U Vice Chairperson ka NITI Aayog, Suman Bery u la pyllait paidbah ia ka kot kaba thymmai jong ka NITI Aayog kaba peit ia ki kam khaii jong ka India na ka bynta ki lai bnai ba nyngkong jong u snem mang tyngka 2024 (Iaiong haduh Jylliew), ha ka 4 tarik u Nohprah 2024 ha New Delhi ha ka jingiadon lang ki dkhot ka NITI Aayog u Dr. V.K. Saraswat bad Dr. Arvind Virmani; BVR Subrahmanyam, CEO, NITI Aayog bad kiwei kiwei ki ophisar. Kane ka kot ka plie lad ban iohi ia ka kam khaii jong ka India ha kaba la pyniasoh lang bad ki jingdawa mar ha kylleng ka pyrthei, ki jingseisoh jong ki kam bapher bapher, bad ki jingbatai shaphang ki lad khaii pateng ba dang mih.

Ha ki lai bnai ba nyngkong jong u snem mang tyngka 2024, ka kam khaii pateng jong ka India ka la iaid ryntih bad ka la don khyndiat ka jingkiew. Baroh ka kam khaii ka long $576 billion, kaba long ka jingkiew kaba 5.45% na u snem sha u snem. Ka jingshalan ia ki mar ka la don khyndiat ka jingkiew namar ka jing duna ha ki kam ba kongsan kiba iadei bad ki nar, ha ryngkat ki pearl. Ha kawei ka liang pat, ka jingshalan mar shapoh ri ka la wan lyngba ki mar ba kham heh dor, ba kynthup ia ki liengsuin, ki liengsuin ba her sha ka haw haw, ki mar poh khyndew, bad ki umphniang bam. Ka jingshalan ia ki jingai jingshakri ka la tam.

U Vice Chairperson Suman Bery u la batai ia ki jingshem jong u bad u la ong ba kane ka kot kan plie lad ia ka jingshim ia ki rai da kaba sngewthuh ia ki jinglong jingem, kan pynkhlain ia ki sienjam katkum ki polisi, bad wanrah ia ka roi ka par ha ka kam khaii bad kiwei kiwei ki ri. U la ong ba ki jingshem ha kane ka kot kin iarap bha ha ka jingshna ia ki polisi bad ki sienjam ha ki por ban wan na ka bynta ka jingkyntiew ia ki kam kiba iadei bad ka khaii pateng da kaba shem ia ki iew bad ki kam ba ka India ka kham khlain.

U Dr. Arvind Virmani, Dkhot NITI Aayog u la kitbok kitrwiang ia ka kynhun kaba la pynmih ia kane ka kot kaba bniah bad u la ong ba kane ka kot kan long ka atiar kaba khlain ha ka kam khaii pateng jong ka India.

Ha kane ka sngi, u BVR Subrahmanyam, CEO, NITI Aayog u la ban jur halor ka jingkongsan jong ka jingshim ia ki sienjam katkum ka data bad ki sakhi bad u la ong ba ka jingpynbiang ia ka jingbatai ia ki kam khaii jong k India man ka lai bnai lyngba kane ka kot kan kyrshan ia ka jingshna ia ki polisi katkum ki jinglong jingman. Kane ka sienjam ka iahap bad ka jingkut jingmut ban pynkhlain ia ka kam khaii jong ka India katkum ka thong ban pyndonkam ia ka bor jong ka India ha ki kam khaii na ka bynta ka Viksit Bharat (India@2047) bad ban pynthikna ka roi ka par kaba ryntih lang ia baroh ha ka kam khaii pateng kaba kylla sted ha ka pyrthei.

La pyntip ruh ba kane ka kot ka long kum ka dak jong ka jingpyllait paidbah ia ka thup ki kot ki ban mih man ka lai bnai kiba thmu ban ai jingtip ha ka por kaba biang shaphang ki kam khaii jong ka India.

Lah ban ioh ia ka kot na ka: https://www.niti.gov.in/sites/default/files/2024-12/Trade-Watch.pdf

***