ঙসি তুরিজম অমসুং কলচরগী য়ুনিয়ন মিনিস্তর শ্রী গাজেন্দ্র সিংহ সেখাৱাতনা অসামগী কাঝিরঙ্গাদা ১২শুবা ইন্তরনেসনেল তুরিজম মার্ত (আই তি এম) হৌদোকখ্রে অমসুং থৌরম অদুদা অসামগী চীফ মিনিস্তর দোক্তর হিমান্ত বিশ্বা শর্মা অমসুং অরুনাচল প্রদেসকী চীফ মিনিস্তর শ্রী পেমা খান্দু শরুক য়াখি।

থৌরম অদুদা য়ুনিয়ন মিনিস্তর শ্রী সেখাৱাতনা হায়খি অৱাং-নোংপোক্কী ইনাক খুল্লবা নাত অমসুং চৎনবীশিং, মহৌশাগী লন-থুমশিং, ইন্সাং-মথেল কয়া, ক্রাফশিং অমসুং থৱায় পানবা কয়া লৈরি। ইন্তরনেসনেল তুরিজম মার্ত অসি অৱাং-নোংপোক্কী নাত অমসুং খেন্নবশিং মালেমদা মশক তাক্নবা খুদোংচাবা অমনি অমসুং মসিনা মালেম শীনবা থুংবগী মীয়াম লমদম অসিগী তোপ-তোপ্পা হেরিতেচ য়েংবা লাক্নবা মফম অমা পীরে।

মহাক্না মখা তানা হায়খি মদুদি কাঝিরঙ্গাদা ইন্তরনেসনেল তুরিজম মার্ত শীনবা অসি মরুওই অমসুং মসিদা জাতিগী থাক্তা অৱাং-নোংপোক্কী মরুওইবা হেনগৎলক্লিবা অসি মমি তারে। হৌখিবা চহি ১০ অসিদা লমদম অসি চাউখৎপগী খোঙজেল য়াংখৎলে। কাঝিরঙ্গা নেসনেল পার্ক অমা ওইনা লাউথোকখিবা চহি ৫০ মপুংফারকপগী থৌরম পাংথোকপগা মপা চান্ননা কাঝিরঙ্গাদা ইন্তরনেসনেল তুরিজম মার্ত পাংথোক্লি। হৌখিবা চহি ১০ দা পার্ক অসি ইসক্বার কিমি ৪০০ দগী ইসক্বার কিমি ১,৩০০ দা পাকথোক-চাউথোক্লে।

য়ুনিয়ন মিনিস্তরনা হায়খি মদুদি কাঝিরঙ্গাগী ফজবা উৎপা খক নত্তনা মসিনা অৱাং-নোংপোক লমদমগী পাক-চাউরবা তুরিজমগী ফজবশিং মশক খঙদোক্নবা মফম অমা পীরে। লমদম অসিদা খুদোংচাবা কয়া মরাংকাইনা ফংলি অমসুং মসিগী মার্ত অসিনা তুরিজম চাউখৎনবা থোঙ্গাল অমা ওইরে। লাক্লিবা চহিশিংদা ভারত্ত তুরিজম হেন্না চাউখৎলক্কনি অমসুং মসিগী চাউৎলকপা অসিদা অৱাং-নোংপোক্না মরুওইবা থৌদাং অমা লৌগনি।

অসামগী চীফ মিনিস্তর শ্রী হিমান্ত বিশ্বা শর্মনা হায়খি মার্ত অসিনা মালেমগী মহৈরোয়শিং অমসুং মালেমগী ইনফ্লুয়েন্সরশিং লমদম অসিগী মহৌশাগী ফজবা অমসুং নাত মশক খঙনবগী অচৌবা খুদোংচাবা অমা পীরে। থৌরম অসিনা উদ্যোগ অমা ওইনা তুরিজমগী খুদোংচাবশিং উৎপা খক নত্তনা কলচরেল একচেঞ্জ, মহৌশাগী অকোয়বগী ফিবম ঙাক-শেনবা অমসুং শেন-থুম চাউখৎনবগী অওনবা পুরক্নবা শাফু অমা ওইরে।

লমদম অসিগী মখল কয়াগী লম্মিৎ-তুমিৎ, ইনাক খুল্লবা পাম্বী অমসুং শা-উচেকশিং, কাংলুপ-ফুরুপ কয়া, অরিবা চৎনবীশিং, কুহ্মৈশিং, মরাংকাইনা লৈরিবা কলা অমসুং ক্রাফশিংগী মমিং চৎলিবা অৱাং-নোংপোক্কী অসামদা লৈবা কাঝিরঙ্গাদা নবেম্বর ২৬ দগী নবেম্বর ২৯,২০২৪ ফাওবা ইন্তরনেসনেল তুরিজম মার্ত পাংথোক্লি। কাঝিরঙ্গা নেসনেল পার্ক অসি য়ুনেস্কো ৱার্ল্দ হেরিতেচ সাইত অমনি অমসুং মসিদা ফজরবা মচি অমা খক পানবা শামু গন্দাগী লৈফম ওইবনা থৌরম অসি অমুক্কা হেন্না মশক থোকহল্লে।

অসাম তুরিজম দিবলপমেন্ত কোর্পোরেসন্না পুথোকপা কোফি তেবল বুক অমা “গুৱাহাতি এন্দ এরাউন্দ”শু ফোঙখ্রে। লাইরিক অসিদা গুৱাহাতিগী হেরিতেচ, নাত অমসুং খেন্নবা কয়া অমসুং মসিগী ফজরবা অকোয়বগী শক্তমশিং য়াওরি। লাইরিক অসি লমদম অশিগী অশেংবা মশক ৱাহৈশিংনা তাকপা শক্তমশিংগী লৈচল অমনি।

ইন্তরনেসনেল তুরিজম মার্ত অসিদা ভারতকী অৱাং-নোংপোক্কী তুরিজম অমসুং কলচরগী শক্তি কয়া হরাওবা ফোঙদোকপনি। চহি অসিগী জুলাইদা, চারাইদিওগী মোইদামশিং ভারতকী ৪৩শুবা য়ুনেস্কো ৱার্ল্দ হেরিতেচ সাইত ওইনা লাউথোকখ্রে। অহোম শাগৈগী মতমগী নাতকী লন অসি ৱার্ল্দ হেরিতেচ ওইনা লাউথোকপা অসি অসাম অমসুং ভারতকী অৱাং-নোংপোক্কী তুরিজম অমসুং নাতকী মরুওইবগী খুদম অমনি।

চহি অসিগী ইন্তরনেসনেল তুরিজম মার্তদা পাংথোক্লিবা তোঙান-তোঙানবা থৌরমশিংগী মনুংদা রাজ্য সরকারনা মীয়ামদা খঙহনবশিং, বি২বি মীফমশিং, থবক পীবা, ইন্নোবেসন, দিজিতাইজেসন, ওন্ত্রেপ্রেনিউয়রশিপ, লমদম অসিগী পোৎথোকশিং শীজিন্নবা, নুপীশিংদা শক্তি পীবগী খন্ন-নৈনবা, এদভেঞ্জর তুরিজমগী কেস স্তিদিসশিং, লম্লক্কী শা-উচেকশিং ঙাক-শেনবা অমসুং য়োকখৎপা, হোমস্তে, ৱাইন তুরিজম, চীঞ্জাকশিং উৎপা, নাতকী থৌরমশিং, ঈশৈগী থৌরম, নোর্থ ইস্ত বাজার অমসুং চারাইদিও মোইদামশিং, রঙ্গঘর, কাঝিরঙ্গা নেসনেল পার্ক, হাথিকুলি তি ইস্তেৎ অমসুং ওর্কিদ অমসুং বাইওদাইভর্সিতি পার্ক য়েংবা য়াওরি।

তুরিজম মিনিস্ত্রিগী ত্রাবেল ফোর লাইফ থৌরাংগা চুন্না অফবা থবক অমা ইন্তরনেসনেল তুরিজম মার্তনা উৎকনি। মহৌশাগী অকোয়বদা চৈথেং পীবা হন্থহন্নবা, ইনর্জ য়াম্না শীজিন্নদবা থবকশিং পায়খৎনবা পান্দম অমগা লোয়ননা থৌরম অসি শীনবনি।

বি২বি অমসুং বি২জি সেসনশিং পাংথোক্তুনা লমদম অসিগী অনৌবা তুরিজমগী মফমশিংগী মখা তানা খন্ননবা অমসুং লমদম অসিগী তুরিজমগী মরী লৈনবশিংগী উন্নবগী খুদোংচাব অমা ইন্তরনেসনেল তুরিজম মার্ত অসিনা পীরি। থবক অসিদগী মখোয় পুন্না থবক তৌমিন্নদুনা অৱাং-নোংপোক ভারতকী তুরিজম অনৌবা থাকশিং পুখৎনবা হোৎনগনি।

থৌরম অসিদা অৱাং-নোংপোক্ত লাইরিক তম্লিবা মপান লৈবাকশিংগী মহৈরোয়শিং অমসুং মালেমগী ইনফ্লুয়েন্সরশিংগা উনদুনা লমদম অসিগী মহৌশাগী ফজবা অমসুং নাত মশক খঙনবগী অচৌবা খুদোংচাবা অমা পীরে।

তুরিজম মিনিস্ত্রি অমসুং অৱাং-নোংপোক রাজ্যশিংগী সরকারশিংগী সেনিয়ার ওফিসিএলশিং, তুরিজম অমসুং হোস্পিতেলিতি এসোসিএসনশিংগী লুচিংবশিং অমসুং মীহুৎশিং, মালেমগী অমসুং লৈবাক মনুংগী তুর ওপরেতরশিং, হোতেলিয়রশিং অমসুং হোমস্তে মপুশিং, তুরিজম সর্বিস প্রোভাইদরশিং, ইনফ্লুয়েন্সরশিং অমসুং ওপিনিয়ন মেকরশিং, মহৈরোয়শিং, নহারোলশিং, প্রেস, মেদিয়া অমসুং অতোপ্পা কয়া থৌরম অসিদা পুনখি।

ইন্তরনেসনেল তুরিজম মার্ত ২০২৪ অসিদা লৈবাক ৩০ শরুক য়ারি। মসিগী মনুংদা লৈবাক ১১ (স্পেন, ম্যন্মার, থাইলেন্দ, ভুতান, ইতালি, ভিয়েতনাম, রুসিয়া, শ্রী লঙ্কা, ইন্দোনেসিয়া, মালেসিয়া অমসুং ফ্রান্স) গী ইন্তরনেসনেল ইনফ্লুয়েন্সর ১৫, লৈবাক ১৬ গী ইন্তরনেসনেল তুর ওপরেতর ২৪, লৈবাক ১৭ গী মহৈরোয় ২০, দোমেস্তিক বয়র ৪৬, দোমেস্তিক ইনফ্লুয়েন্সর ৭ অমসুং দোমেস্তিক সেল্লর ১০১ শরুক য়াখি।

ইন্তরনেসনেল তুরিজম মার্ত অসি লৈবাক মনুং অমসুং মালেমগী মীয়ামদা অৱাং-নোংপোক্কী তুরিজমগী ফজবশিং উৎনবা ভারত সরকারগী তুরিজম মিনিস্ত্রিনা শীনবা চহিগী থৌরম অমনি। থৌরম অসিনা অৱাং-নোংপোক্কী রাজ্য নিপাল- অসাম, অরুনাচল প্রদেস, মনিপুর, মেঘালয়, মিজোরম, নাগালেন্দ, ত্রিপুরা অমসুং সিক্কিমগী তুরিজম ব্যুজিনেস পুনশিন্নবা অমসুং বয়রশিং, সেল্লরশিং, মেদিয়া, সরকারগী এজেন্সিশিং অমসুং অতোপ্পা মরী লৈনবশিং পুন্না থবক তৌমিন্নবা হেনগৎনবা মফম অমনি।

****