুওইবা হীরমশিং থোরক্তুনা, হীরম খুদিংদা লমদম অসিগী তুংলমচৎ শেম্নবা মতিং উৎলি‍। হায়রিবা হীরমশিং অসিদা য়াওরিবশিং অদুদি:

ইনফ্রাস্ত্রকচর দিভেলপমেন্ত: লম্বী, থোং, অমদি রেল নেতৱর্ক পাকথোক চাউথোকহন্বনা কন্সত্রক্সন অমদি দিভেলপমেন্ত সেক্তরশিংদা ইনভেস্তমেন্তকী খুদোংচাবশিং ফংহল্লি‍।

হেন্দলুম অমদি হেন্দিক্রাফ্ত: হেন্দলুম অমদি হেন্দিক্রাফ্ত সেক্তরদা শেল থাদবনা ত্রেদিস্নেল আর্ত য়োকখৎপা, থবক পীবা, অমদি মপান্দা থাদোকপা হেনগৎহনগনি‍।

লৌউ-শিংউ অমদি এগ্রো-বেজ ইন্দস্ত্রীশিং: লৈহাও লৈরবা তম্পাক অমদি অকন্বা ওর্গানিক লৌউ-পথাপকী চৎনবী লৈদুনা, মফমসিদা ফুদ প্রোসেসিং ইন্দস্ত্রিজ, কোল্দ স্তোরেজ, অমদি এগ্রো-বেজ ভেঞ্চরশিংদা শেল থাদনবা খুদোংচাবশিং লৈরি‍।

তুরিজম অমদি হোস্পিতেলিতী: অৱাং নোংপোক ভারতকী মহৌশাগী ফজবা অমদি খেন্নবা নাৎকী লনশিংনা ইকো-তুরিজম, এদভেঞ্চর তুরিজম, অমদি হোস্পিতেলিতী ইনফ্রাস্ত্রকচর শেমগৎপদা শেল থাদনবা খুদোংচাবা মরাং কায়না পীরি‍।

IT অমদি ITES: লমদম অসিগী চাওখৎলক্লিবা IT ইন্দস্ত্রী অমদি লমদমসিগী অৱাংবা লিতরেসী রেত অমসুং ইংলিস লোল ঙাংবা মীয়াম্না লমদম অসিবু IT কম্পেনী অমদি স্তার্তঅপশিংগী পুক্নিং চিংশিন্নিংঙাই ওইরবা লমথুংফম অমা ওইহল্লি‍।

থাউ থেংনবা অমদি রেলৱেজকী লিগেরী: ১৯শুবা চহিচাগী অথেঙবা শরুক্তা অসামদা থাউ লৈরম্বা থেংনখিবনা ভারতকী অহান্বা ওইল রিফাইনরী দিগবোইদা লিংখৎখি অমদি লমদম অসিগী অহান্বা রেলৱেজ শেমগৎ শাগৎখি‍।

দিভেলপমেন্ত অসিনা ইন্দস্ত্রী চাওখৎহনখি, কন্নেক্তিবিতী ফগৎহনখি, অমদি অৱাং নোংপোক ভারতপু মরুওইবা ইকনমিক প্লেয়র অমা ওইহনখি‍। ঙসিদি, লমদম অসিনা লিগেসী অসিদা য়ুম্ফম ওইদুনা ইনফ্রাস্ত্রকচর অমদি ইন্দস্ত্রীগী লমদা মশক থোক্না খুমাঙ চাওশিন্বা ঙম্লি‍।

অৱাংনোংপোক ভারতকী স্ত্রেতেজিক ইম্পোর্তেন্স: অৱাং নোংপোক ভারতনা মফম চানা লৈরিবা অসিগা লোয়ননা ইনাক খুল্লবা মহৌশাগী লনশিং, অমসুং ইনফ্রাস্ত্রকচর ফগৎহন্বনা লমদম অসিবু খা-নোংপোক এসিয়াগী মায়কৈদা মরুওইবা হোজঙ অমা ওইহল্লি‍। অচৌবা ইনফ্রাস্ত্রকচর ইনিসিএতিবশিং পায়খৎপগা লোয়ননা, লমদম অসিনা ত্রেদ, তুরিজম অমদি ইন্দস্ত্রীগী হব অমা ওইদুনা ভারতকী শেন্মিৎলোন চাওখৎহন্বদা মরুওইবা শক্লোন লৌরক্কদৌরি‍। অস্তলক্সমী মহোতসব অসি লমদম অসিগী খোঙজেল উত্থোক্নবা, মফমসিগী নাৎকী লন পুথোক্নবা, অমদি তুংগী চাওখৎ থৌরাংগী অনৌবা ইনভেস্তমেন্ত কৌনবা মরুওইবা থৌরম অমনি‍।

মহোতসব অসিনা লমদম অসিগী মশক মচু নাইরবা খোঙজেল উত্থোক্নবা, অৱাংনোংপোক ভারতকী ইনাক খুল্লবা নাৎকী লন পুথোক্নবা, অমদি তুংগী চাওখৎ থৌরাংগী অনৌবা ইনভেস্তমেন্ত কৌনবা মরুওইবা মীৎকুপ অমা ওইরি‍।

ৱারোয়শিন

অস্তলক্সমী মহোতসব অসিনা নাৎকী অমদি শেন্মিৎলোনগী লমদা মরুওইবা থৌরম অমা ওইবগা লোয়ননা রিজনেল পৱারহাউস অমা ওইনা অৱাং নোংপোক ভারতকী লৈরিবা তুংলমচৎকী মশক অমা উবা ফংহল্লি‍। চৎনবী, নাৎ, অমদি শেন্মিৎলোনগী মতিংদা মরুওইবা মীৎয়েঙ থমদুনা, কুমহৈ অসিনা ভারতকী মপুং ওইবা চাওখৎ থৌরাংদা কাউঙম্লোইদবা ইথিল অমা পীনবা পান্দম থম্লি‍।

রিফরেন্সশিং:

https://www.ashtalakshmimahotsav.com/

https://pib.gov.in/PressReleasePage.aspx?PRID=2079183#:~:text=Ashtalakshmi%20Mahotsav%2C%20celebration%20of%20the,th%20to%208th%20%2C%202024.

PDF ফাইল মফমসিদা য়েংবিয়ু

****