#IFFIWood, 28 नोव्‍हेंबर 2024

सगळ्यो बऱ्यो गजाली सोंपपाक जाय तशीं इफ्फी 2024 लेगीत सोंपता, अर्थांतच सिनेमाच्या आनंदाची परब मनोवपाचे आनी फुडल्या सिनेमा निर्मात्यांक मार्ग दिवपाचें उतर दिवन इफ्फी 2024 चो समापन सुवाळो जालो. 

समाप्तीच्या  नव्या सुरुवातीचे  संकेत दित, आयज गोंयच्या डॉ.श्यामा प्रसाद मुखर्जी इंडोर स्टेडियमांत सिनेमाची जादू आनी कथा सांगपाची भावना मनयत  शानदार समापन सुवाळ्यांत 55 व्या भारतीय आंतरराष्ट्रीय चित्रपट महोत्सवाचे पडदे देंवले.  

ही कार्याक्रम जागतीक आनी भारतीय सिनेमाच्या णव दिसांच्या उत्सवाक योग्य समारोप आशिल्लो, जांतूत पडद्याचेर कथा सांगपाच्या जादूची  प्रशंसा करून चित्रपट निर्माते, कलाकार आनी सिनेमाप्रेमी हांका एकठांय हाडले.

रेड कार्पेट खिणां सावन आत्म्याक हालोवपी सादरीकरण आनी कुशळटायेन कथा सांगप मेरेन समारोप सुवाळो कलाकारांनी भरिल्लो आशिल्लो, तातूंत सिनेमाच्या उत्कृश्ट कृतींक आनी अविस्मरणीय छाप सोडून गेल्ल्या कलाकारांक मान दिलो.

ह्या सिनेमाच्या उत्सवाच्या निमाण्या अध्यायाचें अनावरण करतना हो सुवाळो सिनेमा मोगींच्या मनांत चड काळ तिगून उरपी खीण आनी यादींनी भरिल्लो.

महोत्सवाचो समारोप प्रशंसीत चेक फिल्म निर्मातो बोहदान स्लैमा  हाणें दिग्दर्शीत केल्ल्या, “ड्राय सीझन” - ह्या क्लोसिंग फिल्मान जालो. जांतूत मनीसपण, स्थिरताय आनी पिळगेंतल्या बंधनांची कथा आस्पावता.

समारोप सुवाळ्याचो सगळ्यांत चड प्रतीक्षित भाग म्हळ्यार अपवादात्मक प्रतिभेक आनी कथाकथनाची वळख करून दिवप्यांक  प्रतिश्ठीत पुरस्कार भेटोवप.

लिथुआनियाच्या ‘टॉक्सिक’ फिल्मान बेस्ट फिल्मा खातीर मेळयलो 'गोल्डन पीकॉक' 

अंदूं टॉक्सिक ह्या सिनेमाक बेस्ट फिचर फिल्मा खातीर प्रतिष्ठित गोल्डन पीकॉक पुरस्कार फावो जालो. गोंयचे मुख्यमंत्री डॉ  प्रमोद सावंत आनी आंतरराष्ट्रीय सर्तीचे जूरी अध्यक्ष श्री आशुतोष गोवारीकर हांणी हो पुरस्कार भेटयलो.

लिथुआनियाचो चित्रपट निर्मातो आनी पटकथा लेखक सौले ब्लियुवैटे हाचो पदार्पण फिचर फिल्म इश्टागतीची नाजूक आनी मनानं भरपी  कथा दाखयता . किशोरावस्था आनी अर्थीक नदरेन वंचित समाजांत वाडपाची खर वास्तवताय इतली संवेदनशीलताय आनी सहानुभूतीसयत दाखोवपाखातीर जूरीन ह्या सिनेमाची तोखणाय केली.

बोगदान मुरेसानु हांकां उत्कृश्ट दिग्दर्शक म्हणून सिल्वर पीकॉकचो भोवमान

ताच्या उत्कृश्ट दिग्दर्शनाक आनी पडद्याचेर उत्कृश्ट कथाकथनाचे  सादरीकरणाक लागून  उत्कृश्ट दिग्दर्शकाचो सिल्वर पीकॉक हो पुरस्कार रोमानियन लेखक आनी दिग्दर्शक बोगदान मुरेसानु हाका ताच्या ‘द न्यू इयर दॅट नेव्हर केम’ ह्या चित्रपटाक मेळ्ळो.

क्लेमेंट फेव्हो हाका उत्कृश्ट अभिनेतो (दादलो) खातीर सिल्वर पीकॉक पुरस्कार फावो जालो

नायकाचो भावनिक उतार-चढाव उक्तायिल्ल्यान, निरपराधीपणाच्या युगांतल्यान परिपक्वतायेमेरेनच्या युगांत वचपाखातीर अभिनेतो क्लेमेंट फेव्हो हाका फ्रेंच फिल्म 'होली काव' ह्या सिनेमांतल्या अविश्वसनीय आनी आकर्शक अभिनया खातीर, सिल्वर पीकॅक पुरस्कार फावो जालो.

तशेंच जूरीन ट्युनिशियाच्या हू डू आय बिलोंग टू ह्या सिनेमांत बिलाल हे पात्र साकार करपी अभिनेतो एडम बेसाचो खाशेलो उल्लेख केलो, ह्या सिनेमांतल्या बारीकसाणीन आनी संयमी कामगिरी खातीर ह्या अभिनेत्याची तोखणाय जाली.

अभिनेत्री वेस्टा माटुलिटे आनी इवा रुपेइकाइटे हांणी संयुक्तपणान उत्कृश्ट अभिनेता (बायल) खातीर सिल्वर पीकॉक मेळयलो

तांच्या असामान्य पदार्पणाच्या अभिनया खातीर ‘टॉक्सिक’ ह्या सिनेमा खातीर अभिनेत्री वेस्टा माटुलिटे आनी इवा रुपेइकाइटे हांकां संयुक्तपणान उत्कृश्ट अभिनेता  (बायल) खातीर सिल्वर पीकॅक पुरस्कार फावो जालो.

स्पेशल जूरी पुरस्कार लुईस कौरवोइसियराक मेळ्ळो

चित्रपट निर्मितीच्या सृजनशील उत्कृश्टतायेक लागून फ्रेंच चित्रपट निर्माती लुईस कौरवोइसियर हिका ‘होली काव’ ह्या सिनेमा खातीर खाशेलो जूरी पुरस्कार फावो जालो.

सारा फ्रीडलँड हाच्या 'फेमिलियर टच'क दिग्दर्शकाच्या उत्कृश्ट पदार्पणाच्या फिचर फिल्माचो पुरस्कार फावो जालो

अमेरिकन पदार्पण दिग्दर्शक सारा फ्रीडलँड हाच्या 'फेमिलियर टच' ह्या ड्रामा फिल्माक दिग्दर्शकाचो सगळ्यांत सर्वश्रेष्ठ डेब्यू फिचर चित्रपट पुरस्कार फावो जालो.

दिग्दर्शक नवज्योत बांदिवडेकर हाणें ‘घरात गणपती’ ह्या मराठी फिल्मातल्यान आपल्या अपवादात्मक कथाकथना खातीर भारतीय फीचर फिल्माचो बेस्ट डेब्यू दिग्दर्शक पुरस्कार मेळयलो

पुरस्कारांच्या यादीत महत्त्वाची भर घालताना भारतीय फिचर फिल्माचो पयलो उत्कृश्ट पदार्पण दिग्दर्शक पुरस्कार  मराठी फिल्म घरात गणपतीचो दिग्दर्शक श्री नवज्योत बांदिवडेकर हांकां भेटयलो, जाका लागून उदेंत भारतीय चित्रपट निर्मात्यांक पोसवण दिवपाची इफ्फीची वचनबद्धताय दिसून आयली.

हेर पांच फिचर-फिल्मां मदल्यान हो सिनेमा वेंचून काडून नामनेचो सिनेमाटोग्राफर आनी दिग्दर्शक संतोष सिवान हाच्या अध्यक्षतेंतल्या जूरीन हो सिनेमा घटमूट अभिनयान बरोच तयार केला अशें एकमतान मान्य केलें. कुटुंबीक बंधनांची   गुंतागुंत कुशळटायेन धरल्या आनी  मार्मिक भावनिक अनुनाद हाका लागून चित्रपट पयलेच खेपे उल्लेखनीय थारता

लेवन अकिन हाचें ‘क्रॉसिंग’ फिल्माक आयसीएफटी-युनेस्को गांधी पदक मेळलें

शांतताय, सहिश्णुताय आनी संवादाक चालना दिवपी सिनेमा कृतींचो उत्सव मनोवपी  प्रतिश्ठीत आयसीएफटी-युनेस्को गांधी पदक लेवन अकिन  हाच्या क्रॉसिंग ह्या चित्रपटाक फावो जालें.

अदभूत सिनेमा गुणांक लागून आनी लैंगीक समानताय आनी समाजीक समजूतीच्या विचार करपासारक्या संशोधनाक लागून, “मोग आनी समजूती विशींचो एक अदभूत सिनेमाचो नमूनो ” अशी जूरीन ह्या चित्रपटाची तोखणाय केली. 

सत्यजीत रे लायफटायम अचीवमेंट पुरस्कार ऑस्ट्रेलियन फिल्म निर्मातो फिलिप नोयस हाका भेटयलो

ह्या सुवाळ्यांतलो  एक खाशेलो खिण  म्हळ्यार सिनेमा कलेंतल्या ताच्या अमूल्य योगदानाचो भोवमान करून दिग्गज ऑस्ट्रेलियन फिल्म दिग्दर्शक  फिलीप नोयस हाका सिनेमांतल्या उत्कृश्टताये खातीर सत्यजीत रे लायफटायम अचीवमेंट पुरस्कार दिवप.

पुरस्कार मेळोवन फिल्म निर्मात्यान म्हणलें, भारतीय प्रेक्षक पुरायपणान तल्लीन जावन सिनेमा पळयता, हाचेसारखे दुसरे कांयच ना आनी पयलेच खेपे भारतांत येतना म्हाका तें अणभवपाक मेळ्ळें हाची खोस जाता. प्रेक्षकां वांगडा पयलेच खेपे सिनेमा पळयता अशें दिसतालें” अशेंय तांणी सांगले. 

रे हांच्या व्हडपणाचेर उलयतना तांणी म्हणलें, आमचे खातीर सत्यजीत रे ही एक प्रेरणा, ताच्या चित्रपटांचें प्रमाण ल्हानपण, पूण काळजान ताच्या चित्रपटांचें व्हडपण पळोवन म्हाका खासा प्रेरणा मेळ्ळी. सत्यजीत रे फिल्मां खातीर उणें हेच चड, फुडाराक सिनेमा निर्मितीत  सिनेमा ल्हान आसतले पूण कल्पना व्हड आसतल्यो अशे आपल्याक दिसता अशे तांणी सांगले.”

बेस्ट वेब सीरीज (ओटीटी) पुरस्कार ‘लंपन’क (सोनी लिव) फावो जालो 

कथाकथनांतल्या परिवर्तनकारी बदलाक मान्यताय दिवन डिजिटल युगात नवनिर्माण आनी कलात्मक योग्यता मनयतना ‘लंपन’ ह्या बेस्ट वेब सीरीजाक (ओटीटी) पुरस्कार फावो जालो. ‘लंपन’ हें सीरीज निपुन धर्माधिकारी हांणी दिग्दर्शीत केलां.

अभिनेतो विक्रांत मॅसी हाका इंडियन फिल्म पर्सनॅलिटी ऑफ द ईयर पुरस्कार फावो जालो 

गोंयचे मुख्यमंत्री डॉ प्रमोद सावंत आनी म्हायती आनी प्रसारण मंत्रालयाचे सचीव श्री संजय जाजू हांणी अभिनेतो विक्रांत मॅसी हांकां अंदू वर्साचो  इंडियन फिल्म पर्सनॅलिटी ऑफ द ईयर पुरस्कार भेटयलो. 

हो पुरस्कार घेवन विक्रांत मॅसीन नमूद  केलें, “हो खरेंच म्हजे खातीर एक खाशेलो खीण; हो पुरस्कार मेळटलो अशी कल्पना हांवें केन्नाच करूंक नाशिल्ली. जिवितांत उतार-चढाव येतले पूण 12th फेल ह्या फिल्मांत म्हज्या पात्रान  केल्ले भशेन आमी परतून नवी सुरवात  करपाक तयार आसूंक जाय.”

“हांव काळजान कथाकार, सामान्य लोकांचो आवाज जावपाखातीर पटकथा वेंचून काडटां.

मॅसीन सांगले  की, “स्वताक आपणायात, तुमच्या काणयांक आपणायात, तुमी जंयच्यान येतात, त्या पाळामुळांक आपणायात. भारतीय फिल्म उद्देग हो एक अदभूत उद्देग आसा जाचो प्रत्येकान भाग जावपाक जाय.”

खाशेलें अभिनंदन

गोंयचे मुख्यमंत्री डॉ प्रमोद सावंत आनी म्हायती आनी प्रसारण मंत्रालयाचे सचीव श्री संजय जाजू हांणी ह्या सुवाळ्यांत प्रतिष्ठित भारतीय दिग्दर्शक रमेश सिप्पी आनी नामनेचो अभिनेत्री  जया प्रदा हांचो  भारतीय सिनेमांतल्या योगदाना खातीर खासा भोवमान केलो.

तशेंच ही आवृत्ती यशस्वी करपाक इफ्फीच्या तंत्रीक भागीदारांचे  आनी सहकार्यांचे  तांणी केल्ल्या म्हत्वाच्या भुमिके खातीर ह्या सुवाळ्यांत उपकार मानले. ईएसजीची उपाध्यक्ष श्रीमती डिलायला लोबो, गोंयचे मुखेल सचीव डॉ.व्ही. कांदावेलू हांणी  क्यूब सिनेमा, बारको, पल्स इलेक्ट्रॉनिक्स आणि एसएमपीटीई हांच्या अमूल्य योगदानाखातीर तांच्या प्रतिनिधींचो  सत्कार केलो.

म्हायती आनी प्रसारण मंत्रालय आनी एनएफडीसी हांच्या यत्नांची तोखणाय करतना गोंयचे मुख्यमंत्री डॉ प्रमोद सावंत हांणी म्हणलें, फिल्म बाजारा सारक्या जायत्या नव्या उपक्रमांच्या मळार हो इफ्फी वेगळो आसा जो इतले क्रांतीकारी रितीन सादर केलो की फिल्म बाजाराचो सगळ्यांक फायदो जाता . हे खेपे आमी फिल्म मोगींक फिल्मांचो आस्वाद घेवपा खातीर गोंयभर सिनेमा दाखयले आनी ह्या वर्सा 195 परस चड सिनेमा दाखयले.”

अंदूं इफ्फी परेड करून गोंयची संस्कृताय इफ्फींत रुजली जाका संवसारभरांतल्या सगळ्या प्रतिनिधी आनी भाग घेवप्यांचो अफाट मोग आनी सकारात्मक प्रतिसाद मेळ्ळो हाचेरय सीएम हांणी भर दिलो.” आमच्या पर्यटनाक संवसारीक पांवड्यार व्हरपी  पर्यटक  आतां गोंयांतल्या इफ्फीक हाजीर रावपा खातीर आपले कॅलेंडर चिन्न करतात. इफ्फींन आमची पावणी संवसारीक पांवड्यार व्हेल्या; इफ्फीक हाजीर रावून जायते फिल्म निर्माते गोंयांत शूटिंग करपाक येवंक लागल्यात म्हणून हांव परदेशी  फिल्म निर्मात्यांक गोंय राज्यांत शूटिंग करपाक आपयता आनी सगळ्या फिल्म निर्मात्यांक फिल्म शूटिंगा खातीर सिंगल  विंडो क्लियरन्स दितले हाची खात्री दितां अशे तांणी मुखार सांगले. 

म्हायती आनी प्रसारण मंत्रालयाचे सचीव श्री संजय जाजू हांणी सांगलें की, ह्या वर्साच्या इफ्फींचें वर्णन करपी एक उतर म्हणल्यार जीवंतपण, जें पयलीं केन्नाच पळोवंक नाशिल्लें. कारण आमचो मानादीक प्रधानमंत्री सदांच सामुग्रीचो फुडलो निर्यात करपी म्हणा आमच्या तरणाट्या निर्मात्यां विशीं आनी भारता विशीं उलयता. आमी ह्या वर्साचो इफ्फीं सगळ्या तरणाट्या निर्मात्यांक, क्रिएटिव्ह माइंड्स ऑफ टुमॉरोच्या नवोदित प्रतिभेक आनी देशभरांतल्यान येवपी कथाकारांक समर्पित करतात. ही इफ्फीं गुणात्मक आनी परिमाणात्मक नदरेन आतां मेरेन सगळ्यांत बरी आसा. हें शक्य केल्ल्या गोंयच्या आनी आमच्या देशांतल्या लोकांक, सगळ्या कलाकारांचे  हांव उपकार मानतां” अशे तांणी म्हळे. 

ह्या महोत्सवाच्या जायत्या आंगां विशीं उलयतना, खास करून भारतीय सिनेमा आनी फिल्म बाजाराच्या आयकॉनांच्या शतमानी उत्सवा विशीं उलयतना जाजू हांणी जोडले की, “पयलीं हो उद्देगाचो आनी उद्देगा खातीर उत्सव आशिल्लो, आनी आतां श्री शेखर कपूर इफ्फीच्या 55व्या आवृत्तीचो महोत्सव संचालक आशिल्ल्या कारणान  हो खऱ्या अर्थान उद्देगाचो उत्सव जाला.

संख्या आनी आकार आनी प्रदर्शित जाल्ल्या  सिनेमांची संभाव्य विक्री आनी खरेदी  हांचे नदरेन फिल्म बाजार ह्या वर्सा संवसारांतलो सगळ्यांत व्हड अशें म्हणूं येता; आनी म्हाका दिसता फुडार हांगाच आसा,आनी हें साकार करपा खातीर संवसारभरांतल्यान येवपी लोकांचे  हांव उपकार मानतां,” अशे श्री जाजू हांणी सांगलें.

गोंय ही खऱ्या अर्थान देशाची मनरिजवणेची राजधानी अशें म्हणत सचीवान गोंय सरकारान दिल्ल्या आदार आनी सहकार्याचेय उपकार मानले.

ह्या सुवाळ्यांत प्रेक्षकांक संबोधीत करतना महोत्सव संचालक शेखर कपूर हांणी खोस आनी समाधान उक्तायलें: “आमी आतांच संवसारांतलो सगळ्यांत व्हडलो सिनेमा महोत्सव सादर केला. फिल्म बाजार, मास्टरक्लास आदी उपक्रमांनी हो महोत्सव भव्य यशस्वी जाला.” ह्या महोत्सवांत गोंयकारांनी उमेदीन वांटो घेतिल्ल्याची तांणी तोखणाय केली.

सिनेमाची शक्त दाखोवन आंतरराष्ट्रीय सर्तींचे जूरी अध्यक्ष श्री आशुतोष गोवारीकार हांणी म्हळे की, सर्ती खातीर वेंचून काडिल्ले सगळे सिनेमा शानदार आशिल्ले. एक व्हडलो सिनेमा फकत एक काणी सांगना, तो आमकां बदलता. सगळ्या तरणाट्या सिनेमा निर्मात्यांक संबोधून तांणी  सांगले  की तुमच्या भितरलो उजवाड चड तेजस्वी जावंक दियात म्हळ्यार  एक दीस तुमची दृष्टी संवसारामेरेन पावतली."

55व्या इफ्फीतल्या आपल्या अणभवाची म्हायती दितना गोवारीकारान म्हणलें, सिनेमाची भास ही सगळ्या जूरी वांगड्यांची  काळजाची धडधड आशिल्ली. 15 चित्रपटांतले दरेक चित्रपट जिवी दृष्टी आशिल्ले. ह्या चित्रपटांनी ह्या कलेवीशीची  अविरत वचनबद्धताय उक्ती जाली. पूण, जिखपी चित्रपट शानदार आशिल्ले.”

समीर कोचर हाणें येजमानकी केल्ल्या ह्या सुवाळ्याक फिल्म उद्देगांतले दिग्गज, सरकारी अधिकारी, आंतरराष्ट्रीय सोयरे सयत  प्रेक्षकांनी व्हडा संख्येन हाजिरी लायली.  सांजवेळाक उमेदीन येवकार दिवन सुरवात जाली, उपरांत राष्ट्रगीताचें भावपूर्ण गायन जावन अभिमान आनी उत्सवाची रात लखलखत सुरु जाली.

ह्या वर्साच्या इफ्फीत दाखयल्ल्या कला आनी संस्कृतीक विविधतायेची परब मनयल्ल्या ऑडियो-व्हिज्युअल मॉन्टेजात महोत्सवाच्या उत्तम खिणां मदल्यान एक भावनीक प्रवास सादर केलो. मामे खान, निखिता गांधी, आनी दिग्विजय सिंग परियार हांच्या शो-स्टॉपिंग सादरीकरणांनी आनी गायक अमाल मलिकाच्या मनाक  स्तिमित करपी  संगीत सादरीकरणांनी मनरिजवण उंचायेर व्हेली.

भारतीय शास्त्रीय आनी लोक परंपरेची गिरेस्तकाय दाखोवपी “रिदम्स ऑफ इंडिया” ह्या नांवान अभिनेत्री आनी नर्तकी श्रीया सरण हांणी मंत्रमुग्ध करपी निमाणे  सादरीकरण करून  ही सांज तेंगशेर पावली.

55 वी इफ्फी सोंपपाक लागलो तेन्ना ताणें 55 वर्सांच्या गौरवशाली सिनेमाच्या कृतीचो, अर्थपूर्ण संवाद आनी सांस्कृतीक आदान-प्रदान हांचो दायज फाटीं सोडलो. अंदूंच्या महोत्सवांत फकत चित्रपट निर्मितीची कलेची परब मनयली ना पूण जिणेक प्रेरणा दिवपाची, जोडपाची आनी बदल घडोवपाची  सिनेमाची शक्त अधोरेखित केली.

* * *

PIB IFFI CAST AND CREW | Subhash/Utkarsha/Darshana | IFFI 55