സി ഐ ഐ പ്രസിഡന്റ് ശ്രീ സഞ്ജീവ് പുരി ജി, വ്യാവസായിക ലോകത്തെ പ്രമുഖ വ്യക്തികൾ, മുതിർന്ന നയതന്ത്രജ്ഞർ, രാജ്യത്തുടനീളമുള്ള വ്യവസായ പ്രമുഖർ, വീഡിയോ കോൺഫറൻസിംഗ് വഴി ഞങ്ങളോടൊപ്പം ചേരുന്ന മറ്റ് വിശിഷ്ട വ്യക്തികളേ, സ്ത്രീകളേ മാന്യവ്യക്തിത്വങ്ങളേ! 

ഇത് യുവാക്കളുടെ ഒത്തുചേരലായിരുന്നെങ്കിൽ, 'ആവേശം എങ്ങനെയുണ്ട്? എന്ന് ഞാൻ തുടങ്ങുമായിരുന്നു. എന്നാൽ ഈ ചോദ്യത്തിൽ നിന്ന് ആരംഭിക്കാനുള്ള ശരിയായ സ്ഥലവും ഇതുതന്നെയാണെന്ന് തോന്നുന്നു. എന്റെ രാജ്യത്തെ പ്രഗത്ഭരായ വ്യക്തികൾ ആവേശഭരിതരായിരിക്കുമ്പോൾ, ഭാരതത്തിന് ഒരിക്കലും പിന്നിലാകാൻ കഴിയില്ല. ഈ പ്രോഗ്രാമിലേക്ക് എന്നെ ക്ഷണിച്ചതിന് ഞാൻ CIIക്ക് എന്റെ ഹൃദയംഗമമായ നന്ദി രേഖപ്പെടുത്തുന്നു. ഞാൻ ഓർക്കുന്നു, പകർച്ചവ്യാധിയുടെ സമയത്ത് ഞങ്ങൾ ചർച്ചകൾ നടത്തിയിരുന്നു, നിങ്ങളിൽ പലരും ഓർക്കുന്നുണ്ടാകും. 'വളർച്ച തിരിച്ചുവരുന്നു' എന്നതായിരുന്നു കേന്ദ്ര വിഷയം. ഇന്ത്യ ഉടൻ വികസനത്തിന്റെ പാതയിലെത്തുമെന്ന് അന്ന് ഞാൻ ഉറപ്പ് നൽകിയിരുന്നു. പിന്നെ നമ്മൾ ഇന്ന് എവിടെയാണ് നിൽക്കുന്നത്?  ഇന്ത്യ  8 ശതമാനമെന്ന ആകർഷകമായ വളർച്ചാ നിരക്കിൽ വികസിക്കുകയാണ്. ഇന്ന് നമ്മൾ എല്ലാവരും ചർച്ച ചെയ്യുന്നത് 'വികസിത ഭാരതത്തിലേക്കുള്ള യാത്ര' ആണ്. ഈ പരിവർത്തനം കേവലം വൈകാരികമല്ല; അത് ആത്മവിശ്വാസത്തെക്കുറിച്ചുള്ളതാണ്. നിലവിൽ ഇന്ത്യ ലോകത്തിലെ അഞ്ചാമത്തെ വലിയ സാമ്പത്തിക ശക്തിയാണ്, ഇന്ത്യ ആഗോളതലത്തിൽ മൂന്നാമത്തെ വലിയ സാമ്പത്തിക ശക്തിയായി മാറുന്ന ദിവസം വിദൂരമല്ല. തെരഞ്ഞെടുപ്പിന് മുമ്പ് നൽകിയ വാഗ്ദാനങ്ങൾ അതു കഴിഞ്ഞാൽ മറക്കുന്നതിൽ കുപ്രസിദ്ധിയാർജ്ജിച്ചിട്ടുള്ളവരാണ് രാഷ്ട്രീയക്കാർ. എന്നിരുന്നാലും, ഈ പ്രവണതയ്ക്ക് ഞാൻ ഒരു അപവാദമായി നിലകൊള്ളുന്നു. എന്റെ മൂന്നാം ടേമിൽ ഇന്ത്യ മൂന്നാമത്തെ വലിയ സമ്പദ്‌വ്യവസ്ഥയായി മാറുമെന്ന് ഞാൻ വാഗ്ദാനം ചെയ്തു, നമ്മൾ ആ ലക്ഷ്യത്തിലേക്ക് ക്രമാനുഗതമായി മുന്നേറുകയാണ്. 

സുഹൃത്തുക്കളേ,

2014ൽ രാജ്യത്തെ സേവിക്കാനുള്ള അവസരം നിങ്ങൾ ഞങ്ങളെ ഏൽപ്പിച്ചപ്പോൾ, 2014ൽ ഞങ്ങൾ ​ഗവൺമെന്റ് രൂപീകരിച്ചപ്പോൾ, ഞങ്ങളുടെ ​ഗവൺമെന്റ് ഒരു നിർണായക വെല്ലുവിളി നേരിട്ടു: സമ്പദ്‌വ്യവസ്ഥയെ എങ്ങനെ തിരികെ കൊണ്ടുവരാം. 2014 ന് മുമ്പ് നമ്മുടെ രാജ്യത്തെ ബാധിച്ച 'ഫ്രജൈൽ ഫൈവ്' സാഹചര്യവും ലക്ഷക്കണക്കിന് കോടി രൂപയുടെ അഴിമതികളും നാമെല്ലാവരും ഓർക്കുന്നു. അന്നത്തെ സമ്പദ്‌വ്യവസ്ഥയുടെ അവസ്ഥ വിശദീകരിക്കുന്ന ഒരു ധവളപത്രം നമ്മുടെ ​ഗവൺമെന്റ്  അവതരിപ്പിച്ചു. ഞാൻ ഇപ്പോൾ ആ വിശദാംശങ്ങളിലേക്ക് കടക്കുന്നില്ലെങ്കിലും, ഞങ്ങളുടെ മുൻകാല സാമ്പത്തിക സാഹചര്യങ്ങളും ഞങ്ങൾ അഭിമുഖീകരിച്ച വെല്ലുവിളികളും പഠിക്കാനും സംവാദം നടത്താനും ഞാൻ നിങ്ങളെയും നിങ്ങളെപ്പോലുള്ള സംഘടനകളെയും പ്രോത്സാഹിപ്പിക്കുന്നു. ഭാരതത്തെയും അതിന്റെ വ്യവസായത്തെയും ആ വലിയ പ്രതിസന്ധിയിൽ നിന്ന് കരകയറ്റി, നാം ഇന്നുള്ള ഉയരങ്ങളിലെത്തി. കുറച്ച് ദിവസങ്ങൾക്ക് മുമ്പ്, ബജറ്റ് അവതരിപ്പിച്ചു, നിങ്ങളുടെ സ്ഥാപനം നന്നായി തയ്യാറാക്കിയ ഒരു രേഖ ഞാൻ നോക്കുകയായിരുന്നു, അത് ഞാൻ വിശദമായി പഠിക്കാൻ ആഗ്രഹിക്കുന്നു. ബജറ്റിനെക്കുറിച്ചുള്ള ചർച്ചകൾ നടന്നുകൊണ്ടിരിക്കുന്നതിനാൽ, ചില പ്രധാന വസ്തുതകൾ നിങ്ങളുമായി പങ്കിടാൻ ഞാൻ ആഗ്രഹിക്കുന്നു.

സുഹൃത്തുക്കളേ,

2013-14ൽ ഡോ. മൻമോഹൻ സിങ്ങിന്റെ കീഴിലുള്ള മുൻ ​ഗവൺമെന്റിന്റെ അവസാന ബജറ്റ് 16 ലക്ഷം കോടിയായിരുന്നു. ഇന്ന് നമ്മുടെ ​ഗവൺമെന്റിന്റെ കീഴിൽ ബജറ്റ് മൂന്നിരട്ടി വർധിച്ച് 48 ലക്ഷം കോടിയായി. വിഭവ നിക്ഷേപത്തിന്റെ ഏറ്റവും ഉൽപ്പാദനക്ഷമമായ രൂപമായി അംഗീകരിക്കപ്പെട്ട മൂലധനച്ചെലവിന് കൗതുകകരമായ ഒരു പാതയുണ്ട്. 2004ൽ അടൽജിയുടെ ​ഗവൺമെന്റിന്റെ കാലാവധി അവസാനിച്ചപ്പോൾ യുപിഎ ​ഗവൺമെന്റിന്റെ ആദ്യ ബജറ്റിലെ മൂലധനച്ചെലവ് ഏകദേശം 90,000 കോടി രൂപയായിരുന്നു. ഒരു ദശാബ്ദം അധികാരത്തിലിരുന്ന് 2014 ആയപ്പോഴേക്കും യുപിഎ ​ഗവൺമെന്റ് ഇത് 2 ലക്ഷം കോടി രൂപയായി ഉയർത്തി. ഇന്ന് നമ്മുടെ മൂലധനച്ചെലവ് 11 ലക്ഷം കോടി കവിഞ്ഞു. താരതമ്യപ്പെടുത്തുമ്പോൾ, മുൻ ​ഗവൺമെന്റ് ഒരു ദശാബ്ദത്തിനിടെ അതിന്റെ മൂല്യം ഇരട്ടിയാക്കിയപ്പോൾ, നമ്മുടെ ഗവൺമെന്റ് അത് അഞ്ചിരട്ടിയിലധികം വർദ്ധിപ്പിച്ചു. വിവിധ മേഖലകൾ പരിശോധിക്കുമ്പോൾ, ഓരോ മേഖലയുടെയും സമ്പദ്‌വ്യവസ്ഥയിൽ ഇന്ത്യ ഇപ്പോൾ എങ്ങനെ ശ്രദ്ധ കേന്ദ്രീകരിക്കുന്നുവെന്ന് നിങ്ങൾക്ക് കാണാൻ കഴിയും. മുൻ ഗവൺമെന്റിന്റെ 10 വർഷത്തെ അപേക്ഷിച്ച് നമ്മുടെ ഗവൺമെന്റ് റെയിൽവേ ബജറ്റ് എട്ട് മടങ്ങും ഹൈവേ ബജറ്റ് എട്ട് മടങ്ങും കാർഷിക ബജറ്റ് നാലിരട്ടിയും പ്രതിരോധ ബജറ്റ് രണ്ട് മടങ്ങും വർധിപ്പിച്ചു. 

ഒപ്പം സുഹൃത്തുക്കളേ,

എല്ലാ മേഖലകളിലും അഭൂതപൂർവമായ ബജറ്റ് വർദ്ധനയിലൂടെ മാത്രമല്ല, നികുതികളിലെ റെക്കോർഡ് കുറവുകളിലൂടെയും ഈ പുരോഗതി കൈവരിക്കാനായി. 2014ൽ, ഒരു കോടി രൂപ വരുമാനമുള്ള MSMEകൾക്ക് അനുമാന നികുതി തിരഞ്ഞെടുക്കാമായിരുന്നു. ഇപ്പോൾ, 3 കോടി രൂപ വരെ വരുമാനമുള്ള MSMEകൾക്ക് ഈ പദ്ധതിയുടെ പ്രയോജനം ലഭിക്കും. 2014ൽ 50 കോടി രൂപ വരെ വരുമാനമുള്ള എം എസ്എം ഇകൾക്ക് 30 ശതമാനം നികുതി ഏർപ്പെടുത്തിയിരുന്നെങ്കിൽ ഇന്ന് അത് 22 ശതമാനമായി കുറഞ്ഞു. അതുപോലെ, 2014ൽ 30 ശതമാനമായിരുന്ന കോർപ്പറേറ്റ് നികുതി നിരക്ക് 400 കോടി രൂപ വരെ വരുമാനമുള്ള കമ്പനികൾക്ക് ഇപ്പോൾ 25 ശതമാനമാണ്.

സുഹൃത്തുക്കളേ,

ഇത് ബജറ്റ് വിഹിതം കൂട്ടുകയോ നികുതി കുറയ്ക്കുകയോ മാത്രമല്ല. സദ്ഭരണം നടപ്പിലാക്കുക എന്നതു കൂടിയാണ്. ഇത് ഒരു ഉദാഹരണത്തിലൂടെ ഞാൻ വ്യക്തമാക്കാം. ഉദാഹരണത്തിന്, ഭാരം കുറഞ്ഞ് ബലഹീനനായി കാണപ്പെടുന്ന ഒരു വ്യക്തിയെ പരിഗണിക്കുക, എന്നാൽ അസുഖം മൂലം ശരീരം വീർക്കുകയും അവരുടെ വസ്ത്രങ്ങൾ മുമ്പത്തേക്കാൾ ഇറുകിയിരിക്കുകയും ചെയ്യുന്നു. ഈ രൂപത്തിൽ, നാം അവരെ ആരോഗ്യമുള്ളവരായി കണക്കാക്കുമോ? നാം അവരെ അനുയോജ്യരായി കണക്കാക്കുമോ? അവർക്ക് പുറമേ ആരോഗ്യമുള്ളതായി തോന്നിയേക്കാം, എന്നാൽ വാസ്തവത്തിൽ, അവർ അങ്ങനെയല്ല. 2014ന് മുമ്പുള്ള ബജറ്റിന്റെ സ്ഥിതിയും സമാനമായിരുന്നു. ആരോഗ്യകരമായ സമ്പദ്‌വ്യവസ്ഥയുടെ പ്രതീതി സൃഷ്ടിക്കാൻ അക്കാലത്ത് കാര്യമായ പ്രഖ്യാപനങ്ങൾ നടത്തി. എന്നാൽ, ഈ പ്രഖ്യാപനങ്ങൾ അടിസ്ഥാന തലത്തിൽ പൂർണമായി നടപ്പാക്കിയില്ല. അടിസ്ഥാന സൗകര്യ വികസനത്തിന് അനുവദിച്ച ഫണ്ട് പൂർണമായും ചെലവഴിച്ചില്ല. ഈ പ്രഖ്യാപനങ്ങൾ തലക്കെട്ടുകൾ സൃഷ്ടിക്കുകയും ഇടയ്ക്കിടെ ഓഹരി വിപണിയെ സ്വാധീനിക്കുകയും ചെയ്തു. എന്നാൽ, പദ്ധതികൾ സമയബന്ധിതമായി പൂർത്തീകരിക്കുന്നതിന് മുൻ ​ഗവൺമെന്റുകൾ മുൻഗണന നൽകിയിരുന്നില്ല. ഇതിനു വിപരീതമായി, കഴിഞ്ഞ ദശകത്തിൽ ഞങ്ങൾ ഈ സാഹചര്യത്തെ മാറ്റിമറിച്ചു. നമ്മുടെ ഗവൺമെന്റ് അടിസ്ഥാന സൗകര്യങ്ങൾ നിർമ്മിക്കുന്നതിന്റെ അഭൂതപൂർവമായ വേഗതയ്ക്കും വ്യാപ്തിക്കും നിങ്ങൾ സാക്ഷ്യം വഹിച്ചു.

സുഹൃത്തുക്കളേ,

ഇന്നത്തെ ലോകം അനിശ്ചിതത്വങ്ങൾ നിറഞ്ഞതാണ്. അത്തരം ചാഞ്ചാട്ടങ്ങൾക്കിടയിൽ, ഭാരതത്തിന്റെ വളർച്ചയും സ്ഥിരതയും അസാധാരണമാണ്. ഈ അനിശ്ചിത കാലത്തും ഭാരതത്തിന്റെ വിദേശനാണ്യ കരുതൽ ശേഖരം ഗണ്യമായി വർദ്ധിച്ചു. പല രാജ്യങ്ങളും താഴ്ന്ന വളർച്ചയോ ഉയർന്ന പണപ്പെരുപ്പമോ കൊണ്ട് പൊരുതുമ്പോൾ, ഉയർന്ന വളർച്ചയും കുറഞ്ഞ പണപ്പെരുപ്പവും കൊണ്ട് ഭാരതം വേറിട്ടുനിൽക്കുന്നു. മഹാമാരി ഉണ്ടായിട്ടും ഭാരതത്തിന്റെ ധനകാര്യ വിവേകം ലോകത്തിന് മാതൃകയായി. ആഗോള ചരക്ക് സേവന കയറ്റുമതിയിൽ ഞങ്ങളുടെ സംഭാവന ക്രമാനുഗതമായി വർദ്ധിച്ചുകൊണ്ടിരിക്കുകയാണ്, ഇന്ന് ആഗോള വളർച്ചയിൽ ഭാരതത്തിന്റെ പങ്ക് 16 ശതമാനമാണ്. കഴിഞ്ഞ ദശകത്തിൽ നിരവധി പ്രതിസന്ധികൾ നേരിട്ടിട്ടും ഭാരതം ഈ വളർച്ച കൈവരിച്ചുവെന്നത് ശ്രദ്ധേയമാണ്. 100 വർഷത്തിനിടയിലെ ഏറ്റവും കഠിനമായ പകർച്ചവ്യാധി മുതൽ ലോകത്തിന്റെ വിവിധ ഭാഗങ്ങളിൽ നടന്ന യുദ്ധങ്ങൾ, ഭാരതത്തിലെ ചുഴലിക്കാറ്റുകൾ, വരൾച്ചകൾ, ഭൂകമ്പങ്ങൾ തുടങ്ങിയ വലിയ പ്രകൃതി ദുരന്തങ്ങൾ വരെ, നമ്മൾ എല്ലാ വെല്ലുവിളികളും നേരിട്ടു. ഈ പ്രതിസന്ധികൾ ഉണ്ടായില്ലായിരുന്നുവെങ്കിൽ ഭാരതത്തിന്റെ പുരോഗതി ഇതിലും വലുതാകുമായിരുന്നു. എന്റെ വിശ്വാസത്തിന്റെയും അനുഭവത്തിന്റെയും അടിസ്ഥാനത്തിലാണ് ഞാൻ ഇത് ആത്മവിശ്വാസത്തോടെ പറയുന്നത്.

സുഹൃത്തുക്കളേ,

വികസിത ഭാരതം എന്ന കാഴ്ചപ്പാടോടെയാണ് രാഷ്ട്രം ഇന്ന് മുന്നേറുന്നത്. കഴിഞ്ഞ ദശകത്തിൽ 25 കോടി ജനങ്ങൾ ദാരിദ്ര്യത്തിൽ നിന്ന് കരകയറി. നമ്മുടെ പൗരന്മാരുടെ ജീവിത സൗകര്യവും ജീവിത നിലവാരവും വർദ്ധിപ്പിക്കുന്നതിന് നാം പ്രതിജ്ഞാബദ്ധരാണ്.

സുഹൃത്തുക്കളേ,

വ്യവസായം 4.0 മനസ്സിൽ വെച്ചുകൊണ്ട്, നൈപുണ്യ വികസനത്തിനും തൊഴിലിനും ഞങ്ങൾ ഗണ്യമായ ഊന്നൽ നൽകിയിട്ടുണ്ട്. യുവാക്കൾക്കിടയിൽ സംരംഭകത്വത്തിലേക്ക് കടക്കാനുള്ള ആവേശം നിലനിൽക്കുന്നുണ്ട്. മുദ്ര യോജന, സ്റ്റാർട്ട് അപ്പ് ഇന്ത്യ, സ്റ്റാൻഡ് അപ്പ് ഇന്ത്യ തുടങ്ങിയ സംരംഭങ്ങൾ അവർക്ക് വളരെയധികം പ്രയോജനം ചെയ്യുന്നുണ്ട്. മുദ്ര യോജനയിലൂടെ 8 കോടിയിലധികം വ്യക്തികൾ ആദ്യമായി സ്വന്തം ബിസിനസ്സ് ആരംഭിച്ചു. നിലവിൽ, ലക്ഷക്കണക്കിന് യുവാക്കൾക്ക് പുതിയ സംരംഭങ്ങളിൽ ഏർപ്പെടാൻ അവസരമൊരുക്കുന്ന ഏകദേശം 1 ലക്ഷത്തി 40 ആയിരം സ്റ്റാർട്ടപ്പുകൾ രാജ്യത്തുണ്ട്. ഈ ബജറ്റിൽ പ്രഖ്യാപിച്ച 2 ലക്ഷം കോടി രൂപയുടെ പ്രധാനമന്ത്രിയുടെ പാക്കേജ് വ്യാപകമായ പ്രശംസ നേടിയിരുന്നു. 4 കോടിയിലധികം യുവാക്കൾക്ക് നേരിട്ട് ഇതിന്റെ പ്രയോജനം ലഭിക്കും. ഈ പി എം പാക്കേജ് സമഗ്രവും സർവ്വതലസ്പർശിയുമാണ്, ഇത് പരസ്പരബന്ധിതവും, അവസാന പരിഹാരങ്ങൾ വാഗ്ദാനം ചെയ്യുന്നതുമാണ്. അതിന്റെ കാഴ്ചപ്പാട് വ്യക്തമാണ്: ഭാരതത്തിന്റെ തൊഴിൽ ശക്തിയെ ആഗോളതലത്തിൽ മത്സരാധിഷ്ഠിതമാക്കുക, ഇന്ത്യയുടെ ഉൽപ്പന്നങ്ങൾ ഗുണനിലവാരത്തിൽ മാത്രമല്ല മൂല്യത്തിലും മത്സരക്ഷമതയുള്ളതാണെന്ന് ഉറപ്പാക്കുക. ഞങ്ങളുടെ യുവാക്കളുടെ കഴിവുകൾ വർധിപ്പിക്കുന്നതിനും അവരുടെ എക്‌സ്‌പോഷർ വർദ്ധിപ്പിക്കുന്നതിനും അവർക്ക് എളുപ്പമുള്ള തൊഴിലവസരങ്ങൾ നൽകുന്നതിനുമായി ഞങ്ങൾ ഒരു ഇന്റേൺഷിപ്പ് പദ്ധതി അവതരിപ്പിച്ചു. കൂടാതെ, തൊഴിലവസരങ്ങൾ സൃഷ്ടിക്കുന്നവർക്ക് കാര്യമായ പ്രോത്സാഹനങ്ങൾ ലഭിക്കുമെന്ന് ഞങ്ങൾ ഉറപ്പാക്കിയിട്ടുണ്ട്. തൽഫലമായി, ഇപിഎഫ്ഒ സംഭാവനകളിൽ സർക്കാർ ആനുകൂല്യങ്ങൾ പ്രഖ്യാപിച്ചു.

സുഹൃത്തുക്കളേ,

നമ്മുടെ സർക്കാരിന്റെ ഉദ്ദേശവും പ്രതിബദ്ധതയും വളരെ വ്യക്തമാണ്. ഞങ്ങളുടെ ദിശ അചഞ്ചലമായി തുടരുന്നു. രാഷ്ട്രത്തിന് ഒന്നാം സ്ഥാനം നൽകാനുള്ള നമ്മുടെ സമർപ്പണമാ‌യാലും, 5 ട്രില്യൺ ഡോളർ സമ്പദ്‌വ്യവസ്ഥ എന്ന നമ്മുടെ അഭിലാഷമായാലും, ഒരു സാച്ചുറേഷൻ സമീപനം കൈവരിക്കാനുള്ള ഞങ്ങളുടെ ലക്ഷ്യമായാലും, 'സീറോ ഇഫക്റ്റ്, സീറോ ഡിഫെക്റ്റ്' തത്ത്വത്തോടുള്ള നമ്മുടെ പ്രതിബദ്ധതയാണെങ്കിലും, ഒരു സ്വാശ്രയ ഭാരതത്തിനായുള്ള ഞങ്ങളുടെ ഉറച്ച ദൃഢനിശ്ചയം, അല്ലെങ്കിൽ ഒരു വികസിത രാഷ്ട്രത്തിനായുള്ള ഞങ്ങളുടെ ദീർഘകാലാന്വേഷണം, ഞങ്ങൾ പൂർണ്ണ ശ്രദ്ധയോടും നിശ്ചയദാർഢ്യത്തോടും കൂടി പ്രവർത്തിക്കുന്നു. ഞങ്ങൾ നമ്മുടെ സ്‌കീമുകൾ തുടർച്ചയായി വിപുലീകരിക്കുകയും അവയുടെ പുരോഗതി അവലോകനം ചെയ്യുകയും ചെയ്യുന്നു. സർക്കാരിന്റെ സമീപനത്തെക്കുറിച്ചും വികസനത്തോടുള്ള ഞങ്ങളുടെ പ്രതിബദ്ധതയെക്കുറിച്ചും നിങ്ങൾക്ക് നന്നായി അറിയാം. ഞങ്ങൾ തുടർച്ചയായി പുതിയ നാഴികക്കല്ലുകൾ സ്ഥാപിക്കുകയാണ്. അതിനാൽ, വ്യവസായം ​ഗവൺമെന്റിനൊപ്പം പ്രവർത്തിക്കുമെന്നും വാസ്തവത്തിൽ വികസിത ഭാരതം എന്ന കാഴ്ചപ്പാട് കൈവരിക്കുന്നതിൽ ഞങ്ങളോട് മത്സരിക്കുമെന്നും ഞാൻ പ്രതീക്ഷിക്കുന്നു, ഗവൺമെന്റിന്റെ ശ്രമങ്ങളെ നിങ്ങൾ മറികടക്കുമെന്ന് ഞാൻ പ്രതീക്ഷിക്കുന്നു. സർക്കാരും വ്യവസായമേഖല‌യും പിഎം പാക്കേജ് അടിയന്തരമായും പങ്കുവയ്ക്കപ്പെട്ട ഉത്തരവാദിത്തത്തോടെയും മുന്നോട്ട് കൊണ്ടുപോകണം. ഈ വെല്ലുവിളി നേരിടാനുള്ള നിങ്ങളുടെ കഴിവിൽ എനിക്ക് പൂർണ വിശ്വാസമുണ്ട്.

സുഹൃത്തുക്കളേ,

വികസിത ഭാരതത്തിലേക്കുള്ള നമ്മുടെ യാത്രയെ ശക്തിപ്പെടുത്തുന്ന ഈ വർഷത്തെ ബജറ്റിന്റെ മറ്റൊരു നിർണായക വശമുണ്ട്: ഉൽപ്പാദനം. കഴിഞ്ഞ ദശകത്തിൽ, ഭാരതത്തിന്റെ ഉൽപ്പാദന ആവാസവ്യവസ്ഥയിൽ ശ്രദ്ധേയമായ ഒരു പരിവർത്തനത്തിന് നാം സാക്ഷ്യം വഹിച്ചു. ഞങ്ങൾ ഉത്കൃഷ്ടമായ  മേക്ക് ഇൻ ഇന്ത്യ കാമ്പെയ്ൻ ആരംഭിച്ചു, വിവിധ മേഖലകളിലുടനീളം എഫ്ഡിഐ നിയമങ്ങൾ ലളിതമാക്കി, മൾട്ടി മോഡൽ ലോജിസ്റ്റിക്‌സ് പാർക്കുകൾ നിർമ്മിച്ചു, 14 മേഖലകൾക്കായി പിഎൽഐ സ്‌കീം അവതരിപ്പിച്ചു. ഈ സംരംഭങ്ങൾ ഉൽപ്പാദന മേഖലയുടെ ആത്മവിശ്വാസം ഗണ്യമായി വർധിപ്പിച്ചു. ഈ ബജറ്റിൽ, രാജ്യത്തുടനീളമുള്ള 100 പ്രധാന നഗരങ്ങൾക്ക് സമീപം ഇൻവെസ്റ്റ്‌മെന്റ്‌റെഡി 'പ്ലഗ് ആൻഡ് പ്ലേ' ഇൻഡസ്ട്രിയൽ പാർക്കുകൾ വികസിപ്പിക്കുമെന്ന് ഞങ്ങൾ പ്രഖ്യാപിച്ചിട്ടുണ്ട്. ഈ നഗരങ്ങൾ ഒരു വികസിത ഭാരതത്തിന്റെ പുതിയ വളർച്ചാ കേന്ദ്രങ്ങളായി മാറും. കൂടാതെ, നിലവിലുള്ള വ്യവസായ ഇടനാഴികൾ ​ഗവൺമെന്റ് നവീകരിക്കും. കോടിക്കണക്കിന് ആളുകൾക്ക് തൊഴിൽ നൽകുന്ന എംഎസ്എംഇകൾക്കും ഞങ്ങൾ ഗണ്യമായ ഊന്നൽ നൽകുന്നു. ആവശ്യമായ സൗകര്യങ്ങൾ ഒരുക്കുമ്പോൾ തന്നെ എം എസ് എം ഇകൾ നേരിടുന്ന വെല്ലുവിളികൾ ​ഗവൺമെന്റ് നേരിട്ടു. 2014 മുതൽ, എം എസ് എം ഇകൾക്ക് ആവശ്യമായ പ്രവർത്തന മൂലധനവും ക്രെഡിറ്റും ലഭിക്കുന്നുണ്ടെന്ന് ഉറപ്പാക്കാനും അവയുടെ കംപ്ലയിൻസ് ഭാരവും നികുതികളും കുറയ്ക്കാനും അവരുടെ വിപണി പ്രവേശനവും സാധ്യതകളും മെച്ചപ്പെടുത്താനും അവരുടെ പ്രവർത്തനങ്ങൾ ഔപചാരികമാക്കാനും ഞങ്ങൾ പ്രവർത്തിക്കുന്നു. ഈ ബജറ്റ് എം എസ്എംഇകൾക്കായി ഒരു പുതിയ ക്രെഡിറ്റ് ഗ്യാരണ്ടി പദ്ധതിയും അവതരിപ്പിക്കുന്നു.

സുഹൃത്തുക്കളേ,

ബജറ്റ് അവതരിപ്പിക്കുമ്പോൾ, തുടർന്നുള്ള ചർച്ച പലപ്പോഴും ചില പ്രമുഖ വിഷയങ്ങളിൽ മാത്രം ശ്രദ്ധ കേന്ദ്രീകരിക്കുന്നു. ഈ പ്രഭാഷണത്തിന്റെ ഭൂരിഭാഗവും മാധ്യമ അജണ്ടകളാൽ നയിക്കപ്പെടുന്നു. കൂടുതൽ പ്രതിഫലിപ്പിക്കുന്ന അന്തരീക്ഷത്തിൽ, ഞങ്ങൾ സ്ഥിതിഗതികൾ ആഴത്തിൽ പരിശോധിക്കുന്നു. ഇടയ്ക്കിടെ, വ്യവസായ പ്രൊഫഷണലുകളോ വിദഗ്ധരോ ഈ വിഷയങ്ങൾ അഭിസംബോധന ചെയ്യുന്നു, എന്നാൽ ബജറ്റിന്റെ വശങ്ങൾ എല്ലാ മേഖലകളിലും ആവർത്തിച്ച് പരിശോധിക്കുകയും സൂക്ഷ്മതലത്തിൽ വിശദമായി വിശകലനം ചെയ്യുകയും ചെയ്യണമെന്ന് ഞാൻ വിശ്വസിക്കുന്നു. ഉദാഹരണത്തിന്, ആണവോർജ്ജ ഉൽപാദനത്തിനുള്ള വിഹിതം ബജറ്റിൽ വർദ്ധിപ്പിച്ചിട്ടുണ്ട്. ഞങ്ങൾ കാർഷിക മേഖലയിൽ ഡിജിറ്റൽ പബ്ലിക് ഇൻഫ്രാസ്ട്രക്ചർ സൃഷ്ടിക്കുകയാണ്. ഭൂമി തിരിച്ചറിയുന്നതിന് നമ്പർ അനുവദിക്കുന്നതിന് ഞങ്ങൾ കർഷകർക്ക് ഭൂആധാർ കാർഡുകളും നൽകും. ബഹിരാകാശ സമ്പദ്‌വ്യവസ്ഥയ്ക്കായി 1000 കോടി രൂപയുടെ വെഞ്ച്വർ ക്യാപിറ്റൽ വകയിരുത്തിയിട്ടുണ്ട്. ക്രിട്ടിക്കൽ മിനറൽ മിഷനും ബജറ്റിൽ പ്രഖ്യാപിക്കുന്നു, ഓഫ്‌ഷോർ മൈനിംഗ് ബ്ലോക്കുകളുടെ ആദ്യ ഘട്ട ലേലം ഞങ്ങൾ ഉടൻ ആരംഭിക്കും. ഈ പ്രഖ്യാപനങ്ങൾ പുരോഗതിക്ക് പുതിയ വഴികൾ തുറക്കുകയും നിരവധി അവസരങ്ങൾ സൃഷ്ടിക്കുകയും ചെയ്യും. 

സുഹൃത്തുക്കളേ,

ലോകത്തിലെ മൂന്നാമത്തെ വലിയ സമ്പദ്‌വ്യവസ്ഥയായി ഭാരതം ഉയരുമ്പോൾ, പുതിയ സാധ്യതകൾ ഉയർന്നുവരുന്നു, പ്രത്യേകിച്ച് നമ്മുടെ പ്രധാന മേഖലകളിൽ. സാങ്കേതികവിദ്യ വർത്തമാനകാലം മാത്രമല്ല, ഭാവിയും കൂടിയാണ്. സെമികണ്ടക്ടർ മൂല്യ ശൃംഖലയിൽ സ്ഥാനം ഉറപ്പിക്കുന്ന രാജ്യം ഭാവിയിൽ നിർണായക പങ്ക് വഹിക്കും. അതിനാൽ, ഞങ്ങൾ ഈ വ്യവസായത്തെ ഭാരതത്തിൽ മുന്നോട്ട് കൊണ്ടുപോകുന്നു. ഞങ്ങൾ ഇലക്ട്രോണിക്‌സ് നിർമ്മാണവും പ്രോത്സാഹിപ്പിക്കുന്നു, ഞങ്ങൾ നിലവിൽ ഒരു മൊബൈൽ നിർമ്മാണ വിപ്ലവത്തിന്റെ നടുവിലാണ്. ഒരുകാലത്ത് മൊബൈൽ ഫോണുകളുടെ ഇറക്കുമതിക്കാരായിരുന്ന ഭാരതം ഇപ്പോൾ ആഗോളതലത്തിൽ ഏറ്റവും മികച്ച മൊബൈൽ നിർമ്മാതാക്കളുടെയും കയറ്റുമതിക്കാരുടെയും ഇടയിലാണ്. ഹരിത ഹൈഡ്രജൻ, ഇലക്ട്രിക് വാഹനങ്ങൾ എന്നിവയിൽ ശ്രദ്ധ കേന്ദ്രീകരിച്ച് ഗ്രീൻ ജോബ്‌സ് സെക്ടറിനായി ഞങ്ങൾ ഒരു സമഗ്രമായ റോഡ്മാപ്പ് വികസിപ്പിച്ചിട്ടുണ്ട്. പ്രധാനമന്ത്രി സൂര്യഘർ യോജന, നിരവധി വെണ്ടർമാർ ആവശ്യമുള്ള ഒരു ബൃഹത്തായ പദ്ധതിയാണ്, ഓരോ വീടിനും ​ഗവൺമെന്റ് 75,000 രൂപ നൽകുന്നു, ഇത് ഒരു സുപ്രധാന വിപ്ലവത്തിന് തുടക്കമിട്ടു.

ഈ ബജറ്റിൽ ശുദ്ധ ഊർജത്തിനായി സ്വീകരിച്ച നടപടികൾ ഏറെ ചർച്ച ചെയ്യപ്പെടുന്നുണ്ട്. ഇന്നത്തെ കാലഘട്ടത്തിൽ, ഊർജ്ജ സുരക്ഷയും ഊർജ്ജ സംക്രമണവും സമ്പദ്‌വ്യവസ്ഥയ്ക്കും പരിസ്ഥിതി ശാസ്ത്രത്തിനും നിർണായകമാണ്. കൂടാതെ, ഞങ്ങൾ ചെറിയ ആണവ റിയാക്ടറുകളിൽ പ്രവർത്തിക്കുന്നു, ഇത് ഊർജ ലഭ്യതയിലൂടെ വ്യവസായത്തിന് ഗുണം ചെയ്യുക മാത്രമല്ല, വിതരണ ശൃംഖലയിലുടനീളം പുതിയ ബിസിനസ്സ് അവസരങ്ങൾ സൃഷ്ടിക്കുകയും ചെയ്യും. നമ്മുടെ വ്യവസായങ്ങളും സംരംഭകരും രാജ്യത്തിന്റെ വികസനത്തോടുള്ള പ്രതിബദ്ധത എല്ലായ്‌പ്പോഴും പ്രകടമാക്കിയിട്ടുണ്ട്. ഞാൻ പറഞ്ഞ സുപ്രധാന മേഖലകളിലെല്ലാം നിങ്ങൾ ഭാരതത്തെ ആഗോള നേതൃസ്ഥാനത്തെത്തിക്കുമെന്ന് എനിക്ക് ഉറപ്പുണ്ട്. എന്നെ സംബന്ധിച്ചിടത്തോളം 'ആഗോള നേതൃസ്ഥാനം' എന്നത് വെറുമൊരു പദം മാത്രമല്ല. എന്റെ രാജ്യം ഈ പദവി കൈവരിക്കുമെന്ന് ഞാൻ ഉറച്ചു വിശ്വസിക്കുന്നു.

സുഹൃത്തുക്കളേ,

നമ്മുടെ ​ഗവൺമെന്റിന് രാഷ്ട്രീയ ഇച്ഛാശക്തി കുറവല്ല, നിങ്ങൾക്കത് നന്നായി അറിയാം. രാഷ്ട്രത്തിന്റെയും അവിടുത്തെ ജനങ്ങളുടെയും അഭിലാഷങ്ങൾ നമുക്ക് പരമപ്രധാനമാണ്. വികസിത ഭാരതം കെട്ടിപ്പടുക്കുന്നതിനുള്ള ശക്തമായ മാധ്യമങ്ങളായി ഭാരതത്തിന്റെ വ്യവസായത്തെയും സ്വകാര്യമേഖലയെയും ഞാൻ കാണുന്നു. സമ്പത്തിന്റെ സ്രഷ്ടാക്കളായ നിങ്ങളെപ്പോലുള്ള സുഹൃത്തുക്കളെ ഭാരതത്തിന്റെ വളർച്ചയുടെ പ്രാഥമിക ചാലകങ്ങളായി ഞാൻ കാണുന്നു. ചെങ്കോട്ടയുടെ കൊത്തളത്തിൽ നിന്ന് പോലും ഇത് പ്രസ്താവിക്കുന്നതിൽ ഞാൻ അഭിമാനിക്കുന്നു.

സുഹൃത്തുക്കളേ,

ഇന്ന് ലോകം മുഴുവൻ ഭാരതത്തിലേക്കും നിങ്ങളെ‌‌യോരോരുത്തരെയും വലിയ പ്രതീക്ഷകളോടെയാണ് ഉറ്റുനോക്കുന്നത്. ഭാരതത്തിന്റെ നയങ്ങൾ, സമർപ്പണം, ദൃഢനിശ്ചയം, തീരുമാനങ്ങൾ, ഇവിടെ നടത്തുന്ന നിക്ഷേപങ്ങൾ എന്നിവ ആഗോള പുരോഗതിയെ രൂപപ്പെടുത്തുന്നു. ലോകമെമ്പാടുമുള്ള നിക്ഷേപകർ ഇവിടെ വരാൻ ഉത്സുകരാണ്, ലോക നേതാക്കൾ ഭാരതത്തെക്കുറിച്ചുള്ള പോസിറ്റിവിറ്റി നിറഞ്ഞവരാണ്. ഭാരതത്തിന്റെ വ്യവസായത്തിന് ഇത് ഒരു സുവർണ്ണാവസരമാണ്, അത് നമ്മൾ പാഴാക്കരുത്. നിതി ആയോഗ് യോഗത്തിൽ, ഞാൻ മുഖ്യമന്ത്രിമാരോട് അവരുടെ സംസ്ഥാനങ്ങൾക്കായി നിക്ഷേപക സൗഹൃദ ചാർട്ടറുകൾ സൃഷ്ടിക്കാൻ അഭ്യർത്ഥിച്ചു. നിക്ഷേപം ആകർഷിക്കാൻ സംസ്ഥാനങ്ങൾക്കിടയിൽ ആരോഗ്യകരമായ മത്സരം ഉണ്ടാകണം, എല്ലാ സംസ്ഥാനങ്ങളും ഈ വളർച്ചയുടെ ഭാഗമാകണമെന്ന് ഞാൻ ആഗ്രഹിക്കുന്നു. ഒരു സംസ്ഥാനം പോലും പിന്നാക്കം പോകരുത്. നിക്ഷേപവുമായി ബന്ധപ്പെട്ട നയങ്ങളിൽ കൂടുതൽ വ്യക്തത കൊണ്ടുവരുന്നതിലൂടെയും മികച്ച അന്തരീക്ഷം സൃഷ്ടിക്കുന്നതിലൂടെയും ഓരോ ഘട്ടത്തിലും മികച്ച ഭരണം ഉറപ്പാക്കുന്നതിലൂടെയും, രാജ്യത്തെ എല്ലാ സംസ്ഥാനങ്ങളെയും നിക്ഷേപകർക്ക് ആകർഷകമാക്കാൻ കഴിയും.

സുഹൃത്തുക്കളേ,

കഴിഞ്ഞ ദശകത്തിലെ അനുഭവങ്ങളുടെയും ആഗോള സാഹചര്യങ്ങളെക്കുറിച്ചുള്ള സമഗ്രമായ ധാരണയുടെയും അടിസ്ഥാനത്തിൽ, ഭാരതം സ്വാതന്ത്ര്യത്തിന്റെ നൂറാം വാർഷികം ആഘോഷിക്കുമ്പോൾ, ഒരു വികസിത രാഷ്ട്രമെന്ന നിലയിൽ നാം അത് ചെയ്യുമെന്ന് ഞാൻ ആത്മവിശ്വാസത്തോടെ ഉറപ്പിച്ചു പറയുന്നു. ലോകംത്താൽ ആവർത്തിച്ച് കൊള്ളയടിക്കപ്പെട്ട, ദരിദ്രമായ രാജ്യമായിരിക്കേയാണ് നാം സ്വാതന്ത്ര്യം നേടിയത്. എന്നിരുന്നാലും, നാം നമ്മുടെ യാത്ര ആരംഭിച്ചു 100 വർഷത്തിനുള്ളിൽ, എല്ലാ പ്രതിബന്ധങ്ങളെയും അതിജീവിച്ച് വികസിത ഭാരതം ആഘോഷിക്കാനുള്ള ഞങ്ങളുടെ പ്രമേയങ്ങൾ നിറവേറ്റും. ഭാവി തലമുറകൾ അഭിമാനകരവും വികസിതവുമായ ഒരു രാജ്യത്ത് ജീവിക്കുക എന്നതാണ് ഞങ്ങളുടെ സ്വപ്നം, അതിന് സാക്ഷിയാകാൻ നമ്മൾ തന്നെ ഇല്ലെങ്കിലും. ഭാരതത്തെ ഒരു വികസിത രാഷ്ട്രമാക്കാൻ നമുക്കെല്ലാവർക്കും ഒരുമിച്ച് മുന്നേറാം. ഇത് നേടുന്നതിന്, സമൂഹത്തിനും രാജ്യത്തിനും നൽകാനുള്ള ഏറ്റവും മികച്ചത് നാം സംഭാവന ചെയ്യണം. ഈ ആവേശത്തോടെ, നിങ്ങൾക്കെല്ലാവർക്കും എന്റെ ആശംസകൾ നേരുന്നു.

***

SK