Ka PM Surya Ghar: Muft Bijli Yojana (PMSGMBY), ka skhim kaba heh tam ha pyrthei ba iadei bad ka jingpyndait bording solar ha ki tnum iing, ka la pynkylla ia ka jinglong ka bording solar ha India. Shuwa u Lber 2025, la antad ba ka jingpyndait kan tam 10 lak, ka ban kiew sha ka 20 lak shuwa u Lber 2024, 40 lak shuwa u Lber 2026, bad shi klur ba la buh thong shuwa u Lber 2027. Tang hapoh 9 bnai jong ka PMSGMBY, la lah ban pyndep 6.3 lak ka jingpyndait bording solar- ka average kaba 70,000 shi bnai. Kane kalong ka jingkiew kaba shiphew shah ki jingpyndait bording solar man ka bnai haba ianujor bad ka average kaba 7,000 shi bnai hashuwa ka jingsdang ia ka skhim ha u Rymphang 2024. Ki Jylla kum ka Gujarat, Maharashtra, Kerala, bad Uttar Pradesh ki la pyni ka jingiaid shaphrang, ka pyni ia ka jingkiew ki jingdon jingem bad ka jingkiew ka jingiatreilang bad ki briew kiba iadon bynta ha kane ka kam.

Ka jingkiew shaphrang ka PMSGMBY kalong ka dak jong ka jingpynkhreh ia ki kam, bad ka skhim ka don ha ka lynti ban pynsted ka jingkiew shaphrang ha ki bnai ban wan, kaba prat lynti ia ka lawei kaba iaineh ha ka bording solar ha ki tnum iing.

La pynbeit ia ki jingeh ban pyntreikam na ka bynta ka jingsdang kloi

La lah ban pynbeit ia ki jingeh ha ka jingpyntreikam ban pynstes ia ka jingsdang. Ki DISCOM ki la sdang ia ki auto-load enhancement ban pynthikna ka bor pynmih bording, kaba la pynduna ia ki kyndon da kaba weng ia ki kaiphod Technical Feasibility Report (TFR) na ka bynta ki kam kiba hapoh 10kW. Ka jingpeit ha ka por kaba biang da ki DISCOM ka la pynsted ia ka jingpyllait ia ki subsidy, bad ki sienjam ki la pynthikna ia ka jingdon ki net meter. Ki sienjam ban pynbun ia ki nongdie ki la kyrshan ia ka jingpyllait sted, bad la kyrshan ruh da ki lad bei tyngka kiba jem dor lyngba ka rynsan Jan Samarth na ka bynta ki kam kiba hapoh 3kW.

Ka jingpynbiang ia ki jingdon jingem na ka bynta ka jingpyniar ia ka jingpyndonkam

Ka jingtei ia ki kam IT ba khlain ban pyniasoh palat 90 tylli ki DISCOM, ki bank bad kiwei kiwei kiba iadon bynta ha kane ka kam ka la long kaba donkam bha ha ki kam ban wanrah ia ka jingiatreilang kaba iar. Ka jingkyntiew ia ki nongdie ka la long ka kam kaba kongsan ha kaba jan 9,000 ngut ki nongdie ki la don bad dang bun kiba dang pyniasoh man ka sngi. Ki sienjam ban kyntiew ia ka bor treikam ki la ai jinghikai ia 40,000 ngut ki briew ban pynthikna ka jingbha ha ka rukom pyndait bad ka jingai ki jingshakri. Yn ai jinghikai sa ia 2 lak ngut ki briew ha kine ki phra bnai ban wan. Shuh shuh, palat 50,000 ngut ki engineer na ki DISCOM ki ioh ia ka jinghikai ba kyrpang ban peit bad sdang ia ki rooftop solar plant bad ai ki net meter.

Ka jingpynsuk ia ki nongthied
Ka skhim ka la pynsuk ruh ia ka kam jong ki nongthied. Mynshuwa, kito kiba aplai ki hap ban ai shibun ki kot ki sla bad ki hap leit khari khari sha ki ophis jong ki DISCOM. Mynta, bun ki DISCOM ki la weng noh ia ka jingdonkam ban ioh ia ki jingbit Technical Feasibility na ka bynta ki kam kiba hapoh 10kW bad ki la pynkylla digital ia ki kam jong ki kaba la pynduna ia ka jingdonkam ban ai ki kot ki sla bad kaba la pynsted ia ka rukom ai application. Mynta lah ban ai application hapoh 5 minit ha ka www.pmsuryaghar.gov.in, kaba plié lad ruh ia ka jingjied ia ki nongdie. Kiba aplai ki lah ruh ban pyndonkam ia ka GIS ha kane ka rynsan ban peit ia ka tnum bad sngewthuh donkam ka rooftop solar system kaba katno. Lah ban shim ram ha ka sut kaba 7% ha kane ka rynsan. Hadien ba la pyndait, lah ruh ban upload ia ki jingtip hapoh ki minit. Ka rynsan ka ai jingtip hi ia ki DISCOm ban leit peit, bad hadien kane kiba aplai ki lah ban shim ia ka subsidy lyngba kane ka rynsan.

Ka rukom ai subsidy kaba suk
Ka jingsuk ha ka rukom ai subsidy ruh ka long kawei na ki jingjop.Hadien ba la kut ka Model Code of Conduct ha u Jylliew 2024, ka jingpyllait pisa ka la sdang bran bran. Shuwa u Naiwieng 2024, palat T 3,100 klur ka dei kaba la pyllait sha palat saw lak ki briew. Na ka jingdon kumba 67,000 tylli ki longiing kiba ioh subsidy man u bnai, ka skhim ka pyni ia ka rukom treikam kaba khlain bad ka jingkut jingmut ban ai ka jingiarap pisa ha ka por kaba biang. Ia ki subsidy mynta la pyndep hapoh 15 sngi kaba la wanrah ia ka jinghun ha ki briew.

Ki longiing kiba hun

Namar ki longiing ki ioh kloi ia ka subsidy bad namar ka jinghiar ka bai bording, ki briew kiba aplai ki dang bun katba dang iaid ki sngi. 28% jong ki iing mynta kim hap siew ei ei na ka bynta ka bording.

Ki prokram ai jingtip kiba iar
Ki jingai jingtip kiba iar ki la iarap shuh shuh ia kine ki sienjam bad ki la wanrah ia ki jingkyntiew kyrteng bad ki la ai jinghikai ruh ia ki longiing shaphang ki jingmyntoi kiba wan na kane ka skhim. La kyrmen ba kine ki kam ai jingtip kin kyntiew ia ka jingiashim bynta ka ban wanrah ia ka jingiaid shaphrang jong kane ka kam bad ka jingpdiang ia ka.

Ka PMSGMBY ka la khreh ban pynurlong ia ki thong jong ka – ka la khreh ruh ban wanrah ia ka juk kaba thymmai jong ka jingjop ki rooftop solar kaba long ka nuksa jong ka rukom pynmih bording kaba iaineh. Lyngba ki jingdon jingem kiba khlain, ki rukom treikam kiba suk, bad ka jingthmu kaba shai, kane ka skhim ka la khreh ban mad ia ka jingkiew shaphrang kaba sted. Ka la khreh ruh ban wanrah ia ki jingmyntoi ha ka imlang sahlang bad ka ioh ka kot kum ka nuksa sha ka pyrthei jong ka jingpdiang ia ka rukom pynmih bording kaba lah ban pynthymmai bad kaba pynbiang bording ia ki million tylli ki iing ha kylleng ka ri.

****