Ka High-Level Committee, hapoh ka jingpyniaid jong u Myntri Kam Pohiing bad Cooperation jong ka sorkar pdeng, Amit Shah ka la mynjur T. 1115.67 klur na ka bynta ka jingpynduna ki jingjulor ha ka por ba lynshop ka mariang ha ki jylla bapher bapher. Ka Committee ba kynthup ia ka Myntri Kam Pla Tyngka, Myntri ka Tnad kam rep bad Vice Chairman NITI Aayog kum ki dkhot ka la peit bniah ia ka jingtyrwa ban pynduna ka jingma jong ka jingtwa khyndew ha 15 tylli ki Jylla, ban bei tyngka na ka National Disaster Mitigation Fund (NDMF) bad sa kawei ka jingtyrwa na ka bynta ka jingai jinghikai bad ka bor treikam jong ki nongtrei mon sngewbha ha ki kynhun Civil Defense ha baroh ki jylla bad hapoh ka Preparedness and Capacity Building jong ki UT na ka lad bei tyngka jong ka National Disaster Response Fund (NDRF).

Ka High-Level Committee ka la mynjur ia ka projek National Landslide Risk Mitigation ha 15 tylli ki Jylla (Arunachal Pradesh, Assam, Himachal Pradesh, Manipur, Meghalaya, Mizoram, Nagaland, Sikkim, Tripura, Uttarakhand, Karnataka, Kerala, Maharashtra, Tamil Nadu, West Bengal) ha ka jinglut kaba T. 1000 klur. Ka committee ka la mynjur T. 139 klur ia ka Uttarakhand, T. 139 klur ia ka Himachal Pradesh, T.378 klur ia phra tylli ki jylla ka thain shatei lammihngi, T.100 klur ia ka Maharashtra, T.72 klur ia ka Karnataka, T. 72 klur ia ka Kerala, T.50 klur ia ka Tamil Nadu bad T.50 klur ia ka West Bengal.

Ka HLC ka la mynjur ruh sa kawei ka projek ban ai jinghikai bad ka jingkyntiew ka bor treikam jong ki kynhun civil defense ha baroh ki Jylla/UT ha ka jinglut kaba T. 115.67 klur. Hashuwa kane, ka committee ka la mynjur ia ki projek Urban Flood Risk Mitigation ha hynniew tylli ki nongbah ha ka jinglut kaba T. 3075.65 klur bad ka GLOF Risk Management ha 4 tylli ki Jylla ha ka jinglut kaba T. 150 klur na ka NDMF.

Ban pynurlong ia ka thong jong u Myntri Rangbah duh Narendra Modi na ka bynta ka India kaba iaineh na ki jinglynshop ka mariang, ka Tnad Kam Pohiing hapoh ka jingkhmih jong u Myntri Kam Pohiing, Amit Shah ka la shim bun ki sienjam ban pynthikna ka jingpyniaid kam kaba seisoh haba don ki jinglynshop ka mariang ha ka ri. La shim bun ki sienjam ban iada na kano kano ka jingduh ki mynsiem briew bad ki jingdon jingem ha ki jingjia lynshop ki bor ka mariang da kaba pynkhlain ia ka lad ban pynduna ki jingma na ki jinglynshop ka mariang ha India.

Hapoh ka jingialam jong u Myntri rangbah duh Narendra Modi bad ka jingkhmih jong u Myntri Kam Pohiing Amit Shah ladep pyllait palat T. 21,476 klur sha ki jylla ha une u snem. Kane ka kynthup T. 14,878.40 klur na ka State Disaster Response Fund (SDRF) sha 26 tylli ki Jylla, T.4,637.66 klur na ka National Disaster Response Fund (NDRF) sha 15 tylli ki Jylla, T.1,385.45 klur na ka State Disaster Mitigation Fund (SDMF) sha 11 tylli ki Jylla bad T.574.93 klur na ka National Disaster Mitigation Fund (NDMF) sha 06 tylli ki Jylla.

*****